របប​ភ្នំពេញ​កំពុង​ត្រៀម​របាយការណ៍​ជា​កញ្ចប់​បញ្ជូន​ទៅ​​អឺរ៉ុប​ឆ្លើយ​តប​នឹង​ការ​រំលោភ​សិទ្ធិ​មនុស្ស​​ធ្ងន់ធ្ងរ

ដោយ មួង ណារ៉េត
2019-12-06
អ៊ីម៉ែល
មតិ
Share
បោះពុម្ព
នាយក​រដ្ឋមន្ត្រី​ស្តីទី និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ក្នុង​ពិធី​ប្រកាស​ផ្ទេរ​ភារកិច្ច និង​តែង​តាំង​មុខ​តំណែង​អភិបាល​ថ្មី​ខេត្ត​កំពត នា​សាលា​ខេត្ត​កំពត នៅ​ព្រឹក​ថ្ងៃ​ទី​២២ ខែ​មីនា ឆ្នាំ​២០១៦។
នាយក​រដ្ឋមន្ត្រី​ស្តីទី និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែង​ក្នុង​ពិធី​ប្រកាស​ផ្ទេរ​ភារកិច្ច និង​តែង​តាំង​មុខ​តំណែង​អភិបាល​ថ្មី​ខេត្ត​កំពត នា​សាលា​ខេត្ត​កំពត នៅ​ព្រឹក​ថ្ងៃ​ទី​២២ ខែ​មីនា ឆ្នាំ​២០១៦។
RFA

លោក ស ខេង ​​ថា ក្រសួង​មហាផ្ទៃ បាន​ផ្ញើ​របាយការណ៍​ឆ្លើយ​តប​នឹង​របាយការណ៍​​របស់​សហភាព​អឺរ៉ុប ទៅ​ក្រសួង​ការ​បរទេស​កម្ពុជា​រួច​ហើយ ខណៈ​ក្រសួង​ពាក់ព័ន្ធ​​មួយ​ចំនួន​ទៀត ក៏​​កំពុង​​ធ្វើ​កិច្ច​ការ​នេះ​ដែរ។ មេ​ដឹកនាំ​កំពូល​លំដាប់​ទី​២ នៃ​របប​ក្រុង​ភ្នំពេញ​រូប​នេះ បាន​ប្រាប់​​ក្រុម​អ្នក​សារព័ត៌មាន ​កាល​​ពី​​​ថ្ងៃទី៥ ខែធ្នូ ថា យ៉ាង​យូរ​បំផុត ថ្ងៃ​ទី ១២ ធ្នូ ក្រសួង​ការ​បរទេស​ នឹង​បញ្ជូន​របាយការណ៍​​ទាំង​អស់ ​ឆ្លើយ​តប​នឹង​សហភាព​អឺរ៉ុប​វិញ។ លោក ស ខេង អះអាង​ថា ក្នុង​របាយការណ៍ ដែល​ផ្ញើ​ទៅ​សហភាព​អឺរ៉ុប នឹង​លើក​ឡើង​ពី​ការ​ពិត​ទាំង​អស់ ព្រោះ​មិន​អាច​កុហក សហភាព​អឺរ៉ុប​បាន​ទេ៖ «យើង​នឹង​ឆ្លើយ ប៉ុន្តែ​តាម​ពេល​វេលា​ហ្នឹង ដូចជា​ យ៉ាង​យូរ​ថ្ងៃ​១២ បាទ! យ៉ាង​យូរ​ថ្ងៃ​១២។ ឥឡូវ​ហ្នឹង ក្រសួង​មហាផ្ទៃ និង​ក្រសួង​នានា​គេ ក្រសួង​មហាផ្ទៃ បាន​បញ្ជូន​ហើយ។ ក្រសួង​នានា​ ដែល​ពាក់ព័ន្ធ​ហ្នឹង ប្រហែល​ជា​បាន​បញ្ជូន​ទៅ​ក្រសួង​ការ​បរទេស ដើម្បី​គេ​វេច​ខ្ចប់។ ការ​ពិត​ហើយ យើង​បាន​បង្ហាញ​ទាំង​អស់​ហើយ បង្ហាញ​ការ​ពិត​តែ​ម្ដង ព្រោះ​យើង​មិន​អាច​ភូត​គេ​បាន​ទេ មិន​អ៊ីចឹង។ យើង​មិន​អាច​ភូត​គេ​បាន​ទេ អ្វី​ជា​ការ​ពិត យើង​និយាយ​ការ​ពិត»

អាស៊ី​សេរី មិន​អាច​សុំ​ការ​បញ្ជាក់​បន្ថែម​រឿង​នេះ​ពី​អ្នក​នាំ​ពាក្យ​ក្រសួង​ការបរទេស និង​សហ​ប្រតិបត្តិ​ការ​អន្តរជាតិ​ លោក កុយ គួង បាន​ទេ ដោយសារ​ ទូរស័ព្ទ​រោទ៍​គ្មាន​អ្នក​ទទួល នៅ​ថ្ងៃ​ទី៦ ធ្នូ។ សហភាព​អឺរ៉ុប បាន​ដាក់​ឱសានវាទ ត្រឹម​ថ្ងៃ​ទី១២ ធ្នូ ឲ្យ​របប​ក្រុង​ភ្នំពេញ ឆ្លើយ​តប​នឹង​របាយការណ៍​ស្ដីពី​ការ​រក​ឃើញ​ការ​រំលោភ​សិទ្ធិ​មនុស្ស កម្រាស់ ៧០ទំព័រ។ គិត​ត្រឹម​ថ្ងៃ​ទី៦ ធ្នូ នេះ របប​ក្រុង​ភ្នំពេញ នៅ​មាន​ពេល ១សប្ដាហ៍​ទៀត ដើម្បី​ឆ្លើយ​តប​នឹង​របាយការណ៍​ របស់​សហភាព​អឺរ៉ុប។

ទោះ​ជា​របប​ក្រុង​ភ្នំពេញ ​បាន​ត្រៀម​របាយការណ៍​ឆ្លើយ​តប​រួចរាល់​ហើយ​ក៏​ដោយ ក៏​អ្នក​ធ្វើ​ការ​ឃ្លាំ​មើល​សិទ្ធិ​ការ​ងារ និង​អ្នក​វិភាគ សង្កេត​ឃើញ​ថា របប​ក្រុង​ភ្នំពេញ មិន​បាន​​ធ្វើ​សកម្មភាព​ស្ដារ​លទ្ធិ​ប្រជាធិបតេយ្យ តាម​សំណើ​សហភាព​អឺរ៉ុប​នៅ​ឡើយ។

អ្នក​គ្រប់គ្រង​កម្មវិធី​ការងារ​នៃ​មជ្ឈមណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស ​ហៅ​កាត់​អង្គការ​សង់​ត្រាល់ (Central) លោក ឃុន ថារ៉ូ ប្រាប់​ថា មុខ​សញ្ញា​ក្រសួង​ ដែល​ត្រូវ​ឆ្លើយ​តប​នឹង​របាយការណ៍​រំលោភ​សិទ្ធិ​មនុស្ស គឺ​ក្រសួង​ការងារ​ ក្រសួង​មហាផ្ទៃ ក្រសួង​ព័ត៌មាន និង​ក្រសួង​ដែន​ដី។ លោក​ថា ក្រសួង​ធំៗ ទាំង​នេះ​ បាន​បង្ហាញ​​ការ​កែប្រែ​លក្ខខណ្ឌ​តឹងរ៉ឹង​មួយ​ចំនួន​ខ្លះ​​ហើយ ដូច​ជា ព្រម​ធ្វើ​​វិសោធនកម្ម​ច្បាប់​សហជីព ពិភាក្សា​​ដើម្បី​កែប្រែ​ច្បាប់​អង្គការ​ សមាគម​បើក​ផ្លូវ​ឲ្យ​អង្គភាព​សារ​ព័ត៌មាន​ធ្វើ​សកម្មភាព​នៅ​កម្ពុជា​ឡើង​វិញ និង​ដំណោះស្រាយ​ដីធ្លី​ជា​ដើម។ ប៉ុន្តែ​វិធានការ​ទាំង​នេះ លោក​​ថា ឃើញ​មាន​តែ​ក្នុង​ផ្លូវ​ច្បាប់ ត្រង់​ការ​អនុវត្ត​ជាក់​ស្ដែង មិន​ទាន់​មាន​ប្រសិទ្ធិ​ភាព​ទេ។

ចំណែក​ចំណុច​គ្មាន​ការ​វិវត្តន៍​ទៅ​រក​ភាព​វិជ្ជមាន​ទាល់​តែ​សោះ គឺ​សិទ្ធិ​ពលរដ្ឋ និង​សិទ្ធិ​នយោបាយ។ លោក ឃុន ថារ៉ូ ថា ចំណុច​សំខាន់ ដែល​សហភាព​អឺរ៉ុប​ទាមទារ​នោះ គឺ​សិទ្ធិ​នយោបាយ​នៃ​គណ​បក្ស​សង្គ្រោះ​ជាតិ​ ដូច្នេះ​ប្រសិន​បើ​ សិទ្ធិ​នយោបាយ​ គ្មាន​ការ​វិវត្តន៍​ទៅ​រក​ភាព​វិជ្ជមាន​ទេ លោក​​ថា របាយ​ការណ៍​របស់​រដ្ឋាភិបាល ​ទំនង​ជា​មិន​អាច​ធ្វើ​ឲ្យ​សហភាព​អឺរ៉ុប​ជឿ​ជាក់​ឡើយ។

មន្ត្រី​សង្គម​ស៊ីវិល​រូប​នេះ​បន្ត​ថា ក្រៅពី​របាយការណ៍​ឆ្លើយ​តប​របស់​រដ្ឋាភិបាល សហភាព​អឺរ៉ុប ក៏​នឹង​ផ្ទៀងផ្ទាត់ ជាមួយ​របាយការណ៍​របស់​ក្រុម​អង្គការ​សង្គម​ស៊ីវិល និង​ភាគី​ពាក់ព័ន្ធ​ដទៃ​ទៀត​ដែរ។ ដូច្នេះ លោក​ថា ប្រសិន​បើ​រដ្ឋាភិបាល មាន​តែ​របាយការណ៍ ហើយ​គ្មាន​ឆន្ទៈ ភស្តុតាង និង​អំណះអំណាង​គ្រប់​គ្រាន់​ទេ នោះ​សហភាព​​អឺរ៉ុប​នឹង​មិន​ទុក​ចិត្ត​របាយការណ៍​នោះ​ឡើយ៖ «យើង​ចាំ​មើល​តែ​ការ​វិវត្តន៍​ នៅ​រយៈ​ពេល​ប៉ុន្មាន​ហ្នឹង​ទៀត​ទេ។ បើ​ក្រៅ​ពី​ហ្នឹង ខ្ញុំ​មើល​ឃើញ​ថា រឿង​អ្វី​ផ្សេង​ទាំង​អស់ អាច​ដោះស្រាយ​បាន​ទេ រឿង​ច្បាប់​ ទម្លាប់​ ការ​ធ្វើ​វិសោធន​កម្ម​ហ្នឹង ព្រោះ​ថា នៅ​ក្នុង​ដៃ ប៉ិច​នៅ​គណបក្ស​កាន់​អំណាច​ទេ។ គាត់​ចង់ យល់​ព្រម​ដាក់​បញ្ចូល​កែ​យ៉ាង​ម្ដេច គាត់​អាច​កែ​នៅ​ក្នុង​ពេល​តែ​៥​នាទី ក៏​បាន​ដែរ ព្រោះ​អា​កូន​សោ​​ហ្នឹង​ងាយស្រួល​ហ្នឹង មាន​ទៅ​ជា​បញ្ហា​អ្វី។ អា​ហ្នឹង​ ឲ្យ​តែ​នាយក​រដ្ឋ​មន្ត្រី​ហ្នឹង គាត់​មាន​ឆន្ទៈ​ចង់​ថែរក្សា​អា​ហ្នឹង ខ្ញុំ​គិត​ថា គាត់​អាច​ធ្វើ​ទៅ​បាន​ទេ»

កាលពី​ថ្ងៃ​ទី៣ ធ្នូ តំណាង​សហគមន៍​អឺរ៉ុប​បាន​បង្ហាញ​ការ​សោក​ស្ដាយ ​ប្រាប់​ទៅ​ឯកអគ្គរាជទូត​កម្ពុជា​ប្រចាំ​សហភាព​អឺរ៉ុប លោក​ ណុំ ពិសិដ្ឋ​ ក្នុង​កិច្ចប្រជុំ​ដេញដោល​របស់​គណៈកម្មាធិការ​ទទួល​បន្ទុក​ពាណិជ្ជកម្ម​អន្តរជាតិ នៃ​សភា​អឺរ៉ុប នៅ​ទីក្រុង​ប្រ៊ុចសែល ប្រទេស​បែលហ្សិក ​ថា ច្រើន​ខែ​មក​ហើយ កម្ពុជា​នៅ​មិន​ទាន់​មាន​ការ​កែ​ប្រែ ជា​ដុំកំភួន​តាម​សំណើ​របស់​គណៈកម្មការ​អឺរ៉ុប។

នាយិកា​ទទួលបន្ទុក​កិច្ចការ​អាស៊ី និង​ប៉ាស៊ីហ្វិក នៃ​គណៈកម្មការ​អឺរ៉ុប អ្នកស្រី ផាអូឡា ផេមផេឡូនី (Paola Pampaloni) លើក​ឡើង​កាល​នោះ​ថា កម្ពុជា​គឺជា​រដ្ឋ​ឯក​បក្ស​ ដែល​គ្មាន​គណ​បក្ស​ប្រឆាំង​ ហើយ​​វិស័យ​មួយ​ចំនួន ​ដែល​​ជា​ក្តី​បារម្ភ​ គឺ​ស្ថិត​ក្នុង​កម្រិត​នយោបាយ។ តែ​យ៉ាង​ណា តំណាង​​ទូត​របស់​របប​ក្រុង​ភ្នំពេញ ប្រចាំ​សហភាព​អឺរ៉ុប លោក ណុំ ពិសិដ្ឋ​ ឆ្លើយ​តប ដូច​មន្ត្រី​ជាន់​ខ្ពស់​​ផ្សេង​ទៀត​ដែរ គឺ​ថា រដ្ឋាភិបាល​កម្ពុជា បាន​ខិតខំ​កែប្រែ​ស្ថានភាព​​មួយ​ចំនួន ដូចជា​ វិសោធន​កម្ម​ច្បាប់​សហជីព​​ជាដើម។

អ្នក​វិភាគ​នយោបាយ អ្នកស្រី ធីតា ឃឹះ យល់​ថា ទោះ​បី​រដ្ឋាភិបាល​ មាន​គម្រោង​ផ្ញើ​របាយការណ៍​ឆ្លើយ​តប នឹង​សហភាព​អឺរ៉ុប តែ​រដ្ឋាភិបាល​ មិន​បាន​បង្ហាញ​​ឆន្ទៈ ​ចង់​កែប្រែ​ស្ថានភាព​សិទ្ធិ​មនុស្ស និង​​ស្ដារ​ប្រជាធិបតេយ្យ​​​​ តាម​ការ​ចង់​បាន​​របស់​សហភាព​អឺរ៉ុប​នៅ​ឡើយ។ អ្នកស្រី ថា ​ប្រមុខ​រដ្ឋាភិបាល លោក ហ៊ុន សែន​ ​គ្មាន​គោលការណ៍ ដោះ​ស្រាយ​​ស្ថានភាព​នយោបាយ​ជាក់លាក់ ហើយ​លោក​​តែង​ប្រកាស​ជា​រឿយៗ​ថា នឹង​មិន​អនុវត្ត​តាម​លក្ខខណ្ឌ​របស់​សហភាព​អឺរ៉ុប​នេះ​ឡើយ ព្រោះ​​ ប៉ះពាល់​ដល់​អធិបតេយ្យ​ជាតិ​កម្ពុជា​​។ អ្នកស្រី បន្ត​ទៀត​ថា ​រដ្ឋាភិបាល​​​ទំនង​ជាមិន​អាច​​ស្ដារ​លទ្ធិ​ប្រជាធិបតេយ្យ​​ទាន់​ទេ ព្រោះ​ពេល​​វេលា ដែល​​ សហភាព​អឺរ៉ុប បាន​ទុក​​ឲ្យ​១​ខែ​នោះ ​កាន់​តែ​ខើច​ណាស់​ទៅ​ហើយ៖ «ខ្ញុំ​ថា ដោយសារ​គាត់ ដូចជា​មិន​ចង់​ធ្វើ ដូចជា​ជឿ​ថា ត្រូវ​ធ្វើ ហើយ​គាត់​ក៏​មាន​ឲ្យ​សម្ដី សម្ដេច​នាយក​ក៏​​មាន​សម្ដី​ខ្លះ ដែល​និយាយ​ថា មិន​យក​អធិបតេយ្យ​ភាព​ប្រទេស​ ​ទៅ​ដាក់​នៅ​ក្រោម​EU អ៊ីចឹង​ទៅ។ គាត់​មាន​និយាយ​រឿង​ហ្នឹង​អ៊ីចឹង​ ប្រហែល​ជា​គាត់​អត់​មាន​គោល​បំណង​ក្នុង​ការ​ដោះស្រាយ​រឿង​ហ្នឹង​ទេ ហើយ​គាត់ ខំប្រឹង​ដើរ​រក​ទី​ផ្សារ​ ដើម្បី​ ហៀប​នឹង​រក​មនុស្ស​ឲ្យ​គេ​ជួយ​ មាន​ទាំង​ប្រទេស​ដទៃ ដើម្បី​ឲ្យ​មាន​ទីផ្សារ ប្រទេស​កម្ពុជា ទៅ​ខាង​ហ្នុង។ អ៊ីចឹង​ មាន​ន័យ​ថា ​​អត់​ចង់ គាត់​អត់​ចង់​ធ្វើ កាលណា​ស្ដារ​ប្រជាធិបតេយ្យ​ទៅ វា​អាច​ប៉ះពាល់​ទៅ​ដល់​សិទ្ធិ​អំណាច​ ដែល​គាត់​មាន ក្នុង​ការ​បោះឆ្នោត ក្នុង​ការ​ធ្វើ​ឲ្យ​មាន​សេរី​ពហុបក្ស​អ្វី​ហ្នឹង វា​នៅ​មាន​កម្រិត​ ក្នុង​ពេល​បច្ចុប្បន្ន។ មាន​ន័យ​ថា មាន​គណបក្ស​តែ​មួយ គាត់​មិន​ចង់​ឲ្យ​មាន​ទៀត​ណា»

សហភាព​អឺរ៉ុប​បាន​ហៅ​ចំណាត់​ការ​​​បង្ក្រាប​បក្ស​ប្រឆាំង ធ្វើ​ទុក្ខ​បុក​ម្នេញ​ស្ថាប័ន​សារព័ត៌មាន​ឯករាជ្យ ការ​​យាយី​លើ​សហជីព ការ​រំលោភដីធ្លី​ជា​ប្រព័ន្ធ​ ដែល​របប​ក្រុង​ភ្នំពេញ​ ចាត់​ទុក​ជា​ការ​អនុវត្ត​ច្បាប់​នោះ​ ថា ជា​ការ​រំលោភ​សិទ្ធិ​មនុស្ស​ធ្ងន់ធ្ងរ ហើយ​សហភាព​អឺរ៉ុប​មាន​ភស្តុតាង​រឹង​មាំ​ចំពោះ​រឿង​នេះ។ សហភាព​អឺរ៉ុប ថា ចំណាត់​ការ​រំលោភ​សិទ្ធិ​មនុស្ស​កន្លង​មក របប​ក្រុង​ភ្នំពេញ បាន​ធ្វើ​​ផ្ទុយ​ពី​គោល​ការណ៍​​​​​​នៃ​បទបញ្ញត្តិ​ ការ​ផ្ដល់​ប្រព័ន្ធ​អនុគ្រោះ​ពន្ធ​ទូទៅ ឬ EBA របស់​សហភាព​អឺរ៉ុប​។

ក្នុង​ករណី​ សហភាព​អឺរ៉ុប សម្រេច​ដក​ហូត​ប្រព័ន្ធ​អនុគ្រោះ​ពន្ធ​នៅ​ខែ​កុម្ភៈ​ ឆ្នាំ២០២០ មែន សភា​អឺរ៉ុប​ និង​រដ្ឋ​សមាជិក​អឺរ៉ុប មាន​ពេល ២ខែ ដើម្បី​ធ្វើការ​ជំទាស់​ទៅ​នឹង​សេចក្ដី​សម្រេច​របស់​គណៈកម្មការ​អឺរ៉ុប​នេះ ហើយ​ប្រសិន​បើ​គ្មាន​ការ​ជំទាស់​​ណា​មួយ​នោះ​ទេ ការ​យក​ពន្ធ​ផ្លូវការ​ពី​កម្ពុជា នឹង​ចាប់​ផ្ដើម​ពី​ថ្ងៃ​ទី១២ ខែ​សីហា ឆ្នាំ២០២០។

ស្ថាប័ន​ហិរញ្ញវត្ថុ​ធំៗ ​របស់​ពិភពលោក​ បាន​ព្រមាន​ថា កំណើន​សេដ្ឋកិច្ច​កម្ពុជា នឹង​ត្រូវ​ធ្លាក់​ចុះ​ពី ៧ភាគ​រយ ក្នុង​ឆ្នាំ២០១៩ មក​នៅ​ត្រឹម ៦,% ក្នុង​ឆ្នាំ២០២០ ដោយសារ​ភាព​មិន​ប្រាកដ​ប្រជា​នៃ​បញ្ហា​ព្យួរ​ប្រព័ន្ធ​អនុគ្រោះ​ពន្ធ​​។ ក្នុង​ន័យ​នេះ កម្ពុជា​ នឹង​ត្រូវ​ខាតបង់​យ៉ាង​ហោច​ណាស់​ជិត ៧០០​លាន​ដុល្លារ​អាមេរិក​ក្នុង​មួយ​ឆ្នាំ ឬ​ស្នើ​ជិត ២លាន​ដុល្លារ​អាមេរិក​ក្នុង​មួយ​ថ្ងៃ ប្រសិន​បើ​សហភាព​អឺរ៉ុប​សម្រេច​ព្យួរ​ប្រព័ន្ធ​អនុគ្រោះ​​ពន្ធ​នេះ​មែន។ នេះ​មិន​ទាន់​រាប់​បញ្ចូល​ ដល់​ប្រព័ន្ធ​អនុគ្រោះ​ពន្ធ GSP របស់​សហរដ្ឋ​អាមេរិក​ នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល