គណបក្សហ្វ៊ុនស៊ិនប៉ិច បានធ្វើសមាជជ្រើសតាំងបុត្រាច្បងរបស់សម្ដេចក្រុមព្រះ នរោត្តម រណឫទ្ធិ ឡើងជាព្រះប្រធានគណបក្ស និងអមដោយអនុប្រធានចំនួន៣នាក់ រួមទាំងកែប្រែលក្ខខណ្ឌអាទិភាព ៩ ចំណុចឆ្ពោះទៅរកការបោះឆ្នោតក្រុមប្រឹក្សាឃុំសង្កាត់ឆ្នាំ២០២២។ អ្នកឃ្លាំមើលយល់ថា ព្រះអង្គម្ចាស់ចក្រាវុធ នឹងមិនអាចស្ដារប្រជាប្រិយភាពបានទេ ដោយសារគណបក្សនេះចង់បានសំឡេងគាំទ្រ តែមិនបានធ្វើសកម្មភាពជួយដោះស្រាយកង្វល់របស់ពលរដ្ឋ។
បើទោះជាកំពុងមានជម្លោះផ្ទៃក្នុងបក្សក្ដី តែគណបក្សហ្វ៊ុនស៊ិនប៉ិចបានធ្វើសមាជវិសាមញ្ញចប់សព្វគ្រប់ និងដោយរលូនហើយ នៅថ្ងៃទី៩ ខែកុម្ភៈ។ សមាជិកគណបក្សចំនួនប្រាំរយ (៥០០)នាក់ ជាតំណាងបក្សរបស់ខេត្ត និងស្រុក មកពីទូទាំងប្រទេស បានចូលរួមអង្គសមាជ នៅព្រះរាជដំណាក់វាលស្បូវ ក្នុងខណ្ឌច្បារអំពៅ និងបានលើកដៃអនុម័តជ្រើសតាំងព្រះអង្គម្ចាស់នរោត្តម ចក្រាវុធ ជាប្រធាន និងជ្រើសរើសអនុប្រធាន៣នាក់ គឺលោក ឆឹង ចំរើន លោក ប៉ោ ប៊ុនស្រ៊ឺ និងលោក ពៅ អេងគ្រី។
អង្គសមាជក៏បានអនុម័តធ្វើការកែប្រែលក្ខន្តិកៈគណបក្សមួយចំនួនដែរ។ ក្រៅពីនេះ អង្គសមាជក៏បានបន្តអនុម័តដាក់ចេញយុទ្ធសាស្ត្រគោលនយោបាយចំនួន ៩ ចំណុច សំដៅឆ្ពោះទៅរកការបោះឆ្នោតក្រុមប្រឹក្សាឃុំសង្កាត់នៅពេលខាងមុខ។
អ្នកនាំពាក្យគណបក្សហ្វ៊ុនស៊ិនប៉ិចលោក ញឿន រ៉ាដែន ប្រាប់វិទ្យុអាស៊ីសេរីនៅថ្ងៃទី៩ ខែកុម្ភៈថា អង្គសមាជមិនបានប្រគល់តួនាទីថ្វាយអតីតព្រះប្រធាន គឺសម្ដេចព្រះអនុជ នរោត្តម អរុណរស្មី ទេ គឺស្របតាមលិខិតរបស់ខុទ្ទកាល័យទ្រង់ ដែលបានបញ្ជាក់ថា ព្រះអនុជមិនមានទំនាក់ទំនង និងមិនមានតួនាទីក្នុងបក្សទេ។
លោកបន្តថា ទោះយ៉ាងណា ក្នុងពិធីសមាជ ព្រះអង្គម្ចាស់ នរោត្តម ចក្រាវុធ មានបន្ទូលថា ទ្រង់នៅតែអំពាវនាវឲ្យអ្នកសីហនុនិយម អ្នករណឫទ្ធិនិយម អតីតមន្ត្រីគណបក្សហ្វ៊ុនស៊ិនប៉ិច ឬអ្នកនយោបាយនៃគណបក្សផ្សេង និងពលរដ្ឋទាំងអស់ មកចូលរួមជាមួយគណបក្សរាជានិយមហ្វ៊ុនស៊ិនប៉ិច។ លោកបន្តថា ជាមួយគ្នានេះ គណបក្សហ្វ៊ុនស៊ិនប៉ិច ក៏នឹងស្វែងរកការបង្រួបបង្រួមគ្នាជាមួយគណបក្សនយោបាយផ្សេងទៀត ក្រោមដំបូលហ្វ៊ុនស៊ិនប៉ិចដែរ៖ «ដែលជាអ្នកគាំទ្រគណបក្សហ្វ៊នស៊ិនប៉ិច ដែលជាអ្នកគាំទ្រនូវរបបរាជានិយម សូមមេត្តាអញ្ជើញចូលរួមជាមួយគណបក្សហ្វ៊ុនស៊ិនប៉ិច ដើម្បីឲ្យគណបក្សហ្វ៊ុនស៊ិនប៉ិចបន្តបេសសកម្មក្នុងការបម្រើជាតិមាតុភូមិកម្ពុជាយើងឲ្យកាន់តែរីកចម្រើន។ ជាពិសេសបន្តចូលរួមដោះស្រាយនូវបញ្ហាជាតិមួយចំនួន ដែលយើងពុំទាន់បានចូលរួមដោះស្រាយ»។
ជុំវិញការធ្វើសមាជនេះ វិទ្យុអាស៊ីសេរីមិនអាចសុំការបញ្ជាក់ពីភាគីគណៈកម្មាធិការនាយកនៃគណបក្សហ្វ៊ុនស៊ិនប៉ិចដែលធ្លាប់ជំទាស់អង្គសមាជនេះបានទេ នៅថ្ងៃទី៩ ខែកុម្ភៈ។ ប៉ុន្តែអ្នកនាំពាក្យគណៈកម្មាធិការនាយកលោក ផាន់ សិទ្ធី ធ្លាប់ប្រាប់វិទ្យុអាស៊ីសេរីថា ក្រុមមន្ត្រីចាស់ៗមួយចំនួនក្នុងជួរគណៈកម្មាធិការនាយកមិនទទួលស្គាល់ទាំងសមាជ និងមិនទទួលស្គាល់ទាំងព្រះអង្គម្ចាស់ចក្រាវុធ ជាប្រធានគណបក្សឡើយ។
ក្រុមមន្ត្រីចាស់ៗមួយចំនួន បានកើតវិវាទជាមួយព្រះអង្គម្ចាស់ នរោត្តម ចក្រាវុធ តាំងពីឆ្នាំ២០១៩ ដោយសារពួកគេអះអាងថា ព្រះអង្គម្ចាស់រំលោភតួនាទី ឡើងធ្វើប្រធានស្ដីទីដោយខុសលក្ខន្តិកៈបក្ស និងបណ្ដេញមន្ត្រីចាស់ៗចេញពីបក្ស ដោយគ្មានកំហុស។ ភ្លាមៗក្រុមមន្ត្រីទាំងនោះ បានដាក់ពាក្យប្ដឹងទៅតុលាការ តែនៅដើមឆ្នាំ២០២២ ខាងតុលាការ បានចេញលិខិតបង្វែរឲ្យពួកគាត់ទៅរកកិច្ចអន្តរាគមន៍នៅក្រសួងមហាផ្ទៃវិញ។
គណបក្សហ្វ៊ុនស៊ិនប៉ិច ធ្លាប់លើកពេលធ្វើសមាជម្ដងហើយ កាលពីចុងខែមករា ដោយសាររដ្ឋមន្ត្រីក្រសួងមហាផ្ទៃលោក ស ខេង កាលនោះបានចេញលិខិតណែនាំឲ្យគណបក្សហ្វ៊ុនស៊ិនប៉ិច ដោះស្រាយវិបត្តិផ្ទៃក្នុងសិន។ ការស្នើសុំឲ្យដោះស្រាយវិបត្តិផ្ទៃក្នុងនេះ ដោយសារក្រសួងបារម្ភខ្លាចខ្វះកូរ៉ុមគណៈកម្មាធិការនាយក ដែលមិនអាចធ្វើសមាជបាន។ ប៉ុន្តែខាងព្រះអង្គម្ចាស់ នរោត្តម ចក្រាវុធ អះអាងថា គណបក្សមានកូរ៉ុមគណៈកម្មាធិការនាយកគ្រប់គ្រាន់។
ជុំវិញរឿងនេះដែរ អ្នកឃ្លាំមើលយល់ថា គណបក្សហ្វ៊ុនស៊ិនប៉ិច នឹងនៅតែវិលវល់ក្នុងជម្លោះផ្ទៃក្នុងនេះឯង ដោយមិនអាចឈានជើងដើរដល់ផ្លូវដោះស្រាយបញ្ហាធំៗរបស់ពលរដ្ឋ និងប្រទេសជាតិបានទេ។
អ្នកសិក្សាផ្នែកច្បាប់ យុវជន ពុធ កុលកា មើលឃើញថា គណបក្សហ្វ៊ុនស៊ិនប៉ិច នៅជាប់កេរ្តិ៍ឈ្មោះអាក្រក់មួយ ដែលធ្វើឲ្យអ្នកគាំទ្រប្រជាធិបតេយ្យមិនអាចទទួលយកបាន នោះគឺការចូលដៃចូលជើងជ្រោមជ្រែងឲ្យមានការរំលាយគណបក្សសង្គ្រោះជាតិ កាលពីឆ្នាំ២០១៧។ ទោះយ៉ាងណា អ្នកឃ្លាំមើលរូបនេះយល់ថា ជម្លោះផ្ទៃក្នុងបក្សបច្ចុប្បន្ននេះ មិនមានឥទ្ធិពលប៉ះពាល់ប្រជាប្រិយភាពបក្សខ្លាំងទេ តែបញ្ហាត្រង់ថា គណបក្សរាជានិយមមួយនេះ មិនអនុវត្តតាមស្មារតីដើមរបស់បក្ស គួបផ្សំនឹងការគ្មានសកម្មភាពចេញមុខតវ៉ាជួយពលរដ្ឋកំពុងជួបវិបត្តិការងារ និងអ្នកជួបវិបត្តិសង្គមជាដើម។
លោកជឿជាក់ថា ក្នុងលក្ខខណ្ឌបែបនេះ គណបក្សហ្វ៊ុនស៊ិនប៉ិច នឹងមិនអាចងើបមុខរួចទេ ហើយបើទោះជាបង្រួបបង្រួមជាមួយគណបក្សផ្សេងក៏បានត្រឹមតែឈ្មោះដែរ៖ «អ៊ីចឹង ! កាលណាតែគាត់ ( ហ្វ៊ុនស៊ិនប៉ិច ) មិនបានផ្សារភ្ជាប់ខ្លួនគាត់ជាមួយហ្នឹងប្រជាពលរដ្ឋ ខ្វល់តែរឿងឲ្យគេគាំទ្រ តែគាត់មិនបានខ្វល់អំពីសេចក្ដីសុខរបស់ប្រជាពលរដ្ឋ ដែលត្រូវការឲ្យអ្នកនយោបាយទាំងអស់ ដែលពាក់ព័ន្ធចូលរួមដោះស្រាយ ឬក៏គាំទ្រពួកគេទេ ខ្ញុំគិតថា ទោះបីជាគាត់ធ្វើគោលនយោបាយ ឬក៏គាត់ចូលរួមសកម្មភាពនយោបាយឲ្យគេបោះឆ្នោត ៥០ ឬ៦០ឆ្នាំខាងមុខទៀត នៅតែប៉ុណ្ណឹង។ នៅតែអត់កើនការគាំទ្រ ហើយនៅតែជាគណបក្សចាំតែបង្គ្រប់កិច្ចឲ្យរដ្ឋាភិបាលតែប៉ុណ្ណោះឯង»។
គណបក្សហ្វ៊ុនស៊ិនប៉ិច បង្កើតឡើងដោយព្រះបាទ នរោត្តម សីហនុ ក្នុងស្មារតីប្រឆាំងរបបសាធារណៈរដ្ឋប្រជាមានិតកម្ពុជា ដែលគាំទ្រដោយកងទ័ពវៀតណាមពីឆ្នាំ១៩៧៩ ដល់ឆ្នាំ១៩៩១។ គណបក្សនេះ ធ្លាប់ឈ្នះការបោះឆ្នោតដឹកនាំរដ្ឋាភិបាល នៅអាណ្ណត្តិទី១ ឆ្នាំ១៩៩៣។ ប៉ុន្តែក្រោយពេលបង្កើតរដ្ឋាភិបាលចម្រុះជាមួយគណបក្សប្រជាជនកម្ពុជា និងមានជម្លោះផ្ទៃក្នុងមក គណបក្សរាជានិយមមួយនេះ បានចុះទន់ខ្សោយ ជាបន្តបន្ទាប់រហូតអស់ប្រជាប្រិយភាព តាមរយៈការមិនទទួលបានអសនៈក្នុងរដ្ឋសភាសូម្បីតែមួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។