ម្ចាស់ក្រុមហ៊ុនកាស៊ីណូនៅខេត្តព្រះសីហនុ លោក លី គួង ដែលរងការចោទប្រកាន់ថា បានឃុំខ្លួនមនុស្សខុសច្បាប់ ត្រូវបានព្រះមហាក្សត្រនរោត្តម សីហមុនី ចេញព្រះរាជក្រឹត្យ កាលពីថ្ងៃទី២០ ខែមិថុនា ត្រាស់បង្គាប់ដំឡើងគោរមងារ ពីឧកញ៉ា ទៅជាអ្នកឧកញ៉ា តាមការស្នើសុំរបស់លោកនាយករដ្ឋមន្ត្រី ហ៊ុន សែន។
កំណត់ហេតុរបស់ក្រសួងពាណិជ្ជកម្ម បង្ហាញថា លោក លី គួង គឺជាម្ចាស់ក្រុមហ៊ុន សាជីវកម្មពាណិជ្ជកម្ម Big House ដែលគ្រប់គ្រងកាស៊ីណូចំនួន២ និងត្រូវបានគេស្គាល់ថា ជាម្ចាស់បរិវេណអគារ ហួង លី នៅខេត្តព្រះសីហនុ។
ទីភ្នាក់ងារសារព័ត៌មានអង់គ្លេសឈ្មោះប៊ីប៊ីស៊ី (BBC) កាលពីខែមីនា ឆ្នាំ២០២៣ កន្លងមកនេះ បានចងក្រងឯកសារជាច្រើន ផ្សព្វផ្សាយពីបរិវេណអគារហួង លី ថា ជាកន្លែងប្រតិបត្តិការបោកប្រាស់ បង្ខាំងមនុស្សខុសច្បាប់ ធ្វើទារុណកម្ម និងការជួញដូរមនុស្ស។ ក៏ប៉ុន្តែលោក លី គួង បដិសេធចំពោះការចោទប្រកាន់ទាំងនេះ ដោយលើកឡើងថា ក្រុមហ៊ុនលោក ប្រតិបត្តិការជំនួញស្របច្បាប់។ ចំណែកអភិបាលរងខេត្តព្រះសីហនុ លោក ឡុង ឌីម៉ង់ បដិសេធឆ្លើយតបចំពោះការសាកសួររបស់អ្នកកាសែតនៃសមាគមសម្ព័ន្ធអ្នកសារព័ត៌មានកម្ពុជា (CamboJa) កាលពីថ្ងៃទី២៦ ខែមិថុនា ដោយអះអាងថា លោកពុំស្គាល់ លោក លី គួង និងមិនចង់និយាយពីបញ្ហានេះឡើយ។
សមាគមសម្ព័ន្ធអ្នកសារព័ត៌មានកម្ពុជា (CamboJa) ក៏បានចុះផ្សាយកាលពីថ្ងៃទី២៧ ខែមិថុនា ថា លោក លី គួង មិនបានប្រាប់ពីចំនួនទឹកប្រាក់ដែលម្ចាស់ក្រុមហ៊ុនរូបនេះ បានផ្តល់ដល់រដ្ឋាភិបាល លោក ហ៊ុន សែន ដើម្បីទទួលបានគោរមងារជា អ្នកឧកញ៉ានោះឡើយ។ នៅប្រទេសកម្ពុជា ដើម្បីទទួលបានតួនាទីឧកញ៉ា គឺត្រូវឧបត្ថម្ភប្រាក់ដល់រដ្ឋាភិបាល ចំនួន ៥០ម៉ឺនដុល្លារ។
រដ្ឋាភិបាលសហរដ្ឋអាមេរិក កាលពីថ្ងៃទី១៥ ខែមិថុនា បានចេញផ្សាយរបាយការណ៍ប្រចាំឆ្នាំស្ដីពីការជួញដូរមនុស្ស ដោយបានដាក់ចំណាត់ថ្នាក់កម្ពុជា បន្តជាប់ក្នុងចំណាត់ថ្នាក់កម្រិតទី៣ ទាបបំផុតចំនួន២ឆ្នាំជាប់ៗគ្នា ដោយសារតែកម្ពុជាមិនបានគោរពពេញលេញ តាមបទដ្ឋានអប្បបរមា បរាជ័យក្នុងការលុបបំបាត់ការជួញដូរមនុស្ស ប្រព្រឹត្តអំពើពុករលួយ និងនិទ្ទណ្ឌភាពរបស់មន្ត្រីរដ្ឋាភិបាល ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។