លោក ហ៊ុន សែន អំពាវនាវឲ្យកងទ័ពជួយបង់ពន្ធរដ្ឋ ស្របពេលអន្តរជាតិគ្រោងដកការអនុគ្រោះពន្ធពីកម្ពុជា។ លោក ហ៊ុន សែន ក្នុងឯកសណ្ឋានកងទ័ពពាក់ផ្កាយ៥ ចាត់ទុកការបង់ពន្ធពីមន្ត្រីយោធា មានសារសំខាន់ ដូចគ្នាពីការបង់ពន្ធរបស់ប្រជាពលរដ្ឋស៊ីវិលទូទៅដែរ៖ «ហើយខ្លួនយើងម្នាក់ៗ ក៏ត្រូវបំពេញកាតព្វកិច្ចពន្ធដារដូចគ្នា។ ត្រូវពង្រឹងនូវវប្បធម៌បង់ពន្ធដារ ដើម្បីយើងមានសមត្ថភាពចិញ្ចឹមកងទ័ព ចិញ្ចឹមមន្ត្រីរាជការ ហើយមានប្រាក់ដើម្បីវិនិយោគដោយផ្ទាល់របស់យើង » ។
លោក ហ៊ុន សែន លើកឡើងពីទម្លាប់រួចពន្ធ ដែលកើតមានជាទម្លាប់ក្រោមការដឹកនាំរបស់លោក ដូចជា ការស្នើសុំពីឧត្ដមសេនីយ៍យោធា និងប៉ូលិស ដើម្បីរួចពន្ធរថយន្តជាដើម។ លោក ហ៊ុន សែន អះអាងបន្ថែមថា បើមន្ត្រីយោធាខិតខំជួយបង់ពន្ធរដ្ឋ នោះរបបលោកនឹងមានថវិកា ក្នុងការបន្តបើកប្រាក់ខែ ឲ្យកងទ័ព និងមន្ត្រីរាជការស៊ីវិល រៀងរាល់ពីរដងក្នុង ១ខែ និងអាចមានប្រាក់សម្រាប់អនុវត្តគម្រោងអភិវឌ្ឍមួយចំនួន ដែលមិនចាំបាច់ពឹងជំនួយបរទេស។
សារអំពាវនាវ ដើម្បីបង្កើនចំណូលថវិកាជាតិ និងកាត់បន្ថយការពឹងពាក់ជំនួយបរទេសនេះ ធ្វើឡើងក្រោយឱសានវាទ នៃការដកប្រព័ន្ធអនុគ្រោះពន្ធ EBA របស់សហភាពអឺរ៉ុប កាន់តែខិតជិតចូលមកដល់ណាស់ទៅហើយ។ សារនេះ ស្របគ្នាទៅនឹងជំហររបស់របបលោក ហ៊ុន សែន ដែលអះអាងថា កំពុងខិតខំកែទម្រង់សេដ្ឋកិច្ច ដើម្បីទប់ទល់នឹងទណ្ឌកម្មអន្តរជាតិ។
ទោះជាយ៉ាងនេះក្តី អ្នកវិភាគគោលនយោបាយ និងអ្នកសិក្សាស្រាវជ្រាវការអភិវឌ្ឍសង្គមថា អំពើពុករលួយនៅកម្ពុជា នៅតែមានភាពរីករាលដាលខ្លាំង ហើយកម្ពុជានៅតែពឹងពាក់ខ្លាំងទៅលើជំនួយបរទេស ដែលធ្វើឲ្យកម្ពុជាមិនទាន់អាចរស់ ដោយខ្វះជំនួយបរទេសនៅឡើយ ព្រោះស្ថានភាពក្រីក្រក្នុងស្រទាប់ពលរដ្ឋខ្មែរទូទៅ នៅមានកម្រិតខ្ពស់។ អ្នកវិភាគថា វិធីរក្សាការអភិវឌ្ឍសេដ្ឋកិច្ចជាតិ ឲ្យមានលំនឹង និងលូតលាស់ គឺមានតែស្ដារសិទ្ធិមនុស្ស និងប្រជាធិបតេយ្យឡើងវិញ ដើម្បីបញ្ចៀសទណ្ឌកម្មសេដ្ឋកិច្ច ពីសហគមន៍អន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។