សកម្មជន​បក្ស​ប្រឆាំង​៨​នាក់​ដែល​បង្ហាញ​ជំហរ​គាំទ្រ​លោក សម រង្ស៊ី ត្រូវ​របប​ភ្នំពេញ​ហៅ​សួរនាំ

ដោយ ហេង រស្មី
2018-12-19
អ៊ីម៉ែល
មតិ
Share
បោះពុម្ព
អតីត​ប្រធាន​ឃុំ​អរិយក្សត្រ​ជាប់ឆ្នោត​ខាង​គណបក្ស​សង្គ្រោះជាតិ តែ​ក្រោយមក​បាន​បាត់បង់​តួនាទី​ដោយសារ​របប​ក្រុងភ្នំពេញ​រំលាយ​គណបក្ស​ប្រឆាំង អ្នកស្រី ទូច សាវុធ។
អតីត​ប្រធាន​ឃុំ​អរិយក្សត្រ​ជាប់ឆ្នោត​ខាង​គណបក្ស​សង្គ្រោះជាតិ តែ​ក្រោយមក​បាន​បាត់បង់​តួនាទី​ដោយសារ​របប​ក្រុងភ្នំពេញ​រំលាយ​គណបក្ស​ប្រឆាំង អ្នកស្រី ទូច សាវុធ។
Screenshot

អាជ្ញាធរ​ខេត្ត​កណ្ដាល​នៃ​របប​ក្រុងភ្នំពេញ បាន​កោះហៅ​សកម្មជន​គណបក្ស​សង្គ្រោះជាតិ ចំនួន ៨​នាក់ មក​សាកសួរ​នៅ​ការិយាល័យ​ប៉ូលិស នៅ​ថ្ងៃ​​ទី​២០ ធ្នូ នេះ ក្រោយ​ពី​សកម្មជន​ទាំង​នោះ​បាន​ជួប​ប្រជុំ​គ្នា ក្នុង​គោលបំណង​បង្ហាញ​ជំហរ​របស់​ខ្លួន តាម​មូលដ្ឋាន​គាំទ្រ​លោក សម រង្ស៊ី ជា​ប្រធាន​ស្តីទី​គណបក្ស​សង្គ្រោះជាតិ។

អតីត​ប្រធាន​ឃុំ​អរិយក្សត្រ​ជាប់ឆ្នោត​ខាង​គណបក្ស​សង្គ្រោះជាតិ តែ​ក្រោយមក​បាន​បាត់បង់​តួនាទី​ដោយសារ​របប​ក្រុងភ្នំពេញ​រំលាយ​គណបក្ស​ប្រឆាំង អ្នកស្រី ទូច សាវុធ បាន​បញ្ជាក់​ប្រាប់​អាស៊ីសេរី​ថា អ្នកស្រី​នឹង​សកម្មជន ៧​នាក់​ផ្សេងទៀត ត្រូវ​ប៉ូលិស​ប៉ុស្តិ៍​ឃុំ​អរិយ​ក្សត្រ ខេត្ត​កណ្ដាល កោះហៅ​តាម​ទូរស័ព្ទ​ដោយ​គ្មាន​លិខិត​អញ្ជើញ​ដើម្បី​ឲ្យ​ចូល​ឆ្លើយ​បំភ្លឺ ទាក់ទិន​នឹង​ការ​ជួប​ប្រជុំ​គ្នា​របស់​សកម្មជន​គណបក្សប្រឆាំង​កាលពី​ព្រឹក​ថ្ងៃ​ពុធ។

អ្នកស្រី​បាន​បញ្ជាក់​ថា អ្នកស្រី​និង​សកម្មជន​ផ្សេងទៀត​បាន​អះអាង​ថា នឹង​ចូលខ្លួន​បំភ្លឺ​តាម​ការ​កោះ​អញ្ជើញ​នេះ​ដោយសារតែ​អ្នកស្រី​គិត​ថា មិន​បាន​ធ្វើ​សកម្មភាព​អ្វី​ដែល​ផ្ទុយ​ពី​គោលការណ៍​លទ្ធិ​ប្រជាធិបតេយ្យ៖ «នេះ​ជា​សិទ្ធិ​សេរីភាព​ក្នុង​ការ​បញ្ចេញមតិ​ប្រសិនបើ​ការ​បញ្ចេញមតិ​របស់ខ្ញុំ​វា ប៉ះពាល់​ដល់​សន្តិសុខ​សង្គម ឬមួយ​មាន​អ្វី​ប៉ះពាល់​ដល់​ការ​ញុះញង់​អាហ្នឹង បាន​ខ្ញុំ​មានការ​ព្រួយ​បារម្ភ។ សម្ដី​របស់ខ្ញុំ​អត់​មាន​អ្វី​ធ្វើ​អោយ​មាន​ហិង្សា ឬ​ប៉ះពាល់​ដល់​សន្តិសុខ​ផង»

កាលពី​ថ្ងៃ​ទី​ពុធ ទី​១៨​ធ្នូ សកម្មជន​គណបក្ស​សង្គ្រោះ​ជាតិ​ចំនួន ៨​នាក់ ដែល​រួមមាន​ប្រធាន​ឃុំ និង​ជំទប់​ឃុំ​ជាប់ឆ្នោត​ខាង​គណបក្សប្រឆាំង​នៅ​ឃុំ​អរិយក្សត្រ បាន​ជួប​ប្រជុំ​គ្នា​មួយ​នៅ​ស្រុក​ល្វាឯម​ខេត្ត​កណ្ដាល ក្នុង​គោលបំណង​ដើម្បី​សំដែង​ការ​គាំទ្រ​របស់​ពួកគេ​ចំពោះ​ថ្នាក់ដឹកនាំ​គឺ​លោក សម រង្ស៊ី។

ការ​ជួប​ប្រជុំ​នេះ​ត្រូវ​បាន​ក្រុម​អាជ្ញាធរ​របប​ក្រុងភ្នំពេញ​បាន​ដឹង​ដំណឹង​នេះ រួចហើយ​បាន​កោះហៅ​ពួកគេ​មក​ឆ្លើយ​បំភ្លឺ​ដោយ​ពុំ​មាន​ឯកសារ​ត្រឹមត្រូវ។

ប្រធាន​ប៉ុស្តិ៍​ប៉ូលិស​ឃុំ​អរិយក្សត្រ លោក អាន ពេញ មិន​អាច​សុំ​ដើម្បី​សេចក្ដី​អត្ថាធិប្បាយ​បំភ្លឺ​បាន​ទាក់ទិន​នឹង​ការ​កោះហៅ​សកម្មជន​ទាំង​នោះ​ទេ។

របប​ក្រុងភ្នំពេញ​មួយ​រយះ​ចុង​ក្រោយនេះ ហាក់បីដូចជា​បន្ទន់​ឥរិយាបថ​ថា នឹង​បើក​លំហ​លទ្ធិ​ប្រជាធិបតេយ្យ​ឡើងវិញ។ ក៏​ប៉ុន្តែ​ការ​ធ្វើទុក្ខបុកម្នេញ​សេរីភាព​ជួប​ប្រជុំ​នៅតែ​បន្ត​កើតមានឡើង​នៅឡើយ។

អនុប្រធាន​គណបក្ស​សង្គ្រោះជាតិ​លោក អេង ឆៃអ៊ាង មានប្រសាសន៍​ថា សេរីភាព​ជួប​ប្រជុំ​នៅ​កម្ពុជា​ត្រូវ​បាន​រឹត​បន្តឹង​ក្រោម​របប​ផ្ដាច់ការ​របស់​លោក ហ៊ុន សែន។ លោក​បាន​ទទូច​អោយ​អង្គការ​សិទ្ធិមនុស្ស​ជួយ​ឃ្លាំមើល និង​ជួយ​ការពារ​សិទ្ធិ​ប្រជាពលរដ្ឋ​ដែល​បាន​គាំទ្រ​គណបក្ស​ប្រឆាំង៖ «នេះ​បង្ហាញ​ឲ្យ​ឃើញ​ថា ប្រទេស​កម្ពុជា​អត់​មាន​លទ្ធិ​ប្រជាធិបតេយ្យ​អត់​មាន​លំហ​សេរីភាព ដូច​អ្វី​ដែល​លោក ហ៊ុន សែន អះអាង​ទេ។ គ្រាន់តែ​សកម្មជន​គណបក្ស​សង្គ្រោះ​ជាតិ គាត់​ជួប​ប្រជុំ​គ្នា ជជែក​គ្នា​ក៏​ត្រូវ​ទទួលរង​នូវ​ការ​គំរាមកំហែង​ការ​យាយី​ពី​អាជ្ញាធរ​មូលដ្ឋាន ពី​ប៉ូលិស​ដែល​ផ្ទុយ​ពី​អ្វី​ដែល​របប​លោក ហ៊ុន សែន បង្អួត​ក្អេងក្អាង​ប្រាប់​មតិ​សាធារណៈ​ជាដើម អាហ្នឹង​វា​ផ្ទុយគ្នា​ទាំងស្រុង​តែម្ដង»

លោក សម រង្ស៊ី ត្រូវ​បាន​តំណាង​សាខា​គណបក្ស​សង្គ្រោះ​ជាតិ​នៅ​ក្រៅ​ប្រទេស​តែងតាំង​ជា​ប្រធាន​ស្តីទី​កាលពីដើម​ន​ខែ​ធ្នូ។

អនុប្រធាន​គណបក្ស​សង្គ្រោះជាតិ​ពីរ​រូប​កាល​ពី​ពេល​ថ្មីៗ​នេះ គឺ​អ្នកស្រី មូរ សុខហួរ និង​លោក អេង ឆៃអ៊ាង បាន​សរសេរ​លិខិត​តាមរយៈ​សារ​អេឡិចត្រូនិក​មួយ​ច្បាប់ ពន្យល់​ទៅ​កាន់​សហគមន៍​អន្តរជាតិ អំពី​មូលហេតុ និង​ដំណើរការ​នៃ​ការប្រកាស​តែងតាំង​លោក សម រង្ស៊ី ឲ្យ​ធ្វើជា​ប្រធាន​ស្តីទី​គណបក្ស​សង្គ្រោះជាតិ​ជា​ផ្លូវការ។

អ្នកវិភាគ​បាន​បង្ហាញ​ពី​មន្ទិលសង្ស័យ​អំពី​ចេតនា​នៃ​របប​លោក ហ៊ុន សែន ដែល​តែងតែ​អះអាង​ថា​ចង់​បើក​លំហ​សេរីភាព​ឡើងវិញ ក៏ប៉ុន្តែ​ការអនុវត្ត​ជាក់ស្ដែង​នៅ​តែ​បង្ហាញ​ការ​រឹតត្បិត​ដដែល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល