លោក ហ៊ុន សែន ថា គ្មាន​ការ​ផ្ដល់​អាសនៈ​ក្រុម​ប្រឹក្សាឃុំ​សង្កាត់​ឱ្យ​មន្ត្រី​បក្ស​ប្រឆាំង​ដែល​មិន​ចុះចូល

ដោយ សុ ជីវី
2018-12-26
អ៊ីម៉ែល
មតិ
Share
បោះពុម្ព
(ពី​ឆ្វេង) ចៅ​សង្កាត់​ទើប​ជាប់​ឆ្នោត​សង្កាត់​សាលាកំរើក ក្រុង​សៀមរាប ខេត្ត​សៀមរាប លោក ជិន សុខង៉េង ចៅ​សង្កាត់​ទើប​ជាប់​ឆ្នោត​សង្កាត់​អូរចារ ក្រុង​បាត់ដំបង ខេត្ត​បាត់ដំបង កញ្ញា ស៊ិន ចាន់ពៅរ៉ូហ្ស៊េត និង​ចៅ​សង្កាត់​ទើប​ជាប់​ឆ្នោត​សង្កាត់​នគរធំ ក្រុង​សៀមរាប ខេត្ត​សៀមរាប លោក សៀក ចំណាប់ ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​១២ ខែ​មិថុនា ឆ្នាំ​២០១៧។
(ពី​ឆ្វេង) ចៅ​សង្កាត់​ទើប​ជាប់​ឆ្នោត​សង្កាត់​សាលាកំរើក ក្រុង​សៀមរាប ខេត្ត​សៀមរាប លោក ជិន សុខង៉េង ចៅ​សង្កាត់​ទើប​ជាប់​ឆ្នោត​សង្កាត់​អូរចារ ក្រុង​បាត់ដំបង ខេត្ត​បាត់ដំបង កញ្ញា ស៊ិន ចាន់ពៅរ៉ូហ្ស៊េត និង​ចៅ​សង្កាត់​ទើប​ជាប់​ឆ្នោត​សង្កាត់​នគរធំ ក្រុង​សៀមរាប ខេត្ត​សៀមរាប លោក សៀក ចំណាប់ ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​១២ ខែ​មិថុនា ឆ្នាំ​២០១៧។
Photo: RFA

មេដឹកនាំ​របប​ក្រុងភ្នំពេញ​លោក ហ៊ុន សែន ថា ក្រុមប្រឹក្សាឃុំ​សង្កាត់​ជាប់ឆ្នោត​របស់​គណបក្ស​សង្គ្រោះជាតិ ដែល​បាន​ចុះចូល​ជាមួយ​គណបក្ស​កាន់អំណាច នឹង​បន្ត​កាន់​តំណែង​រហូតដល់​ឆ្នាំ ២០២២ ខាងមុខ។ មេឃុំ​ជាប់ឆ្នោត​មួយ​រូប​នៃ​គណបក្ស​សង្គ្រោះជាតិ ផ្តាំ​ទៅ​លោក ហ៊ុន សែន វិញ​ថា រូបគេ​ធ្វើ​នយោបាយ​ដើម្បី​បម្រើ​ពលរដ្ឋ មិនមែន​ដើម្បី​តួនាទី​ឡើ។

មេដឹកនាំ​របប​ឯកបក្ស​លោក ហ៊ុន សែន អះអាង​ថា គណបក្ស​សង្គ្រោះជាតិ​នឹង​មិន​អាច​រស់​ឡើងវិញ​ឡើយ ដូច្នេះ​មេឃុំ ចៅសង្កាត់ និង​ក្រុមប្រឹក្សាឃុំ​សង្កាត់​ជាប់ឆ្នោត​របស់​គណបក្ស​សង្គ្រោះ​ជាតិ ដែល​មិនបាន​ចុះចូល​ជាមួយ​លោក នឹង​គ្មាន​ផ្លូវ​បាន​តំណែង​វិញ​ជាដាច់ខាត។ លោក​បាន​ធានា​ថា អ្នក​ដែល​ចូលរួម​ជាមួយ​បក្ស​កាន់អំណាច នឹង​បន្ត​កាន់​តំណែង​រហូតដល់​ចប់​អាណត្តិ និង​អាច​ឈរ​ឈ្មោះ​ជាថ្មីទៀត​ក្នុង​ការ​បោះឆ្នោត​ក្រុមប្រឹក្សា​ឃុំ​សង្កាត់​នៅ​ឆ្នាំ២០២២ ខាងមុខ៖ «សុំ​កុំ​ដេក​យល់​សប្តិ​ទាំង​ថ្ងៃត្រង់ ថា​នឹង​បាន​វិល​ត្រឡប់​មក​ធ្វើជា​មេឃុំ​ឡើងវិញ។ សូម​កុំ​យល់​សប្តិ​ឱ្យ​សោះ ប្រឹង​រកស៊ី​ទៅ ក្រែងលោ​វា​ដាច់ពោះ​ងាប់»

បុរស​ខ្លាំង​រូប​នេះ​ក៏បាន​បញ្ជាក់​ដែរ​ថា លោក​កំពុង​រៀបចំ​បន្ថែម​អាសនៈ​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ដើម្បី​ឱ្យ​មាន​ចំនួន​កាន់តែ​ច្រើន​សម្រាប់​សមាជិក​គណបក្ស​សង្គ្រោះ​ជាតិ​ដែល​មក​ចុះចូល​ជាមួយ​លោក។

ក្រោយ​រំលាយ​គណបក្ស​សង្គ្រោះជាតិ លោក ហ៊ុន សែន បាន​បើក​ច្រក​ឱ្យ​មន្ត្រី​គណបក្ស​នេះ​មក​ចុះចូល​ជាមួយ​គណបក្ស​របស់​លោក តាមរយៈ​ការ​លួងលោម​ទិញ​ទឹកចិត្ត និង​ការ​គំរាមកំហែង​តាម​គ្រប់​រូបភាព រហូតដល់​មាន​មន្ត្រី​គណបក្ស​សង្គ្រោះជាតិ​ខ្លះ បង្ខំចិត្ត​រត់​ភៀសខ្លួន​ទៅ​ក្រៅ​ប្រទេស ដើម្បី​គេច​ចេញ​ពី​ការ​តាម​ធ្វើទុក្ខបុកម្នេញ​នេះ។

អតីត​ចៅសង្កាត់​នគរធំ ក្រុង​សៀមរាប លោក សៀក ចំណាប់ ប្រតិកម្ម​ថា មន្ត្រី​គណបក្ស​សង្គ្រោះជាតិ ពិតប្រាកដ​មិន​បាន​ទៅ​ចុះចូល​ជាមួយ​គណបក្ស​កាន់អំណាច ជា​ថ្នូរ​នឹង​ការ​ទទួល​បាន​តំណែង ឬ​រក្សា​តួនាទី​របស់​ខ្លួន​ឡើយ។ លោក​បន្ត​ថា តំណែង​មេឃុំ ចៅសង្កាត់ និង​សមាជិក​ក្រុម​ប្រឹក្សាឃុំ​សង្កាត់​របស់​គណបក្ស​សង្គ្រោះជាតិ គឺ​កើត​ចេញ​ពី​ឆន្ទៈ​របស់​ពលរដ្ឋ​ជា​អ្នក​បោះឆ្នោត​ឱ្យ មិនមែន​ជា​ការ​ផ្ដល់​ឱ្យ​ដោយ​លោក ហ៊ុន សែន ដែល​បាន​លួច​យក​ពី​ពួក​លោក តាមរយៈ​ការ​រំលា​យ​គណបក្ស​សង្គ្រោះជាតិ​នោះ​ទេ៖ «សមាជិក​ក្រុមប្រឹក្សា​ឃុំ​សង្កាត់​ទាំងអស់​របស់​គណបក្ស​សង្គ្រោះ​ជាតិ នៅ​តែ​មាន​ជំហរ​រឹងមាំ​មួយ គឺ​ពួក​យើង​មិន​មានការ​ឱនលំទោន​ចំពោះ​បុគ្គល​ដែល​គាត់​បាន​លួច​តំណែង​ពួក​យើង​ទៅ​ទេ ព្រោះ​តំណែង​សមាជិក​ក្រុម​ប្រឹក្សាឃុំ​សង្កាត់​ទាំងនេះ ជា​តំណែង​ដែល​បាន​មក​ពី​ការបោះឆ្នោត ដែល​ប្រជាពលរដ្ឋ​គាត់​បាន​ផ្ញើ​សេចក្ដី​ទុកចិត្ត​បោះ​ឱ្យ​ពួក​យើង​ខ្ញុំ»

ចៅសង្កាត់​ជាប់ឆ្នោត​វ័យក្មេង​រូប​នេះ បន្ត​ថា លោក ហ៊ុន សែន ដណ្តើម​យក​អាសនៈ​ក្រុមប្រឹក្សាឃុំ​សង្កាត់​របស់​គណបក្ស​សង្គ្រោះជាតិ ដើម្បី​យក​ទៅ​ចែក​ឱ្យ​សមាជិក​របស់​ខ្លួន ដែល​បាក់​ទឹកចិត្ត​ដោយសារ​ពលរដ្ឋ​លែង​គាំទ្រ។ លោក​អំពាវនាវ​ដល់​អ្នក​គាំទ្រ​គណបក្ស​សង្គ្រោះ​ជាតិ​ទាំងអស់ រក្សា​ជំហរ​ឱ្យ​បាន​រឹងមាំ​ក្នុងនាម​ជា​អ្នក​ស្រឡាញ់ និង​ចង់បាន​លទ្ធិ​ប្រជាធិបតេយ្យ​ពិតប្រាកដ កុំ​លុះ​តាម​ការ​អូសទាញ​របស់​គណបក្ស​កាន់អំណាច។

តំណាង​ក្រុមប្រឹក្សា​ឃ្លាំមើល​កម្ពុជា និង​ជា​អតីត​សមាជិក​គ..ប លោក រ៉ុង ឈុន ថ្លែង​ថា អាសនៈ​ក្រុមប្រឹក្សាឃុំ​សង្កាត់​របស់​គណបក្ស​សង្គ្រោះជាតិ កើត​ចេញ​ពី​ឆន្ទៈ​ពិតប្រាកដ​របស់​ពលរដ្ឋ មិន​អាច​យក​ទៅ​បែងចែក​ឱ្យ​គណបក្ស​ដទៃ ដូចដែល​របប​ក្រុងភ្នំពេញ​បាន​ធ្វើ​នោះ​ឡើយ។ លោក​ជំរុញ​ឱ្យ​របប​នេះ ពិចារណា​ឡើងវិញ​រឿង​ដកហូត​អាសនៈ​ក្រុមប្រឹក្សាឃុំ​សង្កាត់​របស់​គណបក្សប្រឆាំង​នេះ ហើយ​លោក​នៅតែ​ទាមទារ​ឱ្យ​របប​ក្រុងភ្នំពេញ​ស្តាត​ប្រជាធិបតេយ្យ និង​ការ​គោរព​សិទ្ធិមនុស្ស​ឡើងវិញ ដើម្បី​បញ្ចៀស​ទណ្ឌកម្ម​ទាំងឡាយ​ដែល​អាច​នឹង​កើតមានឡើង​នៅ​ពេល​ខាងមុខ៖ «វា​សំខាន់​ទាល់តែ​មានការ​ផ្ដល់​ឱ្យ​ព្រម​គ្នា ពីព្រោះ​វា​ស្ថិតនៅ​ក្នុង​ចំណុច​ដែល​សហភាព​អឺរ៉ុប​បាន​ដាក់​ឱ្យ​រដ្ឋាភិបាល​ដោះស្រាយ ដូចជា ការ​ដោះលែង​លោក កឹម សុខា ការ​លើកលែង​ទោស លោក សម រង្ស៊ី ការ​ផ្តល់​សិទ្ធិ​ឱ្យ​ដល់​អ្នក​ទាំង ១១៨ នាក់ ការ​ផ្តល់​តំណែង​ក្រុម​ប្រឹក្សាឃុំ​សង្កាត់​ឱ្យ​មក​វិញ ផ្តល់​ឱ្យ​គណបក្ស​សង្គ្រោះ​ជាតិ​មានដំណើរ​ការ​ឡើង​វិញ សព្វបែបយ៉ាង​ហ្នឹង។ ទាំងនេះ​វា​ស្ថិត​នៅ​ក្នុង​ចំណុច​ដែល​សហភាព​អឺរ៉ុប​បាន​ផ្តល់​ឱ្យ​កម្ពុជា​ដោះស្រាយ​ដើម្បី​រក្សា​ប្រព័ន្ធ​អនុគ្រោះ​ពន្ធ EBA»

អាសនៈ​ក្រុមប្រឹក្សាឃុំ​សង្កាត់​របស់​គណបក្ស​សង្គ្រោះជាតិ ចំនួន ៥.០០៧​អាសនៈ ដែល​បាន​មក​ពី​ការ​បោះឆ្នោត​ឃុំ-សង្កាត់ ត្រូវ​បាត់បង់​ទាំងស្រុង ក្រោយ​ពេល​របប​ក្រុងភ្នំពេញ​រំលាយ​គណបក្ស​នេះ កាលពី​ខែ​វិច្ឆិកា ឆ្នាំ​២០១៧ កន្លង​ទៅ។ ចំណែក​អាសនៈ​សភា និង​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ទាំងអស់ របស់​គណបក្សប្រឆាំង ក៏​ត្រូវ​រលាយ​ទៅតាម​នោះ​ដែរ។ ចំណាត់​ការ​បែបនេះ ត្រូវ​បាន​វាយតម្លៃ​ថា ជា​ការ​បំផ្លាញ​ចោល​ទាំងស្រុង​នូវ​លទ្ធិ​ប្រជាធិបតេយ្យ ដែល​ចាក់​ឫសគល់​នៅ​កម្ពុជា ចាប់តាំង​ពី​ឆ្នាំ១៩៩៣​មក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល