របប​ក្រុងភ្នំពេញ​បញ្ចុះបញ្ចូល​អ្នកគាំទ្រ​បក្ស​ប្រឆាំង​ឲ្យ​ចុះចូល​ជាមួយ​បក្ស​កាន់​អំណាច

ដោយ មួង ណារ៉េត
2018-12-21
អ៊ីម៉ែល
មតិ
Share
បោះពុម្ព
និមិត្ត​សញ្ញា​គណបក្ស​សង្គ្រោះជាតិ
និមិត្ត​សញ្ញា​គណបក្ស​សង្គ្រោះជាតិ
screenshot

អាជ្ញាធរ​ខេត្ត​កណ្ដាល​នៃ​របប​ក្រុងភ្នំពេញ​បាន​ព្យាយាម​បញ្ចុះបញ្ចូល​សកម្មជន​គណបក្ស​សង្គ្រោះ​ជាតិ ចំនួន​១០​នាក់​អោយ​គាំទ្រ​របប​ក្រុងភ្នំពេញ បន្ទាប់ពី​បាន​កោះហៅ​ពួកគេ​មក​សាកសួរ​រឿង​ជួប​ប្រជុំ​គ្នា​តាម​មូលដ្ឋាន​ដើម្បី​សំដែង​ការ​គាំទ្រ​លោក សម រង្ស៊ី ជា​ប្រធាន​ស្តីទី​គណបក្ស​សង្គ្រោះជាតិ។ សមាជិក​គាំទ្រ​គណបក្ស​សង្គ្រោះជាតិ​យ៉ាងតិច​ចំនួន ៨​នាក់​នៅ​ថ្ងៃ​ព្រហស្បតិ៍​ទី​២០ ធ្នូ នេះ បាន​ទៅ​បំភ្លឺ​តាម​ការ​កោះហៅ​របស់​មន្ត្រី​ប៉ូលិស​ឃុំ​អរិយក្សត្រ ប៉ុន្តែ​មិន​មាន​សកម្មជន​ណា​ម្នាក់​ត្រូវ​បាន​ឃុំខ្លួន​ទេ។

អតីត​ប្រធាន​ឃុំ​អរិយក្សត្រ​ជាប់ឆ្នោត​ខាង​គណបក្ស​សង្គ្រោះជាតិ តែ​ក្រោយមក​បាន​បាត់បង់​តួនាទី​ដោយសារ​របប​ក្រុងភ្នំពេញ​រំលាយ អ្នកស្រី ទូច សាវុធ បាន​បញ្ជាក់​ប្រាប់​អាស៊ីសេរី​ថា ក្រុម​សកម្មជន​ត្រូវ​បាន​ប៉ូលិស​ឃុំ​អរិយក្សត្រ​បញ្ចុះបញ្ចូល​អោយ​គាំទ្រ​របប​ក្រុងភ្នំពេញ នៅ​ក្នុង​ពេល​ក្រោយ​ពី​បាន​សាកសួរ​នោះ។

អ្នកស្រី​បាន​បញ្ជាក់​ថា ការ​គាំទ្រ​គណបក្ស​នយោបាយ​គឺជា​សិទ្ធិ​របស់​ពលរដ្ឋ​ម្នាក់ៗ​មិន​អាច​មាន​អ្នកណាម្នាក់​មក​បង្ខំ​បាន​ឡើយ៖ «រដ្ឋធម្មនុញ្ញ​បាន​ចែង​ការ​ជ្រើសរើស​គណបក្ស​នយោបាយ​ដោយសារ​យើង​ចង់​ផ្លាស់ប្ដូរ​ផ្នត់គំនិត​ថ្នាក់ដឹកនាំ​ដែល​ប្រើ​អំណាច​នឹង​អំពើពុករលួយ»

កាលពី​ថ្ងៃ​ទី​ពុធ​ទី​១៩ ធ្នូ សកម្មជន​គណបក្ស​ស​ង្គ្រោះ​ជាតិ​ចំនួន ៨​នាក់ ដែល​រួមមាន​ប្រធាន​ឃុំ និង​ជំទប់​ឃុំ​ជាប់ឆ្នោត​ខាង​គណបក្សប្រឆាំង​នៅ​ក្នុង​ឃុំ​អរិយក្សត្រ​បាន​ជួប​ប្រជុំ​គ្នា​មួយ នៅ​ស្រុក​ល្វាឯម​ខេត្ត​កណ្ដាល ក្នុង​គោលបំណង​ដើម្បី​សំដែង​ការ​គាំទ្រ​របស់​ពួកគេ ចំពោះ​ថ្នាក់ដឹកនាំ​គឺ​លោក សម រង្ស៊ី។

ការ​ជួប​ប្រជុំ​នេះ​ត្រូវ​បាន​ក្រុម​អាជ្ញាធរ​របប​ក្រុងភ្នំពេញ​បាន​ដឹង​ដំណឹង​នេះ រួចហើយ​បាន​កោះហៅ​ពួកគេ​មក​ឆ្លើយ​បំភ្លឺ​ជា​បន្តបន្ទាប់​ជុំវិញ​បញ្ហា​ការ​ជួប​ប្រជុំ​គ្នា​នេះ។

ការ​កោះហៅ​អោយ​ចូល​ខ្លួន​មក​បំភ្លឺ​របស់​សមត្ថកិច្ច​បាន​ធ្វើឡើង​ទាក់ទិន​នឹង​សំណុំរឿង​ខុសៗ​គ្នា​។​មាន​សកម្មជន​ខ្លះ​បំភ្លឺ​ទាក់ទិន​រឿង​ថា បាន​បង្ហោះ​តាម​បណ្ដាញ​សង្គម​ហ្វេសប៊ុក​បន្ទាប់ពី​មាន​កិច្ចប្រជុំ​នោះ​បាន​កើតមាន​ឡើង។

អតីត​ជំទប់​ទី​១ ឃុំ​អរិយក្សត្រ​លោក ថោង សារុន បាន​បញ្ជាក់​ថា លោក​ត្រូវ​បាន​សម្ថ​កិច្ច​បង្ខំ​អោយ​ចុះ​កិច្ចសន្យា​លើ​កំណត់ហេតុ​ដោយសារតែ​លោក​បាន​បង្ហោះ​តាម​បណ្ដាញ​សង្គម​ហ្វេសប៊ុក​ប្រើ​ឈ្មោះ​គណបក្ស​សង្គ្រោះជាតិ៖ «គេ​អោយ​ចុះ​កិច្ចសន្យា​អ៊ីចឹង​ទៅ វា​ដូច​ខឹង​ដែរ​ពីព្រោះ​យើង​តស៊ូ​ជា​យូរ​មក​ហើយ​មានចិត្ត​ថា​តូច​ចិត្ត​ដែរ វា​មិន​អាច​ធ្វើ​អ៊ីចឹង​បាន ក៍​ប៉ុន្តែ​មិន​ដឹង​ធ្វើ​យ៉ាងម៉េច​បើ​កាលៈទេសៈ​នេះ​គេ​អោយ​យើង​ធ្វើ​អ៊ីចឹង​ហើយ​យើង​ត្រូវតែ​ធ្វើ​ដើម្បី​សុវត្ថិភាព»

ទោះជា​យ៉ាងណាក៏ដោយ​ក៏​មន្ត្រី​ប៉ូលិស​ឃុំ​អរិយក្សត្រ​បាន​បដិសេធ​មិន​ធ្វើ​អត្ថាធិប្បាយ​បាន​ដោយ​លោក​គ្រាន់តែ​អះអាង​យ៉ាង​ខ្លី​ថា សកម្មជន​ទាំងនោះ​មិនមែន​ជា​សកម្មជន​គណបក្ស​សង្គ្រោះ​ជាតិ​ទៀត​ទេ ដោយសារតែ​គណបក្ស​នេះ​បាន​រំលាយ​រួច​ទៅ​ហើយ។

គណបក្ស​សង្គ្រោះជាតិ​ដែល​ជា​គណបក្សប្រឆាំង​ដ៏​ធំជាង​គេ​ត្រូវ​បាន​តុលាការ​កំពូល​របស់​របប​ក្រុងភ្នំពេញ​បាន​រំលាយ​កាលពី​ខែ​វិច្ឆិកា ឆ្នាំ​២០១៧។

ចាប់​តាំង​ពី​គណបក្ស​នេះ​បាន​រំលាយ​ប្រធាន​គណបក្ស​នេះ​លោក កឹម សុខា ត្រូវ​បាន​របប​ក្រុងភ្នំពេញ​ចាប់​ដាក់​ពន្ធនាគារ​ត្រពាំង​ថ្លុង ខេត្ត​ត្បូងឃ្មុំ តែ​ក្រោយមក​បាន​លោក​ដឹក​យក​មក​ឃុំឃាំង​នោះ​ក្នុង​ផ្ទះ​វិញ។

ដោយសារតែ​គណបក្ស​នេះ​គ្មាន​មេដឹកនាំ អ្នកគាំទ្រ​គណបក្សប្រឆាំង​នៅ​ក្រៅ​ប្រទេស​កាលពី​ដើមខែ​ធ្នូ​បាន​ធ្វើ​សន្និសីទ​ដាច់ដោយឡែកៗ​ពី​គ្នា​នៅ​សហរដ្ឋអាមេរិក និង​ប្រទេស​បារាំង​ដោយ​សម្រេច​បោះឆ្នោត​គាំទ្រ​លោក សម រង្ស៊ី ជា​ប្រធាន​ស្ដីទី។

ក្រោយ​ពី​លោក សម រង្ស៊ី ត្រូវ​បាន​តែងតាំង​ជា​ប្រធាន​ស្ដីទី​ក្រុម​សកម្មជន​គណបក្សប្រឆាំង​នៅ​ក្នុង​ប្រទេស និង​នៅ​ក្រៅ​ប្រទេស​បាន​ចាប់ផ្ដើម​រៀបចំ​យុទ្ធសាស្ត្រ​ដោយ​ធ្វើ​ញត្តិ​ជា​បន្តបន្ទាប់​គាំទ្រ​មេដឹកនាំ​របស់​ខ្លួន។ ក៏ប៉ុន្តែ​យុទ្ធនាការ​នេះ​ត្រូវ​បាន​រារាំង​ពី​ក្រុម​សមត្ថកិច្ច​ដែល​ជា​ការអនុវត្ត​ផ្ទុយ​នឹង​សិទ្ធិ​សេរីភាព​ក្នុង​ការ​ធ្វើ​នយោបាយ​របស់​ប្រជាពលរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល