លោក ហ៊ុន សែន បើក​ទូលាយ​កិច្ច​សន្ទនា​ជាមួយ​គណបក្ស​នយោបាយ និង​សង្គម​ស៊ីវិល តែ​មិន​មែន​ជាមួយ​គណបក្ស សង្គ្រោះ​ជាតិ

ដោយ ទីន ហ្សាការីយ៉ា
2019-01-07
អ៊ីម៉ែល
មតិ
Share
បោះពុម្ព
ប្រធាន​ស្ដីទី​គណបក្ស​សង្គ្រោះជាតិ លោក កឹម សុខា (ស្ដាំ) និង​លោក​នាយករដ្ឋមន្ត្រី ហ៊ុន សែន (ឆ្វេង) ថ្លែង​ក្នុង​កិច្ច​ប្រជុំ នា​វិមាន​រដ្ឋសភា នៅ​ព្រឹក​ថ្ងៃ​ទី​៧ ខែ​ធ្នូ ឆ្នាំ​២០១៦។ RFA/Cheu Sideth
ប្រធាន​ស្ដីទី​គណបក្ស​សង្គ្រោះជាតិ លោក កឹម សុខា (ស្ដាំ) និង​លោក​នាយករដ្ឋមន្ត្រី ហ៊ុន សែន (ឆ្វេង) ថ្លែង​ក្នុង​កិច្ច​ប្រជុំ នា​វិមាន​រដ្ឋសភា នៅ​ព្រឹក​ថ្ងៃ​ទី​៧ ខែ​ធ្នូ ឆ្នាំ​២០១៦។ RFA/Cheu Sideth
RFA/Cheu Sideth

មេ​ដឹក​នាំ​របប​ក្រុងភ្នំពេញ​ ប្រកាស​ស្វាគមន៍​ និង​បើក​ទូលាយ​កិច្ច​សន្ទនា​ជាមួយ​គណបក្ស​ នយោបាយ និង​អង្គការ​សង្គម​ស៊ីវិល តែ​មិន​មែន​ជាមួយ​គណបក្ស សង្គ្រោះ​ជាតិ នោះ​ទេ។ អ្នកវិភាគ​ និង​សង្គម​ស៊ីវិល​យល់ថា ការ​ប្រកាស​របស់​លោក ​ហ៊ុន​ សែន នេះ មិន​ចេញ​ពី​បេះដូង​ពិត​ប្រាកដ និង​មិន​ឆ្លើយ​តប ចំពោះ​សំណើ​សហគមន៍​អន្តរ​ជាតិ ដែល​ចង់​ឃើញ​ដំណើរ​ការ​លទ្ធិ​ប្រជាធិបតេយ្យ និង​ការ​គោរព​សិទ្ធិ​មនុស្ស​នោះ​ទេ។

ថ្លែង​ក្នុង​ពិធី​អបអរ​សាទរ​ខួប​លើក​ទី៤០ នៃ​ថ្ងៃ ៧ មករា លោក ហ៊ុន សែន បញ្ជាក់​ថា របប​របស់​លោក នឹង​បើក​ទូលាយ​សម្រាប់​កិច្ច​សន្ទនា​ដ៏​ស្មោះ​ស​ជាមួយ​គណបក្ស​នយោបាយ សង្គម​ស៊ីវិល និង​មជ្ឈដ្ឋាន​ជឿនលឿន​ទាំង​អស់ ដើម្បី​ប្រមែប្រមូល​គំនិត​បញ្ញា និង​ធនធាន​មនុស្ស​ពី​គ្រប់​ប្រភព ដោយ​គ្មាន​ការ​បែង​ចែក​រើសអើង ដើម្បី​បង្កើន​កម្លាំង​សរុប​នៅ​ក្នុង​កិច្ចការ​កសាង និង​អភិវឌ្ឍន៍​ប្រទេស​ជាតិ។

ទោះ​យ៉ាង​ណា​ក្តី លោក ហ៊ុន សែន មិន​បាន​បញ្ជាក់​អំពី​ការ​បើក​កិច្ច​សន្ទនា​ជាមួយ​គណបក្ស សង្គ្រោះ​ជាតិ ដែល​របប​របស់​លោក​រំលាយ​ចោល​នោះ​ទេ៖ «»

អ្នក​នយោបាយ​បក្ស​ប្រឆាំង អ្នកវិភាគ និង​សង្គមស៊ីវិល សុទ្ធតែ​មើល​ឃើញ​ថា ការ​ប្រកាស​របស់​មេ​ ដឹក​នាំ​របប​ក្រុង​ភ្នំពេញ មិន​កើត​ចេញ​ពី​បេះដូង និង​គ្មាន​ឆន្ទៈ​បង្រូបបង្រួម​ជាតិ​ពិត​ប្រាកដ​នោះ​ទេ គឺ​គ្រាន់​តែ​និយាយ​បោកប្រាស់​ប្រជា​ពលរដ្ឋ​ខ្មែរ​ប៉ុណ្ណោះ ខណៈ​របប​លោក កំពុង​ធ្វើ​ឲ្យ​ជាតិ​ខ្មែរ​បែក​បាក់​ខ្ទេច​ខ្ទាំ គ្មាន​លទ្ធិ​ប្រជាធិបតេយ្យ និង​ការ​គោរព​សិទ្ធិ​មនុស្ស​ពិត​ប្រាក​នោះ​ទេ។

អ្នក​វិភាគ​នយោបាយ​ឯករាជ្យ លោក បណ្ឌិត ឡៅ ម៉ុងហៃ មាន​ប្រសាសន៍​ថា កាយវិការ​របស់​លោក ហ៊ុន សែន នៅ​ពេល​នេះ គឺ​នៅ​មិន​ទាន់​បាន​ឆ្លើយ​តប​ជា​វិជ្ជមាន ចំពោះ​ស្ថានភាព​នយោបាយ​បច្ចុប្បន្ន និង​មិន​ឆ្លើយ​តប ចំពោះ​ការ​ទាមទារ​របស់​សហគមន៍​អន្តរជាតិ ជា​ពិសេស​សហគមន៍​អឺរ៉ុប​នៅ​ឡើយ។ សហគមន៍​អឺរ៉ុប​ព្រមាន​ថា នឹង​ដក​ប្រព័ន្ធ​អនុគ្រោះ​ពន្ធ​ពី​កម្ពុជា បើ​របប​លោក ហ៊ុន សែន ​មិន​ព្រម​ស្ដារ​លទ្ធិ​ប្រជាធិបតេយ្យ និង​ការ​គោរព​សិទ្ធិមនុស្ស​ឡើង​វិញ​ តាម​រយៈ​ការ​ផ្ដល់​សេរីភាព​ពេញលេញ​ដល់​លោក ​កឹម ​សុខា​ និង​ផ្ដល់​សិទ្ធិ​ធ្វើ​នយោបាយ​ដល់​ថ្នាក់​ដឹក​នាំ​គណបក្ស សង្គ្រោះ​ជាតិ ទាំង ១១៨រូប ដោយ​រួម​ទាំង​ផ្ដល់​នីតិសម្បទា​ឲ្យ​គណបក្ស សង្គ្រោះ​ជាតិ ឡើង​វិញ​ជា​ដើម។

លោក ​បណ្ឌិត ​ឡៅ​ ម៉ុងហៃ ​យល់ថា ​លោក ​ហ៊ុន ​សែន​ គួរ​តែ​បង្ហាញ​ឆន្ទៈ​ពិត​ប្រាកដ​ឲ្យ​ប្រជា​ពលរដ្ឋ​ខ្មែរ និង​សហគមន៍​អន្តរជាតិ បាន​មើល​ឃើញ​ថា កម្ពុជា​ពិត​ជា​វិល​ទៅ​រក​របប​លទ្ធិ​ប្រជាធិបតេយ្យ សេរី ពហុបក្ស ការ​គោរព​សិទ្ធិ​មនុស្ស និង​ការ​អនុវត្ត​នីតិរដ្ឋ​ដូច​មាន​ចែង​ក្នុង​រដ្ឋធម្មនុញ្ញ៖ «»

អ្នក​នាំ​ពាក្យ​គណបក្ស​ប្រជាជន​កម្ពុជា​ លោក ​ឈឹម ​ផលវរុន ​ដែល​តែងតែ​កំណត់​នាទី​និយាយ​ជា​ មួយ​អ្នក​សារព័ត៌មាន​នោះ​បញ្ជាក់​ថា ប្រសាសន៍​របស់​លោក ​ហ៊ុន ​សែន គឺ​មិន​មាន​ន័យ​ចរចា​ជាមួយ​គណបក្ស សង្គ្រោះ​ជាតិ ឡើយ៖ «»

មន្ត្រី​ជាន់​ខ្ពស់​គណបក្ស សង្គ្រោះ​ជាតិ លោក អ៊ុំ សំអាន មាន​ប្រសាសន៍​ថា លោក ហ៊ុន សែន មិន​ហ៊ាន​ចរចា និង​បើក​ផ្លូវ​ឲ្យ​គណបក្ស សង្គ្រោះ​ជាតិ ដំណើរ​ការ និង​រៀបចំ​ការ​បោះ​ឆ្នោត​ឡើង​វិញ​នោះ​ទេ ព្រោះ​លោក ហ៊ុន សែន កំពុង​បាត់បង់​ប្រជាប្រិយភាព​ខ្លាំង ហើយ​ខ្លាច​ចាញ់​ការ​បោះ​ឆ្នោត។ លោក​បន្ត​ថា លោក ហ៊ុន សែន កំពុង​ព្យាយាម​បំបែក​បំបាក់​គណបក្ស សង្គ្រោះ​ជាតិ ជា​ពិសេស​លោក សម រង្ស៊ី និង​លោក កឹម សុខា តាម​ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ ដើម្បី​បើក​ផ្លូវ​ថ្នាក់​ដឹក​នាំ​បក្ស​ប្រឆាំង​មួយ​ចំនួន​ធ្វើ​នយោបាយ​ឡើង​វិញ៖ «»

លោក អ៊ុំ សំអាន បន្ត​ថា ទោះ​បី​ជា​លោក ហ៊ុន សែន មិន​ចរចា​ជាមួយ​ស្វែងរក​ដំណោះ​ស្រាយ​ជាមួយ​គណបក្ស សង្គ្រោះ​ជាតិ ក្តី ប៉ុន្តែ​គណបក្ស សង្គ្រោះ​ជាតិ ប្រជា​ពលរដ្ឋ​ខ្មែរ និង​សហគមន៍​អន្តរ​ជាតិ ក៏​មិន​នៅ​ស្ងៀម​ដែរ។ លោក​សង្ឃឹម​ថា ក្នុង​ដំណាក់​កាល​ណា​មួយ នឹង​មាន​ការ​ផ្លាស់​ប្ដូរ​ជា​វិជ្ជមាន នៅ​កម្ពុជា ដូច​នៅ​ប្រទេស​ហ្វីលីពីន ឥណ្ឌូនេស៊ី និង​ហ្ស៊ីមបាវ៉េ ជា​ដើម ទោះ​បី​ជា​មេ​ដឹក​នាំ​ផ្ដាច់ការ ខំ​ប្រើ​ល្បិច​ក្រាញ​អំណាច​យូរ​ឆ្នាំ​យ៉ាង​ណា​ក៏​ដោយ​។

រីឯ​អ្នក​នាំ​ពាក្យ​សមាគម​ការពារ​សិទ្ធិមនុស្ស អាដហុក លោក ស៊ឹង សែនករុណា មាន​ប្រសាសន៍​ថា លោក​ស្វាគមន៍ ចំពោះ​ការ​លើក​ឡើង​របស់​លោក ហ៊ុន សែន ដែល​ចង់​ផ្ដល់​សេរីភាព និង​បើក​កិច្ច​សន្ទនា​ទូលាយ​ជាមួយ​សង្គម​ស៊ីវិល ព្រោះ​កន្លង​មក​អង្គការ​សង្គម​ស៊ីវិល ពិត​ជា​ពិបាក​បំពេញ​ការងារ​ជាមួយ​របប​លោក ហ៊ុន សែន តាំង​ពី​ថ្នាក់​លើ​រហូត​ដល់​ថ្នាក់​ក្រោម។ លើស​ពី​នេះ​កន្លង​មក អង្គការ​ សង្គម​ស៊ីវិល ដែល​ធ្វើ​ការ​ផ្នែក​សិទ្ធិ​មនុស្ស ផ្នែក​បោះ​ឆ្នោត និង​ការ​តស៊ូ​មតិ​ផ្សេងៗ ក៏​តែងតែ​រង​ការ​ ចោទ​ប្រកាន់ និង​លាប​ពណ៌​ផ្សេងៗ ពី​របប​ក្រុង​ភ្នំពេញ​ដែរ៖ «»

ក្រុម​អ្នក​ឃ្លាំមើល​សិទ្ធិមនុស្ស និង​អ្នក​វិភាគ​លើក​ឡើង​ថា ការ​ថ្លែង​របស់​លោក ហ៊ុន សែន នេះ មិន​ឆ្លុះ​បញ្ចាំង​ពី​ការ​អនុវត្ត​ជាក់​ស្ដែង​នៅ​ក្នុង​របប​របស់​លោក​តែ​ប៉ុណ្ណោះ​ទេ ពីព្រោះ​ថា​ ការ​ប្រកាស​ដែល​អះអាង​ពី​ការ​បើក​ទូលំទូលាយ​សិទ្ធិ​សេរីភាព​វិញ​នេះ តាំង​ពី​ខែ​វិច្ឆិកា​មក​ម្ល៉េះ ក៏​ប៉ុន្តែ​ការ​អនុវត្ត​ជាក់​ស្ដែង របប​ឯក​បក្ស​នេះ នៅ​តែ​រឹតត្បិត​សិទ្ធិ​សេរីភាព​បញ្ចេញ​មតិ សិទ្ធិ​ជួបជុំ របស់​គណបក្ស​នយោបាយ សង្គម​ស៊ីវិល សហជីព កម្មករ​ដដែល។

លោក​បណ្ឌិត​ ឡៅ ​ម៉ុងហៃ ​មើល​ឃើញ​ថា ​ប្រសិន​បើ​លោក ​ហ៊ុន ​សែន ​នៅ​តែ​មាន​មធ្យោបាយ ដើម្បី​ទ្រទ្រង់​អំណាច​បន្ត​ទៀត​ ដោយ​មិន​ខ្វល់​អំពី​ការ​តិះដៀល​ពី​គ្រប់​មជ្ឈដ្ឋាន​នោះ គឺ​នឹង​បណ្ដាល ឲ្យ​មានការ​ដាក់​ទណ្ឌកម្ម​ជា​បន្ត​បន្ទាប់​ពី​សហគមន៍​អន្តរជាតិ ដូច​ជា ឈប់​ផ្ដល់​ប្រព័ន្ធ​អនុគ្រោះ​ពន្ធ​ (EBA) ជា​ដើម ដូច្នេះ​នឹង​ប៉ះ​ពាល់​ធំធេង​ដល់​សេដ្ឋកិច្ច​កម្ពុជា និង​ជីវភាព​រស់នៅ​របស់​ប្រជា​ពលរដ្ឋ​ ខ្មែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល