សមាជ​អ្នក​ប្រជាធិបតេយ្យ​ខ្មែរ​នៅ​កូរ៉េ​ទទូច​ឱ្យ​អ្នក​ពាក់ព័ន្ធ​រួមគ្នា​ស្ដារ​ប្រជាធិបតេយ្យ​នៅ​កម្ពុជា

ដោយ ជី វិតា
2019-04-21
អ៊ីម៉ែល
មតិ
Share
បោះពុម្ព
សមាជ​អ្នកប្រជាធិបតេយ្យ​នៅ​ទីក្រុង​ក្វាងជូ ប្រទេស​កូរ៉េខាងត្បូង កាល​ពីថ្ងៃ​ទី២១ ខែ​មេសា ឆ្នាំ​២០១៩។
សមាជ​អ្នកប្រជាធិបតេយ្យ​នៅ​ទីក្រុង​ក្វាងជូ ប្រទេស​កូរ៉េខាងត្បូង កាល​ពីថ្ងៃ​ទី២១ ខែ​មេសា ឆ្នាំ​២០១៩។
RFA/Jeevita

សមាជ​អ្នក​ប្រជាធិបតេយ្យ​ខ្មែរ​មកពី​ប្រទេស​នានា ​ជុំវិញ​ពិភពលោក ​ដែល​ប្រារព្ធ​ធ្វើ​នៅ​ទីក្រុង​ក្វាងជូ (Gwangju) ប្រទេស​កូរ៉េខាងត្បូង ៣ថ្ងៃ​ បាន​បញ្ចប់​នៅ​ថ្ងៃ​អាទិត្យ​​ ទី២១ មេសា ដោយ​បាន​ចេញ​សេចក្ដី​សម្រេច​រួម ​ទាមទារ​ឱ្យ​មាន​ការ​ស្តារ​លទ្ធិ​ប្រជាធិបតេយ្យ​នៅ​កម្ពុជា​ជា​បន្ទាន់​។ អ្នកវិភាគ​ដែល​ចូលរួម និង​សង្កេតការណ៍​ឱ្យ​តម្លៃ​ថា ទាំង​សមាជ និង​មហា​បាតុកម្ម​ភ្លើង​ទៀន ជា​​ជោគជ័យ​​សម្រាប់​អ្នក​ប្រជាធិបតេយ្យ។

គណៈប្រតិភូ​អ្នក​ប្រជាធិបតេយ្យ ដែល​មាន​មន្ត្រី​គណបក្ស​សង្គ្រោះជាតិ ពី​ប្រទេស​នានា​ជាច្រើន​ជុំវិញ​ពិភពលោក តំណាង​ពលករ​ខ្មែរ​ពី​ប្រទេស​កូរ៉េ​ខាងត្បូង តំណាង​សង្គម​ស៊ីវិល​ប្រទេស​កម្ពុជា អ្នកវិភាគ​នយោបាយ និង​ព្រះសង្ឃ​ផង​នោះ បាន​មូលមតិ​​គ្នា​ចេញ​សេចក្ដី​ប្រកាស​រួម​មួយ ដោយ​ប្រកាស​ថា ប្រជាធិបតេយ្យ​នៅ​កម្ពុជា បាន​ដើរ​មកដល់​ផ្លូវ​ទាល់​ហើយ ដែល​អ្នក​ប្រជាធិបតេយ្យ​ត្រូវ​ធ្វើការ​រួមគ្នា ដើម្បី​ទាញ​ដំណើរ​វិវត្តន៍​នៃ​ប្រជាធិបតេយ្យ​នៅ​កម្ពុជា​ឱ្យ​ងាក​មក​លើ​ផ្លូវ​ត្រូវ​វិញ។

ដើម្បី​សម្រេច​គោលដៅ​នេះ អង្គ​សមាជ​នៃ​អ្នក​ប្រជាធិបតេយ្យ​ដែល​មាន​គ្នា​ជាង ​៧០​រូប នៅ​ថ្ងៃទី​២១ មេសា បាន​អនុម័ត​ដោយ​មតិ​ភាគច្រើន​លើសលប់​នូវ​ខ្លឹម​សារសំខាន់ៗ​មួយ​ចំនួន ក្នុង​នោះ​រួមមាន ស្នើ​ឱ្យ​គ្រប់​ភាគី​ពាក់ព័ន្ធ​ទាំងអស់ រួមមាន គណបក្ស​នយោបាយ កងកម្លាំងប្រដាប់អាវុធ មន្ត្រីរាជការ អង្គការ​សង្គម​ស៊ីវិល ព្រះសង្ឃ បញ្ញវន្ត សិស្ស​និស្សិត កម្មករ កសិករ ពលករ​ខ្មែរ ព្រមទាំង​ប្រជាពលរដ្ឋ​ខ្មែរ​ទាំង​ក្នុង​ទាំង​ក្រៅ​ប្រទេស ចូលរួម​យ៉ាងសកម្ម ក្នុង​ការ​ស្ដារ​ប្រជាធិបតេយ្យេ​នៅ​ក្នុង​​ប្រទេស​កម្ពុជា​ឡើងវិញ ដោយ​យក​រដ្ឋធម្មនុញ្ញ​កម្ពុជា និង​កិច្ចព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១ ជា​គោល។

នាយក​ប្រតិបត្តិ​នៃ​អង្គការ​តម្លាភាព​កម្ពុជា លោក ព្រាប កុល ដែល​បាន​ចូលរួម​ក្នុង​អង្គ​សមាជ ប៉ុន្តែ​មិនបាន​ចូលរួម​ក្នុង​មហា​បាតុកម្ម​ភ្លើង​ទៀន​នោះ​សង្កត់ធ្ងន់​ថា ការងារ​លើកស្ទួយ​ប្រជាធិបតេយ្យ​មិនមែន​ជា​រឿង​បាន​មក​ដោយ​មិន​ប្រឹងប្រែង​នោះ​ទេ ពោល​គឺ​អ្នក​ប្រជាធិបតេយ្យ​ត្រូវ​ធ្វើការ​រួមគ្នា​។ លោក ព្រាប កុល ដែល​ចូលរួម​សម្របសម្រួល​ក្នុង​ការ​ពិភាក្សា​ក្នុង​អង្គ​សមាជ​បិទ​ទ្វា​ដែរ​នោះ បញ្ជាក់​ថា អង្គ​សមាជ​បាន​ព្រមព្រៀងគ្នា​ជំរុញ​ឱ្យ​មាន​ការអនុវត្ត​វប្បធម៌​នយោបាយ​ថ្មី និង​ការ​បន្ត​វេន​​ដើម្បី​ភាព​រឹងមាំ​នៃ​ប្រជាធិបតេយ្យ​នៅ​កម្ពុជា៖ «ទី​មួយ យើង​និយាយ​អំពី​បញ្ហា​ប្រជាធិបតេយ្យ ដែល​ដើរ​មក​ដល់​ផ្លូវ​ទាល់ ហើយ​ទាមទារ​ឱ្យ​អ្នក​ស្រឡាញ់​ប្រជាធិបតេយ្យ​ចូលរួម​កម្លាំង​គ្នា​សរុប ដើម្បី​កសាង និង​ពង្រឹង​ប្រជាធិបតេយ្យ​ខ្មែរ​ឡើង​វិញ»

នៅ​ពេល​សួរ​ទាក់ទង​នឹង​សុវត្ថិភាព​របស់​លោក លោក ព្រាប កុល ដែល​ជា​ប្រធាន​អង្គការ​សង្គម​ស៊ីវិល​មួយ​នៅ​កម្ពុជា ដែល​ហ៊ាន​មក​បង្ហាញមុខ​ចូលរួម​ក្នុង​សមាជ​អ្នក​ប្រជាធិបតេយ្យ នៅ​ប្រទេស​កូរ៉េ ឱ្យ​ដឹង​ថា លោក​បារម្ភ​ខ្លះ​ដែរ ពេល​ត្រឡប់​ទៅ​ប្រទេស​កម្ពុជា​វិញ ប៉ុន្តែ​លោក​សង្ឃឹមថា អាជ្ញាធរ​ក្រុងភ្នំពេញ​នឹង​មិន​ធ្វើទុក្ខបុកម្នេញ​អ្វី​មក​លើ​រូបលោក​ទេ ពីព្រោះ​អ្វី​ដែល​លោក​ធ្វើ គឺ​ធ្វើ​តាម​តួនាទី និង​ដើម្បី​ប្រយោជន៍​ខ្មែរ​ទាំងអស់​គ្នា៖ «ខ្ញុំ​មក​ទី​នេះ​ជួប​ជាមួយ​អ្នក​ប្រជាធិបតេយ្យ ដែល​គាត់​ជា​ជន​ជាតិ​ខ្មែរ​ដូច​ខ្ញុំ​ដែរ ខ្ញុំ​មិន​អាច​ដើរ​គេច មិន​ជួប​មិន​ជជែក​ជាមួយ​នឹង​ប្រជាពលរដ្ឋ​ខ្មែរ​យើង ដែល​ជា​អ្នក​តស៊ូ​ដើម្បី​ប្រជាធិបតេយ្យ​ទេ ហើយ​ខ្ញុំ​ធ្វើការ​ជា​មួយ​គ្រប់​គណបក្ស​នយោបាយ​សំខាន់ៗ ដែរ រួប​ទាំង​បក្ស​កាន់​អំណាច ខ្ញុំ​ក៏​មាន​ការ​ជួប​ជជែក​គ្នា​ដែរ។ ដូច្នេះ​ខ្ញុំ​ជឿ​ថា ក្នុង​នាម​ជា​អ្នក​អព្យាក្រឹត ខ្ញុំ​មាន​ភាព​ក្លាហាន ដើម្បី​ធ្វើ​ការ​ជាមួយ​គ្រប់​ភាគី។ បើ​សិន​ជា​ខ្ញុំ​ខ្លាច មិន​ហ៊ាន​មក​ជួប​អ្នក​ដែល​គាត់​មាន​និន្នាការ​ប្រឆាំង ការ​ខ្លាច​នេះ​ហើយ ដែល​ធ្វើ​ឱ្យ​ខ្ញុំ​បាត់​នូវ​ភាព​អព្យាក្រឹត។ ពាក្យ​ថា​ខ្លាច គឺ​ធ្វើ​ឱ្យ​មនុស្ស​លម្អៀង។ អ៊ីចឹង ខ្ញុំ​ក្លាហាន ខ្ញុំ​ធ្វើ​ការ​ជាមួយ​ទាំង​គណបក្ស​ប្រឆាំង ទាំង​គណបក្ស​កាន់​អំណាច គឺ​ខ្ញុំ​បាន​រក្សា​ភាព​ឯករាជ្យ និង​ភាព​អព្យាក្រឹត​របស់​ខ្ញុំ។ ខ្ញុំ​គិត​ថា ប្រហែល​ជា​មិន​មាន​វិធានការ​ប៉ះពាល់​ដល់​ខ្ញុំ​ទេ ហើយ​ខ្ញុំ​មិន​ភ្លេច​តួនាទី​ក្នុង​នាម​ជា​អ្នក​អព្យាក្រឹត ដើម្បី​រួម​ចំណែក​លើក​កម្ពស់​ប្រជាធិបតេយ្យ ស្រប​តាម​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា ដែល​ស្រប​តាម​ច្បាប់ យើង​អាច​ធ្វើ​បាន ក្នុង​នាម​ជា​ពលរដ្ឋ​ខ្មែរ​ផង ក្នុង​នាម​អង្គការ​សង្គម​ដែល​ស្រឡាញ់ និង​លើក​កម្ពស់​ប្រជាធិបតេយ្យ​ផង»

ចំណែក​អតីត​អ្នក​ទោស​នយោបាយ​មនសិការ​លោក គឹម សុខ ដែល​បាន​ស្កាត់​ម​កី​ប្រទេស​ហ្វាំងឡង់ សំដែង​ការ​ពេញចិត្ត​នឹង​លទ្ធផល​នៃ​សមាជ​អ្នក​ប្រជាធិបតេយ្យ បើ​ទោះ​ជា​លោក​យល់​ថា មាន​ចំណុច​ខ្វះខាត​ខ្លះ​ក៏​ដោយ​ចុះ៖ «សមាជ​ពីរ​ថ្ងៃ​អំពី​អ្នក​ប្រជាធិបតេយ្យ ដែល​ធ្វើ​ឡើង​ដោយ​បិទ​ទ្វារ បិទ​ទូរស័ព្ទ ជជែក​គ្នា​ត្រង់ៗ គឺ​ជា​ដំណើរ​ល្អ ពីព្រោះ​យើង​បាន​លើក​ចំ​ជាមួយ​គ្នា ចំពោះ​មុខ​អ្នក​នយោបាយ​កំពូលៗ ទាំង​មនុស្ស​នៅ​នៅ​ក្នុង​សង្គម​ស៊ីវិល​ផង អំពី​ចំណុច​ខ្លាំង និង​ចំណុច​ខ្សោយ របស់​អ្នក​នយោបាយ ហើយ​និង​អ្នក​ចូលរួម​ចលនា​សង្គម ជា​ពិសេស អ្នក​អត្ថាធិប្បាយ​នានា ទាក់ទង​នឹង​បញ្ហា​នយោបាយ និង​សង្គម​ជាតិ​ជា​ដើម។ យើង​កែ​លម្អ​គ្នា។ ក៏​ប៉ុន្តែ​អ្វី​ដែល​ខ្ញុំ​មើល​ឃើញ​ពី​ចំណុច​ខ្វះខាត គឺ​ថា ខ្វះ​ភាព​ក្លាហាន​នៃ​ការ​ចូលរួម​ពី​បណ្ដា​ភាគី​ផ្សេងៗ ទៀត ដូច​ជា គណបក្ស​នយោបាយ ដូច​ជា អ្នក​វិភាគ​សង្គម​អ្វី​ជា​ដើម ដែល​អាច​មក​ពី​ខ្លាច​សុវត្ថិភាព​ផង ឬ​ក៏​អាច​មក​ពី​ហេតុផល​ផ្សេងៗ ដែល​ខ្ញុំ​មិន​ប្រាកដ​ផង ក៏​ប៉ុន្តែ​អ្វី​ដែល​ខ្ញុំ​កត់​សម្គាល់ គឺ​ថា សមាជ​នេះ​ធ្វើ​បាន​ល្អ ទាំង​ការ​ជជែក​គ្នា ទាំង​ការ​សម្រេច ហើយ​ជជែក​ទាំង​ការ​សម្រេច​ថា តើ​យើង​សម្រេច​របៀប​ម៉េច យើង​ដើរ​របៀប​ម៉េច​ទៅ​ទៀត ដូច្នេះ​វា​ជា​ការ​ចាប់​ផ្ដើម​ល្អ​បំផុត​មួយ។ យើង​គួរ​លើក​ទឹក​ចិត្ត​ដល់​បងប្អូន​ពលករ​នៅ​កូរ៉េ ដែល​ខិតខំ​ប្រឹងប្រែង​រៀបចំ​ផ្ដួចផ្ដើម​គំនិត​ជជែក​គ្នា​ត្រង់ៗ ក្នុង​ចំណោម​អ្នក​ប្រជាធិបតេយ្យ​បែប​នេះ ហើយ​ខ្ញុំ​តែងតែ​សំណូមពរ​ថា ឱ្យ​មាន​ជា​រៀងរាល់​ឆ្នាំ»

លោក គឹម សុខ ដែល​ត្រូវ​បាន​របប​ក្រុងភ្នំពេញ​ចាប់​ដាក់​ពន្ធនាគារ​ចំនួន ១៨​ខែ​ដោយសារ​រិះគន់​លោកនាយ​រដ្ឋមន្ត្រី ហ៊ុន សែន នោះ ក៏បាន​ចូលរួម​ក្នុង​មហា​បាតុកម្ម​ភ្លើង​ទាន​ដែរ។ លោក​ថា បាតុកម្ម​នេះ​បង្ហាញ​ថា កម្លាំង​ប្រជាធិបតេយ្យ​ខ្មែរ​នៅតែ​ខ្លាំងក្លា៖ «បាតុកម្ម​នេះ​ធំ​ណាស់ គឺ​បង្ហាញ​អំពី​ស្មារតី​រឹង​មាំ​ណាស់​នៃ​ពលករ​នៅ​កូរ៉េ បើ​ទោះ​បី​ជា​គេ​មាន​ប្រគំ​ខន់ស៊ើត (Concert) ដើម្បី​បង្វែរ​ចំណាប់​អារម្មណ៍ ក៏​គេ​អត់​ចូល​រួម​ដែរ។ តាម​ព័ត៌មាន​ឃើញ​ថា ការ​ប្រគំ​ខន់ស៊ើត​នោះ មាន​មនុស្ស​តែ ២០០នាក់​ប៉ុណ្ណឹង​ទេ ចូលរួម។ ចំណែក​ឯ​បាតុកម្ម​អ្នក​ប្រជាធិបតេយ្យ ដែល​មាន​លោក សម រង្ស៊ី ដឹក​នាំ ហើយ​រៀបចំ​ដោយ​យុវជន​នៅ​កូរ៉េ​នេះ ចូលរួម​ច្រើន មិន​តិច​ជាង​មួយ​ម៉ឺន​នាក់ ដែល​ខ្ញុំ​មើល​ឃើញ​នេះ គឺ​ជា​ការ​បង្ហាញ​ស្មារតី​មួយ សម្រាប់​ពលករ​នៅ​ប្រទេស​កូរ៉េ​ថា ពួក​គេ​យល់​ច្បាស់​អំពី​សេចក្ដី​ត្រូវ​ការ​ពិត​ប្រាកដ​នៃ​សេរីភាព​ប្រជាធិបតេយ្យ​នៅ​ប្រទេស​កម្ពុជា។ ពួក​គេ​យល់​ច្បាស់​ណាស់​ថា មាន​តែ​សេរីភាព​ប្រជាធិបតេយ្យ​នៅ​ក្នុង​ប្រទេស​របស់​ខ្លួន ដូច​ដែល​ប្រព័ន្ធ​គ្រប់គ្រង​សង្គម​នៅ​កូរ៉េ​មាន​សព្វ​ថ្ងៃ​នេះ​ទេ ទើប​ពួក​គេ​មាន​សុវត្ថិភាព ពួក​គេ​មាន​ការងារ​ធ្វើ​ត្រឹមត្រូវ ពួក​រស់​នៅ​ដោយ​សេចក្ដី​ថ្លៃថ្នូរ រស់​ដោយ​មាន​ការ​គោរព និង​ជីវភាព​ថ្កុំថ្កើង​រុងរឿង»

សេចក្ដី​សម្រេច​រួម​នៃ​អង្គ​សមាជ​របស់​អ្នក​ប្រជាធិបតេយ្យ នៅ​ទីក្រុង​ក្វាងជូ ដែល​ជា​ទីក្រុង​ប្រវត្តិសាស្ត្រ​នៃ​ការ​តស៊ូ​ដោយ​តំណក់​ឈាម និង​ការ​ធ្វើ​ពលិកម្ម​របស់​ប្រជាជន​កូរ៉េខាងត្បូង ដើម្បី​ដូរ​យក​លទ្ធិប្រជាធិបតេយ្យ​ដោយ​ជោគជ័យ​នោះ ក៏​ទទូច​ឱ្យ​កង​ប្រដាប់​អាវុធ មន្ត្រី​រាជការ និង​មន្ត្រី​តុលាការ ចូលរួម​ស្ដារ​ប្រជាធិបតេយ្យ​នៅ​កម្ពុជា​ឡើងវិញ ដោយ​គ្រាន់តែ​ពួកគេ​ប្រកាន់​ជំហរ​អព្យាក្រឹត មិន​ចូល​បម្រើ​ឱ្យ​គណបក្ស​នយោបាយ និង​ទទូច​ឱ្យ​គោរព​គោលការណ៍​សិទ្ធិមនុស្ស​ឱ្យ​បាន​ខ្ជាប់ខ្ជួន ដូច​មាន​ចែង​ក្នុង​រដ្ឋធម្មនុញ្ញ​កម្ពុជា។

សមាជ​អ្នក​ប្រជាធិបតេយ្យ និង​មហា​បាតុកម្ម​ភ្លើង​ទាន​ដែល​ប្រារព្ធ​ធ្វើ​ពី​ថ្ងៃ​ទី​១៩ ដល់​ថ្ងៃ​ទី២១ មេសា​នេះ រៀបចំ​ដោយ​ចលនា​យុវជន​ខ្មែរ​នៅ​ប្រទេស​កូរ៉េ​ខាងត្បូង សហការ​ជាមួយ​អង្គការ​ប្រជាធិបតេយ្យ​អាស៊ី និង​វេទិកា​សិទ្ធិមនុស្ស (Democracy Asia and HRs Forum) ដោយ​មាន​ការ​គាំទ្រ​ផ្ដល់​ទីកន្លែង និង​ការពារ​សន្តិសុខ​យ៉ាង​កក់ក្ដៅ​ពី​អាជ្ញាធរ​សាលាក្រុង​ទីក្រុង​ក្វាងជូ។ មហា​បាតុកម្ម​ភ្លើង​ទៀន​រៀបចំ​ដោយ​ពលករ​ខ្មែរ​នៅ​ទីក្រុង​ក្វាជូ​នេះ គឺជា​លើក​ទី​២​ហើយ​។ លើក​ទី​១ នៅ​ខែ​កក្កដា​ឆ្នាំ​២០១៨ ដើម្បី​សំដែង​ឆន្ទៈ​ប្រឆាំង​ការបោះឆ្នោត​នៅ​កម្ពុជា បន្ទាប់ពី​របប​ក្រុងភ្នំពេញ​រំលាយ​គណបក្ស​សង្គ្រោះជាតិ និង​ចាប់​មេ​គណបក្ស​ប្រឆាំង​នេះ​ដាក់គុក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល