អ្នកឃ្លាំមើលថា កូនៗ លោក ហ៊ុន សែន ជាគ្រាប់គ្រោះក្នុងសារពាង្គកាយខ្មែរ
2024.08.29
កូនទាំង ៥នាក់របស់លោក ហ៊ុន សែន ប្រធានគណបក្សប្រជាជនកម្ពុជា និងជាប្រធានប្រធានព្រឹទ្ធសភា។ ពីឆ្វេងទៅស្ដាំ៖ លោក ហ៊ុន ម៉ាណែត អ្នកស្រី ហ៊ុន ម៉ាណា លោក ហ៊ុន ម៉ានិត លោក ហ៊ុន ម៉ានីនិងអ្នកស្រី ហ៊ុន ម៉ាលី។
រូប៖ ហ្វេសប៊ុកលោក ហ៊ុន សែន
អ្នកឃ្លាំមើល និងមន្ត្រីបក្សប្រឆាំងចាត់ទុកកូនទាំង ៥នាក់របស់ប្រធានគណបក្សប្រជាជនកម្ពុជា លោក ហ៊ុន សែន ថា ជាក្រុមមេដឹកនាំដែលនាំគ្រោះដល់ប្រជាជាតិខ្មែរ។ ការលើកឡើងនេះ ធ្វើឡើងបន្ទាប់ពីលោក ហ៊ុន សែន អះអាងថា កូនរបស់លោកទាំង ៥នាក់ គឺជាគ្រាប់ពេជ្រ និងជាមនុស្សមានគុណធម៌។
អ្នកឃ្លាំមើលបញ្ហានយោបាយ និងមន្ត្រីបក្សប្រឆាំងលើកឡើងថា កូនៗ របស់លោក ហ៊ុន សែន ជាពិសេស លោកនាយករដ្ឋមន្ត្រី ហ៊ុន ម៉ាណែត ដែលឡើងគ្រងតំណែងតាមរយៈការផ្ទេរអំណាចពុំមានគុណធម៌នោះទេ ដោយសារតែលោកនៅតែបន្តបង្ក្រាបឥតស្រាកស្រាន្តលើក្រុមពលរដ្ឋ និងអ្នកមាននិន្នាការមិនស្របនឹងរដ្ឋាភិបាល និងបានឡើងកាន់អំណាចតពីឪតាមរយៈការបោះឆ្នោតមិនត្រឹមត្រូវ និងយុត្តិធម៌ ប៉ុន្តែ លោកព្រមទទួលយកតំណែងនាយករដ្ឋមន្ត្រីនេះ ដោយគ្មានភាពអៀនខ្មាស។
អ្នកធ្វើអត្ថាធិប្បាយនយោបាយ លោក គឹម សុខ ប្រាប់វិទ្យុអាស៊ីសេរី នៅថ្ងៃទី២៩ ខែសីហាថា លោកមិនឃើញថា កូនរបស់លោក ហ៊ុន សែន ទាំង ៥នាក់ជាគ្រាប់ពេជ្រ ឬក្ដីសង្ឃឹមសម្រាប់ប្រជាពលរដ្ឋខ្មែរឡើយ ផ្ទុយទៅវិញលោកថា ពួកគេប្រៀបបីដូចជាគ្រាប់គ្រោះសម្រាប់ប្រជាជាតិខ្មែរទៅវិញទេ។ លោកបន្ថែមថា នៅពេលពួកគេកាន់តែធំធាត់មានអំណាចពេញដៃ ប្រជាពលរដ្ឋកាន់តែក្រីក្រជួបទុក្ខលំបាក រីឯជោគវាសនាទឹកដី ក៏ប្រឈមបាត់បង់នាថ្ងៃអនាគត ដោយសារតែដឹកនាំរណបបរទេស។
លោក គឹម សុខ៖ «កូនលោក ហ៊ុន សែន ទាំង ៥នាក់ហ្នឹងមិនដឹងថា រាប់ថា មានសីសធម៌យ៉ាងម៉េចទេ បើមួយថ្ងៃៗ និយាយបោកប្រជាពលរដ្ឋខ្មែរមិនឈប់ កម្ពុជាកំពុងតែរអិលធ្លាក់ក្នុងវិបត្តិស្ទើរគ្រប់វិស័យ ក៏ប៉ុន្តែ កូនលោក ហ៊ុន សែន បែរជាបោកប្រជាពលរដ្ឋខ្មែរថា រីកចម្រើនខ្លាំងណាស់។ កូនលោក ហ៊ុន សែន ក៏មិនរាប់ថា មានគុណធម៌ដែរ ពីព្រោះពួកគេលួចជាតិធ្វើមាន សេដ្ឋីអស់ហើយ តែប្រជាពលរដ្ឋខ្មែរកាន់តែធ្លាក់ខ្លួនក្រវេទនាវ័ណ្ឌកនឹងបំណុល។ កូនលោក ហ៊ុន សែន ក៏មិនរាប់ថា សុភាពរាបសាដែរ ទាំង ហ៊ុន ម៉ាណែត ហ៊ុន ម៉ាណែត ហ៊ុនម៉ានី គំរាមបង្ក្រាបប្រជាពលរដ្ឋមិនស្វាង ដោយគ្រាន់តែប្រជាពលរដ្ឋសម្ដែងមតិទាមទារយុត្តិធម៌»។
ការលើកឡើងនេះ គឺបន្ទាប់ពីប្រធានព្រឹទ្ធសភាលោក ហ៊ុន សែន សរសេរសារនៅលើហ្វេសប៊ុក (Facebook) របស់លោកនៅថ្ងៃទី២៩ ខែសីហាថា កូនៗ ទាំង ៥នាក់របស់លោក រួមមាន លោក ហ៊ុន ម៉ាណែត លោក ហ៊ុន ម៉ានិត លោក ហ៊ុន ម៉ានី អ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី គឺជាគ្រាប់ពេជ្រ ដែលលោកបានច្នៃ និងមានចំណេះដឹងសីលធម៌ គុណធម៌ សុភាពរាបសា និងចេះជួយពលរដ្ឋក្រីក្រតាមរយៈការបញ្ជូនពួកគេឱ្យទៅរៀនសូត្រនៅក្រៅប្រទេសជាដើម។
ទោះជាយ៉ាងណាក្ដី ក្រុមអ្នកឃ្លាំមើល និងមន្ត្រីបក្សប្រឆាំងរិះគន់ថា នេះគ្រាន់តែជាសារបែបប្រជាភិថុតិសម្រាប់កូនៗ របស់លោក ហ៊ុន សែន តែប៉ុណ្ណោះ ខណៈរដ្ឋាភិបាលលោក ហ៊ុន ម៉ាណែត កំពុងដឹកនាំប្រទេសកាន់តែច្របូកច្របល់ ជាពិសេស រឿងប្រជាពលរដ្ឋទាំងក្នុង និងក្រៅប្រទេសនៅតែទាមទារឱ្យរដ្ឋាភិបាលដកគម្រោងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) ដើម្បីបញ្ចៀសការបាត់បង់ទឹកដីនាថ្ងៃអនាគត។ ទន្ទឹមគ្នានេះ ក្នុងពេលពលរដ្ឋជាច្រើនមានជីវភាពក្រីក្រក្រុមគ្រួសារត្រកូល ហ៊ុន បែរជាប្រមែប្រមូលធនធានទ្រព្យសម្បត្តិជាតិ និងស្រវាមានបានកប់ក្ដោង តាមរយៈការធ្វើអាជីវកម្មនៃមុខជំនួញរបស់ពួកគេ។
អង្គការឃ្លាំមើលពិភពលោក គ្លបល វីនេស (Global Witness) ធ្លាប់លាតត្រដាងទ្រព្យសម្បត្តិសែស្រឡាយត្រកូល ហ៊ុន កាលពីអំឡុងឆ្នាំ២០១៦ ថា ត្រកូល ហ៊ុន អាចមានទ្រព្យសម្បត្តិសរុបមិនតិចជាងពី ៥រយលានទៅ ១ពាន់ដុល្លារដុល្លារនោះទេ តាមរយៈការធ្វើជំនួញខុសច្បាប់ និងរំលោភសិទ្ធិមនុស្ស។ ក្រុមហ៊ុនទាំងនោះ រួមមាន តាំងពីក្រុមហ៊ុន កាប់ឈើ រុករករ៉ែ ក្រុមហ៊ុនពាណិជ្ជកម្ម ហិរញ្ញវត្ថុ ទេសចរណ៍ សំណង់ អចលនទ្រព្យ ថាមពល ក្រុមហ៊ុននាំចូលថ្នាំពេទ្យ និងក្រុមហ៊ុនបនល្បែងជាដើម។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីឆ្លើយតបនឹងការលើកឡើងនេះបានទេ នៅថ្ងៃទី២៩ ខែសីហា។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន លើកឡើងថា កូនៗ លោក ហ៊ុន សែន ពុំមានអត្តចរិតសុភាពរាបសា និងគុណធម៌សម្រាប់ប្រជាជនខ្មែរឡើយ។ លោកបន្តថា តាមរបៀបដឹកនាំរបស់លោក ហ៊ុន ម៉ាណែត តតំណែងពីឪពុក នៅតែមានចរិតបែបហិង្សានិយមបង្ក្រាបសំឡេងអ្នករិះគន់ និងបែងចែកប្រកាន់បក្ខពួកនិយមស្ទើរគ្រប់ស្ថាប័នរដ្ឋ តាំងពីថ្នាក់ជាតិរហូតដល់ថ្នាក់ក្រោមជាតិ។
លោក អ៊ុំ សំអាន៖ «ក្រោមការដឹកនាំរបស់លោក ហ៊ុន ម៉ាណែត មានការរំលោភសិទ្ធិមនុស្សចាប់ចងសកម្មជនសង្គម សកម្មជនបក្សប្រឆាំង បរិស្ថានដាក់ពន្ធនាគារយ៉ាងច្រើនមានការបំផ្លិចបំផ្លាញធនធានធម្មជាតិ បក្ខពួកនិយម គ្រួសារនិយម រំលោភយកដីធ្លីប្រជាពលរដ្ឋ។ ប្រជាពលរដ្ឋអត់ការងារធ្វើចំណាកស្រុកធ្វើការនៅស្រុកថៃជាដើម ដូច្នេះ លោក ហ៊ុន ម៉ាណែត មិនមែនជាគ្រាប់ពេជ្រនោះទេ គឺជាគ្រោះចង្រៃដ៏អាក្រក់សម្រាប់ប្រទេសកម្ពុជា នៅពេលដឹកនាំបន្តពីឪពុករបស់គាត់ គឺបានធ្វើឱ្យកម្ពុជាដាំក្បាលចុះមែនទែនខាងផ្នែកសេដ្ឋកិច្ច»។
អ្នកឃ្លាំមើល និងមន្ត្រីបក្សប្រឆាំងថា ប្រសិនបើលោក ហ៊ុន សែន និងលោក ហ៊ុន ម៉ាណែត ក្លាហានដឹកនាំប្រទេសតាមគន្លងប្រជាធិបតេយ្យ ពលរដ្ឋអាចនឹងមិនជួបបញ្ហាសេដ្ឋកិច្ចដុនដាបដូចពេលបច្ចុប្បន្ននោះទេ ហើយពលរដ្ឋ និងយុវជន ដែលជាកូនអ្នកកសិករក្រីក្រ ដែលមានចំណេះដឹង និងសមត្ថភាពក៏អាចរួមចំណែកកសាងប្រទេសដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
អត្ថបទពេញនិយម
នយោបាយ
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ពលរដ្ឋខ្មែរនៅប្រទេសនូវែលហ្សេឡង់ធ្វើបាតុកម្មប្រឆាំងគម្រោង CLV-DTA និងទាមទារស្ដារប្រជាធិបតេយ្យ