គណបក្សបេះដូងជាតិថាក្រសួងមហាផ្ទៃនៅតែមិនព្រមឲ្យចុះបញ្ជីទោះខ្លួនកែសម្រួលឯកសារច្រើនលើកច្រើនសារមកហើយក្តី។ នៅក្នុងសេចក្តីថ្លែងការណ៍ កាលពីថ្ងៃទី ១ ខែវិច្ឆិកា គណបក្សនេះថាក្រសួងមហាផ្ទៃមានភាពយឺតយ៉ាវចំពោះការស្នើសុំចុះបញ្ជីគណបក្សបេះដូងជាតិទោះខ្លួនបានកែសម្រួលឯកសារចំនួនបីលើកទៅហើយទៅតាមសំណើរបស់ក្រសួងមហាផ្ទៃ។
គណបក្សនេះបន្ថែមថាការកែសម្រួលនិងបំពេញបែបបទឡើងវិញចុងក្រោយគឺធ្វើនៅថ្ងៃទី១៧ ខែកញ្ញា ដែលគិតមកដល់ពេលនេះមានរយៈពេលជាង ៤០ ថ្ងៃមកហើយ។
បើតាមច្បាប់ស្តីពីវិសោធនកម្មច្បាប់ស្តីពីគណបក្សនយោបាយ មាត្រា ២២ ចែងថា ក្រសួងមហាផ្ទៃត្រូវពិនិត្យខ្លឹមសារនៃសំណុំឯកសាររបស់គណបក្សនយោបាយបន្ទាប់ពីថ្ងៃចេញបង្កាន់ដៃទទួលពាក្យសុំចុះបញ្ជីគណបក្ស។ក្នុងរយៈពេលយ៉ាងយូរ ៣០ ថ្ងៃ ក្រសួងមហាផ្ទៃត្រូវសម្រេចយល់ព្រមឬមិនព្រមឲ្យចុះបញ្ជីគណបក្ស។
ក្រសួងមហាផ្ទៃកាលពីថ្ងៃទី២១ ខែមិថុនា ព្រមទទួលពាក្យសុំ និងអនុញ្ញាតឲ្យបង្កើតគណបក្សបេះដូងជាតិ ប៉ុន្តែត្រូវបំពេញលក្ខខណ្ឌចាំបាច់មួយចំនួនជាមុនសិន។ លក្ខខណ្ឌចាំបាច់ដែលក្រសួងមហាផ្ទៃតម្រូវឲ្យគណបក្សនេះបំពេញ និងកែសម្រួលខ្លឹមសារជាបន្តបន្ទាប់គឺពាក់ព័ន្ធនឹងលក្ខន្តិកៈរបស់គណបក្សនេះ។
ប៉ុន្តែគណបក្សបេះដូងជាតិ អះអាងថា ទោះខ្លួនបានកែតម្រូវនូវចំណុចខ្វះខាតនៃលក្ខន្តិកៈរបស់គណបក្សនេះឲ្យស្របតាមខ្លឹមសារនៃច្បាប់ស្តីពីគណបក្សនយោបាយតាំងពីថ្ងៃទី១៧ ខែ កញ្ញា នោះក៏ដោយក៏ក្រសួងមហាផ្ទៃ នៅតែមិនទាន់ឆ្លើយតប។
គណបក្សបេះដូងជាតិថាខ្លួនសោកស្តាយយ៉ាងខ្លាំងចំពោះភាពយឺតយ៉ាវរបស់ក្រសួងមហាផ្ទៃក្នុងការពិនិត្យ និងសម្រេចក្នុងរឿងនេះ។
វិទ្យុអាស៊ីសេរី មិនទាន់អាចសុំការបំភ្លឺពីអ្នកនាំពាក្យក្រសួងមហាផ្ទៃលោក ខៀវ សុភ័គបានទេកាលពីថ្ងៃទី១ ខែវិច្ឆិកា។ ប៉ុន្តែលោក ខៀវ សុភ័គ ប្រាប់សារព័ត៌មានក្នុងស្រុក ថាការមិនទាន់ឆ្លើយតបនេះគឺដោយសារក្រុមការងារមិនទាន់ត្រួតពិនិត្យឯកសារនានារបស់គណបក្សបេះដូងជាតិចប់សព្វគ្រប់នៅឡើយ។ លោកបន្ថែមថា ក្រុមការងារក្រសួងមហាផ្ទៃកំពុងតែផ្ទៀងផ្ទាត់ស្នាមមេដៃដែលគណបក្សនេះបញ្ជូនទៅក្រសួង។ ទោះជាយ៉ាងនេះក្ដីលោកអះអាងថាក្រសួងនឹងឆ្លើយតបទៅគណបក្សបេះដូងជាតិភ្លាមពេលរួចរាល់។ សារនេះលោកនិយាយកាលពីថ្ងៃទី២០ ខែ តុលា។ ១០ ថ្ងៃក្រោយមក គឺកាលពីថ្ងៃទី១ ខែវិច្ឆិកា លោកប្រាប់ប្រព័ន្ធផ្សព្វផ្សាយក្នុងស្រុកដដែលថាក្រុមការងារជំនាញរបស់ក្រសួងមហាផ្ទៃ កំពុងតែពិនិត្យលើបញ្ហានេះហើយ។
វិទ្យុអាស៊ីសេរី មិនទាន់អាចសុំការបំភ្លឺបន្ថែមពីប្រធានគណបក្សបេះដូងជាតិគឺលោក សៀម ភ្លុក បានទេ កាលពីថ្ងៃទី១ ខែវិច្ឆិកា។ ប៉ុន្តែនៅក្នុងសេចក្តីថ្លែងការណ៍ គណបក្សនេះ អំពាវនាវ និងរម្លឹកក្រសួងមហាផ្ទៃ ឲ្យពិនិត្យ និងសម្រេចរឿងនេះឲ្យបានឆាប់តាមដែលអាចធ្វើទៅបានដើម្បីឲ្យស្របតាមនីតិវិធីនៃច្បាប់ស្តីពីគណបក្សនយោបាយដែលកំណត់មិនឲ្យលើសពី៣០ថ្ងៃនោះផងទោះពេលនេះ ក្រសួងមហាផ្ទៃ បានយឺតយ៉ាវជាង១០ថ្ងៃទៅហើយក្នុងការពិនិត្យនិងសម្រេចលើបញ្ហានេះ។
គណបក្សបេះដូងជាតិ ដែលអះអាងថា បង្កើតឡើងដោយអ្នកស្នេហាជាតិនិងស្រលាញ់ប្រជាធិបតេយ្យពិតប្រាកដទាំងក្នុងនិងក្រៅប្រទេសនេះថាខ្លួនចង់ឆាប់បានធ្វើសកម្មភាពនយោបាយស្របច្បាប់ជាធរមានរបស់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។