គណៈកម្មាធិការនាយករបស់គណបក្សសង្គ្រោះជាតិ បានរក្សាតំណែងប្រធានបក្សរបស់លោក កឹម សុខា និងតំណែងអនុប្រធានបក្ស ៣រូបឲ្យនៅដដែល តែគណបក្សនេះបានសម្រេចលុបចោលពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ដ្រ» ដើម្បីសម្រួលកុំឲ្យបរិយាកាសនយោបាយឡើងកម្តៅខ្លាំងនៅពេលការបោះឆ្នោតជ្រើសរើសក្រុមប្រឹក្សាឃុំ-សង្កាត់ខិតជិតចូលមកដល់។
អ្នកវិភាគនយោបាយសង្ស័យថា ការសម្រេចរបស់គណបក្សប្រឆាំងនេះ អាចដោយសារមានការស្រុះស្រួលគ្នាខាងផ្នែកនយោបាយរវាងគណបក្សសង្គ្រោះជាតិ និងគណបក្សប្រជាជនកម្ពុជា ដែលកំពុងកាន់អំណាច ដើម្បីជូនកាដូដល់គ្នាទៅវិញទៅមកក្នុងឱកាសឆ្នាំថ្មីនេះ។
គណបក្សសង្គ្រោះជាតិ ប្រកាសថានឹងមិនផ្លាស់ប្ដូរក្បាលម៉ាស៊ីនដឹកនាំគណបក្សឡើយ គឺលោក កឹម សុខា នៅតែជាប្រធានគណបក្សជំនួសឲ្យលោក សម រង្ស៊ី ដដែលរហូតចប់អាណត្តិ និងមានអនុប្រធាន ៣រូបដូចការសម្រេចក្នុងអង្គសមាជកន្លងទៅថ្មីៗនេះ។
ថ្លែងនៅក្រោយកិច្ចប្រជុំគណៈកម្មាធិការនាយកគណបក្សសង្គ្រោះជាតិ កាលពីថ្ងៃទី២ មេសា អនុប្រធានគណបក្ស លោក អេង ឆៃអ៊ាង បញ្ជាក់ប្រាប់អ្នកកាសែតថា ការសម្រេចរក្សាតំណែងទាំងនេះ គឺស្របតាមប្រការ ៤៧ថ្មី នៃលក្ខន្តិកៈគណបក្សដែលបានតម្កល់ទុកនៅក្រសួងមហាផ្ទៃ៖ « ឥឡូវនេះយើងធ្វើស្រប ព្រោះតាមការពិត លក្ខន្តិកៈរបស់យើងក្រោយធ្វើវិសោធនកម្មហើយហ្នឹង គឺវាចូលជាធរមានភ្លាមហើយ។ អ៊ីចឹងលោក កឹម សុខា ហ្នឹង លោកក្លាយជាប្រធានគណបក្សដោយស្វ័យប្រវត្តិ អត់មានចាំបាច់បោះឆ្នោតអីទេ។ លក្ខន្តិកៈចែងអ៊ីចឹង។ ច្បាស់អ៊ីចឹងហើយ ក្រសួងមហាផ្ទៃ បានទទួលស្គាល់ហើយ រហូតដល់ចប់អាណត្តិ ព្រោះអាណត្តិរបស់ប្រធានគណបក្សសង្គ្រោះជាតិ ត្រូវចប់យ៉ាងយូរនៅថ្ងៃទី៧ ខែ៤ ឆ្នាំ២០១៨ »។
កាលពីថ្ងៃទី២៩ មីនា គណបក្សសង្គ្រោះជាតិ បានឲ្យដឹងថា ក្រសួងមហាផ្ទៃ បានទទួលស្គាល់ដំណើរការសមាជវិសាមញ្ញរបស់ខ្លួន ហើយក្រសួងមហាផ្ទៃ ក៏មិនជំទាស់ការធ្វើវិសោធនកម្មប្រការ៤៥ និងប្រការ៤៧ នៃលក្ខន្តិកៈរបស់គណបក្សសង្គ្រោះជាតិ ដែរ។
លោក អេង ឆៃអ៊ាង បញ្ជាក់ថា ការប្រជុំគណៈកម្មាធិការនាយកគណបក្សដើម្បីជ្រើសរើសក្បាលម៉ាស៊ីនដឹកនាំបក្សថ្មីនេះ គឺតម្រូវតាមការចង់បានរបស់ក្រសួងមហាផ្ទៃ។ លោកបញ្ជាក់ថា ក្រៅពីបន្តតំណែងប្រធាន និងអនុប្រធានបក្សឲ្យនៅដដែល សមាជិកដែលបានចូលរួមប្រជុំគណៈកម្មាធិការនាយកទាំងអស់ក៏បានសម្រេចឯកច្ឆន្ទដកចំណងជើង «ដូរមេឃុំបម្រើបក្ស ដាក់មេឃុំបម្រើរាស្ដ្រ» ចេញពីគោលនយោបាយអាទិភាព ៥ចំណុចដែរ។
លោក អេង ឆៃអ៊ាង ពន្យល់ថា ការសម្រេចដកពាក្យស្លោកនេះ គឺដោយសារគណបក្សចង់ឲ្យមានការសម្របសម្រួល ហើយពាក្យស្លោកនេះទៀតសោត ក៏មិនសំខាន់ក្នុងការប្រកួតប្រជែងសម្រាប់ការបោះឆ្នោតក្រុមប្រឹក្សាឃុំ-សង្កាត់ឡើយ។ អនុប្រធានបក្សប្រឆាំងរូបនេះបញ្ជាក់ទៀតថា គណបក្សក៏មិនទទួលខុសត្រូវដែរប្រសិនបើសកម្មជនបន្តយកពាក្យស្លោកនេះទៅឃោសនាបោះឆ្នោតនាពេលខាងមុខ។
គណបក្សប្រជាជនកម្ពុជា ចាត់ទុកពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ដ្រ» ដែលគណបក្សសង្គ្រោះជាតិ ប្រើប្រាស់តាំងពីឆ្នាំ២០១២ ថាមានចរិតញុះញង់ បង្កហេតុ និងប្រមាថមើលងាយយ៉ាងធ្ងន់ធ្ងរដល់មន្ត្រីឃុំ-សង្កាត់នៅទូទាំងប្រទេស។ គណបក្សកាន់អំណាចតែងតែព្រមានប្ដឹងគណបក្សសង្គ្រោះជាតិ ទៅតុលាការ ប្រសិនបើនៅតែរឹងទទឹងមិនព្រមលុបចោលពាក្យស្លោកនោះ។
អ្នកវិភាគនយោបាយ លោកបណ្ឌិត មាស នី សង្ស័យថា ការសម្រេចលុបចោលពាក្យស្លោករបស់គណបក្សប្រឆាំងពេលនេះ អាចដោយសារមានការស្រុះស្រួលគ្នាដ៏សម្ងាត់មួយរវាងគណបក្សទាំងពីរ ដើម្បីជូនជាកាដូគ្នាក្នុងឱកាសឆ្នាំថ្មី៖ « ការទុកក្បាលម៉ាស៊ីនដឹកនាំបក្សឲ្យនៅដដែល មានរឿងពីរ។ ទី១ សង្គ្រោះជាតិ អាចនៅបន្តតស៊ូមតិជាមួយគណបក្សកាន់អំណាច ឬក៏សង្គ្រោះជាតិ ប្រហែលជាមានការជជែកគ្នាក្រៅផ្លូវការខ្លះជាមួយគណបក្សកាន់អំណាច ដែលយើងអត់បានដឹងដើម្បីដោះដូរ »។
ការជ្រើសរើសប្រធាន និងអនុប្រធានបក្ស ព្រមទាំងការយកមកប្រើប្រាស់ឡើងវិញនូវពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ដ្រ» នៅក្នុងសមាជវិសាមញ្ញរបស់គណបក្សសង្គ្រោះជាតិ កាលពីថ្ងៃទី២ មីនា បន្ទាប់ពីការលាលែងពីប្រធានបក្សរបស់លោក សម រង្ស៊ី នោះ ត្រូវបានក្រសួងមហាផ្ទៃ ប្រកាសថា ការជ្រើសរើសមេដឹកនាំថ្មីបក្សប្រឆាំងនេះធ្វើខុសលក្ខន្តិកៈបក្ស ដែលតម្កល់ទុកនៅក្នុងក្រសួងកាលពីឆ្នាំ២០១៣ រីឯពាក្យស្លោកក៏ផ្ទុយនឹងស្មារតីរដ្ឋធម្មនុញ្ញ ច្បាប់គណបក្សនយោបាយ និងច្បាប់បោះឆ្នោត។
ទោះជាយ៉ាងណាក្ដី មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ត្រេកអរនៅពេលគណបក្សប្រឆាំងលុបចោលពាក្យស្លោកនេះ។ លោកចាត់ទុកថា ពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ដ្រ» ជះឥទ្ធិពលដល់ការអនុវត្តច្បាប់។ មន្ត្រីគណបក្សកាន់អំណាចដដែលនេះបន្តថា ការរក្សាក្បាលម៉ាស៊ីនដឹកនាំរបស់បក្សប្រឆាំងនៅដដែល ដោយសម្រេចលុបពាក្យស្លោកសម្រាប់ឃោសនាបោះឆ្នោតនោះចោល គឺពុំមានការដោះដូរអ្វីរវាងគណបក្សទាំងពីរឡើយ៖ « ព្រោះការសម្រេចរៀបចំជាថ្មីសមាសភាពថ្នាក់ដឹកនាំគណបក្សសង្គ្រោះជាតិ វាទំនាស់ជាមួយលក្ខន្តិកៈរបស់គាត់ទេ បើសិនណាគាត់ដោះដូរ គាត់លុបចោលលទ្ធផលសមាជវិសាមញ្ញរបស់គាត់ហើយ បានសេចក្ដីថា គាត់ងាកមកអនុវត្តប្រការ៤៧ របស់លក្ខន្តិកៈហ្នឹងហើយ បញ្ហាលុបចោលពាក្យស្លោករបស់គាត់ អាហ្នឹងគឺការពង្រឹងអនុវត្តច្បាប់ទាំងអស់គ្នា »។
គណបក្សសង្គ្រោះជាតិ ប្រកាសថា លទ្ធផលនៃកិច្ចប្រជុំគណៈកម្មាធិការនាយកគណបក្សកាលពីថ្ងៃទី២ មេសា នោះ គណបក្សនឹងធ្វើជាលិខិតជូនដំណឹងទៅក្រសួងមហាផ្ទៃ នៅថ្ងៃច័ន្ទ ទី៣ មេសា នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។