លោក ហ៊ុន សែន បន្តុះ​បង្អាប់​បណ្ឌិត​ពីរ​រូប​ថា អសមត្ថភាព​ក្នុង​ការ​វិភាគ

ដោយ ទីន ហ្សាការីយ៉ា
2019-10-07
អ៊ីម៉ែល
មតិ
Share
បោះពុម្ព
នាយករដ្ឋមន្ត្រី ហ៊ុន សែន បណ្ឌិត ឡៅ ម៉ុងហៃ (កណ្ដាល) អ្នក​វិភាគ​នយោបាយ បណ្ឌិត មាស នី អ្នក​សិក្សា​ស្រាវជ្រាវ​ការ​អភិវឌ្ឍន៍​សង្គម។
នាយករដ្ឋមន្ត្រី ហ៊ុន សែន បណ្ឌិត ឡៅ ម៉ុងហៃ (កណ្ដាល) អ្នក​វិភាគ​នយោបាយ បណ្ឌិត មាស នី អ្នក​សិក្សា​ស្រាវជ្រាវ​ការ​អភិវឌ្ឍន៍​សង្គម។
រូប៖ ហ្វេសប៊ុក​លោក ហ៊ុន សែន (ឆ្វេង) និង RFA

មេ​ដឹក​នាំ​របប​ក្រុង​ភ្នំពេញ​លោក ហ៊ុន សែន តិះដៀល​​អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត មាស នី និង​អ្នក​វិភាគ​នយោបាយ ​បណ្ឌិត ឡៅ ម៉ុងហៃ ​នៅ​ចំពោះ​មុខ​សិស្ស​និទ្ទេស A និង​មន្ត្រី​អ្នក​មុខ​អ្នក​ការ​រាប់​រយ​នាក់នៅថ្ងៃទី៧ តុលា។ អ្នក​ឃ្លាំមើល​បញ្ហា​សង្គម​យល់ថា លោក​ ហ៊ុន សែន មិន​គួរ​បញ្ចេញ​សារ​បែប​នេះ​ឡើយ ព្រោះ​ការ​វិភាគ​ឆ្លុះ​បញ្ចាំង​អំពី​ការ​យល់​ឃើញ​របស់​បញ្ញវន្ត​ទាំងនោះ ហើយ​នេះ​ជា​សេរីភាព​បញ្ចេញ​មតិ​ដែល​ធានា​ដោយ​ច្បាប់។

លោកនាយក​រដ្ឋ​មន្ត្រី ហ៊ុន សែន វាយ​តម្លៃ​សមត្ថភាព​បញ្ញវន្ត​ទាំងពីរ​រូប​ថា អន់​ខ្សោយ​ជាង​មន្ត្រី​របស់​លោក​ ហើយ​ថា បណ្ឌិត​ទាំងពីរ​រូប​វិភាគ​មិន​ត្រូវ​អំពី​ស្ថានការណ៍​កម្ពុជា​ឡើ៖ «ឥលូវ​ខ្ញុំ​និយាយ​ចំ​ឈ្មោះ មាស នី តែ​ម្ដង ឈ្មោះ​នេះ​វិភាគ​អន់​ណាស់ កម្រិត​វិភាគ​ទាប​ពេក។ សង្ឃឹមថា មាស នី វិភាគ​​ឱ្យ​ត្រូវ​ ល្អ​ជាង​នេះ។ រាប់​ទាំង ឡៅ ម៉ុងហៃ ផង ខ្ញុំ​ថា​ងាប់​ហើយ​បណ្ឌិត​ធុន​ហ្នឹង មិន​ដឹង​យក​ធ្វើ​ផេះ​អ្វី​ទេ។ យើង​នៅ​ទីនេះ​ បណ្ឌិត​ក៏​មិន​មែន​តិច​ដែរ បណ្ឌិត​សភាចារ្យ ហង់ ជួន ណរ៉ុន។ ឱ្យ​បាន​តែ​ពាក់​កណ្ដាល ឬ​បាន​ ៣០% របស់​ ហង់ ជួន ណរ៉ុន ទៅ​បាន​ហើយ។ ឡប់ៗ មក​ពីអង្កាល់ ធ្វើ​ឯង​ជា​អ្នក​វិភាគ​សង្គម»

លោក ហ៊ុន សែន បញ្ចេញ​​ប្រតិកម្ម​បែបនេះ បន្ទាប់​ពី​លោក​បណ្ឌិត មាស នី បាន​វិភាគ​នៅ​លើ​វិទ្យុ​អាស៊ី​សេរី​កាល​ពី​​យប់​ថ្ងៃ​ទី៦ តុលា​ថា រដ្ឋាភិបាល​កម្ពុជា​កំពុង​ព្រួយ​បារម្ភ​កាន់​តែ​ខ្លាំង​ នៅ​ពេល​ឃើញ​អ្នក​គាំទ្រ​បក្ស​ប្រឆាំង​មិន​បាក់​ស្បាត ទោះ​ជា​រង​ការ​គំរាម​កំហែង និង​ការ​បំភិតបំភ័យ​តាម​គ្រប់​រូប​ភាព​ពី​សំណាក់​អាជ្ញាធរ។ លោក ហ៊ុន សែន អះអាង​ថា លោក​មិន​​បារម្ភ​រឿង​នេះ​ឡើយ ប៉ុន្តែ​អ្វី​ដែល​លោក​ភ័យ​ព្រួយ​នោះ គឺ​ការ​មិន​បាន​លេង​កូន​ហ្គោល​ទៅ​វិញ​ទេ៖ «វិភាគ​ចេញ​មក​រដ្ឋាភិបាល​ដូច​ជា​ភ័យ​ខ្លាំង​ណាស់។ អា​មួយ​នោះ​ស្រែក​ថា​ភ័យ អា​មួយ​នេះ​នៅ​ខាង​ក្នុង​​ស្រែក​ថា​ភ័យ​ដែរ​។ ចាំ​តែ​ភ័យ​ជាមួយ​អា​សែន​តើ! ត្រូវ​ដឹង​អា​មនុស្ស​ដែល​ចូល​សមរភូមិ​ ដែល​មិន​ដែល​ខ្លាច​ស្លាប់ ពាក្យ​ថា​ភ័យ​គ្មាន​សម្រាប់​វា​ទេ។ របស់​ដែល​ភ័យ ខ្លាច​វាយ​កូន​ហ្គោល​មិន​បាន​ឡើង​វិញ»

មេដឹកនាំ​របប​ក្រុង​ភ្នំពេញ​លោក ហ៊ុន សែន ធ្លាប់​បាន​ប្រតិកម្ម​ខ្លាំងៗ ទៅ​នឹង​ការ​លើក​ឡើង​របស់​ក្រុម​អ្នក​វិភាគ និង​អ្នក​ឃ្លាំមើល​បញ្ហា​សង្គម​ជាច្រើន​ដង​រួច​មក​ហើយ នៅ​ពេល​អ្នក​ទាំង​នោះ​បញ្ចេញ​ទស្សនៈ​ប៉ះពាល់​ដល់​អារម្មណ៍​របស់​លោក​ ជាពិសេស នៅ​ពេល​ក្រុម​អ្នក​វិភាគ​ចង់​ឱ្យ​លោក ហ៊ុន សែន ជួប​ចរចា​ជាមួយ​លោក សម រង្ស៊ី ដើម្បី​ដោះស្រាយ​បញ្ចប់​វិបត្តិ​នយោបាយ។

អ្នកវិភាគ​នយោបាយ​ បណ្ឌិត ឡៅ ម៉ុងហៃ ថ្លែងថា លោក​មាន​កិត្តិយស​ដែល​ត្រូវ​លោក ហ៊ុន សែន យក​លោក​​ទៅ​ប្រៀបធៀប​ជាមួយ​មន្ត្រី​ជាន់ខ្ពស់​របស់​ជាតិ។ ទោះ​ជា​យ៉ាង​ណា លោក​ថា ប្រសាសន៍​របស់​លោក ហ៊ុន សែន នេះ គ្រាន់​តែ​ជា​ការ​​យល់​ឃើញ​តាម​អារម្មណ៍​ប៉ុណ្ណោះ ពីព្រោះ​លោក​ ហ៊ុន សែន មិន​មែន​ជា​គ្រូ​ដាក់​ពិន្ទុ​លើ​សមត្ថភាព​របស់​លោក ហើយក៏​គ្មាន​ក្បួន​ខ្នាត​ណាមួយ​អាច​យក​មក​វាស់វែង​ការ​ចេះដឹង​របស់​លោក​ប្រៀប​ធៀប​ជាមួយ​អ្នក​ដទៃ​នោះ​ដែរ។ ​

អ្នក​វិភាគ​នយោបាយ​ចាស់​វស្សា​រូប​នេះ​អះអាង​ថា ក្នុង​នាម​ជា​ពលរដ្ឋ​ខ្មែរ​មួយ​រូប ដែល​ទទួល​បាន​ការ​ឧបត្ថម្ភ​ពី​សង្គម​ឱ្យ​បាន​រៀន​សូត្រ​ក្លាយ​ជា​បញ្ញវន្ត លោក​មាន​ករណី​កិច្ច​ជួយ​សង្គម​ទៅតាម​លទ្ធភាព​ដែល​អាច​ធ្វើ​​បាន​ ជា​ពិសេស ​គឺ​ការ​ចែក​រំលែក​ចំណេះ​ដឹង និង​បទពិសោធន៍​​ដល់​ប្រជាពលរដ្ឋ​ខ្មែរ។ លោក​បញ្ជាក់​ថា លោក​នឹង​នៅ​តែ​ផ្តល់​ការ​វិភាគ​បញ្ហា​នយោបាយ និង​សង្គម​​ រហូត​ដល់​ប្រទេស​លែង​មាន​បញ្ហា ឬ​រហូត​ដល់​ពេល​លោក​ផុត​ដង្ហើម៖ «ហ្នឹង​គឺ​ជា​ករណី​កិច្ច​ ជាពិសេស​នៅ​ពេល​ដែល​សង្គម​ហ្នឹង ជួប​វិបត្តិ ឬក៏​មាន​បញ្ហា​អ្វី​ទៅ ម៉្លោះហើយ​បើ​យើង​មាន​គំនិត មាន​អ្វី​ដែល​លេច​ចេញ​មក​ពី​ការ​អប់រំ​របស់​យើង ដែល​សង្គម​យើង​បាន​ជួយ​នោះ យើង​ត្រូវ​តែ​ចែក​រំលែក​បទពិសោធន៍​ គំនិត​ និង​ផ្ដល់​ដំណោះស្រាយ​ក្នុង​ក្របខ័ណ្ឌ​ដែល​ខ្មែរ​ថា អ្នក​ប្រាជ្ញ​រក្សា​ខ្លៅ។ ខ្ញុំ​មិន​មែន​ជា​អ្នក​ប្រាជ្ញ​ទេ ប៉ុន្តែ​ដឹង​រឿង​ហ្នឹង ដឹង​បញ្ហា​ហ្នឹង​ដោះស្រាយ​យ៉ាងម៉េច អា​ហ្នឹង​យើង​ជួយ​ទៅ។ តែ​ប៉ុណ្ណឹង​ឯង​ទេ អត់​មាន​អ្វី​ចង់​បាន​ប្រយោជន៍​ផ្ទាល់​ខ្លួន​អ្វី​ទេ ហើយ​ក៏​មិន​ទៅ​តតាំង​ជាមួយ​អ្នក​ណា​ ប្រឆាំង​ជាមួយ​អ្នក​ណា​អ្វី​ដែរ»

អនុប្រធាន​បណ្ដាញ​យុវជន​កម្ពុជា និង​ជា​អ្នក​សិក្សា​ផ្នែក​សិទ្ធិមនុស្ស​អន្តរជាតិ លោក ស ម៉ូរី យល់ថា ​ប្រសាសន៍​របស់​លោក ហ៊ុន សែន នេះ គឺ​ជា​ការ​គំរាម​កំហែង និង​​ជា​ការ​បំបាក់​ទឹក​ចិត្ត​យុវជន និង​ពលរដ្ឋ​ដទៃ​ មិន​ឱ្យ​លើក​ឡើង​អំពី​ភាព​ខ្វះ​ចន្លោះ​របស់​រដ្ឋាភិបាល។ ​លោក​​ថា ការ​បញ្ចេញ​មតិ​ គឺ​ជា​សិទ្ធិ​សេរីភាព​ដ៏​សំខាន់​នៅ​ក្នុង​សង្គម​​ប្រជាធិបតេយ្យ ដូច្នេះ​រដ្ឋាភិបាល​កម្ពុជា​មាន​កាតព្វកិច្ច​លើក​​ស្ទួយ​សិទ្ធិ​នេះ​ជា​ចាំបាច់៖ «ការ​បន្តុះ​បង្អាប់​របស់​លោក​នាយក​រដ្ឋ​មន្ត្រី ហ៊ុន សែន ទៅលើ​ការ​វិភាគ​របស់​លោក​បណ្ឌិត​ទាំង​ពីរ​ វា​ជា​រូប​ភាព​មួយ​គំរាម​កំហែង​ផង ហើយ​ទីពីរ​ជា​ការ​មិន​លើក​ទឹក​ចិត្ត​ឱ្យ​យុវជន​ផ្សេង​ទៀត​ ឬក៏​អ្នក​វិភាគ​ផ្សេងទៀត​ហ្នឹង ​ហ៊ាន​បញ្ចេញ​មតិ​ ឬក៏​តិះតៀន​ទៅលើ​ភាព​អសកម្ម​របស់​រាជ​រដ្ឋាភិបាល​ ឬក៏​ស្ថានភាព​សិទ្ធិមនុស្ស និង​ប្រជាធិបតេយ្យ​នៅ​ក្នុង​ប្រទេស​កម្ពុជា»

រដ្ឋ​ធម្មនុញ្ញ​ចែងថា កម្ពុជា​​ទទួល​ស្គាល់​ និង​គោរព​សិទ្ធិមនុស្ស​ដូច​ដែល​មាន​ចែង​ក្នុង​ធម្មនុញ្ញ​អង្គការ​សហប្រជាជាតិ សេចក្ដី​ប្រកាស​ជា​សកល​ស្ដីពី​សិទ្ធិមនុស្ស និង​កតិកាសញ្ញា ព្រមទាំង​អនុសញ្ញា​ទាំងឡាយ​ទាក់ទង​ទៅ​នឹង​សិទ្ធិមនុស្ស ហើយ​ប្រជាពលរដ្ឋ​ខ្មែរ​មាន​សេរីភាព​ខាង​ការ​បញ្ចេញ​មតិ​របស់​ខ្លួន។

ទោះ​ជា​យ៉ាង​ណា គិត​មក​ដល់​ពេល​នេះ មាន​ពលរដ្ឋ និង​បញ្ញវន្ត​មិន​តិច​នាក់​ទេ ដែល​រងគ្រោះ​ដោយ​សារ​តែ​ការ​បញ្ចេញ​មតិ និង​ការពារ​សិទ្ធិមនុស្ស​នេះ។ ជាឧទាហរណ៍ អតីតប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា លោក ជា វិជ្ជា សកម្មជន​ព្រៃឈើ លោក ឈុត វុទ្ធី និង​អ្នក​​ស្រាវជ្រាវ​ខាង​ការ​អភិវឌ្ឍ​សង្គម បណ្ឌិត កែម ឡី ជា​ដើម សុទ្ធ​សឹង​តែ​ត្រូវ​បាន​គេ​ធ្វើឃាត​ ដោយ​​សារ​តែ​ភាព​លេច​ធ្លោ​នៃ​ការ​ប្រើប្រាស់​សិទ្ធិ​សេរីភាព​របស់​ខ្លួន​នេះឯង។ ទន្ទឹម​នឹង​នេះ សកម្មជន​បក្ស​ប្រឆាំង អ្នក​ឃ្លាំមើល​បញ្ហា​សង្គម​ និង​​សកម្មជន​មួយ​ចំនួន​ទៀត ក៏​​រង​ការ​ប្ដឹង​ចាប់​ដាក់​គុក​ពី​របប​លោក ហ៊ុន សែន​ ដែរ ដោយសារ​តែ​ពួក​​គេ​បាន​​​​បញ្ចេញ​មតិ ប៉ះពាល់​ដល់​របប​ដឹក​នាំ​ក្រុង​ភ្នំពេញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល