កម្ពុជា​​ប្តេជ្ញាចិត្ត​​ពង្រឹង​​បន្ថែម​​យុទ្ធសាស្ត្រ​គំនិត​​ផ្តួចផ្តើម​​ខ្សែក្រវាត់ និង​​ផ្លូវ​​របស់​ចិន​ដើម្បី​​ស្តារ​សេដ្ឋកិច្ច​​ក្រោយ​​វិបត្តិ​កូវីដ១៩​

ដោយ មាន ឫទ្ធិ
2021-04-20
Share
កម្ពុជា​​ប្តេជ្ញាចិត្ត​​ពង្រឹង​​បន្ថែម​​យុទ្ធសាស្ត្រ​គំនិត​​ផ្តួចផ្តើម​​ខ្សែក្រវាត់ និង​​ផ្លូវ​​របស់​ចិន​ដើម្បី​​ស្តារ​សេដ្ឋកិច្ច​​ក្រោយ​​វិបត្តិ​កូវីដ១៩​ (ឆ្វេង) លោកនាយករដ្ឋមន្ត្រី ហ៊ុន សែន ចាប់ដៃជាមួយប្រធានាធិបតីចិនលោក ស៊ី ជិនពីង។
រូប៖ ហ្វេសប៊ុក SPM

ការប្តេជ្ញាចិត្ត​ពង្រឹង​បន្ថែម​យុទ្ធសាស្ត្រ​របស់​ចិន​នេះ ត្រូវ​លោក​នាយករដ្ឋមន្ត្រី ហ៊ុន សែន បង្ហាញ​ក្នុងពេល​បើក​វេទិកា​បូអាវ​សម្រាប់​អាស៊ី​ (BOAO FORUM FOR ASIA) ស្តីពី​ការលើក​កម្ពស់​កិច្ចសហប្រតិបត្តិការ​ខ្សែក្រវាត់ និង​ផ្លូវ របស់​ចិន តាម​ប្រព័ន្ធ​វីដេអូ ​កាលពី​ថ្ងៃទី២០ ខែមេសា។ 

ក្រៅពី​ថ្លែង​សរសើរ​ចិន​ថា បាន​យក​ចិត្ត​ទុក​ដាក់​ខ្ពស់​ និង​ឈាន​មុខគេ​ក្នុង​ការផ្តល់​ថ្នាំពេទ្យ គ្រឿង​បរិក្ខារ​វេជ្ជសាស្ត្រ និង​វ៉ាក់សាំង​ការពារ​ជំងឺ​កូវីដ១៩ ដែល​លោក​ថា បង្ហាញ​ពី​ភាពដឹកនាំ​សាកល​របស់​ប្រទេស​ចិន លោក ហ៊ុន សែន ប្តេជា្ញ​ចិត្ត​ចូលរួម​​ពង្រឹង​យុទ្ធសាស្ត្រ​របស់​ចិន​នេះ​បន្ថែម​ទៀត៖ «ខ្ញុំ​មាន​ចក្ខុវិស័យ​អំពី​ការពង្រឹង​បន្ថែមទៀត​នូវ​គំនិត​ផ្តួចផ្តើម​ខ្សែក្រវាត់ និង​ផ្លូវ​ដែល​មាន​សមត្ថភាព​ក្នុង​ការនាំ​មក​នូវ​សាមគ្គីភាព​ក្នុង​ចំណោម​ប្រទេស​ទាំងអស់​ដើម្បី​ចូលរួម​ចំណែក​ដល់​ដំណើរការ​ស្តារឡើងវិញ។ សន្ទុះ​វិជ្ជមាន​ដែល​សម្រេច​បាន​ក្រោម​គំនិតផ្តួចផ្តើម​ខ្សែក្រវាត់ និង​ផ្លូវ​ចាប់​តាំង​ពី​ការបង្កើត​មក បាន​រួមចំណែក​ដល់​ការជំរុញ​កិច្ចសហប្រតិបត្តិការ​ក្នុង​តំបន់ និង​ពិភពលោក លើ​ហេដ្ឋារចនាសម្ព័ន្ធ​រឹង និង​ទន់ សេដ្ឋកិច្ច ពាណិជ្ជកម្ម កាលានុវត្តភាព​វិនិយោគ ការផ្លាស់ប្តូរ​វប្បធម៌ និង​ការតភ្ជាប់​រវាង​ប្រជាជន​និង​ប្រជាជន»

លោក ហ៊ុន សែន បន្ត​លើក​សរសើរ​គម្រោង​យុទ្ធសាស្ត្រ​របស់​ចិន​នេះ​ថា បើ​ទោះបី​ជា​ពេលនេះ​​មាន​ការធ្លាក់ចុះ​សេដ្ឋកិច្ច​ក៏ដោយ ក៏​យុទ្ធសាស្ត្រ​នេះ​នៅ​តែ​ជា​កម្លាំង​ជំរុញ​ដើម្បី​បន្ត​ពង្រីក​កិច្ចសហប្រតិបត្តិការ​ក្នុង​ចំណោម​ប្រទេស​ក្នុង​តំបន់​ និង​ពិភពលោក​សម្រាប់​បុព្វេហតុ​សន្តិភាព សន្តិសុខ វិបុលភាព និង​ការអភិវឌ្ឍ​ប្រកប​ដោយ​ចីរភាព​នោះដែរ។

យ៉ាងណា អ្នកជំនាញ​វិទ្យាសាស្ត្រ​នយោបាយ និង​កិច្ចការ​អន្តរជាតិ លោក ឯម សុវណ្ណារ៉ា មើលឃើញ​ថា ការប្តេជ្ញា​ចិត្ត​របស់​កម្ពុជា​បែប​នេះ នឹង​រឹតតែ​ជំរុញ​ឲ្យ​កម្ពុជា​ប្រឈមមុខ​កាន់តែ​ខ្លាំង​ជាមួយ​ក្រុម​ប្រទេស​លោក​ខាងលិច៖ «កាលណា​បើសិន​ជា​កម្ពុជា​ប្តេជ្ញាចិត្ត​ ហើយ​ឈរលើ​ប៉ូល​នយោបាយ​របស់​ចិន កម្ពុជា​អាច​ប្រឈម​នឹង​ភាពប្រឈម​របស់​មហាអំណាច​របស់​យុទ្ធសាស្ត្រ​ឥណ្ឌូប៉ាស៊ីហ្វិក ដែល​មាន​សហរដ្ឋ​អាមេរិក​ជាមេធំ​មួយ ហើយ​អូស្ត្រាលី ជប៉ុន ឥណ្ឌា​ចូលរួម។ ដូច្នេះ កម្ពុជា​នឹង​មាន​ការប្រឈម​លំបាក។ ចំណុច​មួយទៀត​គឺ​យុទ្ធសាស្ត្រ​ឥណ្ឌូប៉ាស៊ីហ្វិក​ ក៏ត្រូវ​បាន​មាន​ការចាប់​អារម្មណ៍​ពី​សហគមន៍​អឺរ៉ុប​ដែល​ដាក់​យុទ្ធសាស្ត្រ​ថ្មី​ចូល​ទៅ​ក្នុង​តំបន់​ដើម្បី​ទាក់ទាញ​ ឬក៏​ការគាំទ្រ​ទៅក្នុង​យុទ្ធសាស្ត្រ​ឥណ្ឌូប៉ាស៊ីហ្វិក​មួយ​បែប​សហគមន៍​អឺរ៉ុប​ក្នុង​តំបន់​អឺរ៉ុប ហើយ​តំបន់​នេះ​ក៏​អាច​ប្រឈម​ទៅនឹង​ចិនដែរ»

លោក ឯម សុវណ្ណារ៉ា ចង់ឃើញរដ្ឋាភិបាល​កម្ពុជា​ដាក់ចេញគោល​នយោបាយ​ការបរទេស​ច្បាស់លាស់ និង​ចេះ​បត់បែន​តាម​សភាពការណ៍​ជាជាង​ដើរតាម​បន្ទាត់​គោលនយោបាយ​របស់​ចិន ដើម្បី​បញ្ចៀស​ការ​ប្រឈម​នឹង​យុទ្ធសាស្ត្រ​ភូមិសាស្ត្រ​នយោបាយ​របស់​ក្រុមប្រទេស​លោក​ខាងលិច៖ «បើ​យើង​និយាយ​ពី​ថវិកា​របស់​អាមេរិក​ចាក់​ចូល​ទៅ​ក្នុង​អង្គការ​សុខភាព​ពិភពលោក ក៏​ច្រើន​ជាង​ចិនដែរ។ អញ្ចឹង ខ្ញុំ​គិតថា អត្ថប្រយោជន៍​ដែល​កម្ពុជា​ទទួល​ពី​ Belt and Road Initiative គឺ​វាតិចតួច​ជាង ឥណ្ឌូប៉ាស៊ីហ្វិក​របស់​អាមេរិក​ទេ។ យន្តការ​នេះ គួរតែ​យើង​ឈរ​លក្ខណៈ​យ៉ាងម៉េច​ឲ្យ​មាន​លំនឹង​រវាង​ប៉ូល​នយោបាយ​សាកលលោក​ មហាអំណាច​មាន​អាមេរិក មាន​ចិន​ជាអាទិ៍ ជាចម្បង​ជាងគេ​ ហើយ​នឹង​អឺរ៉ុប​ដែល​កម្ពុជា​បាន​អត្ថប្រយោជន៍​ពាណិជ្ជកម្ម​ច្រើន សេដ្ឋកិច្ច និង​នយោបាយ​ការបរទេស​ច្រើន»

រីឯ អ្នកជំនាញ​សេដ្ឋកិច្ច​នយោបាយ និង​ជា​អ្នកស្រាវជ្រាវ​នៅ​សាកលវិទ្យាល័យ University College London បណ្ឌិត យង់ សុភា វិញ លោក​មើលឃើញ​ថា ថ្វីត្បិតតែ​គម្រោងវិនិយោគ​​គំនិតផ្តួចផ្តើម​ខ្សែក្រវាត់ និង​ផ្លូវ​របស់​ចិន អាច​ចូលរួម​ជួយ​ស្តារ​សេដ្ឋកិច្ច​​ឡើងវិញ​ក្រោយ​វិបត្តិ​កូវីដ១៩ក៏ដោយ ក៏ប៉ុន្តែ​បើ​ប្រទេស​ដែលទទួលពីចិន​គ្រប់គ្រង​លុយ​មិន​បាន​ល្អ ក៏​អាច​ធ្វើ​ឲ្យ​ប្រទេស​ទាំងនោះ ជាប់​ជំពាក់​បំណុល​ចិន​កាន់តែ​ច្រើនដែរ៖ «ដោយសារ​កូវីដ១៩ ចិន​ខ្លួនឯង​ក៏​ការវិនិយោគ​ទៅក្រៅ​ប្រទេស​មាន​ការធ្លាក់ចុះ​ដែរ ដូច​ជា​នៅ​អាព្រិក​អី​ក៏មាន​ការធ្លាក់ចុះ។​ អញ្ចឹង​ធ្វើឲ្យ​សេដ្ឋកិច្ច​នៅ​ក្នុង​ប្រទេស​ទាំងអស់​ក៏កាន់តែ​ថយ​ចុះ​ទៅដែរ។ អញ្ចឹង​បើ​មាន​ទុន​ច្រើន​ក្នុង​ការវិនិយោគ​ក្រោយវិបត្តិ​កូវីដ១៩ ក៏​វាជា​ឱកាស​ល្អប្រសើរ​ដល់​ប្រទេស​មួយៗ។ បើសិន​ជា​យើង​ប្រើប្រាស់​លុយ​ហ្នុង​បាន​ល្អ វា​អាច​ជួយ​ពង្រឹង​សេដ្ឋកិច្ច​ឲ្យ​ងើប​ឡើងវិញ​បាន។ តែបើ​មិន​ល្អ​ទេ វា​អាច​ធ្វើ​ឲ្យ​សេដ្ឋកិច្ច​ក៏​មាន​បញ្ហា​ ហើយ​បំណុល​ក៏​កាន់តែ​ជំពាក់​កាន់តែ​ច្រើន»

មហាយក្ស​ចិន​បាន​លាតត្រដាង​យុទ្ធសាស្ត្រ​គំនិត​ផ្តួចផ្តើម​ខ្សែក្រវាត់ និង​ផ្លូវ​ជាលើក​ដំបូង​កាលពី​ឆ្នាំ២០១៣ ក្រោម​ហេតុផល​ថា ដើម្បី​ផ្សារភ្ជាប់​ហេដ្ឋារចនា​សម្ព័ន្ធ​សម្រួល​ការផ្លាស់ប្តូរ​ពាណិជ្ជកម្ម​រវាង​ប្រទេស​នៅ​ទ្វីប​អាស៊ី អាហ្វ្រិក និង​អឺរ៉ុប ព្រមទាំង​ប្រទេសផ្សេងៗ​នៅលើ​ពិភពលោក។ ក៏ប៉ុន្តែ គម្រោងការ​របស់​ចិន​ដែល​អ្នកខ្លះ​ហៅថា​ជា «វិថីសូត្រថ្មី» នេះ រង​ការរិះគន់​ថា ជា​មហិច្ឆតា​ប្រចាំ​សតវត្ស​របស់​ចិន​ដើម្បី​ពង្រីក​ឥទ្ធិពល​សេដ្ឋកិច្ច ភូមិសាស្ត្រ​នយោបាយ និង​វប្បធម៌​របស់​ខ្លួន។ ការសិក្សា​ជា​បន្តបន្ទាប់​​របស់​ស្ថាប័ន​ស្រាវជ្រាវ​អន្តរជាតិនានា​បាន​រកឃើញ​ថា យុទ្ធសាស្ត្រ​របស់​ចិន​នេះ អាច​លួច​បង្កប់​មហិច្ឆតា​យោធា ​ធ្វើ​ឲ្យ​ប្រទេស​ម្ចាស់​ផ្ទះ​បាត់​បង់​អធិបតេយ្យ ជាប់ផុង​ក្នុង​អន្ទាក់​បំណុល និង​កើនឡើង​អំពើពុករលួយ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល