មន្ត្រី​បក្ស​ភ្លើងទៀន​នៅ​ភ្នំពេញ​រក្សា​ជំហរ​មិន​ចុះ​ចូល​បក្ស​កាន់អំណាច​ជា​ថ្នូរ​នឹង​សេរីភាព

ដោយ ច័ន្ទ ដារ៉ូ
2024.01.29
មន្ត្រី​បក្ស​ភ្លើងទៀន​នៅ​ភ្នំពេញ​រក្សា​ជំហរ​មិន​ចុះ​ចូល​បក្ស​កាន់អំណាច​ជា​ថ្នូរ​នឹង​សេរីភាព ប្រធានស្ដីទីគណបក្សភ្លើងទៀនរាជធានីភ្នំពេញលោក ខឹម ចាន់វណ្ណៈ ដែលត្រូវបានសមត្ថកិច្ចចាប់ខ្លួនថ្ងៃទី ១៥ ខែមករា ឆ្នាំ២០២៤
រូប​៖ ពលរដ្ឋ​ផ្តល់ឱ្យ

មន្ត្រី​បក្ស​ភ្លើងទៀន​នៅ​ភ្នំពេញ​ដែល​អាជ្ញាធរ​ទើប​ចាប់ខ្លួន​កាល​ពី​ពេល​ថ្មីៗ​នេះ រក្សា​ជំហរ​មិន​ចុះចូល​ជាមួយ​បក្ស​កាន់អំណាច​ដើម្បី​ប្តូរ​នឹង​សេរីភាព​ឡើយ​។ គ្រួសារ និង​មន្ត្រី​សិទ្ធិមនុស្ស​ចាត់ទុក​ការ​ចាប់ខ្លួន​នេះ​ថា ជា​ការ​គំរាមកំហែង​ផ្នែក​នយោបាយ ហើយ​ស្នើ​ឱ្យ​តុលាការ​ទម្លាក់​ការ​ចោទប្រកាន់​និង​ដោះលែង​សមាជិក​បក្ស​ប្រឆាំង​ទាំងនោះ​ឱ្យ​មាន​សេរីភាព​ឡើង​វិញ។

ប្រពន្ធ​មន្ត្រី​គណបក្ស​ភ្លើងទៀន​នៅ​រាជធានី​ភ្នំពេញ​លោក ខឹម ចាន់វណ្ណៈ គឺ​អ្នកស្រី ឡង់ សូដានី ប្រាប់​វិទ្យុ​អាស៊ីសេរី​នៅ​ថ្ងៃទី​២៨ ខែ​មករា ថា អាជ្ញាធរ​បញ្ជូន​ប្តី​អ្នកស្រី​យក​ទៅ​ឃុំ​នៅក្នុង​បន្ទប់​តូច​ចង្អៀត​ដែល​មាន​អ្នកទោស​ជាង ១៥០​នាក់ ទោះ​យ៉ាងណា​ប្តី​អ្នកស្រី​នៅតែ​ស៊ូទ្រាំ​ដោយ​រក្សា​ជំហរ​ស្មោះត្រង់ និង​ស្មារតី​រឹងមាំ​ដដែល។ ស្ត្រី​ដែល​ជា​ក្រុមប្រឹក្សា​សង្កាត់​កាកាប ១​រូប​នេះ​អះអាង​ថា ប្តី​អ្នកស្រី​ជា​មនុស្ស​ស្អាតស្អំ ពីព្រោះ​កន្លង​មក​គាត់​មិន​បាន​ពាក់ព័ន្ធ​ការ​ក្លែងបន្លំ​ឯកសារ​រៀបចំ​បញ្ជី​បេក្ខជន​សង្កាត់​ដែល​គេ​រៀបចំ​មនុស្ស​ឱ្យ​ប្តឹង​ប្តី​អ្នកស្រី​នោះ​ទេ។ ម្យ៉ាងទៀត​អ្នកស្រីថា ករណីនេះ​ក៏​ជា​ការ​ដាក់​សម្ពាធ​នយោបាយ​មក​លើ​ប្តី​អ្នកស្រី​បន្ថែម​ទៀត​ដែរ ដោយសារ​ក្រោយ​ពេល​ចាប់ខ្លួន​ភ្លាម មន្ត្រី​មានអំណាច​បាន​មក​អូសទាញ​ឱ្យ​ចុះចូល​គណបក្ស​ប្រជាជន​កម្ពុជា​ដើម្បី​ដោះដូរ​នឹង​ការ​ដោះលែង​ប៉ុន្តែ​អ្នកស្រី និង​ប្តី​បាន​បដិសេធ។

អ្នកស្រី ឡង់ សូដានី៖ «គាត់​មិន​បាន​ធ្វើ​អ្វី​ខុស​អ៊ីចឹង ហើយ​អាជ្ញាធរ​មក​ចាប់​គាត់​ដាក់​ពន្ធនាគារ ខ្ញុំ​គិត​ថា វា​អយុត្តិធម៌។ គាត់​ស៊ូទ្រាំ​គឺ​គាត់​អត់​ចុះចូល​ទេ​នេះ ជា​ជំហរ​ដែល​គាត់​ប្រាប់​មក​ខ្ញុំ​អ៊ីចឹង ហើយ​ខ្ញុំ​គោរព​តាម​ឆន្ទៈ​ប្តី​របស់​ខ្ញុំ​ជានិច្ច។ ខ្ញុំ​ស្នើ​ឱ្យ​តុលាការ​ជួយ​រក​ភាព​ស្អាត​ស្អំ​ឱ្យ​គាត់ ដោះលែង​ឱ្យ​គាត់​មក​ជួប​ជុំ​គ្រួសារ​វិញ»

ស្រដៀង​គ្នា​នេះ​ដែរ កូនប្រុស​មន្ត្រី​បក្ស​ភ្លើងទៀន​នៅ​ខណ្ឌ​ជ្រោយចង្វារ រាជធានី​ភ្នំពេញ​អ្នកស្រី ឆាយ ចិន្តា គឺ​លោក ចាន់ រិទ្ធី ព្រួយ​បារម្ភ​ពី​សុខភាព​ម្តាយ​ជា​ខ្លាំង ពី​ព្រោះ​គាត់​មាន​វ័យចាស់ និង​មាន​ជំងឺ​បេះដូង ជំងឺ​ទឹកនោមផ្អែម​ដែល​ត្រូវ​លេបថ្នាំ​មើល​ថែទាំ​ឱ្យ​បាន​ដិត​ដល់​ពី​កូនចៅ ខណៈ​ឆ្មាំ​ពន្ធនាគារ (ម២) មិន​ទាន់​អនុញ្ញាត​ឱ្យ​គ្រួសារ​ចូល​សួរសុខទុក្ខ​នៅឡើយ​។ លោក​ឱ្យ​ដឹង​ថា ការ​ចាប់ខ្លួន​ម្តាយ​របស់​លោក​ជា​រឿង​អយុត្តិធម៌ និង​ធ្វើ​ឱ្យ​គ្រួសារ​លោក​ឈឺចាប់​កាន់តែ​ខ្លាំង ក្រោយ​ពេល​ម្តាយ​លោក​បដិសេធ​ចុះចូល​ជាមួយ​គណបក្ស​កាន់​អំណាច។

លោក ចាន់ រិទ្ធី៖ «ខ្ញុំ​ស្តាប់​ទៅ​វា​ជា​រឿង​មួយ​ដែល​អស់​សំណើច​មែនទែន ដោយសារ​ម្តាយ​របស់ខ្ញុំ​ជា​បេក្ខជន​ឈរឈ្មោះ​ឱ្យ​គណបក្ស​ភ្លើងទៀន​នៅ​សង្កាត់​ព្រែកលៀប​ទេ ប៉ុន្តែ​ការចោទប្រកាន់​ដែល​លើកឡើង​គឺ​នៅ​សង្កាត់​ច្បារអំពៅ ខណ្ឌ​ច្បារអំពៅ ខ្ញុំ​គិតថា​រឿង​នេះ​អយុត្តិធម៌​មែន​ទែន»

សមត្ថកិច្ច​ក្រុងភ្នំពេញ​បាន​ចាប់ខ្លួន​ប្រធាន​ស្តីទី​គណបក្ស​ភ្លើងទៀន​ប្រចាំ​រាជធានី​ភ្នំពេញ និង​ជា​ក្រុម​ប្រឹក្សា​សង្កាត់​កាកាប២ លោក ខឹម ចាន់វណ្ណៈ រួម​ជាមួយ​ប្រធាន​ចលនា​ស្ត្រី​បក្ស​ភ្លើងទៀន​នៅ​ខណ្ឌ​ជ្រោយចង្វារ ម្នាក់​ទៀត គឺ​អ្នកស្រី ឆាយ ចិន្តា កាលពី​ថ្ងៃទី​១៥ ខែ​មករា។ សាលាដំបូង​រាជធានី​ភ្នំពេញ​ចោទប្រកាន់​ពួកគេ​ពី​បទ «​ក្លែងបន្លំ​ឯកសារ និង​ប្រើប្រាស់​ឯកសារ​ក្លែង » ទាក់ទង​នឹង​ការរៀបចំ​បញ្ជី​បេក្ខជន​ឈរឈ្មោះ​បោះឆ្នោត​ជ្រើសរើស​ក្រុម​ប្រឹក្សាឃុំ​សង្កាត់​កាលពី​ឆ្នាំ​២០២២។ រីឯ​មេធាវី​ការពារ​ក្តី​ពួកគាត់​គឺ​លោក ជូង ជូងី កាល​ពី​ថ្ងៃ​ទី១៧ ខែ​មករា បាន​ប្តឹង​ឧទ្ធរណ៍​ជំទាស់​នឹង​ដីកា​សម្រេច​ឃុំខ្លួន​បណ្ដោះអាសន្ន​របស់​សាលាដំបូង​រាជធានី​ភ្នំពេញ។

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​សាលាដំបូង​រាជធានី​ភ្នំពេញ​លោក ប្លង់ សុផល ដើម្បី​សាកសួរ​រឿង​នេះ​បាន​ទេ នៅ​ថ្ងៃ​ទី២៨ ខែ​មករា។

ជុំវិញ​រឿង​នេះ នាយក​ទទួលបន្ទុក​កិច្ចការ​ទូទៅ​នៃ​អង្គការសិទ្ធិមនុស្ស​លីកាដូ (Licado) លោក អំ សំអាត សង្កេត​ឃើញ​ថា ករណី​រៀបចំ​បញ្ជី​បេក្ខជន​ក្រុមប្រឹក្សាឃុំសង្កាត់​បាន​កើត​ឡើង តាំង​ពី​ឆ្នាំ​២០២២ ប៉ុន្តែ​អាជ្ញាធរ​ទើប​មក​ចាប់​ខ្លួន សកម្មជន​បក្ស​ភ្លើងទៀន​នៅ​ពេល​នេះ។ មន្ត្រី​សិទ្ធិមនុស្ស​រូប​នេះ​បារម្ភ​ថា បរិយាកាស​នយោបាយ​កាន់តែ​អាប់អួរ​នឹង​ធ្វើ​ឱ្យ​កម្ពុជា​រង​ការរិះគន់​ពី​សហគមន៍​ជាតិ​និង​អន្តរជាតិ​ថែមទៀត​ដោយសារតែ​សកម្មជន​នយោបាយ ជាពិសេស​អង្គ​បោះឆ្នោត​ដែល​ជា​ក្រុម​ប្រឹក្សា​ឃុំ​សង្កាត់ និង​បេក្ខជន​ឈរឈ្មោះ​របស់​គណបក្សប្រឆាំង​នៅតែ​រង​ការ​ចាប់ខ្លួន​ជា​បន្តបន្ទាប់។

លោក អំ សំអាត៖ «គេ​មើល​ឃើញ​ថា ការ​ចាប់ខ្លួន​ជា​រឿង​នយោបាយ​ច្រើនជាង​ការអនុវត្ត​ច្បាប់​ជាពិសេស​បទល្មើស​មិនមែន​ទើបតែ​កើត​ទេ គឺ​កើត​យូរ​មក​ហើយ។ ការ​ចាប់ និង​ការខ្លួន​ជា​បន្តបន្ទាប់​មកនេះ​កាន់តែ​ធ្វើ​ឱ្យ​បរិយាកាស​នយោបាយ​កាន់តែ​អាប់អួរ​ទៅវិញ ដែល​គេ​ចោទប្រកាន់​រួចហើយ​ថា​លទ្ធិ​ប្រជាធិបតេយ្យ​នៅ​ប្រទេស​កម្ពុជា​ហ្នឹង​ដំណើរការ​ថយក្រោយ ជា​ពិសេស​ការ​អនុវត្ត​សិទ្ធិ​សេរីភាព​ផ្នែក​នយោបាយ»

គិត​មក​ដល់​ពេល​នេះ​ថ្នាក់​ដឹកនាំ និង​សកម្មជន​គណបក្ស​ភ្លើង​ទៀន​ប្រមាណ ១០​នាក់​ត្រូវ​បាន​តុលាការ​ចោទប្រកាន់​ដាក់​ពន្ធនាគារ​ដូចៗ​គ្នា​ពី​បទ​ក្លែង​ឯកសារ​រៀបចំ​បញ្ជី​បេក្ខជន​ឈរ​ឈ្មោះ​ក្រុម​ប្រឹក្សាឃុំ​សង្កាត់ កាល​ពី​ឆ្នាំ​២០២២។ ប៉ុន្តែ​អ្នកខ្លះ​ត្រូវ​បាន​តុលាការ​ដោះលែង​មក​វិញ បន្ទាប់​ពី​ពួកគេ​បង្ខំចិត្ត​ប្រកាស​ចុះចូល​ជាមួយ​គណបក្ស​កាន់អំណាច​ដើម្បី​ជា​ថ្នូរ​ទទួល​បាន​សេរីភាព​មក​វិញ។ ទោះ​យ៉ាងណា តុលាការ​មិន​បាន​យក​ករណី​ដែល​នៅក្នុង​សំណុំរឿង​ដូចៗ​គ្នា ឬ​បទ​ចោទ​តែមួយ​នោះ​ទៅ​អនុវត្ត​បែបនេះ​លើ​អ្នក​ជាប់ឃុំ​នយោបាយ​ផ្សេងទៀត​ដែល​រក្សា​ជំហរ​តស៊ូ​រឹងមាំ​នៅក្នុង​ពន្ធនាគារ​ឡើយ។

អ្នក​ជំនាញ​សិទ្ធិមនុស្ស និង​ក្រុម​ប្រទេស​ប្រជាធិបតេយ្យ​ធំៗ​ជំរុញ​ដល់​រដ្ឋាភិបាល​របស់​លោក ហ៊ុន ម៉ាណែត ដោះលែង​អ្នក​ជាប់ឃុំ​ក្រោម​ហេតុផល​នយោបាយ ដើម្បី​បង្ហាញ​ពី​ឆន្ទៈ​ពិតប្រាកដ​ក្នុង​ការ​ស្តារ​ប្រជាធិបតេយ្យ និង​ការគោរព​សិទ្ធិមនុស្ស​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
ពលរដ្ឋ​ខ្មែរ-អូស្ត្រាលី​ម្នាក់ ដែល​រិះគន់​រដ្ឋាភិបាល​កម្ពុជា រង​ការ​វាយដំ​ពី​ជន​មិន​ស្គាល់​មុខ​មួយ​ក្រុម ពេល​ទៅ​លេង​ស្រុកខ្មែរ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។