អាជ្ញាធរបានចាប់ឃាត់ខ្លួនមន្ត្រីបក្សប្រឆាំងចំនួន ៣នាក់កាលពីថ្ងៃ៩ មេសា។ សមត្ថកិច្ចបានចាប់ខ្លួនអតីតមន្រ្តី និងសកម្មជនគណបក្សភ្លើងទៀន និងជាបេក្ខជនក្រុមប្រឹក្សារបស់គណបក្សឆន្ទៈខ្មែរបីនាក់បន្ថែមទៀតនៅថ្ងៃទី៩ខែមេសា។ អាជ្ញាធរបានចោទប្រកាន់ពួកគេថា ក្លែងបន្លំឯកសាររៀបចំបញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាកាលពីពេលថ្មីៗនេះ ខណៈសមាជិកបក្សនេះមួយចំនួនទៀតកំពុងរត់គេចខ្លួន។
ប្រធានចលនាស្រ្តីគណបក្សភ្លើងទៀនខេត្តកំពង់ចាមអ្នកស្រី លី គឹមហៀង ប្រាប់វិទ្យុអាស៊ីសេរីថា កាលពីយប់មិញថា សមត្ថកិច្ចបានចាប់ខ្លួនអតីតប្រធានគណៈកម្មាធិការប្រតិបត្តិគណបក្សភ្លើងទៀនខេត្តកំពង់ចាម និងជាបេក្ខជនក្រុមប្រឹក្សាខេត្តលេខរៀងទី៥ របស់គណបក្សឆន្ទៈខ្មែរ គឺលោក សាន សឿង នៅរាជធានីភ្នំពេញ កាលថ្ងៃ៩ មេសា។ អ្នកស្រីបន្ថែមថា ចំណែកបេក្ខជនក្រុមប្រឹក្សាស្រុកស្ទឹងត្រង់ពេញសិទ្ធិរបស់បក្សឆន្ទៈពីរនាក់ទៀតគឺលោក យិន ភាន និងលោក ស្រ៊ី មាន ត្រូវបានសមត្ថកិច្ចឃាត់ខ្លួននៅសាលាស្រុកនៅពេលពួកគេទៅបំភ្លឺរឿងស្លាមមេដៃបេក្ខជនឈរឈ្មោះបំម្រុងម្នាក់ដែលប្រពន្ធផ្តិតមេដៃជំនួស។ អ្នកស្រីឱ្យដឹងថា បច្ចុប្បន្នសមត្ថកិច្ចកំពុងសាកសួរពួកគាត់នៅស្នងការដ្ឋានគរបាលខេត្តកំពង់ចាម។ យ៉ាងណាអ្នកស្រី លី គឹមហៀង ស្នើដល់អាជ្ញាធរដោះលែងសមាជិកបក្សជំទាស់ទាំងនោះត្រឡប់មកវិញ ពីព្រោះពួកគេគ្មានចេតនាក្លែងឯកសារនោះទេ។
អ្នកស្រី លី គឹមហៀង៖ «សូមឱ្យអាជ្ញាធរដោះលែងពួកគាត់ឱ្យមានសេរីភាពវិញមក សូមកុំចោទប្រកាន់ពួកគាត់ ពីព្រោះវាប៉ះពាល់ដល់ការបោះឆ្នោតក្រុមប្រឹក្សាស្រុក ក្រុង និងខេត្តផងដែរ ហើយខ្ញុំគិតថាពួកគាត់អត់មានចេតនាអ្វីធ្វើឱ្យមានរឿងរ៉ាវអ៊ីចឹងទេ គាត់តស៊ូ ចូលរួមប្រកួតប្រជែងដោយភាពត្រឹមត្រូវ គឺគាត់មិនចង់បានអ្វីលើសហ្នឹងទេ ពួកគាត់ទាំងនោះសុទ្ធតែធ្វើអ្វីសមស្របតាមច្បាប់ផង សមស្របនឹងអ្វីជាក់ស្តែងដោយរឿងបន្លំឯកសារអ្វីនោះគឺពួកគាត់អត់ចង់ទេ ពីព្រោះមានមេរៀនជាច្រើនមកហើយកន្លងមកថ្នាក់ដឹកនាំយើងជាច្រើនជាប់ទោសដោយសាររឿងធ្វើឯកសារហ្នឹង»។
វិទ្យុអាស៊ីសេរីមិនអាចទាក់ទងស្នងការនគរបាលខេត្តកំពង់ចាមលោក ហេង វុទ្ធី ដើម្បីសាកសួរជុំវិញរឿងនេះបានទេ នៅយប់ថ្ងៃទី៩ ខែមេសា។
អាជ្ញាធរក្រុងភ្នំពេញបានចាប់ខ្លួនសកម្មជន និងមន្ត្រីបក្សប្រឆាំង នៅអំឡុងពេលបោះឆ្នោតព្រឹទ្ធសភា និងមុនការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាស្រុក ក្រុង ខណ្ឌ។ ការចាប់ខ្លួនជាបន្តបន្ទាប់នេះបានធ្វើឱ្យចំនួនសកម្មជនបរិស្ថាន និងមន្ត្រីបក្សប្រឆាំងកើនឡើងដល់ជាង ៧០នាក់ហើយ។
ចំណែកក្រុមអង្គការជាតិ អន្តរជាតិ រួមទាំងក្រុមប្រទេសប្រជាធិបតេយ្យធំៗ តែងតែថ្កោលទោសជាបន្តបន្ទាប់ថា ការចាប់ឃុំខ្លួនទាំងនេះ គឺជារឿងនយោបាយ ពោលគឺរដ្ឋាភិបាលរបស់បក្សកាន់អំណាចតែងតែយកប្រព័ន្ធតុលាការធ្វើជាអាវុធដើម្បីគំរាមកំហែង និងបង្ក្រាបលើសំឡេងប្រឆាំង ហើយទាមទារឲ្យដោះលែង ពួកគេវិញជាបន្ទាន់ និងឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។