សកម្មជនគណបក្សប្រឆាំង ប្រមាណ៣០នាក់នៅស្រុកស្វាយចេក ខេត្តបន្ទាយមានជ័យ នៅព្រឹកថ្ងៃទី២៨ កុម្ភៈ បានប្រមូលផ្ដុំគ្នាពង្រឹងសាមគ្គីភាព ដើម្បីត្រៀមខ្លួនទៅទទួលប្រធានស្ដីទីគណបក្សសង្គ្រោះជាតិលោក សម រង្ស៊ី វិលចូលស្រុកវិញក្នុងពេលឆាប់ៗខាងមុខ ដោយមិនខ្លាចអាជ្ញាធរគំរាមកំហែងចាប់ខ្លួនពួកគាត់។
ប្រធានគណបក្សប្រឆាំងស្រុកស្វាយចេក លោក មិន ហរ ថ្លែងប្រាប់អាស៊ីសេរីឱ្យដឹងនៅរសៀលថ្ងៃទី២៨ កុម្ភៈថា ពួកគាត់បានជួបជុំគ្នានៅផ្ទះសកម្មជនគណបក្សសង្គ្រោះជាតិនៅភូមិរលួស ឃុំរលួស ស្រុកស្វាយចេក ដោយបានរួមសាមគ្គីគ្នាស្មោះស្ម័គ្រជាមួយគណបក្សសង្គ្រោះជាតិដោយឥតងាករេ បើទោះបីជាកន្លងមកមានការគំរាមកំហែងពីអាជ្ញាធរក្នុងមូលដ្ឋានក្ដី ក៏ពួកគាត់នៅតែសាមគ្គីគ្នាស្អិតល្មួតដដែល។ សកម្មជនបក្សរូបនេះបន្ថែមទៀតថា ពួកគាត់ជួបគ្នានេះដើម្បីត្រៀមកម្លាំងទៅទទួលលោក សម រង្ស៊ី ដែលគ្រោងនឹងវិញចូលស្រុកក្នុងពេលឆាប់ខាងមុខនោះ៖ «ខ្ញុំសូមផ្ដាំផ្ញើទៅអ្នកគាំទ្រគណបក្សសង្គ្រោះពីមុនដែលយើងបានធ្លាប់តស៊ូជាយូរយារណាស់មកហើយ ដូចរូបខ្ញុំតស៊ូជិត ២០ឆ្នាំហើយ គឺមិនអាចលក់ឧត្ដមគតិរបស់ខ្លួនក្បត់ម្ចាស់ឆ្នោតបានទេ ហើយនិងផ្ដាំផ្ញើទៅបងប្អូនឱ្យទ្រាំតស៊ូបន្ថែមទៀត ខ្ញុំជឿថា យ៉ាងក្នុងឆ្នាំ២០១៩នេះ យើងមានឱកាសហើយ»។
សកម្មជនបក្សប្រឆាំងម្នាក់ទៀត លោក យ៉ាត ភារម្យ ដែលចូលរួមពង្រឹងសាមគ្គីភាពដែរអះអាងថា ពួកគាត់ជួបគ្នានេះ ក្នុងគោលបំណងដើម្បីសាមគ្គីគ្នាជាធ្លុងមួយរបស់សមាជិកគណបក្សខ្លួននៅក្នុងមូលដ្ឋានផង និងក៏ជាពញ្ញាក់ស្មារតីអ្នកស្នេហាជាតិឱ្យមានភាពក្លាហានឡើងវិញ ដើម្បីរួមកម្លាំងស្ដារប្រជាធិបតេយ្យនៅកម្ពុជាឱ្យរស់ឡើងវិញ។ លោកបន្ថែមថា ពួកលោកចង់ជួបជុំឱ្យបានញឹកញាប់ និងមានទ្រង់ទ្រាយធំជាងនេះដែរ ក៏ប៉ុន្តែមិនអាចធ្វើបានដោយសារស្ថានការណ៍នយោបាយសព្វថ្ងៃមិនអំណោយផល ហើយអាជ្ញាធរតែងរឹតត្បិតសិទ្ធិ សេរីភាពរបស់ពួកគាត់៖ «យើងធ្វើទៅមិនមែនមានអីខុសដែរ ព្រោះកម្ពុជាបានកំណត់ឱ្យពលរដ្ឋអាចជួបជុំគ្នាដែរតើ ដូច្នេះរឿងឈប់គឺយើងមិនឈប់ទេ ធ្វើតទៀតរហូត ព្រោះប្រទេសមានច្បាប់។ ពួកខ្ញុំទៅទទួលលោក សម រង្ស៊ី មានច្បាប់ណាហាមមិនឱ្យពួកយើងទៅផង ព្រោះគាត់ជាខ្មែរមួយរូបដែរ រឿងដែលរដ្ឋាភិបាលចោទគាត់ពួកយើងអត់ដឹងទេ សំខាន់ពួកខ្ញុំដឹងថា គាត់ជាប្រធានបក្សយើងត្រូវទៅទទួលគាត់ជាកាតព្វកិច្ចរបស់ពួកយើង ព្រោះយើងជាអ្នកគាំទ្រគាត់»។
ទាក់ទងនឹងបញ្ហានេះ អធិការនគរបាលស្រុកស្វាយចេក លោក ជា ឈ្លូញ មានប្រសាសន៍ប្រាប់អាស៊ីសេរីថា សកម្មជនបក្សប្រឆាំងជួបជុំគ្នាមិនបានសុំច្បាប់ពីអាជ្ញាធរដែនដីនោះទេ ហើយលោកចាត់ទុកសកម្មភាពនេះថា ជារឿងខុសច្បាប់ ព្រោះគណបក្សប្រឆាំងបានរំលាយអស់ហើយ៖ «បាទ ! ខ្ញុំធ្វើយ៉ាងឱ្យត្រូវច្បាប់ បើសុំច្បាប់វាស្រ័យទៅលើពួកគាត់អ្នកធ្វើទេ ព្រោះការប្រមូលផ្ដុំគ្នានឹងវាខុសច្បាប់បាត់ទៅហើយ ហើយបើគាត់ធ្វើគួរតែសុំអាជ្ញាធរដែនដី ដូច្នេះរឿងនេះ បើគេអនុវត្តផ្លូវច្បាប់ពួកគាត់ក៏ពិបាកដែរ»។
កន្លងមកអាជ្ញាធរក្រុងភ្នំពេញរួមទាំងលោក ហ៊ុន សែន ផង តែងគំរាមកំហែងដល់មន្ត្រីគណបក្សប្រឆាំងទាំងឡាយណា ដែលជួបជុំគ្នាគាំទ្រប្រធានស្ដីទីគណបក្សសង្គ្រោះជាតិលោក សម រង្ស៊ វិលចូលស្រុក គឺជាការញុះញង់បង្កអសន្តិសុខក្នុងសង្គម។ លោក ហ៊ុន សែន ក៏បានគំរាមកម្ទេចសកម្មជនគណបក្សប្រឆាំងនៅក្នុងស្រុកចោលទាំងអស់ ដោយសារពួកគេមិនព្រមចុះចូលជាមួយគណបក្សកាន់អំណាច និងជាការបញ្ចប់ជីវិតនយោបាយរបស់លោក សម រង្ស៊ី។
មន្ត្រីសម្របសម្រួលសមាគមការពារសិទ្ធិមនុស្ស លីកាដូ (Licadho) លោក ភុន ឈិន លើកឡើងថា ការជួបជុំគ្នានេះ គឺជាសិទ្ធិសេរីភាពក្នុងការបញ្ចេញមតិរបស់ប្រជាពលរដ្ឋ ដែលបានកំណត់ដោយរដ្ឋធម្មនុញ្ញ ដូច្នេះពួកគាត់មិនខុសច្បាប់នោះទេ។ មន្ត្រីសង្គមស៊ីវិលរូបនេះចាត់ទុកការហាមឃាត់មិនឱ្យពួកគាត់ជួបជុំគ្នាគឺជាការរឹតត្បិតសិទ្ធិសេរីភាពរបស់ពលរដ្ឋទៅវិញទេ៖ «អីចឹងសេរីភាពនឹងជាគោលការណ៍ពលរដ្ឋខ្មែរអាចអនុវត្តបានជាទូទៅ ជាធម្មតា ព្រោះវាមានចែងនៅក្នុងរដ្ឋធម្មនុញ្ញនៃកម្ពុជា បានន័យថា រដ្ឋធម្មនុញ្ញវាជាឆន្ទៈរបស់ពលរដ្ឋខ្មែរ គឺជាច្បាប់កំពូលរបស់ប្រទេសទៅហើយ ហើយមិនតែប៉ុណ្ណោះ វាជាសេរីភាពដែលមានចែងនៅក្នុងច្បាប់អន្តរជាតិផងដែរបាទ»។
មន្ត្រីគណបក្សប្រឆាំងទាំង ២រូបនេះ អះអាងថា បើទោះបីជាមានការគំរាមកំហែងមកលើពួកគាត់ក៏ដោយ ក៏មិនអាចបំបែកពួកគាត់បានដែរ ដោយពួកគាត់នៅតែប្រកាន់ជំហរទៅទទួលលោក សម រង្ស៊ី នៅគ្រប់ទីកន្លែង បើទោះបីជាត្រូវស្លាប់ ឬត្រូវអាជ្ញាធរចាប់ដាក់គុកក៏ពួកគាត់មិនខ្លាចដែរ ព្រោះលោក សម រង្ស៊ី គឺជាបុគ្គលម្នាក់ដែលមានសមត្ថភាពអាចសង្គ្រោះកម្ពុជាឱ្យរស់នៅឡើងវិញបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។