លោក​ ហ៊ុន​ សែន ថា​វិបត្តិ​នៅ​ភូមា​មិន​អាច​​ដោះស្រាយ​ដោយ​ការ​កម្ចាត់​កម្លាំង​យោធា​ចោល​នោះ​ឡើយ​​​

ដោយ មាន ឫទ្ធិ
2022.02.22
លោក​ ហ៊ុន​ សែន ថា​វិបត្តិ​នៅ​ភូមា​មិន​អាច​​ដោះស្រាយ​ដោយ​ការ​កម្ចាត់​កម្លាំង​យោធា​ចោល​នោះ​ឡើយ​​​ លោក ហ៊ុន​ សែន ក្នុង​ពេល​ចូលរួម​បើក​ការដ្ឋាន​សាងសង់​ស្ថានីយ៍​ប្រព្រឹត្តកម្ម​ទឹកកខ្វក់​បឹងជើងឯក នៅ​ព្រឹក​ថ្ងៃអង្គារ ទី២២ ខែកុម្ភៈ ឆ្នាំ២០២២។
រូប៖ ហ្វេសប៊ុក SMP

លោក​ ហ៊ុន​ សែន​ ថ្លែង​ថា​ ក្នុង​នាម​ជា​ប្រធាន​អាស៊ាន​ និង​ជា​មិត្តភ័ក្ដិ​របស់​​ភូមា ​(Myanmar) លោក​​មិន​​បោះបង់​​ការ​ស្វែង​រក​ដំណោះស្រាយ​​វិបត្តិនយោបាយ​​នៅ​ភូមា​​នោះ​ទេ​។​ ​ទោះ​យ៉ាងណា​ មន្ត្រី​បក្ស​ប្រឆាំង​រិះគន់​ថា​ លោក​ ហ៊ុន​ សែន​ គ្មាន​សមត្ថភាព​​ដោះស្រាយ​វិបត្តិ​នៅ​ភូមា​ បាន​នោះ​ឡើយ​ ខណៈ​ដែល​វិបត្តិ​នយោបាយ​នៅ​​ក្នុង​​ប្រទេស​របស់​ខ្លួន​ លោក​ ហ៊ុន​ សែន​ ដោះស្រាយ​មិន​បាន​ផង​នោះ​។​

ប្រធានប្ដូរ​វេន​អាស៊ាន​ លោក​នាយករដ្ឋមន្ត្រី​ ហ៊ុន សែន ​លើកឡើង​ថា​ វិបត្តិ​នយោបាយ​នៅ​ភូមា​ ​មាន​បញ្ហា​ស្មុគស្មាញ​ ប៉ុន្តែ​លោក​នៅ​តែ​រំពឹង​ថា​ កិច្ចប្រឹងប្រែង​នេះ​អាច​​​បញ្ឈប់​អំពើ​ហិង្សា​​ អាចផ្ដល់​ជំនួយ​ដល់​​ពលរដ្ឋ​ និង​ជំរុញ​ឲ្យ​មានការ​សន្ទនា​រវាង​ភាគី​ពាក់ព័ន្ធ​។​ ​លោក​ថ្លែង​ដែរ​ថា​ បញ្ហា​នៅ​ភូមា​ មិន​អាច​កំចាត់​ចោល​កង​​កម្លាំង​ភូមា​ បាន​នោះទេ​ ខណៈ​ប្រទេស​នេះ​ ​អំណាច​យោធា​ បាន​ចាក់ស្រេះ​ជាង​៧០​ឆ្នាំ​មក​ហើយ​។​ លោក​ថា​ ការ​ស្វែង​រក​សន្តិភាព​នៅ​ភូមា មិន​អាច​ធ្វើ​ទៅ​បាន​ដោយ​ការ​កម្ចាត់​កម្លាំង​យោធា​នោះ​ទេ​៖ «មាន​ចេតនា​មួយ​កំពុង​លេចឡើង​ គឺ​ការ​កម្ចាត់​ចោល​កម្លាំង​យោធា​​មីយ៉ាន់ម៉ា​ទាំង​ស្រុង​តែ​ម្ដង​សួរ​ថា​ គេ​សុខ​ចិត្ត​ទេ​បើ​អ្នក​ឯង​ធ្វើ​តាម​ហ្នឹង​ វា​មិន​ខុស​ពី​យក​ក្បាល​បោល​ទៅ​បុក​ជញ្ជាំង​ដែល​មាន​សុទ្ធ​​ដែកគោល​។ ការ​ចរចា​មិនមែន​ជា​រឿង​ងាយ​ស្រួល​​ទេ​ រឿង​ពិបាក​ គឺ​ទិដ្ឋភាព​យោធា​ ហ្នឹង​តែ​ម្ដង​​​ ហើយ​អ្នក​ខ្លះ​​​​ចង់​ឲ្យ​ខ្ញុំ​ធ្វើ​ជា​ប្រធាន​អាស៊ាន​ក្នុង​រយៈ​១២​ខែ​​ចង់​ឲ្យ​ដោះស្រាយ​បញ្ហា​មីយ៉ាន់ម៉ា​​(ដោះស្រាយ​ចប់)»។

លោក​ ហ៊ុន​ សែន​ ថ្លែង​ដូច្នេះ​ក្នុង​ពេលបើកការដ្ឋានសាងសង់ ស្ថានីយប្រព្រឹត្តកម្មទឹកកខ្វក់បឹងជើងឯក នៅ​ទីក្រុង​ភ្នំពេញ​ ថ្ងៃ​ទី​២២​ ខែ​កុម្ភៈ​។​ លោក​បាន​រិះគន់​ថា​ មាន​ក្រុម​ជ្រុល​​និយម​ ប៉ុន្តែ​លោក​មិន​បញ្ចេញ​​ឈ្មោះ​នោះ​ទេ​ ថា​កំពុង​មានចេតនា​ បញ្ឆេះ​សង្គ្រាម​នៅ​ប្រទេស​ភូមា។​ លោកថា​ ​​កាល​ពី​ដោះស្រាយ​ជម្លោះ​ផ្ទៃ​ក្នុង​កម្ពុជា​ គឺ​ត្រូវ​ការ​ប្រើ​ពេល​វេលា​យូរ​​និង​មិន​អាចយក​សង្គ្រាម​មក​បញ្ចប់​សង្គ្រាម​នោះ​ឡើយ​។​

មន្ត្រី​ជាន់ខ្ពស់​គណបក្ស​សង្គ្រោះជាតិ​ ដែល​កំពុង​ភៀសខ្លួន​នៅ​ក្រៅ​ប្រទេស​លោក​ ម៉ន​ ផល្លា រិះគន់ថា ការ​ដែលលោក ហ៊ុន​ សែន បង្ហាញជំហរដោះស្រាយជម្លោះប្រទេសភូមា គឺគ្រាន់តែនិយាយឲ្យល្អក្នុងនាមខ្លួនជាប្រទេសអាស៊ាន។ លោក​ ម៉ន ផល្លា ជំរុញ​ទៅ​លោក​ ហ៊ុន​ សែន មុន​​ដោះស្រាយ​វិបត្តិ​នយោបាយ​នៅ​ភូមា​ លោក​ ហ៊ុន​ សែន​ ត្រូវ​ដោះស្រាយ​វិបត្តិ​នយោបាយ​នៅ​ប្រទេស​ខ្លួន​ជា​មុន​សិន​ ដោយ​អនុញ្ញាត​ឲ្យ​គណបក្សប្រឆាំង​អាច​ចូលរួម​ប្រកួតប្រជែង​ក្នុង​ការ​បោះឆ្នោត​​នា​​ពេល​ខាង​មុខ​ និង​អនុញ្ញាត​ឲ្យ​ថ្នាក់​ដឹកនាំ​គណបក្ស​សង្គ្រោះជាតិ​មាន​សិទ្ធិ​ធ្វើ​នយោបាយ​ឡើង​វិញ​៖ «​គាត់​ (លោក​ ហ៊ុន​ សែន)​​មិន​អាច​ដោះស្រាយ​បញ្ហា​ភូមា​បាន​ទេ​គាត់​​គ្រាន់​​តែ​បំភ័ន្តភ្នែក​​ជាតិ​ និង​អន្តរជាតិ​ ក្នុង​ឋានៈ​ខ្លួន​ជា​ប្រធាន​អាស៊ាន​ប្ដូរ​វេន​ កុំ​ឲ្យ​គេ​មើល​ឃើញ​ថា​ ធ្វើ​ជា​ប្រធាន​​​មិន​បាន​​ធ្វើ​អីសោះ​»។ 

ទោះ​លោក​ ហ៊ុន​ សែន បង្ហាញ​ពី​ការ​ប្ដេជ្ញា​ចិត្ត​ក្នុង​ការ​ដោះស្រាយ​វិបត្តិ​នៅ​ភូមា​​ បែប​នេះ​ក្ដី​ ប៉ុន្តែ​ កិច្ច​ប្រជុំ​ចង្អៀត​រដ្ឋមន្ត្រី​ការបរទេស​អាស៊ាន (AMMR)​ ​កាល​ពី​ថ្ងៃ​ទី​១៧ ខែ​កុម្ភៈ​​ ដែលកម្ពុជា​ធ្វើ​ម្ចាស់​ផ្ទះ​​​ផង​នោះ​​បាន​បិទ​បញ្ចប់​ទៅ​ដោយ​គ្មាន​ដំណោះស្រាយ​ជាក់​លាក់​​នៃវិបត្តិ​​ភូមា ក្រៅ​ពី​ការ​សម្ដែង​ក្តី​ព្រួយបារម្ភ​ជា​រួម​ពី​សំណាក់​ក្រុម​​រដ្ឋមន្ត្រី​ការបរទេស​អាស៊ាន។

ជុំវិញ​រឿង​នេះ​ អ្នក​ជំនាញ​ផ្នែក​វិទ្យាសាស្ត្រ​នយោបាយ និង​កិច្ចការ​អន្តរជាតិ​លោក ឯម សុវណ្ណារ៉ា​ សង្កេត​ឃើញ​ថា​ ដំបូង​ឡើយ​លោក​ ហ៊ុន​ សែន​ បាន​ធ្វើ​នយោបាយ​ការបរទេស​​ដោយធ្វើ​ទៅ​បំពេញ​ទស្សនកិច្ចនៅភូមា​​ ដើម្បី​ដោះស្រាយ​បញ្ហា​ ​ ប៉ុន្តែ​​​លោក​ ហ៊ុន​ សែន​ ​ទទួល​​បរាជ័យ​​ ដោយ​​មេដឹកនាំ​​យោធា​ ភូមា​ មិន​បាន​ធ្វើ​តាម​ការ​ព្រមព្រៀង​នោះ។​ លោក​យល់​ថា​ ការ​ដែល​លោក​ ហ៊ុន​ សែន​ ព្យាយាម​ ដោះស្រាយ​វិបត្តិ​នៅ​ភូមា​ តាម​យន្តការ​អាស៊ាន​ព្រោះ​លោក​ ហ៊ុន​ សែន​ ខ្លាច​បាត់​ឱកាស​​ក្នុងនាម​កម្ពុជា​ ជាប្រធាន​ ប្ដូរវេន្តអាស៊ាន​  ដោយមិន​អាចចូលរួមប្រជុំជាមួយ​ប្រទេស​ដៃ​គូ​ អាស៊ាន​ ឬ​កិច្ច​ប្រជុំ​រវាង​ថ្នាក់​ដឹកនាំ​អាស៊ាន​ និង​សហរដ្ឋអាមេរិក​៖ «កម្ពុជា​​បច្ចុប្បន្ន​បាន​ដក​ឃ្លា​ហើយ​ ហើយ​បាន​អញ្ជើញ​សមាជិក​អាស៊ាន​ផ្សេង​មក​​ប្រជុំ​កាល​ពី​ថ្មីៗ​នេះ​​គឺ​ដោយសារ​កម្ពុជា​ដក​ថយ​​​​មួយ​ជំហាន​មក​វិញ​​​រក្សា​ជំហរ​អាស៊ាន​ហ្នឹង​ហើយ​បាន​រក្សា​ការ​ប្រជុំ​មិន​អាច​គាំង​​ ហើយ​អញ្ចឹង​ទេ កម្ពុជា​មិន​រវល់​រឿង​ភូមា​ទៀត​ទេ ព្រោះ​បើ​រវល់​​ទៅ​អាច​បាត់​ឱកាស»។

លោក​ ហ៊ុន​ សែន​ ថាលោក​និង​​ភាគី​ពាក់ព័ន្ធ​នឹង​ព្យាយាម​ដោះស្រាយ​បញ្ហា​ភូមា​​​តាម​យន្តការ​អាស៊ាន​ ហើយ​នឹង​ពន្លឿន​បញ្ជូន​​រដ្ឋមន្ត្រី​ក្រសួង​ការបរទេស​ លោក ប្រាក់ សុខុន ដែល​ជា​ប្រេសិត​ពិសេស​នៃ​ប្រធាន​អាស៊ាន ឲ្យ​​​ឆាប់​ទៅ​បំពេញ​​បេសកកម្ម​នៅ​ប្រទេស​ភូមា។

លោក​ ប្រាក់​ សុខុន​ ធ្លាប់​ថ្លែង​ឲ្យ​ដឹង​ថា​ លោក​គ្រោង​ទៅ​ប្រទេស​ភូមា​ នៅ​ដើម​ខែ​មីនា​ ដើម្បី​ជួប​សន្ទនា​ជាមួយ​ដៃគូ​ពាក់ព័ន្ធ​ ​ចែក​ជំនួយ​មនុស្ស​ធម៌​​ដល់​មន្ទីរ​ពេទ្យ​ និង​​ជួប​​អង្គទូត​នានា​ដែល​កំពុង​ប្រចាំ​ការ​នៅ​ប្រទេស​ភូមា។

​​ទោះ​យ៉ាងណា អ្នក​ជំនាញ​​កិច្ចការ​អន្តរជាតិ​ លោក ឯម សុវណ្ណារ៉ា យល់ថា​​ វិបត្តិ​នយោបាយ​នៅ​ភូមា​ ​មិន​អាច​ដោះសា្រយ​​ក្នុង​ក្របខណ្ឌ​អាស៊ានបាននោះទេ​ ដែល​កិច្ចការ​នេះ​ទំនង​ធ្លាក់​ទៅ​​​ក្រុមប្រឹក្សា​សន្តិសុខ​​អង្គការ​សហប្រជាជាតិ​ ព្រោះ​កន្លង​ទៅ​របប​សឹក​យោធា​ភូមា​ ​មិន​ទទួល​យក​កិច្ច​ព្រមព្រៀង​​៥​​ចំណុច​បាន​អនុម័ត​កាល​ពី​​​ខែ​មេសា​ ឆ្នាំ​២០២១​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។