គ្រួសារ​ចាត់​ទុក​ថា​ការ​កាត់​ទោស​ លោក​ថាច់​ សេដ្ឋា​ ឱ្យ​ជាប់​ពន្ធនាគារ​​៣ឆ្នាំ​បន្ថែម​ទៀត​ គឺ​ជា​ការ​ធ្វើ​បាប​គ្រួសារ

ដោយ សេក បណ្ឌិត
2023.10.18
គ្រួសារ​ចាត់​ទុក​ថា​ការ​កាត់​ទោស​ លោក​ថាច់​ សេដ្ឋា​ ឱ្យ​ជាប់​ពន្ធនាគារ​​៣ឆ្នាំ​បន្ថែម​ទៀត​ គឺ​ជា​ការ​ធ្វើ​បាប​គ្រួសារ ប្រពន្ធលោក ថាច់ សេដ្ឋា (អាវក្រហម) និង​អ្នក​គាំទ្រ ទៅ​តាមដាន​សវនាការ​កាត់ក្ដី​លោក ថាច់ សេដ្ឋា នៅ​សាលាដំបូងរាជធានី​ភ្នំពេញ ថ្ងៃ​ទី១៨ ខែតុលា ឆ្នាំ២០២៣។
រូបពីពលរដ្ឋ

ក្រុម​គ្រួសារ ចាត់​ទុក​ថា​ការ​ផ្ដន្ទា​ទោស​មក​លើ​លោក ថាច់ សេដ្ឋា​ឱ្យ​ជាប់​ពន្ធនាគារ ៣ឆ្នាំ​បន្ថែម​ទៀត​ ដោយ​សាលា​ដំបូង​រាជធានី​ភ្នំពេញ​នៅ​ពេល​នេះ​ គឺ​ជា​រឿង​អយុត្តិធម៌​ និង​ជា​ការ​ធ្វើ​បាប​​គ្រួសារ​ ខណៈ​មេធាវី​ថា ​នឹង​បន្ត​ប្ដឹង​ទៅ​សាលាឧទ្ធរណ៍​ប្រឆាំង​ទៅ​នឹង​​សាលក្រម​នេះ​។ ​មន្ត្រី​សង្គម​ស៊ីវិល​សោក​ស្ដាយ​ដែល​អាជ្ញាធរ​កម្ពុជា​ចាត់​ទុក​ការ​ប្រើ​ប្រាស់​សេរីភាព​បញ្ចេញ​មតិ​របស់​ពលរដ្ឋ​ដែល​គាំពារ​ដោយ​ច្បាប់​ជាតិ​ និង​អន្តរជាតិ​គឺ​ជា​បទ​ល្មើស។

ការ​ទាមទារ​យុត្តិធម៌​ពី​ក្រុមគ្រួសារ និង​មេធាវី​របស់​អនុប្រធាន​គណបក្ស​ភ្លើង​ទៀន​ លោក ថាច់ សេដ្ឋា​នេះ​ ក្រោយ​សាលាដំបូង​រាជធានី​ភ្នំពេញ​នៅ​ព្រឹក​ថ្ងៃទី១៨ ខែ​តុលា​ ប្រកាស​សាល​ក្រម​ផ្ដន្ទាទោស​ លោក ថាច់ សេដ្ឋា ដែល​កំពុង​មាន​ជំងឺ​ប្រចាំ​កាយ​ធ្ងន់ធ្ងរ​ ឱ្យ​ជាប់​ពន្ធនាគារ​រយៈ​ពេល​ ៣ឆ្នាំ​ និង​ពិន័យ​ជា​ប្រាក់​ ៤លានរៀល ក្រោម​​បទ​ញុះញង់​បង្ក​ឱ្យ​មាន​ភាព​វឹកវរ​ក្នុង​សង្គម និង​បទ​ញុះញង់​ឱ្យ​មាន​ការ​រើស​អើង​ពូជ​សាសន៍​តាម​មាត្រា​ ៤៩៤ ៤៩៥ និង៤៩៦ នៃ​ក្រម​ព្រហ្មទណ្ឌ។​

ក្រោយ​ចៅក្រម​ជំនុំជម្រះ​​ លោកស្រី​ ឈុន​ ដាវី​ ប្រកាស​សាលក្រម​​ផ្ដន្ទាទោស​នេះ​ លោក​ ថាច់​ សេដ្ឋា​ បាន​​ប្រាប់​ទៅ​កាន់​មន្ត្រី​​អង្គការ​សហប្រជាជាតិ​ប្រចាំ​នៅ​កម្ពុជា​ មន្ត្រី​សហភាព​​អឺរ៉ុប និង​មន្ត្រី​ស្ថាន​ទូត​អាល្លឺម៉ង់​ដែល​កំពុង​ចូល​រួម​ឃ្លាំ​មើល​ការ​ប្រកាស​សាលក្រម​នៅ​ក្នុង​បន្ទប់​សវនាការ​ ​ឱ្យ​ជួយ​សង្គ្រោះ​ប្រជាធិបតេយ្យ​នៅ​កម្ពុជា។

លោក ថាច់​ សេដ្ឋា​ថ្លែង​ថា​៖ «សូម​លោក​ជួយ​សង្គ្រោះ​ប្រជាធិបតេយ្យ​នៅ​កម្ពុជា​ផង​ លោក​ឃើញ​ផ្ទាល់​ភ្នែក​ ឮ​ផ្ទាល់​ត្រចៀក​ពី​លទ្ធិប្រជាធិបតេយ្យ​នៅ​កម្ពុជា​»។​​​​​​

ក្រោយ​ចេញ​ពី​សវនាការ​សហ​មេធាវី ដែល​ការពារ​ក្ដី​ឱ្យ​លោក ថាច់ សេដ្ឋា គឺ​លោក​បណ្ឌិត សឺន ជុំជួន មាន​ប្រសាសន៍​ថា​ តាមរយៈ​ការ​សួរ​ដេញ​ដោល​ក្នុង​សវនាការ​ និង​តាម​រយៈ​អង្គហេតុ​ លោក​រំពឹង​​ថា​ កូន​ក្ដី​របស់​លោក​បាន​រួច​ពី​បទ​ចោទ។ បណ្ឌិត​​ សឺន ជុំជួន ចាត់​ទុក​ការ​ផ្ដន្ទាទោស​នេះ​ថា ​ជា​រឿង​អយុត្តិធម៌ ហើយ​លោកជឿ​ថា សាធារណជន​នឹង​យល់​ឃើញ​បែប​នេះ​ដែរ។

លោក សឺន ជុំជួន៖ «ធម្មតា​ទុក​ឱ្យ​ប្រជា​ពលរដ្ឋ​អ្នក​ស្ដាប់​ អ្នក​តាម​ដាន​វិនិច្ឆ័យ​ថា​ យុត្តិធម៌​ ឬ​អយុត្តិធម៌​សម្រាប់​កូន​ក្ដី​ខ្ញុំ​​​ សម្រាប់​​ខ្ញុំ​ជា​សហ​មេធាវី​មិន​សប្បាយចិត្ត​ទេ ដោយ​ផ្អែក​ទៅ​តាម​អង្គហេតុ​ ដែល​យើង​បាន​ពិភាក្សា ដេញ​ដោល​កន្លង​មក​ពី​ថ្ងៃ​ទី​២១ គឺ​យើង​ពិបាក​ទទួល​យក​ណាស់»

ក្នុង​ពេល​សួរ​ដេញ​ដោល​ក្នុង​សវនាការ​កន្លង​ទៅ​ តំណាង​អយ្យការ លោក សេង ហៀង បាន​ចោទ​ប្រកាន់​ថា​ការ​ដែល​ លោក ថាច់ សេដ្ឋា លើកឡើងនៅវេទិកាជាមួយពលករកូរ៉េកាលពីថ្ងៃទី១៣ ខែ​មករា ឆ្នាំ២០២៣ អំពី​ប្រវត្តិ​គណបក្ស​ប្រជាជន ស្តូប​មិត្តភាព​កម្ពុជា​វៀតណាម និង​ប្រវត្តិ ៧មករា នេះ​គឺ​ជា​អំពើ​ទុច្ចរិត​ និង​មាន​គោល​បំណង​បញ្ឆេះ​កំហឹង​ដល់​ពលរដ្ឋ​ឱ្យ​ស្អប់​គណបក្ស​ប្រជាជន​កម្ពុជា​ រដ្ឋាភិបាល និង​មាន​ចេតនា​កេង​ចំណេញ​នយោបាយ​មុន​ការ​បោះ​ឆ្នោត​ខិត​ចូល​មក​ដល់។

ឆ្លើយ​តប​នឹង​សំនួរ​របស់​តំណាង​អយ្យការ​នេះ លោក ថាច់ សេដ្ឋា បាន​អះអាង​ថា​ក្នុង​នាម​រូប​លោក​ជា​អ្នក​នយោបាយ និង​ជា​អតីត​គ្រូ​ប្រវត្តិសាស្ត្រ​ផង បើ​មិន​ឱ្យ​លោក​និយាយ​រឿង​ប្រវត្តិសាស្ត្រ តើ​ឱ្យ​លោក​និយាយ​រឿង​កំប្លែង​ឬ​យ៉ាង​ណា។ លោក ថាច់ សេដ្ឋា បន្ថែម​ទៀត​ថា​ ការ​ដែល​លោក​និយាយ​ពី​ប្រវត្តិសាស្ត្រ​ ដើម្បី​ឱ្យ​កូន​ខ្មែរ​មាន​ស្មារតី​ភ្ញាក់​រលឹក មាន​ស្មារតី​ជាតិ​និយម​ និង​ដឹង​ពី​ល្បិច​កល​របស់​ប្រទេស​ជិត​ខាង​ ដែល​លោក​សំដៅ​ដល់​ប្រទេស​វៀតណាម ​ដែល​ព្យាយាម​បំបែក​បំបាក់​ខ្មែរ។

ក្រៅ​ពី​សំណុំ​រឿង​ញុះញង់​នេះ​ លោក ថាច់ សេដ្ឋា កាល​ពី​ថ្ងៃ​ទី​២១ ខែ​កញ្ញា​ ត្រូវ​បាន​បាន​សាលា​ដំបូង​រាជធានី​ភ្នំពេញ​ ផ្ដន្ទាទោស​ឱ្យ​ជាប់​ពន្ធនាគារ​រយៈ​ ១៨ខែ ក្នុង​សំណុំ​រឿង​ចេញ​សែក​ស្អុយ​ ឬ​សែក​អត់​ប្រាក់។ បើ​សរុប​ទាំង​ទោស​មុន​ និង​ក្រោយ​ លោក ថាច់ សេដ្ឋា ដែល​ជា​អ្នក​នយោបាយ​ប្រឆាំង​ដើម​កំណើត​ខ្មែរ​ក្រោម​រូប​នេះ ត្រូវ​បាន​តុលាការ​ផ្ដន្ទាទោស​ជាប់​ពន្ធនាគារ​ចំនួន ៤ឆ្នាំ​កន្លះ។

លោក​បណ្ឌិត សឺន ជុំជួន ថា ចំពោះ​ករណី​ផ្ដន្ទាទោស​កូន​ក្ដី​​សំណុំ​រឿង​ចេញ​សែក​ស្អុយ លោក និង​មេធាវី​ផ្សេង​ទៀត បាន​ប្ដឹង​ជំទាស់​ទៅ​សាលាឧទ្ធរណ៍​រួច​ទៅ​ហើយ ចំណែក​សំណុំ​រឿង​ញុះញង់​​នេះ​លោក គ្រោង​​នឹង​ប្ដឹង​ទៅ​សាលា​ឧទ្ធរណ៍​ឆាប់ៗ នេះ​ដែរ។

ដោយ​ឡែក​ប្រពន្ធ​លោក ថាច់ សេដ្ឋា គឺ លោក​ស្រី ថាច់ សុខបូរ៉ានី យំ​បណ្ដើរ និយាយ​បណ្ដើរ​ថា​ការ​សម្រេច​របស់​តុលាការ​នេះ គឺ​ជា​រឿង​អយុត្តិធម៌ និង​ជា​បំបែក​បំបាក់​មក​លើ​គ្រួសារ​លោកស្រី។ លោក​ស្រី ថាច់ សុខបូរ៉ានី ថា ប្ដី​លោកស្រី​ជា​អ្នក​ស្នេហា​ជាតិ និង​និយាយ​តែ​ការ​ពិត មិន​បាន​ប្រព្រឹត្ត​បទ​ញុះញង់​​​​ដូច​ការ​ចោទ​ប្រកាន់​នេះ​ទេ។

លោកស្រី ថាច់ សុខបូរ៉ានី៖ «ឱ្យ​ពួក​ខ្ញុំ​បែក​បាក់​គ្រួសារ ដាក់​បន្ទុក​នេះ ដាក់​បន្ទុក​នោះ​គ្រប់​សព្វ​បែប​យ៉ាង​ទាំង​អស់​លើ​ប្ដី​ខ្ញុំ អយុត្តិធម៌​មក​លើ​ប្ដី​ខ្ញុំ គាត់​អាយុ ៧០ឆ្នាំ គាត់​ចាស់​ហើយ​ជំងឺ​បេះ​ដូច​ទៀត»

វិទ្យុ​អាស៊ី​សេរី​មិន​ទាន់​អាច​សុំ​ការ​ឆ្លើយ​តប​រឿង​នេះ ពី​អ្នក​នាំ​ពាក្យ​អយ្យការ​អម​សាលា​ដំបូង​រាជធានី​ភ្នំពេញ លោក ប្លង់ សុផល បាន​ទេ​ នៅ​ថ្ងៃ​ទី១៨ តុលា។ ចំណែក​​អ្នកនាំ​ពាក្យ​ក្រសួង​យុត្តិធម៌ លោក ជិន ម៉ាលីន ចុច​បិទ​ទូរស័ព្ទ។

ជុំវិញ​រឿង​នេះ ប្រធាន​សមាគម​ការពារ​សិទ្ធិ​មនុស្ស អាដហុក (Adhoc) លោក នី សុខា សោក​ស្ដាយ ដែល​តុលាការ​ក្រុង​ភ្នំពេញ​សម្រេច​ផ្ដន្ទាទោស​អ្នក​នយោបាយ ដោយ​គ្រាន់​តែ​ប្រើ​ប្រាស់​សិទ្ធិ​បញ្ចេញ​មតិ ត្រូវ​បាន​​ចោទ​ជា​បទ​ល្មើស​ទៅ​វិញ។ លោក នី សុខា ថា ករណី​រឹតត្បិត​​សេរីភាព​ទាំង​នេះ​ហើយ ដែល​សហគមន៍​អន្តរជាតិ​វាយ​តម្លៃ​ពី​ការ​បន្ត​ធ្លាក់​ចុះ​នៃ​លទ្ធិ​ប្រជាធិបតេយ្យ​ ហើយ​ពលរដ្ឋ​ជា​អ្នក​រង​គ្រោះ​ទៅ​វិញ។

លោក នី សុខា៖ «ការ​ប្រើ​ប្រាស់​សិទ្ធិ​សេរីភាព​របស់​អ្នក​នយោបាយ គឺ​ជា​សេរីភាព​មួយ ដែល​ធានា នៅ​ក្នុង​ច្បាប់​គាត់​ចោទ​អ្នក​នយោបាយ​ពី​បទ​ញុះញង់ ក្នុង​ការ​ប្រើ​ប្រាស់​សេរីភាព​បញ្ចេញ​មតិ ​គឺ​ជា​រឿង​មួយ ដែល​ហាក់​បី​ដូច​ជា​ដំណើរ​ការ​ប្រជាធិបតេយ្យ យើង​នៅ​មាន​បញ្ហា។ ហេតុ​នេះ​ហើយ​បាន​ជា​គេ​មើល​ឃើញ​ពី​ការ​ធ្លាក់​ចុះ នៃ​ដំណើរ​ការ​ប្រជាធិបតេយ្យ»

ភ្លាមៗ​នោះ​ដែរ ​នាយក​រង​ប្រចាំ​តំបន់​អាស៊ី​នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ យូមែន រ៉ៃត៍ វ៉ច្ឆ លោក ហ្វីល រ៉ូប៉ឺតសុន (Phil Robertson) លើក​ឡើង​នៅ​ក្នុង​សេចក្ដី​ថ្លែង​ការណ៍​ថា ការ​ផ្ដន្ទាទោស​នេះ គឺ​ជា​រឿង​ដ៏​ហួស​ចិត្ត និង​មិន​អាច​ទទួល​យក​បាន ដោយ​គ្រាន់​តែ​លោក ថាច់ សេដ្ឋា ប្រើ​ប្រាស់​សិទ្ធិ​សេរីភាព​បញ្ចេញ​មតិ​របស់​ខ្លួន។

លោក ហ្វីល រ៉ូប៉ឺតសុន បន្ថែម​ថា លោក​នាយក​រដ្ឋមន្រ្តី ហ៊ុន ម៉ាណែត គឺ​ជា​អ្នក​ដឹក​នាំ​ផ្ដាច់​ការ​ដូច​គ្នា ទៅ​នឹង​​ឪពុក​របស់​លោក ដូច្នេះ មន្ត្រី​កម្ពុជា និង​សម្ព័ន្ធមិត្ត​ក្នុង​សហគមន៍​អន្តរជាតិ ដែល​យល់​ថា លោក ហ៊ុន ម៉ាណែត មាន​ចរិត​ស្លូតបូត នោះ​គឺ​ផ្ទុយ​ពី​ការ​ពិត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។