គ្រួសារខកចិត្តចំពោះមន្ត្រីពន្ធនាគារត្រពាំងផ្លុងមិនអនុញ្ញាតឱ្យសកម្មជនបក្សប្រឆាំង លោក គង់ សំអាន ដែលកំពុងមានជំងឺធ្មេញធ្ងន់ធ្ងរអាចចេញព្យាបាលនៅមន្ទីរពេទ្យជំនាញនៅខាងក្រៅពន្ធនាគារ។ ពួកគេស្នើដល់អាជ្ញាធរពាក់ព័ន្ធជួយអន្តរាគមន៍ ដើម្បីកុំឱ្យអាការៈជំងឺនេះកាន់តែធ្ងន់។ មន្ត្រីជាន់ខ្ពស់នៃអគ្គនាយកដ្ឋានពន្ធនាគារអះអាងថា អាជ្ញាធរនឹងពិនិត្យមើលស្ថានភាពជំងឺលោក គង់ សំអាន ដោយយកចិត្តទុកដាក់ និងមិនទុកឱ្យគាត់មានបញ្ហាសុខភាពនោះទេ។
គ្រួសារព្រួយបារម្ភអំពីស្ថានភាពជំងឺមាត់ធ្មេញ និងសុខទុក្ខរបស់មន្ត្រីបក្សប្រឆាំងលោក គង់ សំអាន ជាខ្លាំង។ ពួកគេស្នើយ៉ាងទទូចដល់អាជ្ញាធរពន្ធនាគារអនុញ្ញាតឱ្យសាច់ញាតិពួកគេចេញមកពិនិត្យ និងព្យាបាលធ្មេញនៅមន្ទីរពេទ្យឯកទេសខាងក្រៅឱ្យទាន់ពេលវេលា។
កូនស្រីមន្ត្រីគណបក្សប្រឆាំងនៅខេត្តត្បូងឃ្មុំ លោក គង់ សំអាន គឺកញ្ញា គង់ មុយលី ប្រាប់វិទ្យុអាស៊ីសេរីនៅថ្ងៃទី២៧ ខែមីនាថា ឪពុកកញ្ញាជាប់ពន្ធនាគារជិត ៣ឆ្នាំមកនេះ កើតជំងឺប្រចាំកាយជាច្រើន ដូចជា ជំងឺលើសឈាម ជំងឺក្រពះពោះវៀន ដុះសាច់តម្រងនោម រមាស់ និងជំងឺធ្មេញជាដើម។ កញ្ញាឱ្យដឹងថា ឪពុកកញ្ញា មានសភាពរាងកាយស្គមស្គាំង និយាយសំឡេងតិចៗ ត្អូញត្អែរប្រាប់ប្រពន្ធ និងកូនៗ ពេលចូលសួរសុខទុក្ខ កាលពីថ្ងៃទី២៦ ខែមីនាថា គាត់ប៉ុន្មានសប្ដាហ៍ចុងក្រោយនេះ ធ្មេញជួរខាងក្រោមស្រោបដែកឈឺចាប់បណ្ដាលឱ្យពិបាកហូបចុក និងសម្រាន្តមិនលក់។ កញ្ញាបន្តថា ឪពុករបស់កញ្ញាបានស្នើសុំមន្ត្រីពន្ធនាគារ ដើម្បីចេញមកព្យាបាលខាងក្រៅដែរ តែមន្ត្រីនៅទីនោះបដិសេធ ដោយមិនបញ្ជាក់មូលហេតុនោះទេ។ កូនស្រីមន្ត្រីបក្សប្រឆាំងរូបនេះថ្លែងថា គ្រួសារខ្លោចចិត្តពេលឃើញឪពុក ដែលគ្មានទោសកំហុស បែរជាជាប់គុកដោយអយុត្តិធម៌ និងរងទុក្ខលំបាក គ្មានការយកចិត្តទុកដាក់មើលថែត្រឹមត្រូវពីមន្ត្រីនៅទីនោះ។
កញ្ញា គង់ មុយលី៖«ថ្នាំពេទ្យឈឺថ្កាត់អីបានអង្គការលីកាដូជួយព្យាបាលទៅបានធូរស្រាលខ្លះទៅ ចំណែកធ្មេញហ្នឹងខ្ញុំមិនដឹងថា គេ(មន្ត្រីពន្ធនាគារ)គិតយ៉ាងម៉េចទេ ដូចជា ពិបាកណាស់តាមប៉ារបស់ខ្ញុំនិយាយមកគាត់ពិបាកសុំគេដោយគេមិនអនុគ្រោះឱ្យយើងទៅព្យាបាលទេ ហើយខ្ញុំមានតែទទូចសុំហើយសុំទៀតសុំខាងពន្ធនាគារយកគាត់ទៅព្យាបាលធ្មេញផង បើលោកមិនជឿទៅសួរគាត់ក៏ដឹងដែរ ធ្មេញគាត់យ៉ាងមិច គាត់ឈឺដល់កម្រិតណា លោកគួរតែដឹងគួរតែយល់ហើយយើងជាខ្មែរដូចគ្នា»។
ជំងឺមាត់ធ្មេញរបស់លោក គង់ សំអាន បានធ្វើទុក្ខជាលើកទី២ ដោយលើកទី១ មន្ត្រីពន្ធនាគារបញ្ជូនមន្ត្រីគណបក្សសង្គ្រោះជាតិរូបនេះទៅពិនិត្យ និងព្យាបាលជំងឺនៅមន្ទីរពេទ្យរុស្ស៊ី កាលពីខែសីហា ឆ្នាំ២០២២ ក្រោយពេលគ្រួសារ និងក្រុមយុវជនសង្គមនាំគ្នាដាក់ញត្តិជូនរដ្ឋមន្ត្រីក្រសួងមហាផ្ទៃលោក ស ខេង ស្នើសុំជួយអន្តរាគមន៍កន្លងទៅ។
មនុស្សមួយចំនួនយល់ថាជំងឺធ្មេញស្ដាប់ទៅសាមញ្ញ តែអ្នកជំនាញវេជ្ជសាស្ត្រលើកឡើងថា ជំងឺមាត់ធ្មេញមិនមែនជារឿងតូចតាចនោះទេ ពីព្រោះជំងឺមាត់ធ្មេញអាចធ្វើឱ្យមនុស្សងាយរងគ្រោះ ឬអាចមានគ្រោះថ្នាក់ដល់ជីវិតបាន បើសិនអ្នកជំងឺមិនទទួលបានការព្យាបាល និងថែទាំឱ្យបានត្រឹមត្រូវពីគ្រូពេទ្យទេនោះ។
ឆ្លើយតបរឿងនេះ អ្នកនាំពាក្យអគ្គនាយកដ្ឋានពន្ធនាគារ លោក នុត សវនា ប្រាប់វិទ្យុអាស៊ីសេរីថា លោកមិនទាន់ទទួលព័ត៌មានជុំវិញជំងឺធ្មេញរបស់លោក គង់ សំអាន នៅឡើយទេ ប៉ុន្តែលោកនឹងសួរនាំមន្ត្រីពន្ធនាគារត្រពាំងផ្លុងជុំវិញរឿងនេះ។ ទោះយ៉ាងណាក្ដី លោកអះអាងថា មន្ត្រីរបស់លោកតែងតែយកចិត្តទុកដាក់ចំពោះសុខភាពអ្នកជាប់ឃុំទាំងអស់ដោយអាជ្ញាធរពន្ធនាគារមិនទុកបណ្ដាលឱ្យពួកគេមានបញ្ហាសុខភាពធ្ងន់ធ្ងរនោះទេ។
លោក នុត សវនា៖«រឿងហ្នឹងមានតែសួរទៅមន្ត្រីយើងអំពីស្ថានភាពជាក់ស្ដែងវាយ៉ាងម៉េច ជួនកាលគេ(មន្ត្រី)មានហេតុផលដែរ បញ្ហាខ្លះគឺដោយសារកង្វះមន្ត្រីអ៊ីចឹងទៅដោយអត់មានអ្នកណាជូនគាត់ទៅ ឬក៏ស្ថានភាពគាត់ហ្នឹងមិនធ្ងន់ធ្ងរដូចការអះអាងរហូតដល់ថ្នាក់ត្រូវបញ្ជូនចេញទៅក្រៅ ប៉ុន្តែយើងសួរមើលសិនថារឿងហ្នឹងវាយ៉ាងម៉េច»។
ទោះជាយ៉ាងណា ការបញ្ជូនអ្នកជាប់ឃុំទៅព្យាបាលនៅមន្ទីរពេទ្យក្រៅពន្ធនាគារនេះ សាធារណជន និងក្រុមអ្នកការពារសិទ្ធិមនុស្សតែងរិះគន់អាជ្ញាធរ ចំពោះការអនុវត្តមិនស្មើភាពគ្នារវាងអ្នកជាប់ឃុំដោយសារមូលហេតុនយោបាយ និងឧក្រិដ្ឋជន ដែលបានប្រព្រឹត្តបទល្មើសធំៗ ដែលមានលុយមានអំណាច។ ចំណុចមិនស្មើភាពគ្នានោះ គឺពួកឧក្រិដ្ឋជនខ្លះ ទោះជាត្រូវតុលាការផ្ដន្ទាទោសដាក់ពន្ធនាគារពីបទឃាតកម្ម ឬជួញដូរគ្រឿងញៀនទ្រង់ទ្រាយធំក៏ដោយ ក៏ពួកគេមិនបានជាប់ឃុំក្នុងពន្ធនាគារតាមអំណាចសាលក្រមរបស់តុលាការដែរ។
ជាឧទាហរណ៍ ឧកញ៉ា ថោង សារ៉ាត់ ដែលត្រូវបានតុលាការក្រុងភ្នំពេញផ្ដន្ទាទោសដាក់ពន្ធនាគារអស់មួយជីវិតក្នុងរឿងក្ដីបាញ់សម្លាប់ឧកញ៉ា អ៊ឹង ម៉េងជឺ កាលពីឆ្នាំ ២០១៥ នោះបានជាប់ឃុំក្នុងពន្ធនាគារមិនដល់មួយសប្ដាហ៍ផង រួចក៏ត្រូវបានគេបញ្ជូនមកស្នាក់នៅបន្ទប់វីអាយភី (VIP) ក្នុងមន្ទីរពេទ្យខាងក្រៅពន្ធនាគារវិញ រហូតទាល់តែសាលាឧទ្ធរណ៍សម្រេចដោះលែងឱ្យនៅក្រៅឃុំនៅខែវិច្ឆិកា ឆ្នាំ២០១៩។ រីឯបងប្រុសបង្កើតរបស់លោក គិត ម៉េង គឺលោក គិត ធាង វិញ តុលាការក្រុងភ្នំពេញបានកាត់ទោសឱ្យជាប់ពន្ធនាគារ ៤ឆ្នាំ ក្នុងករណីជួញដូរគ្រឿងញៀនជិត ៥០ គីឡូក្រាម ប៉ុន្តែលោកជាប់ឃុំប្រមាណកន្លះខែ ក៏ត្រូវបានគេបញ្ជូនឱ្យទៅស្នាក់នៅក្នុងបន្ទប់វីអាយភី (VIP) នៅមន្ទីរពេទ្យខាងក្រៅពន្ធនាគារដែរ រហូតទាល់តែសាលាឧទ្ធរណ៍កាត់តម្រឹមទោសត្រឹម ២ឆ្នាំ ហើយដោះលែងលោកនៅឆ្នាំ២០២១។ ឧកញ៉ាទាំងពីររូបអាចរស់នៅក្រៅពន្ធនាគារបានយូរតាមចិត្តចង់ ដោយសារតែហេតុផលសុខភាពនេះឯង។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថាជនជាប់ឃុំមានសិទ្ធិប្រាស្រ័យទាក់ទងជាមួយគ្រួសារ មិត្តភ័ក្ដិ ជាពិសេសមានសិទ្ធិទទួលបានសេវាថែទាំព្យាបាលដោយគ្មានការរើសអើសដូចពលរដ្ឋដទៃទៀតដែរ លើកលែងសិទ្ធិមួយចំនួនដែលតុលាការដកហូតតែប៉ុណ្ណោះ។ លោកបញ្ជាក់ថា បើសិនជនជាប់ឃុំមានជំងឺធ្ងន់ធ្ងរដែលប៉ុស្តិ៍សុខភាពនៅក្នុងមណ្ឌលអប់រំកែប្រែមិនមានលទ្ធភាពព្យាបាលបានទេនោះ អាជ្ញាធរត្រូវបញ្ជូនលោក គង់ សំអាន ទៅព្យាបាលនៅមន្ទីរពេទ្យជំនាញខាងក្រៅដើម្បីឱ្យគាត់ទទួលបានការពិនិត្យនិងព្យាបាលជំងឺធ្មេញបានត្រឹមត្រូវ។
លោក អំ សំអាត៖«បញ្ហាជំងឺមិនថាធ្មេញ ភ្នែក ត្រចៀក គឺវាអាចក្លាយទៅជាបញ្ហាទាំងអស់ប៉ះពាល់ដល់សុខភាព អ៊ីចឹងវាត្រូវមានសិទ្ធិស្មើគ្នាក្នុងការព្យាបាល បើសិនជាជំងឺធ្មេញរបស់គាត់តម្រូវឱ្យជួបពេទ្យជំនាញខាងធ្មេញ អាហ្នឹងខាងពន្ធនាគារអាចទាក់ទងព្រះរាជអាជ្ញា ឬអគ្គនាយកដ្ឋានដើម្បីបញ្ជូនទៅពេទ្យជំនាញពិនិត្យ និងព្យាបាល»។
លោក គង់ សំអាន អាយុ ៧១ឆ្នាំ គឺជាអតីតគ្រូបង្រៀន និងជាសមាជិកក្រុមប្រឹក្សាស្រុកមេមត់នៃគណបក្សសង្គ្រោះជាតិ។ លោកត្រូវបានអាជ្ញាធរចាប់ខ្លួនកាលពីដើមខែកញ្ញា ឆ្នាំ២០២០។ តុលាការខេត្តត្បូងឃ្មុំបានផ្ដន្ទាទោសលោកឱ្យជាប់ពន្ធនាគារចំនួន ៧ឆ្នាំ ពីបទរួមគំនិតក្បត់ ដោយសារលោកបានគាំទ្រនយោបាយរបស់ថ្នាក់ដឹកនាំបក្សប្រឆាំង និងហូបនំបញ្ចុកជុំគ្នាជាមួយសមាជិកដទៃទៀត នៃគណបក្សសង្គ្រោះជាតិ ជាពិសេសលោកបានគាំទ្រដំណើរវិលចូលស្រុកវិញរបស់លោក សម រង្ស៊ី កាលពីខែវិច្ឆិកា ឆ្នាំ២០១៩។ កាលពីដើមឆ្នាំ២០២២ តុលាការកំពូលតម្កល់សេចក្ដីសម្រេចរបស់សាលាដំបូងខេត្តត្បូងឃ្មុំ ដែលបានកាត់ទោសឱ្យលោក គង់ សំអាន ជាប់ពន្ធនាគារ ៧ឆ្នាំដដែល ដោយសហគមន៍ជាតិ និងអន្តរជាតិចាត់ទុកថា ជាអ្នកទោសនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។