យុវជន និង​អ្នកវិភាគ​រិះគន់​សៀវភៅ "​កូនប្រុស​ច្បង​នាយករដ្ឋមន្ត្រី ដំណើរ​ឆ្ពោះទៅ​បន្តវេន"

ដោយ យ៉ង ចាន់តារា
2022.09.23
Share on WhatsApp
Share on WhatsApp
យុវជន និង​អ្នកវិភាគ​រិះគន់​សៀវភៅ "​កូនប្រុស​ច្បង​នាយករដ្ឋមន្ត្រី ដំណើរ​ឆ្ពោះទៅ​បន្តវេន" កូនប្រុសច្បង​លោកនាយករដ្ឋមន្ត្រី ហ៊ុន សែន គឺ​លោក ហ៊ុន ម៉ាណែត។
RFA

យុវជន និង​អ្នកវិភាគ​ថា សៀវភៅ​“​កូនប្រុស​ច្បង​នាយករដ្ឋមន្ត្រី ដំណើរ​ឆ្ពោះទៅ​បន្តវេន ហ៊ុន ម៉ា​ណែ​ត​” ជា ការ​ផ្សព្វផ្សាយ​ពី​គុណសម្បត្តិ​របស់​លោក មុន​ពេល​ស្នង​តំណែង​ពី​លោក ហ៊ុន សែន​។ ពួកគេ​ថា ការសិក្សា និង​តួនាទី​របស់​លោក ហ៊ុន ម៉ាណែត បាន​មក​ដោយសារ​ឥទ្ធិពល​លោក​នាយក​រដ្ឋមន្ត្រី ហ៊ុន សែន ដែល​ជា​ឪពុក មិនមែន​បាន​មក​ដោយសារ​សមត្ថ​ភាព​របស់​លោក​ឡើយ។

សៀវភៅ ដែល​មាន​ចំណង​ជើង​ថា “​កូនប្រុស​ច្បង​នាយករដ្ឋមន្ត្រី ដំណើរ​ឆ្ពោះទៅ​បន្តវេន ហ៊ុន ម៉ាណែត” ចងក្រង​ដោយ​អនុរដ្ឋលេខាធិការ​ក្រសួង​ព័ត៌មាន លោក ឆាយ សុផល បោះពុម្ភ​ផ្សាយ​លើក​ទី​១ នៅ​ខែ​កក្កដា មាន​កម្រាស់​៣០៥​ទំព័រ ចែកចេញជា ៣​ជំពូក ដែល​ជំ​ពួក​នីមួយៗ រៀបរាប់​ពី ក្រុម​គ្រួសារ និង​ចរិត​លោក ហ៊ុន ម៉ាណែត រម្លឹក​រឿង​អតីតកាល និង​ដំណើរ​ឆ្ពោះទៅ​បន្តវេន។

ក្នុង​ជំពូក​ទី​៣ ស្ដីពី “​ដំណើរ​ឆ្ពោះទៅ​បន្តវេន​” សៀវភៅ​នេះ​រៀបរាប់​ពី​ជីវិត និង​ការសិក្សា​របស់​លោក ហ៊ុន ម៉ាណែត នៅ​សហរដ្ឋអាមេរិក សកម្មភាព​ដោះស្រាយ​បញ្ហា​មួយចំនួន​របស់​លោក ហ៊ុន ម៉ាណែត ដូចជា នៅ​បឹង​ទន្លេសាប បញ្ហា​ជម្ងឺ​កូវីដ១៩ លើកស្ទួយ​វិស័យ​អប់រំ កងទ័ព ការ​ភ្នាល់​ជាមួយ​លោក សម រង្ស៊ី អារម្មណ៍​របស់​លោក ពេល​ក្លាយជា​បេក្ខជន​នាយករដ្ឋមន្ត្រី និង​រៀបរាប់​ពី​តំណែង គ្រឿង​ឥស្សរិយយស ដែល​ទទួល​បាន​ពី​រដ្ឋាភិបាល​ឪពុក​លោក។

យុវជន សកម្មជន​បរិស្ថាន និង​អ្នកវិភាគ​ថា សៀវភៅ​ស្ដីពី​លោក ហ៊ុន ម៉ាណែត នេះ បោះពុម្ព​ឡើង ដើម្បី​ប្រមូល​ការ​គាំទ្រ​ពី​មហាជន ជាពិសេស​យុវជន ឱ្យ​ស្វែងយល់​ពី​ប្រវត្តិ និង​លក្ខណៈ​សម្បត្តិ​របស់​លោក ហ៊ុន ម៉ាណែត មុន​ពេល​លោក​ក្លាយជា​នាយករដ្ឋមន្ត្រី។

យុវជន​រស់នៅ​ខេត្តសៀមរាប លោក ថៃ រិទ្ធិសែន ប្រាប់​វិទ្យុ​អាស៊ីសេរី​ថា លោក​ខកចិត្ត នៅពេល​អាន​សៀវភៅ​នេះ​ចប់ ព្រោះ​សៀវភៅ​នេះ​មិនបាន​បង្ហាញ ពី​ចំណេះដឹង បទពិសោធន៍ ឬ​ដំណើរ​ជីវិត​តស៊ូ​អ្វី​ឡើយ ក្រៅពី​អួត​សរសើរ​លោក ហ៊ុន ម៉ាណែត។ លោក​យល់​ឃើញ​ថា ជីវិត​ការសិក្សា និង​តំណែង​តួនាទី​នៅក្នុង​សង្គម​របស់​លោក ហ៊ុន ម៉ាណែត គឺ​បាន​មក​ដោយសារ​ឥទ្ធិពល​លោកនាយក​រដ្ឋមន្ត្រី ហ៊ុន សែន ដែល​ជា​ឪពុក មិនមែន​បាន​មក​ដោយសារ​សមត្ថភាព​របស់​លោក​ឡើយ។ យុវជន​រូប​នេះ​បន្ត​ថា ក្នុងនាម​ជា​បេក្ខជន​បន្តវេន​តំណែង​កំពូល លោក ហ៊ុន ម៉ាណែត គួរ​សាង​ស្នាដៃ តាមរយៈ​ការ​ដោះស្រាយ​បញ្ហា​រ៉ាំ​រៃ​ក្នុង​សង្គម​វិញ ដើម្បី​ឱ្យ​មហាជន​មាន​ទំនុកចិត្ត៖ «ទាក់ទង​នឹង​ការ​អាន​សៀវភៅ​នេះ ខ្ញុំ​អាន​ហើយ មានតែ​ខាតបង់​ពេលវេលា ខាតបង់​លុយកាក់​ខ្ញុំ​។ មែនទែន​ទៅ ៩​ដុល្លា​៥​កាក់​(៩​ដុល្លា ៥០​សេន) ខ្ញុំ​ធ្វើការ​២​ថ្ងៃ​ទើបបាន​លុយ​ទិញ​សៀវភៅ​ហ្នឹង​។ អ៊ីចឹង​២​ថ្ងៃ​ខ្ញុំ​សុខចិត្ត​ផ្ដាច់​ពី​មាត់​ពី​ក ដើម្បី​ទិញ​សៀវភៅ​ហ្នឹង ហើយ​ខ្ញុំ​គិតថា​សៀវភៅ​ហ្នឹង​វា​ល្អ ប៉ុន្តែ​សរសេរ​មក​អួត​តែ​ពី​ខ្លួនឯង ធ្វើ​បាត់បង់​នូវ​អា​តម្លៃ​សៀវភៅ​ផង​។ ប្រសិនបើ​សរសេរ​តែ​របៀប​ហ្នឹង ខ្ញុំ​មើលទៅ​វា​អត់​មានអី​រីកចម្រើន​ដល់​សង្គមជាតិ បើ​សរសេរ​អួត​តែ​ខ្លួនឯង​អ៊ីចឹង​នោះ»

ស្រដៀង​គ្នា​នេះ​ដែរ ស្ថាបនិក​ចលនា​មាតា​ធម្មជាតិ លោក អាឡិចហាន់ដ្រូ ហ្គាន់សាឡេស ដេវីដសុន (Alejandro Gonzalez-Davidson) ឱ្យដឹង​ថា សៀវភៅ “​កូនប្រុស​ច្បង​នាយករដ្ឋមន្ត្រី ដំណើរ​ឆ្ពោះទៅ​បន្តវេន ហ៊ុន ម៉ាណែត” ដែល​លោក​បាន​អាន​មក​នេះ​ឃើញ​ថា លោក ហ៊ុន ម៉ាណែត កំពុង​ចម្លង​នយោបាយ​បែប​ប្រជាភិថុតិ​ដើម្បី​កុហក​ទៅកាន់​មហាជន ខណៈ​លោក​មិន​ទាន់​មាន​ស្នាដៃ ឬ​គុណសម្បត្តិ​ធំដុំ​ណាមួយ​លើ​ឆាកនយោបាយ ជាពិសេស​ក្នុង​ជួរ​គណបក្ស​ប្រជាជន​កម្ពុជា​របស់​ឪពុក​លោក​នៅឡើយ​ទេ៖ «សៀវភៅ​មួយ​ហ្នឹង គ្រាន់តែ​ជា​សៀវភៅ​មួយទៀត ក្នុងចំណោម​ច្រើន​វិធី​ហ្នឹង ដើម្បី​ពង្វក់​ប្រជាជន បោកប្រាស់​ប្រជាជន​ថា ហ៊ុន ម៉ាណែត ហ្នឹង​ជា​មនុស្ស​ពោរពេញ​ដោយ​សមត្ថភាព ខណៈ​ពេល​ដែល ហ៊ុន ម៉ាណែត ហ្នឹង បទពិសោធន៍​នយោបាយ​ក៏​គ្មាន បទពិសោធន៍​ក្នុង​វិស័យ​យោធា​ក៏​គ្មាន បទពិសោធន៍​ក្នុង​វិស័យ​ឯកជន ឬ​សង្គម​ស៊ីវិល​ក៏​គ្មាន​ដែរ​។ គាត់​គ្រាន់តែ​ត្រូវ​ឪពុក​របស់​គាត់ ដែល​ជា​មនុស្ស​ហិង្សា​និយម​ហ្នឹង ជ្រើសរើស ហ៊ុន ម៉ាណែត ជា​អ្នក​បន្តវេន មិនមែន​ត្រៀម​កាន់អំណាច​ដោយសារ​ប្រជាជន​ជ្រើសរើស​គាត់​ទេ ហើយក៏​មិនមែន​ដោយសារ​គាត់​ឆ្លាត ឬ​មាន​ស្នាដៃ​អ្វី​ឡើយ»

ជុំវិញ​រឿង​នេះ​ដែរ អ្នកវិភាគ​នយោបាយ​លោក គឹម សុខ ថ្លែង​ថា តាម​ការវិភាគ​លើ​មាតិកា សៀវភៅ​នេះ បង្ហាញ​ថា លោក ហ៊ុន ម៉ាណែត កំពុង​ធ្វើ​នយោបាយ​ប្រើ​ផ្លូវ​កាត់ តាមរយៈ​ឥទ្ធិពល​ឪពុក ដែល​ជា​នាយករដ្ឋមន្ត្រី​។ លោក​បន្ត​ថា សៀវភៅ​នេះ​នឹង​ធ្វើ​ឱ្យ​ពលរដ្ឋ​មើលឃើញ​កាន់តែ​ច្បាស់​ថា បេក្ខជន​បន្តវេន​នាយករដ្ឋមន្ត្រី​រូប​នេះ ជា​បុគ្គល​មានតែ​ទ្រឹស្ដី តែ​ខ្វះ​សមត្ថភាព​៖ «ខ្ញុំ​គិតថា​លោក ហ៊ុន ម៉ាណែត ឱ្យ​គេ​និពន្ធ​តែមួយ​ក្បាល​ហ្នឹង​បាន​ហើយ វា​អាច​ទាញ​គាត់​ឱ្យ​ធ្លាក់​តិចតួច​។ ប៉ុន្តែ​បើ ២​ក្បាល ៣​ក្បាល ដល់​១០​ក្បាល​ទៀត គឺ​គេ​ស្គាល់​ថា ហ៊ុន ម៉ាណែត អត់​បាន​ការ​អី​សោះតែ​ម្ដង​។ ពីព្រោះ​គឺជា​របៀប​នៃ​សំណេរ​បែប​បញ្ចើចបញ្ចើ ចរិត​បុគ្គល​ផ្ទាល់ខ្លួន អត់​មាន​លក្ខណសម្បត្តិ​ដែល​បង្ហាញ​អំពី​គុណសម្បត្តិ​ជាតិ​របស់ ហ៊ុន ម៉ា​ណែ​ត សូម្បីតែ​បន្តិច នៅ​ពេល​ដែល ហ៊ុន ម៉ាណែត អត់​មាន​ខ្លួន​ឯង​ផង»

វិទ្យុ​អាស៊ីសេរី​មិនទាន់​អាច​ទាក់ទង​លោក ហ៊ុន ម៉ាណែត និង​អ្នក​និពន្ធ​សៀវភៅ​នេះ គឺ​លោក ឆាយ សុផល ដើម្បី​ឆ្លើយតប​រឿង​នេះ​បាន​នៅ​ឡើយ​ទេ។

ប៉ុន្តែ​លោក ឆាយ សុផល បាន​ប្រាប់​ទូរទស្សន៍​ក្នុងស្រុក​ថា ការ​ចងក្រង​សៀវ​ភោ​នេះ ដើម្បី​បង្ហាញ ពី​សកម្មភាព​សង្គម ប្រវត្តិ​តស៊ូ​សិក្សា​របស់​លោក ហ៊ុន ម៉ាណែត នៅ​ក្រៅ​ប្រទេស និង​កត់ត្រា​ទុក​នូវ​អ្វី​ដែល​លោក ហ៊ុន ម៉ាណែត បាន​និយាយ និង​សន្យា​មុន​ពេល​លោក ឡើង​កាន់​ដំណែង​បន្ត​ពី​ឪពុក​លោក គឺ​លោក ហ៊ុន សែន។ លោក​មិនបាន​បញ្ជាក់​ថា ថវិកា​សរសេរ​សៀវភៅ​នេះ លោក​បាន​មក​ពី​ប្រភព​ណា​នោះ​ទេ៖ «អ៊ីចឹង​សៀវភៅ​នេះ​អាច​ឆ្លុះបញ្ចាំង​បាន​ថា តើ​ការសន្យា​របស់​គាត់ (ហ៊ុន ម៉ាណែត) នៅក្នុង​សង្គម​កន្លង​មក តើ​ដូច​អ្វី​ដែល​គាត់​កំពុងតែ​កាន់​តំណែង បាន​កាន់​តំណែង និង​បន្ត​កាន់​តំណែង»

លោក ឆាយ សុផល ក៏​ធ្លាប់​និពន្ធ និង​បោះ​ពុម្ពផ្សាយ​ស្នាដៃ ដែល​ទាក់ទង​នឹង​លោក ហ៊ុន សែន និង​ប្រពន្ធ​កូន​របស់​លោក​ជាច្រើន​ផ្សេងទៀត​ដែរ មាន​ដូចជា “​ហ៊ុន សែន អំណាច និង​នយោបាយ​ក្នុង​ប្រវត្តិសាស្ត្រ​ខ្មែរ​ជាង​៤០​ឆ្នាំ​” ប៊ុន រ៉ានី ភរិយា​បុរស​ខ្លាំង​” “​បងប្អូន​ទាំង​បី ឈាម​ថ្មី​ក្នុងចំណោម​អ្នក​បន្តវេន​” និង​ស្នាដៃ​មួយ​ចំនួន​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។