លោក ហ៊ុន សែន យកដីដែលបានពីលោក គង់ គាំ ប្រគល់ឱ្យគ.ជ.បសាងសង់ទីស្នាក់ការ
2023.01.14
(រូបកណ្ដាល) លោក គង់ គាំ ឧត្ដមទីប្រឹក្សាគណបក្សភ្លើងទៀន។
លោកនាយករដ្ឋមន្ត្រី ហ៊ុន សែន សម្រេចយកដីដែលបានទាំងបង្ខំពីឧត្តមទីប្រឹក្សាគណបក្សភ្លើងទៀន លោក គង់ គាំ ប្រគល់ទៅឱ្យគណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីសាងសង់អគារទីស្ដីការស្ថាប័ននេះ។
លោកនាយករដ្ឋមន្ត្រី ហ៊ុន សែន បញ្ជាឱ្យមន្ត្រីជំនាញរៀបចំឯកសារដើម្បីធ្វើឱ្យដីទំហំជាង ៥ពាន់ម៉ែត្រការ៉េ ពីការគ្រប់គ្រងដោយលោក គង់ គាំ មកជាការគ្របគ្រងដោយរដ្ឋវិញ។ លោក ហ៊ុន សែន សម្រេចដូចនេះ ក្នុងកិច្ចប្រជុំពេញអង្គគណៈរដ្ឋមន្ត្រី ថ្ងៃទី១៣ ខែមករា។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ឱ្យវិទ្យុអាស៊ីសេរីថា លោក ហ៊ុន សែន សម្រេចដូច្នេះ ព្រោះ គ.ជ.ប សព្វថ្ងៃមិនទាន់មានអគារទីស្នាក់ការផ្ទាល់ខ្លួននៅឡើយ។ មន្ត្រីរដ្ឋាភិបាល រូបនេះឱ្យដឹងទៀតថា បើទោះជារដ្ឋាភិបាលបញ្ចប់វិធានការផ្លូវច្បាប់ក្រោយពេលលោក គង់ គាំ ប្រគល់ដីនិងផ្ទះជូនរដ្ឋបែបនេះក្ដី ប៉ុន្តែ លោកមិនទាន់ដឹងថា បណ្ដឹងដែលគណបក្សប្រជាជនកម្ពុជា ប្ដឹងលោក គង់ គាំ នឹងត្រូវបញ្ចប់ដែរឬយ៉ាងណានោះទេ។
លោក ផៃ ស៊ីផាន៖ «អត់ដឹងទេ ដល់ទៅសួរខាងឯកឧត្តម សុខ ឥសាន ខ្ញុំដឹងតែរឿងដីធ្លីពាក់ព័ន្ធនឹងរដ្ឋាភិបាលណា»។
ពេលនេះ ឧត្តមទីប្រឹក្សាគណបក្សភ្លើងទៀន លោក គង់ គាំ បានរួចផុតពីការស៊ើបអង្កេត និងបណ្ដឹងនានាពីរដ្ឋាភិបាលលោក ហ៊ុន សែន ក្រោយអស់ដីអស់ផ្ទះ ដែលមានតម្លៃរាប់លានដុល្លារនៅកណ្ដាលទីក្រុងភ្នំពេញ។ លោក គង់ គាំ និងភរិយា បានផ្ដិតមេដៃលើលិខិតប្រគល់ដី និងផ្ទះនេះ ជូនទៅរដ្ឋាភិបាល លោក ហ៊ុន សែន កាលពីថ្ងៃទី១២ មករា។
ចំណែក លោក ហ៊ុន សែន យល់ព្រមឈប់ប្ដឹងលោក គង់ គាំ។ ទោះជាបែបនេះក្ដី តែលោក ហ៊ុន សែន មិនបានបញ្ជាក់ថា លោកឈប់ប្ដឹងលោក គង់ គាំ គ្រប់ករណី ឬបញ្ចប់ត្រឹមសំណុំរឿងដីផ្ទះលោក គង់ គាំ នេះទេ។
លោក គង់ គាំ នៅជាប់បណ្ដឹងមួយទៀតពីគណបក្សប្រជាជនកម្ពុជាប្រចាំខេត្តត្បូងឃ្មុំ។ តំណាងគណបក្សនេះបានដាក់ពាក្យប្ដឹងលោក គង់ គាំ ទៅតុលាការ កាលពីថ្ងៃទី១០ ខែមករា ដោយចោទប្រកាន់ថា សម្ដីរបស់លោក គង់ គាំ ដែលនិយាយពីដើមកំណើតបក្សប្រជាជនកម្ពុជា ជាចេតនា ក្នុងគោលបំណងទុច្ចរិត ញុះញង់បង្កឱ្យមានភាពវឹកវរចលាចលអសន្តិសុខសង្គម។ គណបក្សនេះ ប្ដឹងទៅតុលាការ ខេត្តត្បូងឃ្មុំ សុំឱ្យចោទប្រកាន់ និងផ្ដន្ទាទោសលោក គង់ គាំ ឱ្យធ្ងន់ធ្ងរបំផុត និងទាមទារជំងឺចិត្តពីលោក គង់ គាំ ជាប្រាក់ចំនួន ៥០ម៉ឺនដុល្លារ។
ទាក់ទងរឿងនេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យដឹងថា ការសម្រេចបន្តប្ដឹង ឬដកពាក្យប្ដឹងពីលោក គង់ គាំ ជាសិទ្ធិសម្រេចរបស់ភាគីដើមបណ្ដឹង គឺតំណាងគណបក្សប្រជាជនកម្ពុជា ប្រចាំខេត្តត្បូងឃ្មុំ។
វិទ្យុអាស៊ីសេរីមិនទាន់អាចមានប្រភពសុំការបញ្ជាក់ពីអនុប្រធានក្រុមការងារយុវជនខេត្តត្បូងឃ្មុំ លោក សេង ជ័យវុធ ដែលឈរឈ្មោះដើមបណ្ដឹងប្ដឹងលោក គង់ គាំ បានទេ នៅថ្ងៃទី១៣ ខែមករា។
ជុំវិញបញ្ហានេះវិទ្យុអាស៊ីសេរីមិនអាចសុំប្រតិកម្មពីឧត្តមទីប្រឹក្សាគណបក្សភ្លើងទៀន លោក គង់ គាំ និងកូនប្រុសរបស់ គង់ គាំ គឺលោក គង់ មូនីកា និងលោក គង់ សភា បានទេ នៅថ្ងៃទី១៣ ខែមករា។
កាលពីថ្ងៃទី១២ ខែមករា លោក គង់ គាំ និងកូនប្រុស គឺលោក គង់ មូនីកា បានដាក់លិខិតសុំជួបលោក ហ៊ុន សែន ដើម្បីជជែករឿងគណបក្សប្រជាជនកម្ពុជាខេត្តត្បូងឃ្មុំ ប្ដឹងលោក និងបញ្ហាដីផ្ទះរបស់លោក។ ទោះយ៉ាងណា មកដល់ពេលនេះ លោក ហ៊ុន សែន មិនទាន់បង្ហាញជំហរថា លោកយល់ព្រមជួបលោក គង់ គាំ ឬមិនជួបនោះទេ។
ចំណែក លោក សុខ ឥសាន យល់ថា ទំនងមិនអាចមានជំនួបនេះកើតឡើយបានឡើយ។ អ្នកនាំពាក្យបក្សកាន់អំណាចដដែល យល់ថា បើទោះមានជំនួបក៏មិនដឹងថា ត្រូវជជែករឿងអ្វីនោះដែរ។
លោក សុខ ឥសាន៖ «ធម្មតាបើសិនជាដើមបណ្ដឹងគាត់យល់ព្រមតតាំងក្ដីទៅមុខទៀត មានតែតុលាការលោក មិនចោទមិនចាត់ការប្រហែលសម្ដេចលោកគ្មានពេលវេលាឱ្យជួបទេ ហើយម៉្យាងជួបក៏មិនដឹងនិយាយរឿងពីព្រោះបញ្ហាវាចប់រួចទៅហើយបាទ»។
ទោះមន្ត្រីបក្សកាន់អំណាចអះអាងបែបនេះ តែមន្ត្រីសិទ្ធិមនុស្សយល់ថា ការដោះស្រាយបញ្ហាដោយជជែកគឺជាវប្បធម៌ល្អ។
អ្នកនាំពាក្យសមាគមអាដហុក (Adhoc) លោក ស៊ឹង សែនករុណា សង្កេតឃើញថា ចំណាត់ការលើលោក គង់ គាំ ជាប់ៗគ្នាប៉ុន្មានថ្ងៃនេះបង្កឱ្យមានភាពតានតឹងផ្នែកនយោបាយ ដែលមិនបានផ្ដល់ផលល្អសម្រាប់ការបោះឆ្នោតទី២៣ ខែកក្កដា ខាងមុខនេះទេ។ មន្ត្រីសិទ្ធិមនុស្សរូបនេះកត់សម្គាល់ឃើញថា រាល់ពេលមានការបោះឆ្នោតម្ដងៗពលរដ្ឋតែងតែរងការភិតភ័យពីព្រោះជម្លោះនយោបាយ។ លោកយល់ថា ការស្នើទៅបក្សកាន់អំណាចគួរបង្កបរិយាកាសបើកលំហសេរីបញ្ចេញមតិនិងសិទ្ធិនយោបាយឡើងវិញ។
លោក ស៊ឹង សែនករុណា៖ «គូប្រកួតប្រជែងហ្នឹងហើយធ្វើទុក្ខបុកម្នេញគ្នា ធ្វើឱ្យប៉ះទង្គិចទៅដល់ផ្លូវចិត្តរបស់ប្រកួតប្រជែងគ្នា ឬក៏អង្គអ្នកបោះឆ្នោតក្ដីអ្នកអង្គអ្នកបោះឆ្នោតក្ដីគាត់មានការព្រួយបារម្ភហ្នឹងគឺយើងអត់ចង់ឃើញទេ យើងចង់ឃើញបរិយាកាសមួយដែលមានការគាំទ្រពីគ្រប់មជ្ឈដ្ឋានទាំងសហគមន៍ជាតិ និងអន្តរជាតិ ហើយបើសិនមិនទាន់ការបោះឆ្នោតមកដល់ផងហើយយើងមានស្ថានភាពតានតឹងផ្នែកនយោបាយបែបនេះវាកាន់តែបង្កើនការព្រួយបារម្ភ»។
របាយការណ៍អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch)ចុះផ្សាយកាលពីថ្ងៃទី១២ ខែមករា រកឃើញថា រដ្ឋាភិបាលលោក ហ៊ុន សែន បានប្រើវិធានការតឹងរ៉ឹង ដើម្បីបំបិទសេរីភាពប្រជាពលរដ្ឋ អ្នកនយោបាយ និងមន្ត្រីសង្គមស៊ីវិល ក្នុងការបញ្ចេញមតិ និងសិទ្ធិនយោបាយ ដែលមាននិន្នាការផ្ទុយពីរដ្ឋាភិបាល។ ទោះយ៉ាងណា សហគមន៍អន្តរជាតិ បានរំលឹកទៅរដ្ឋាភិបាលលោក ហ៊ុន សែន ជាញឹកញាប់ឱ្យបើកលំហប្រជាធិបតេយ្យសម្រាប់ការបោះឆ្នោតនាខែកក្កដាខាងមុខផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
អត្ថបទពេញនិយម
នយោបាយ
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- ចិនបញ្ជូនកងទ័ពជាង២០០នាក់មកធ្វើសមយុទ្ធនាគមាសឆ្នាំ២០២៣ជាមួយកម្ពុជា
- មន្ត្រីសិទ្ធិមនុស្សថា ការចាប់ខ្លួនអ្នកគាំទ្រលោក កឹម សុខា ពីរនាក់ជាការបំបិទសិទ្ធិបញ្ចេញមតិ
- តុលាការចោទប្រកាន់ លោក យឹម ស៊ីណន និងលោក ហ៊ុន កុសល ពីបទប្រមាថព្រះមហាក្សត្រ និងបទញុះញង់