ប្រជាពលរដ្ឋខ្មែររស់នៅប្រទេសអូស្ត្រាលី គ្រោងធ្វើបាតុកម្មទ្រង់ទ្រាយធំប្រឆាំងការបោះឆ្នោតនៅកម្ពុជា ដោយសារពួកគាត់មើលឃើញថា ជាការបោះឆ្នោតក្លែងក្លាយរៀបចំដោយក្រុមលោក ហ៊ុន សែន។ បាតុកម្មនេះ នឹងធ្វើនៅថ្ងៃទី១៦ ខែកក្កដា ចាប់ពីម៉ោង ១ ដល់ម៉ោង ៣រសៀល នៅមុខសាលាក្រុងស្ព្រីងវែល (Springvale town hall) ក្នុងទីក្រុងម៉ែលប៊ន (Melbourne) រដ្ឋវ៉ិកតូរីយ៉ា (Victoria)។
ប្រធានប្រតិបត្តិគណបក្សសង្គ្រោះជាតិប្រចាំ រដ្ឋវ៉ិកតូរីយ៉ា លោក អ៊ិន ហេមរ៉ា អំពាវនាវដល់ប្រជាពលរដ្ឋឲ្យចូលរួមបាតុកម្មប្រឆាំងការបោះឆ្នោតក្លែងក្លាយនៅកម្ពុជា នេះឲ្យបានច្រើនដើម្បីជួយសង្គ្រោះប្រទេសកម្ពុជា ឲ្យមានដំណើរការប្រជាធិបតេយ្យ សេរីពហុបក្ស និងការគោរពសិទ្ធិមនុស្ស។ «»
ស្របពេលដែលរបបដឹកនាំរបស់លោក ហ៊ុន សែន ធ្វើយុទ្ធនាការឃោសនាបោះឆ្នោត ដែលសហគមន៍ជាតិនិងអន្តរជាតិទុកថា ជាការបោះឆ្នោតបង្គ្រប់កិច្ចដូចអាណត្តិមុននោះ ប្រជាពលរដ្ឋខ្មែរ ដែលរស់នៅតាមបណ្តាប្រទេសប្រជាធិបតេយ្យមួយចំនួន ចាប់ផ្តើមធ្វើបាតុកម្មប្រឆាំងការបោះឆ្នោតនេះជាបន្តបន្ទាប់។
អ្នកឃ្លាំមើលវាយតម្លៃថា ការធ្វើបាតុកម្មពីសំណាក់ពលរដ្ឋខ្មែរនៅជុំវិញពិភពលោកនេះ នឹងធ្វើឲ្យក្រុមរបស់លោក ហ៊ុន សែន ទទួលរងនូវភាពអាម៉ាស់ ហើយខ្វះភាពស្របច្បាប់ក្នុងការបង្កើតរដ្ឋាភិបាលថ្មី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។