លោកនាយករដ្ឋមន្ត្រី ហ៊ុន សែន ទទួលជួបពិភាក្សាការងារជាមួយអគ្គសេនាធិការចម្រុះកងទ័ពស្វ័យការពារជប៉ុន លោក យ៉ាម៉ាសាគិ កូជិ (Yamazaki Koji) ដើម្បីពង្រឹងវិស័យការពារសណ្ដាប់ធ្នាប់ និងសន្តិភាព និងរក្សាសន្តិសុខនៅក្នុងតំបន់អាស៊ីប៉ាស៊ីហ្វិក។ ជំនួបនេះ ធ្វើឡើងនៅព្រឹកថ្ងៃទី២៩ ខែមេសានេះ នៅរាជធានីភ្នំពេញក្នុងវិមានសន្តិភាព។
លោក ហ៊ុន សែន បង្ហោះសារនៅក្នុងហ្វេសប៊ុក (Facebook) របស់លោកថា លោក យ៉ាម៉ាសាគិ កូជិ មកកម្ពុជាលើកនេះ ដើម្បីធ្វើឲ្យរឹងមាំនូវកិច្ចសហប្រតិបត្តិការ រវាងប្រទេសទាំងពីរ កម្ពុជា-ជប៉ុន ក្នុងការថែរក្សាមិនឲ្យមានអំពើភេរវកម្ម ឧក្រិដ្ឋកម្មកើតឡើងនៅក្នុងប្រទេស និងប្រុងប្រៀបឲ្យមានការសង្គ្រោះបន្ទាន់ពេលមានគ្រោះមហន្តរាយកើតឡើងជាយថាហេតុ។
លោក ហ៊ុន សែន ក៏បានគាំទ្រឲ្យកងទ័ពប្រទេសទាំងពីរបន្តកិច្ចសហប្រតិបត្តិការជាមួយនឹងកម្មវិធីដែលមានស្រាប់ យកចិត្តទុកដាក់ជាពិសេសលើការហ្វឹកហ្វឺនរួមគ្នាក្នុងការសង្គ្រោះបន្ទាន់ពីគ្រោះមហន្តរាយ និងទប់ស្កាត់អំពើភេរវកម្ម។
នៅមុនជំនួបជាមួយលោក ហ៊ុន សែន នេះ អគ្គសេនាធិការចម្រុះកងទ័ពស្វ័យការពារជប៉ុនក៏បានជួបប្ដូរបទពិសោធការងារជាមួយ មេបញ្ជាការនៃកងយោធពលខេមរភូមិន្ទ លោក វង្ស ពិសេន និងអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកលោក ហ៊ុន ម៉ាណែត ផងដែរ ដោយផ្ដោតលើការរួបរួមគ្នាឲ្យបានយូរអង្វែងក្នុងការធ្វើសមយុទ្ធជាមួយគ្នា ដើម្បីចូលរួមក្នុងបេសកកម្មមនុស្សធម៌ និងគ្រោះវិបត្តិផ្សេងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។