លោក ទៀ បាញ់៖ កម្ពុជា​នៅតែជា «ម្ចាស់» នៃ​មូលដ្ឋាន​កងទ័ពជើងទឹក​រាម​​ជាដរាប

ដោយ មាន ឫទ្ធិ
2022.06.12
Share on WhatsApp
Share on WhatsApp
លោក ទៀ បាញ់៖ កម្ពុជា​នៅតែជា «ម្ចាស់» នៃ​មូលដ្ឋាន​កងទ័ពជើងទឹក​រាម​​ជាដរាប លោក ទៀ បាញ់ ថ្លែង​នៅឯ​កិច្ចប្រជុំកំពូល​សន្តិសុខ​អាស៊ី ឬហៅថា កិច្ចសន្ទនា​សាំងហ្គ្រីឡា (Shangri-La Dialogue) លើកទី១៩ ​ដែល​បាន​ប្រព្រឹត្តទៅ​នៅ​ប្រទេសសិង្ហបុរី ចាប់ពី​ថ្ងៃទី១០ ដល់ថ្ងៃទី១២ ខែមិថុនា ឆ្នាំ២០២២។
រូប៖ SPS page

ប្រមុខ​ការពារជាតិ​កម្ពុជាលោក ទៀ បាញ់ ថ្លែងការពារ​ជំហរ​ដ៏ចម្រូងចម្រាស់​របស់​កម្ពុជា​ជុំវិញ​ការអនុញ្ញាត​ឱ្យ​មិត្តដែកថែប​ចិន​អភិវឌ្ឍន៍​កំពង់ផែ​រាម​ថា កម្ពុជា​នៅតែជា «ម្ចាស់» នៃ​មូលដ្ឋាន​កងទ័ព​ជើងទឹក​រាម​ជាដរាប។ លោក​សង្កត់ធ្ងន់ថា ការអភិវឌ្ឍន៍​មូលដ្ឋាន​កំពង់ផែ​កងទ័ព​ជើងទឹក​រាមនេះ មិនមែន​ជា​ការគំរាមកំហែង​ដល់​សន្តិសុខ​របស់​ប្រទេស ឬ​តំបន់ណាមួយ ទោះជិត ឬឆ្ងាយ​ក្តី។ លោកថា កម្ពុជា​ចាត់ទុក​ការចោទប្រកាន់​សព្វបែបយ៉ាង គឺជា​លេស​ដើម្បី​បំផ្លាញ​ផលប្រយោជន៍​របស់​កម្ពុជា។

លោក ទៀ បាញ់ ថ្លែង​យ៉ាងដូច្នេះ​នៅឯ​កិច្ចប្រជុំកំពូល​សន្តិសុខ​អាស៊ី ឬហៅថា កិច្ចសន្ទនា​សាំងហ្គ្រីឡា (Shangri-La Dialogue) លើកទី១៩ ​ដែល​បាន​ប្រព្រឹត្តទៅ​ចាប់ពី​ថ្ងៃទី១០ ដល់ថ្ងៃទី១២ ខែមិថុនា នៅ​ប្រទេសសិង្ហបុរី។ កិច្ចប្រជុំកំពូល​នេះ​​រៀបចំ​ឡើង​ដោយ​វិទ្យាស្ថាន​អន្តរជាតិ​សម្រាប់​សិក្សា​យុទ្ធសាស្ត្រ (IISS) របស់​ចក្រភព​អង់គ្លេស ដោយមាន​ការចូលរួម​ពី​គណៈប្រតិភូ​ជិត ៦០០នាក់ មកពី​ប្រទេស​ចំនួន ៤០ ជាអ្នកកាទូត មន្ត្រីការពារជាតិ និងក្រុមហ៊ុនផលិត​អាវុធ ក្នុងនោះ​ក៏រួមមាន​រដ្ឋមន្ត្រី​ការពារជាតិ​អាមេរិក និង​ចិន​ចូលរួម​ផងដែរ។

លោក ទៀ បាញ់ ថ្លែង​ថា ការធ្វើ​ទំនើបកម្ម​ផ្នែកយោធា និង​ការកសាង​សមត្ថភាព​ក្នុង​វិស័យការពារ​ជាតិ គឺជា​កាតព្វកិច្ច​សម្រាប់​ប្រទេសជាតិ​នីមួយៗ។ លោកគូសបញ្ជាក់​ថា កម្ពុជា​ជា​រដ្ឋ​មួយ​ដែល​មានឯករាជ្យ អធិបតេយ្យ និង​សិទ្ធិពេញលេញ ក្នុងការ​ចាត់ចែង​វាសនា​ប្រទេសជាតិ​របស់​ខ្លួន។ លោកបន្ត​អះអាង​ថា ផ្អែកតាម​ច្បាប់​រដ្ឋធម្មនុញ្ញ​កម្ពុជា​មិន​អនុញ្ញាត​ឱ្យមាន​មូលដ្ឋាន​យោធា​បរទេស​នៅលើ​ទឹកដី​របស់​ខ្លួនឡើយ ហើយ​ក៏​មិនអនុញ្ញាត​ឱ្យ​មាន​មូលដ្ឋាន​យោធា​របស់​ខ្លួន​នៅ​បរទេសដែរ លើកលែង​តែក្នុង​ក្របខណ្ឌ​នៃ​សំណូមពរ​របស់​អង្គការ​សហប្រជាជាតិ។

នេះគឺជា​លើកទីមួយ​ដែល​លោក ទៀ បាញ់ ថ្លែងការពារ​ជំហរ​របស់​កម្ពុជា​ជុំវិញ​ការអនុញ្ញាត​ឱ្យ​ចិន​ធ្វើទំនើបកម្ម​កំពង់ផែ​កងទ័ពជើងទឹករាម នៅលើ​ឆាកអន្តរជាតិ​នៅឯ​កិច្ចប្រជុំកំពូល​ដែល​មាន​ការចូលរួម​ពី​មន្ត្រីយោធា​ជាន់ខ្ពស់​ពី​ប្រទេស​ពាក់ព័ន្ធ​នៅ​ក្នុង​តំបន់​និង​នៅលើ​សាកលលោក។ 

នៅឯ​កិច្ចប្រជុំកំពូល​នោះ លោក ទៀ បាញ់ ក៏បាន​មាន​ជំនួប​ពិភាក្សាការងារ​ដាច់ដោយឡែក​ជា​លក្ខណៈ​ទ្វេភាគី​ជាមួយ​រដ្ឋមន្ត្រី​ការពារជាតិ​របស់​ប្រទេសពាក់ព័ន្ធ​មួយចំនួន ដូចជា ហ្វីលីពីន (the Philippines)​ សិង្ហបុរី​ (Singapore) ចិន (China) និង​អូស្ត្រាលី (Australia)។ ក៏ប៉ុន្តែ លោក​ពុំបាន​ជួប​ទ្វេភាគី​ជាមួយ​រដ្ឋមន្ត្រី​ការពារជាតិ​អាមេរិក លោក ឡូយ អូស្ទីន (Lloyd Austin) ឡើយ។ លោក ទៀ បាញ់ បាន​សរសេរ​នៅលើ​ទំព័រ​ហ្វេសប៊ុក​របស់​លោក​កាលពី​ថ្ងៃទី១១ ខែមិថុនា ថា លោក​បានជួបពិភាក្សា​ជាមួយ​រដ្ឋមន្ត្រី​ការពារជាតិ​របស់​ប្រទេសចិន ដើម្បី​ពង្រឹង​កិច្ចសហប្រតិបត្តិការ​ភាពជាដៃគូ​យុទ្ធសាស្ត្រ​គ្រប់ជ្រុងជ្រោយ​ឱ្យ​កាន់តែ​ប្រសើរថែមទៀត។ លោក​ពុំបាន​បញ្ជាក់​លម្អិត​ពី​លទ្ធផល​នៃ​ជំនួប​នោះទេ និង​ថាតើ​មាន​ការជជែក​ជាមួយ​ប្រមុខ​ការពារជាតិ​ចិន​ពីបញ្ហា​ចម្រូងចម្រាស​ជំុវិញរឿង​ដែល​សហរដ្ឋអាមេរិក​នៅតែ​បន្ត​សង្ស័យ និង​ចោទប្រកាន់​ថា​កម្ពុជា​អនុញ្ញាត​ឱ្យ​ចិន​ដាក់មូលដ្ឋានទ័ព​ជាសម្ងាត់ និង​គ្រប់គ្រង​កំពង់ផែ​រាម​ផ្តាច់មុខ​នោះទេ។

នៅប៉ុន្មាន​ថ្ងៃ​មុនពេល​ចូលរួម​កិច្ចប្រជុំកំពូល​សន្តិសុខ​អាស៊ី​ប្រចាំឆ្នាំ លើកទី១៩ ដែលបាន​ខកខាន​ចាប់តាំងពី​ឆ្នាំ២០១៩​មក​ដោយសារ​វិបត្តិ​ជំងឺរាតត្បាត​សាកល​កូវីដ១៩ លោក ទៀ បាញ់ និង​ឯកអគ្គរដ្ឋទូត​ចិន​ប្រចាំ​កម្ពុជា បាន​បើកការដ្ឋាន​សាងសង់​ធ្វើ​ទំនើបកម្ម​កំពង់ផែ​កងទ័ព​ជើងទឹករាម ដែល​ជាជំនួយ​ឥតសំណង​របស់​ចិន។ សារព័ត៌មាន​ល្បីឈ្មោះ​របស់​អាមេរិក ឌឹ វ៉ាស៊ីនតោន ប៉ុស្តិ៍ (The Washington Post)​ បាន​ចុះផ្សាយ​ដោយ​ស្រង់ប្រសាសន៍​មន្ត្រី​លោកខាងលិច​ដោយមិន​បញ្ចេញឈ្មោះ​ថា ចិន​កំពុង​លួចសាងសង់​មូលដ្ឋាន​កងទ័ព​ជើងទឹក​ដោយ​សម្ងាត់​នៅកម្ពុជា​សម្រាប់​បម្រើ​ឱ្យ​វិស័យយោធា​ផ្តាច់មុខ ដែល​ការណ៍​នេះ​នឹង​អាច​ធ្វើឱ្យ​កម្ពុជា​ក្លាយជា​មូលដ្ឋាន​កងទ័ព​របស់​ចិនទីមួយ​នៅក្នុង​តំបន់​យុទ្ធសាស្ត្រ​ឥណ្ឌូប៉ាស៊ីហ្វិក និង​ជាមូលដ្ឋាន​កងទ័ព​ទីពីរ​របស់​ចិន​នៅលើ​ពិភពលោក។

កាសែត​អាមេរិក​ដដែល​ក៏បាន​ស្រង់ប្រសាសន៍​​មន្ត្រី​រដ្ឋាភិបាល​ក្រុងប៉េកាំង​ដែល​បាន​ទទួលស្គាល់ និង​បញ្ជាក់ថា ផ្នែកមួយ​នៃ​មូលដ្ឋាន​កងទ័ពជើងទឹករាម​នេះ នឹងត្រូវបាន​ប្រើប្រាស់​ដោយ​កងទ័ព​ចិន។ មន្ត្រីចិន​រូបនោះ​ក៏បាន​ទម្លាយ​ឱ្យដឹងដែរ​ថា ចិនមាន​គម្រោង​សាងសង់​ស្ថានីយ​បំពាក់​បច្ចេកវិទ្យា​ប្រព័ន្ធផ្កាយរណប​កំណត់ទីតាំង ឈ្មោះ បៃឌូ (BeiDou Navigation Satellite System) ដើម្បី​ជួយ​សម្រួល​ដល់​ការចល័យទីតាំងទ័ព និង​ការបញ្ជា​គោលដៅ​បាញ់​កាំជ្រួច​របស់​កងទ័ពចិន។ ក៏ប៉ុន្តែ ព័ត៌មាន​នេះ ត្រូវបាន​ភាគីកម្ពុជា និង​ចិន​ច្រានចោល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Jean Francois
Jul 07, 2022 06:44 AM

លោក ទៀ បាញ់ ​ថាត្រូវ កម្ពុជា​នៅតែជា «ម្ចាស់» នៃ​មូលដ្ឋាន​កងទ័ព​ជើងទឹក​រាម​ជាដរាប ក៏ប៉ុន្តែសព្វបែបយ៉ាងគឺ​ភាគីចិនគ្រប់គ្រង ត្រូវសម្រេចដោយភាគីចិន