យុទ្ធនាការបញ្ចប់អំពើនិទណ្ឌភាព មានអ្នកចូលរួមចុះហត្ថលេខាជិត ៦,០០០ នាក់ហើយ គិតមកត្រឹមព្រឹក ថ្ងៃទី ២៦ ខែកក្កដា។
យុទ្ធនាការនេះ ចាប់ផ្ដើមធ្វើនៅចំថ្ងៃបុណ្យខួបគម្រប់បួនឆ្នាំ នៃឃាតកម្មលោកបណ្ឌិត កែម ឡី គឺថ្ងៃទី ១០ ខែកក្កដា។
ប្រជាពលរដ្ឋ និងសកម្មជនគណបក្សសង្គ្រោះជាតិទាំងក្នុង និងនៅក្រៅប្រទេស គាំទ្រយុទ្ធនាការបញ្ចប់និទណ្ឌភាព ឬភាពគ្មានទោសពៃរ៍នៅកម្ពុជានេះ ដោយគ្រោងប្រមូលស្នាមមេដៃប្រជាពលរដ្ឋប្រមាណកន្លះលាននាក់ (៥០០.០០០នាក់) ដើម្បីដាក់ញត្តិ ទៅតុលាការអន្តរជាតិនានា ឲ្យជួយរកយុត្តិធម៌ជូនក្រុមជនរងគ្រោះ ដោយអំពើបាញ់សម្លាប់ទាំងអយុត្តិធម៌ ក្រោមរបបគ្រប់គ្រងរបស់លោក ហ៊ុន សែន។
គណបក្សសង្គ្រោះជាតិ យកយុទ្ធនាការនេះ ដើម្បីស្វែងរកយុត្តិធម៌ដល់សពមនុស្សមួយចំនួនទៀត រួមមានអ្នកស្រីពិសិដ្ឋ ពីលីកា ដែលជាតារាភាពយន្ត ព្រះតេជព្រះគុណ សំ ប៊ុនធឿន លោក ជា វិជ្ជា ដែលជាប្រធានសហជីពកម្មករ លោកឈុត វុទ្ធី ដែលជាសកម្មជនព្រៃឈើ និងអ្នកសារព័ត៌មាន សកម្មជននយោបាយ សហជីព និងប្រជាពលរដ្ឋទៀត ដែលបានស្លាប់បាត់បង់ជីវិតដោយអយុត្តិធម៌។
អ្នកស្រី មូរ សុខហួរ អនុប្រធានគណបក្សសង្គ្រោះជាតិថា យុទ្ធនាការលុបបំបាត់អំពើនិទណ្ឌភាព គឺដើម្បីរកយុត្តិធម៌ជូនមនុស្សគ្រប់រូប ដោយគ្មានការរើសអើង។ អ្នកស្រីអំពាវនាវឲ្យពលរដ្ឋខ្មែរទាំងអស់ រួមគ្នាគាំទ្រយុទ្ធនាការនេះ ដើម្បីជាសំឡេងលឺខ្លាំងដល់សហគមន៍អន្តរជាតិ ជាពិសេសតុលាការអន្តរជាតិ និងស្ថាប័នអង្គការសហប្រជាជាតិ ឲ្យជួយដាក់សម្ពាធរបបក្រុងភ្នំពេញ ក្នុងការបង្កើតគណៈកម្មការស៊ើបអង្កេតឯករាជ្យ ដើម្បីរកមុខអ្នកនៅពីក្រោយឃាតកម្មធំៗ នៅកម្ពុជា។ យុទ្ធនាការប្រមូលស្នាមមេដៃ ឬហត្ថលេខាគាំទ្រនេះ ធ្វើតាមបណ្ដាញអ៊ិនធើណិត តាមគេហទំព័រ change.orgក្រោមប្រធានបទជាភាសាអង់គ្លេសថា "Together We Fight to End Impunity" ឬប្រែថា យើងរួមគ្នាតស៊ូលុបបំបាត់អំពើនិទណ្ឌភាព"។ អ្នកចង់ចូលរួមគាំទ្រយុទ្ធនាការនេះ អាចស្វែងរកឃ្លា "Together We Fight to End Impunity" នេះនៅលើអ៊ិនធើណិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។