លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000

ក្រោយ​មាន​ការ​រិះគន់​ពី​ប្រជាពលរដ្ឋ​មួយ​ចំនួន​ជុំវិញ​ព្រឹត្តិការណ៍ Gumball 3000 លោក​នាយក​រដ្ឋមន្ត្រី ហ៊ុន ម៉ាណែត បាន​ចេញ​មក​ប្រតិកម្ម ដោយ​លើក​ឡើង​ថា កម្មវិធី​ដាក់​តាំង​រថយន្ត​ទំនើប​នេះ កើត​ចេញ​ពី​ការ​ខិតខំ​ប្រឹងប្រែង​របស់​ក្រសួង និង​អ្នក​ពាក់ព័ន្ធ ក្នុង​គោលបំណង​ជំរុញ​ឱ្យ​មាន​កំណើន​វិស័យ​ទេសចរណ៍។ តែ​អ្នក​ប្រកប​របរ​ក្នុង​វិស័យ​នេះ លើក​ឡើង​ថា ស្ថានភាព​ទេសចរណ៍​នៅ​ទីតាំង ដែល​ព្រឹត្តិការណ៍ Gumball បាន​ទៅ​ដល់ នៅតែ​គ្មាន​អ្វី​ល្អ​ប្រសើរ​ជា​ដុំ​កំភួន​នោះ​ឡើយ។

ថ្លែង​ក្នុង​ពិធី​ប្រគល់​សញ្ញាប័ត្រ​ជូន​និស្សិត​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច នៅថ្ងៃទី២៦ ខែកញ្ញា លោក​នាយក​រដ្ឋមន្ត្រី ហ៊ុន ម៉ាណែត បាន​ប្រតិកម្ម ចំពោះ​ការ​បញ្ចេញ​ទស្សនៈ​ជុំវិញ​វិវាទ​លើ​ព្រឹត្តិការណ៍ Gumball 3000 និង​ស្នើ​ឱ្យ​បញ្ចប់​វិវាទ​ពី​ពេល​នេះ​ត​ទៅ​ទៀត។ លោក ហ៊ុន ម៉ាណែត អះអាង​ថា ការ​តម្រៀប​ឡាន​នៅ​មុខ​ប្រាសាទ​អង្គរ មិន​មែន​ជា​ការ​បង្កើត​រូបភាព​មិន​សមរម្យ ចំពោះ​បុព្វ​បុរស​ខ្មែរ​ជំនាន់​មុន​នោះ​ទេ ប៉ុន្តែ លោក​អះអាង​ថា ព្រឹត្តិការណ៍​នេះ បាន​លើក​ស្ទួយ​វិស័យ​ទេសចរណ៍ និង​បាន​រៃអង្គាស​ប្រាក់​សម្រាប់​សប្បុរសធម៌។

នាយក​រដ្ឋមន្ត្រី ហ៊ុន ម៉ាណែត៖ «ប៉ុន្តែ បើ​យើង​មើល​ចង់​ចាញ់​ឈ្នះ​រាង​ខ្លួន រឿង​ថា អ្នក​នេះ​បន្លំ រឿង​ថា គម្លាត​ថា​ឡាន​បើក​មក​នៅ​មុខ​ប្រជាពលរដ្ឋ​ក្រីក្រ វា​មាន​ការ​កង្វល់។ ការ​ខិតខំ​ប្រឹងប្រែង​សម្របសម្រួល ហើយ​ជា​គំនិត​របស់អ្នក​ថត​អ្នក​ធ្វើ​នោះ​ខ្ញុំ​សូម​បញ្ជាក់​រឿង​តែ​ប៉ុណ្ណឹង គ្មាន​អ្វី​អាក្រក់​នោះ​ទេ។ ហើយ​រៀបចំ​ណាស់ កាត់​បន្ថយ​ណាស់ ទម្រាំ​បាន​ប៉ុណ្ណឹង តែ​នៅ​មិន​ទាន់​អស់។ ហើយ​បង​ប្អូន ដែល​ព្រួយ​បារម្ភ​នោះ ក៏​បញ្ចេញ​កង្វល់​ពី​ការ​ប៉ះពាល់​នោះ បញ្ចេញ​មតិ​ខ្វែង​គ្នា​ចុះ តែ​កុំ​យក​មកតតាំងគ្នា វាអត់ចំណេញ»។

ព្រឹត្តិការណ៍ Gumball 3000 បានប្រព្រឹត្តិទៅកាលពីថ្ងៃទី១៥ ដល់ថ្ងៃទី១៦ ខែកញ្ញា ដោយមានរថយន្តទំនើបៗ ចូលរួមជាង ១០០គ្រឿង។ ក្នុងនោះក៏មានរថយន្តរបស់អភិជន អ្នកជំនួញ និងបុគ្គលល្បីៗរបស់កម្ពុជាចូលរួមផងដែរ ដោយដង្ហែក្បួនឡាននេះចេញពីរាជធានីភ្នំពេញ ទៅកាន់ខេត្តសៀមរាប។ ព្រឹត្តិការណ៍នេះ មានឆាកប្រគុំតន្ត្រីមួយ ដែលសាងសង់នៅមុខព្រះបរមរាជវាំង និងមានការដាក់តាំងពិពណ៌រថយន្តទំនើបៗជាច្រើន ដោយរដ្ឋាភិបាលសង្ឃឹមថា ព្រឹត្តិការណ៍នេះ នឹងជួយដល់វិស័យទេសចរណ៍នៅកម្ពុជា។

ទោះជាយ៉ាងណាក្ដី មគ្គទេសក៍ទេសចរណ៍ភាសាអង់គ្លេស នៅខេត្តសៀមរាប សុំមិនបញ្ចេញឈ្មោះ ដោយបារម្ភពីសុវត្ថិភាព ប្រាប់វិទ្យុអាស៊ីសេរី​ថា ព្រឹត្តិការ Gumball 3000 ដែលរដ្ឋាភិបាលបានរៀបចំឡើង ហាក់គ្មានផលប្រយោជន៍ចំពោះវិស័យទេសចរឡើយ ព្រោះបន្ទាប់ពីរៀបចំព្រឹត្តិការណ៍នេះរួច ចំនួនភ្ញៀវទេសចរហាក់គ្មានការកើនឡើងនោះទេ ប៉ុន្តែបែរជាធ្លាក់ទៅវិញ។

មគ្គទេសក៍ទេសចរណ៍លាក់​ឈ្មោះ៖ «បើយើងតាម Gumball ហើយនិងតាមការតាំងពិពណ៌នៅមុខអង្គរវត្តឥតប្រយោជន៍ទេ។ យើងអត់បានអញ្ជើញទូរទស្សន៍ល្បីៗ ដូចជាទូរទស្សន៍លោកខាងលិច មាន CNN BBC អីអ៊ីចឹង ឱ្យក្រុមគាត់ហ្នឹងជួយផ្សព្វផ្សាយ បានវាបានផល។ បើត្រឹម Media (ប្រព័ន្ធផ្សព្វផ្សាយ) កំប៉ិកកំប៉ុកដូចអត់សូវបានការអីទេ។ ខ្ញុំចង់ស្នើសុំដែរដូចភ្ញៀវនៅសហរដ្ឋអាមេរិកអ៊ីចឹង យើងអាចដាក់តាមប្រលានយន្តហោះធំៗ ទីផ្សារធំណាស់អាមេរិកនោះ ជនជាតិអាមេរិកមកលេងយើងច្រើន»។

យ៉ាងណាក៏ដោយចុះ មហាជនអ្នកលេងបណ្ដាញសង្គមមួយចំនួន នៅតែរិះគន់ព្រឹត្តិការណ៍ Gumball 3000 នៅកម្ពុជា ថា នឹងមិនអាចជួយវិស័យទេសចរណ៍កម្ពុជា ឱ្យរស់ឡើងវិញបានឡើយ ដរាបណារដ្ឋាភិបាល មិនអាចទប់ស្កាត់ឧក្រិដ្ឋកម្មឆបោក ជួញដូរមនុស្ស ចាប់ជំរិត និងអំពើពុករលួយ ឱ្យមានប្រសិទ្ធភាព។ ក្នុងនោះ អ្នកធ្វើមាតិកាវីដេអូ មួយចំនួន បានលើកឡើងថា ព្រឹត្តិការណ៍ Gumball 3000 នៅកម្ពុជា ដែលយករថយន្តទំនើប មកដាក់តាំងបង្ហាញនៅពីមុខ ប្រាសាទអង្គរវត្ត គឺជាការសំញែងសម្ភារៈនិយម នៅចំពោះមុខប្រជាពលរដ្ឋខ្មែរ ដែលភាគច្រើនមានជីវភាពក្រលំបាក និងជាការបន្ទាបតម្លៃសម្បត្តិបេតិកភណ្ឌរបស់ដូនតាខ្មែរ។

យ៉ាងណាមិញ បន្ទាប់ពីទទួលរងការរិះគន់ភ្លាមៗ លោក ហ៊ុន ម៉ាណែត មិនបានបញ្ចេញប្រតិកម្មនោះទេ ដោយលោកបានយកវីដេអូ អ្នកគាំទ្រមកឆ្លើយតប ខណៈដែលនៅលើវីដេអូ របស់អ្នករិះគន់ បានទទួលរងការវាយប្រហារ តាមរយៈការបញ្ចេញមតិ ឬComment ពីសំណាក់ក្រុម អ៊ឹម.អ៊ឹម.អូ (MMO) ដែលអ្នកលេងបណ្ដាញសង្គមសន្និដ្ឋានថា គឺជាក្រុមស៊ីឈ្នួលរបស់រដ្ឋាភិបាល។

ជុំវិញរឿងនេះ អ្នកអត្ថាធិប្បាយនយោបាយ លោក គឹម សុខ យល់ឃើញថា រដ្ឋាភិបាលរៀបចំឱ្យមានព្រឹត្តិការណ៍ Gumball ដោយមានអ្នកគាំទ្រ និងអ្នករិះគន់ឆ្លើយឆ្លងគ្នាទៅវិញទៅមក គឺដើម្បីបន្លប់វិបត្តិសង្គម ពិសេសគឺបញ្ហាតំបន់ត្រីកោណអភិវឌ្ឍ CLV-DTA។

លោក គឹម សុខ៖ «ហើយក្នុងស្ថានភាពចុងក្រោយនេះ ដោយសារតែរដ្ឋាភិបាលក្រុមគ្រួសារ ហ៊ុន ប្រឈមខ្លាំងពេក នឹងការតវ៉ារបស់ប្រជាពលរដ្ឋខ្មែរ កក្រើកពិភពលោកប្រឆាំងនឹងគម្រោង CLV ហើយនិងការដាក់ទណ្ឌកម្មរបស់សហរដ្ឋអាមេរិកលើឧកញ៉ា លី យ៉ុងផាត់ លោក ហ៊ុន សែន លោក ហ៊ុន ម៉ាណែត លោក សុខ សូកេន ក៏យកល្បែង Gumball នៅអង្គរឡូកឡំគ្នា មកបង្ហោះលេងយ៉ាងកក្រើករំពងដើម្បីបន្លប់វិបត្តិជាតិ»។

ព្រឹត្តិការណ៍ Gumball 3000 ត្រូវបានបង្កើតឡើងក្នុងឆ្នាំ១៩៩៩ ដោយសហគ្រិនសញ្ជាតិអង់គ្លេស លោក ម៉ាកស៊ី មីលាន គូបពឺ (Maximillion Cooper) ដែលជាព្រឹត្តិការណ៍ប្រារព្ធឡើងដើម្បីអបអរសាទរទៅលើប្រណីតភាពប្លែកៗរបស់រថយន្តដែលមានសមត្ថភាពខ្លាំងក្លា ក៏ដូចជាតម្លៃខ្ពស់ៗ និងការធ្វើដំណើរផ្សងព្រេងទៅកាន់តំបន់ផ្សេងៗ ដោយបច្ចុប្បន្នព្រឹត្តិការណ៍នេះកំពុងមានវត្តមាននៅតាមបណ្ដាប្រទេសមួយចំនួនក្នុងតំបន់អាស៊ីអាគ្នេយ៍។

ប្រជាពលរដ្ឋ ទទូចឱ្យរដ្ឋាភិបាល ជាពិសេសក្រសួងទេសចរណ៍ បង្កើនការផ្សព្វផ្សាយ និងជំរុញវិស័យនេះតាមរបៀបផ្សព្វផ្សាយផ្សេងទៀត ដែលផ្ដល់តម្លៃដល់សម្បត្តិបេតិកភណ្ឌ វប្បធម៌​ជាតិ ជា​ជាង​ពឹង​ផ្អែក​លើ​កម្មវិធី​នាំ​មក​ពី​ក្រៅ​ប្រទេស ដែល​មាន​ចរិត​លក្ខណៈ​ផ្ដោត​លើ​ភាព​ស៊ីវិល័យ និង​យក​កម្ពុជា ជា​កន្លែង​ផ្សាយ​ពាណិជ្ជកម្ម​ឱ្យ​កម្មវិធី​ពួក​គេ​ទៅ​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។