ពលរដ្ឋ​រិះគន់​​អភិបាល​​ខេត្ត​បាត់ដំបង ​រឿង​យក​​វេទិកា​​បុណ្យ​​វិសាខបូជា​ឃោសនា​នយោបាយ​

ដោយ ជី វិតា
2022.05.16
Share on WhatsApp
Share on WhatsApp
ពលរដ្ឋ​រិះគន់​​អភិបាល​​ខេត្ត​បាត់ដំបង ​រឿង​យក​​វេទិកា​​បុណ្យ​​វិសាខបូជា​ឃោសនា​នយោបាយ​ លោក សុខ លូ អភិបាល​ខេត្ត​បាត់​ដំបង មាន​ប្រសាសន៍​នៅ​ចំពោះ​មុខ​ប្រជាពលរដ្ឋ​ប្រមាណ​២​ពាន់​នាក់​នៅក្នុង​ពិធី​បុណ្យ​វិសាខបូជានៅ​ក្រុង​បាត់ដំបង​ កាលពីព្រឹកថ្ងៃទី១៥ ខែឧសភា ឆ្នាំ២០២២។
រូប៖ រដ្ឋបាលខេត្តបាត់ដំបង

ប្រជាពលរដ្ឋ​និង​​​សង្គម​​ស៊ីវិល​​រិះគន់ អភិបាល​​ខេត្ត​​បាត់ដំបង​​ថា​ ​យក​​វេទិកា​បុណ្យ​វិសាខបូជា​ ឆ្លៀត​ឱកាស​និយាយ​លើក​សរសើរ​​ពី​គុណ​បំណាច់​របស់​បក្ស​កាន់​អំណាច ដើម្បីកេងចំណេញនយោបាយនៅមុនការបោះឆ្នោតខិតជិតចូលមកដល់។ ពួកគេថា អាជ្ញាធរ​ពុំ​គួរឃោសា​នយោបាយ នៅ​ក្នុង​ពិធី​បុណ្យទាន​​ដូច្នេះ​ទេ។

ពលរដ្ឋនិងមន្ត្រី​សង្គមស៊ីវិលលើកឡើងថា ​អាជ្ញាធរ​គួរតែ​យក​ថ្ងៃ​បុណ្យ​វិសាខបូជា អប់រំ​ដល់​ប្រជាពលរដ្ឋ​​ឱ្យ​ធ្វើអំពើ​ល្អ​ជួយ​ដល់​សង្គមជាតិ​ប្រសើរជាងនិយាយលើកតម្កើង​លោក​នាយក​រដ្ឋមន្ត្រី ហ៊ុន សែន ដើម្បី​កេង​ចំណេញនយោបាយ​នៅមុនការបោះឆ្នោតបែបនេះ។

អតីត​អ្នកទោស​មនសិការដែលកំពុងភៀសខ្លួននៅក្រៅប្រទេស​លោកស្រី​ សាត ផា ​យល់ឃើញ​ថា ប្រជាពលរដ្ឋ​សព្វ​ថ្ងៃ​កំពុងក្រលំបាក និង​មិន​ទាន់​មាន​សន្តិភាព​ពេញ​លេញនោះទេ។ លោក​ស្រីបញ្ជាក់ថា ការ​លើក​ឡើង​​របស់​អភិបាលខេត្តបាត់ដំបងលោក​ សុខ លូ ជារឿង​​មិន​ទាន់​ត្រឹមត្រូវ​ឡើយ។ លោកស្រី​​បន្ថែម​​ថា ​ការ​ដឹក​នាំ​របស់​រាជរដ្ឋាភិបាល​សព្វ​ថ្ងៃ ​គឺ​កាន់តែ​ផ្ដាច់ការ​ទៅ​ៗ​ ដែលធ្វើ​ឲ្យ​ប្រជាពលរដ្ឋ​​ស្ទើរគ្រង់ទីកន្លែង​ជួបតែទឹកភ្នែក ដោយសារអ្នកមានលុយមានអំណាចរំលោភយកដីធ្លី និង​ចាប់​សាច់ញាតិ​របស់​ពួកគាត់​ដាក់ពន្ធនាគារដោយអយុត្តិធម៌៖ «ប្រជាពលរដ្ឋ​យំ​ស្រែក​មាន​ការ​ឈឺ​ចាប់​ដើម្បី​ជាតិ ដើម្បី​រក​លុយ​ទិញ​អង្ករ​ ទិញ​ម្ហូប​អត់​បាន​ផង​។​ តើ​គាត់​​មាន​សន្តិភាព​មក​ពី​កន្លែង​ណា​ទៅខ្ញុំ​គិត​ថា​ គាត់​និយាយ​ គាត់​មាន​មាត់​ចេះ​តែ​និយាយ​ទៅ គាត់​ថា ​ប្រជាពលរដ្ឋ​គាំទ្រ​ពួក​គាត់ តាម​អង្គ​ប្រជុំ​នីមួយៗ​ គាត់​សុទ្ធ​តែ​ជួល​ទេ ប្រជាពលរដ្ឋ​ទៅ​គាំទ្រ​គាត់ គាត់​យក​លុយ​ទៅ​ជះ​ជួល​ប្រជាពលរដ្ឋ​ទៅ​ទេ គឺ​ប្រជាពលរដ្ឋ​ដឹង​ថា ទុក្ខ​លំបាក​ដែល​ប្រទេស​កំពុង​រង​ទុក្ខ​ហើយ​ គឺ​ប្រទេស​យើង​កូ​វីដ​ប្រជាពលរដ្ឋ​ធ្លាក់​ខ្លួន​ក្រ»។

ស្រដៀងគ្នានេះដែរ ​ប្រជាពលរដ្ឋ​ម្នាក់​ទៀតនៅ​ខេត្ត​បាត់ដំបង និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ថា​​ សព្វ​ថ្ងៃ​នេះមាន​តែអ្នក​មានលុយនិងមានអំណាច​ប៉ុណ្ណោះ ដែលរស់នៅមានសុខសន្តិភាព​។ ពលរដ្ឋរួបនេះបន្ត​ថា ​រីឯ​អ្នក​ក្រី​ក្រ​​រស់នៅលំបាកវេទនា និងមានជីវភាព​កាន់តែក្រ៖ «និយាយ​ទៅ​គ្នា​គេ គេ​យល់​ឃើញ​​ថា​ សន្តិភាព​ហ្នឹង​ឯង ហើយ​យើង​អ្នក​អត់​នៅ​តែ​អត់ នៅ​តែ​ខ្វះ​ខាត​ហ្នឹង។ គេ​មាន​ គេ​មាន​ទៅ យើង​​ឯណេះ​ក្រ។ ​ហើយ​ណា​មួយ​ទៀត​ពិបាក​និយាយ យើង​និយាយ​ទៅ​ចេះ​តែ​ខ្លាច។​ ហើយ​ថ្ងៃ​នេះ​អត់​នៅ​ផ្ទះ​ មក​វិញ​ឃើញ​មេឃុំ​គេ​ឲ្យ​បាន​សារុង​ពីរ​ដែរ​ថ្ងៃ​នេះ»

ប្រតិកម្ម​របស់​ប្រជាពលរដ្ឋ​បែបនេះ ធ្វើ​ឡើងក្រោយពេលអភិបាលខេត្ត​បាត់ដំបងលោក សុខ លូ បានមានប្រសាសន៍នៅចំពោះមុខប្រជាពលរដ្ឋប្រមាណ២ពាន់នាក់នៅក្នុងពិធីបុណ្យវិសាខបូជានៅក្រុងបាត់ដំបង​នៅព្រឹកថ្ងៃទី១៥ ខែឧសភាថា​ ក្រោយ​ពី​របប​ខ្មែរ​ក្រហម​បាន​ដួល​រលំ​មក​ ពលរដ្ឋខ្មែរ​អាច​ជួបជុំ​យ៉ាង​កុះករ​ធ្វើពិធីវិសាខបូជាបែបនេះ​បាន គឺ​ដោយ​សារ​សន្តិភាព។ លោក​បន្ត​ថា ដូច្នេះ​ប្រជាពលរដ្ឋ​កុំភ្លេច​ចំពោះ​ថ្នាក់​ដឹក​នាំ​គ្រប់​លំដាប់​ថ្នាក់​ ជា​ពិសេស​លោកនាយករដ្ឋមន្ត្រី ហ៊ុន សែន ដែល​​បាន​ដឹកនាំ​កម្ពុជា​ឱ្យ​មាន​សុខសន្តិភាព​ដូចសព្វ​ថ្ងៃនេះ៖ «នាំ​ឲ្យ​ប្រទេស​ជាតិ​យើង​ខេត្ត​បាត់ដំបង​​មាន​ការ​រីក​ចម្រើន​​មក​ដល់​ថ្ងៃ​នេះ។​ នេះ​យើង​គ្រាន់​តែ​និយាយ​មួយ​ផ្នែក​អំពី​ការ​ដឹក​នាំ​ប្រទេស​ជាតិ​​ពី​សង្គ្រាម​មក​សន្តិភាព ក៏​ដោយសារ​ថ្នាក់​ដឹក​នាំ​គ្រប់​លំដាប់​ថ្នាក់​របស់​យើង ជា​ពិសេស​សម្ដេចតេជោ​ ហ៊ុន សែន។​ ខ្ញុំ​ករុណា​​តែងតែ​ជម្រាប​ជូននៅ​ផ្ទះ​យើង​មាន​ឪពុក​ម្ដាយ​ជា​ព្រះ​រស់​របស់​យើង។ ដែល​សម្រាប់​យើង​ទាំងអស់​គ្នា​គឺ​មាន​សម្ដេច​តេជោ ហ៊ុន សែន ជា​ព្រះ​ធ្វើ​ឲ្យ​យើង​រស់»

ជុំវិញ​រឿងនេះនាយក​​ផ្នែក​ទទួល​បន្ទុក​ទូទៅ​នៃ​អង្គការ​លីកាដូ ​(LICADHO) លោក​ អំ សំអាត យល់ថា​ ​បើទោះ​បីជារដ្ឋាភិបាលសព្វថ្ងៃបានចូលរួម​បញ្ចប់​សង្គ្រាម​ស៊ីវិល​ ចាប់​តាំង​ពី​មាន​កិច្ច​ព្រមព្រៀង​សន្តិភាព​ទីក្រុង​ប៉ារីសថ្ងៃទី២៣ ខែ​តុលា ឆ្នាំ១៩៩១​មក ក៏ដោយ ក៏ការមានសន្តិភាពពិតប្រាកដទៅបាន ទាល់​តែ​ប្រជាពលរដ្ឋ​មាន​យុត្តិធម៌​ពេញលេញ​ដែរ៖ «សង្គម​ដែល​ប្រកាន់​លទ្ធិ​ប្រជាធិបតេយ្យ អញ្ចឹង​សន្តិភាព​ពេញលេញ​​ គឺ​សន្តិភាព​ទាំង​ផ្លូវ​កាយ​ទាំង​ផ្លូវ​ចិត្ត។ អញ្ចឹង​​គឺ​ទាក់ទង​នឹង​ពាក្យ​ថា​ សន្តិភាព​ពេញលេញ​ គឺ​ក្រៅ​តែ​អំពី​សន្តិភាព​ដែល​យើង​បញ្ចប់​សង្គ្រាម​ គឺ​ធ្វើ​ម៉េច​ឲ្យ​មាន​ការ​គោរព​ទៅ​តាម​គោល​ការណ៍​​លទ្ធិ​ប្រជាធិបតេយ្យ​ និង​គោលការណ៍​គោរព​សិទ្ធិ​មនុស្ស។​ បើសិនជា​នៅ​មាន​ការ​រំលោភ​បំពាន​ទាក់ទង​ទៅ​នឹង​បញ្ហា​សិទ្ធិ​មនុស្ស លទ្ធិប្រជាធិបតេយ្យ​មាន​ការ​ដើរ​ថយក្រោយ​ ហើយ​មាន​ការ​រឹតត្បិត​ទៅ​លើ​សេរី​ភាព​ក្នុង​ការ​បញ្ចេញ​មតិ សេរី​ភាព​ជា​មូលដ្ឋាន​ ឬក៏​ភាព​អយុត្តិធម៌​ផ្សេងៗ​កើតឡើង នោះ​មិន​ទាន់​មាន​សន្តិភាព​ទេ»

ថ្ងៃ​បុណ្យ​វិសាខបូជា​គឺ​ជា​ថ្ងៃ​ដែល​ពុទ្ធបរិស័ទ​ខ្មែរ​ និងពលរដ្ឋ​ជាតិសាសន៍ដទៃទៀតក្នុង​សាកលលោក​ ដែលកាន់ព្រះពុទ្ធសាសនា ​ប្រារព្ធ​ធ្វើ​ឡើង​ដើម្បី​រំឭក​ដល់​ថ្ងៃ​ដែល​ព្រះ​សម្មាសម្ពុទ្ធ​បរមគ្រូ​ទ្រង់​ប្រសូតិ ទ្រង់​ត្រាស់​ដឹង និង​ព្រះ​អង្គ​ទ្រង់​យាង​ចូល​កាន់​បរិ​​និព្វាន។ ថ្ងៃ​នេះ​អ្នក​ដែល​កាន់​សាសនា​ព្រះពុទ្ធ​នាំគ្នា​ទៅ​វត្ត​អារាម​ រក្សា​សីល​ ខិតខំ​ធ្វើ​សេចក្ដី​ល្អ វៀរចាក​អំពើ​អាក្រក់​ និង​ព្យាយាម​ដុះ​ខាត់​ជម្រះ​ចិត្ត​ឲ្យ​ស្អាត​ ដើម្បី​សុំ​សេចក្ដី​សុខ​ដល់​ខ្លួន​ ក្រុម​​គ្រួសារ និង​ពិភលោក៕​​​​​​​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។