នាយករដ្ឋមន្ត្រីជប៉ុនថា លោកមានបំណងសហការជាមួយកម្ពុជាដើម្បីសន្តិភាព និងស្ថិរភាពក្នុងតំបន់ និងពិភពលោក

ដោយ មាន ឫទ្ធិ
2022.03.20

នាយករដ្ឋមន្ត្រីជប៉ុនថា លោកមានបំណងសហការជាមួយកម្ពុជាដើម្បីសន្តិភាព និងស្ថិរភាពក្នុងតំបន់ និងពិភពលោក

(ពីឆ្វេង) នាយករដ្ឋមន្ត្រីជប៉ុន លោក គីស៊ីដា ហ្វូមិអុ (Fumio Kishida) និងលោកនាយករដ្ឋមន្ត្រី ហ៊ុន សែន ក្នុងជំនួបនាវិមានសន្តិភាព នៅថ្ងៃទី២០ មីនា ២០២២។

រូប៖ ហ្វេសប៊ុក ហ៊ុន សែន

នាយករដ្ឋមន្ត្រីជប៉ុន លោក គីស៊ីដា ហ្វូមិអុ (Fumio Kishida) គូសបញ្ជាក់តាមរយៈសាររបស់ លោកផ្ញើជូនចំពោះប្រជាជនកម្ពុជា បង្ហោះនៅលើទំព័រហ្វេសប៊ុក (Facebook) របស់ស្ថានទូតជប៉ុនប្រចាំនៅកម្ពុជា នៅថ្ងៃទី២០ ខែមីនា ថា ក្នុងដំណើរទស្សនកិច្ចផ្លូវការរបស់លោកមកកាន់កម្ពុជានាពេលនេះ លោកមានបំណងសហការជាមួយរដ្ឋាភិបាលកម្ពុជាដើម្បីសន្តិភាព និងស្ថិរភាពក្នុងតំបន់ និងពិភពលោក ដោយសារកម្ពុជាមានចិត្តគំនិតដ៏ពិសេសចំពោះសន្តិភាព តាមរយៈបទពិសោធន៍នៃសង្គ្រាមស៊ីវិល។

នាយករដ្ឋមន្ត្រីជប៉ុនសង្កត់ធ្ងន់ថា ការឈ្លានពានរបស់រុស្ស៊ីមកលើអ៊ុយក្រែន (Ukraine) គឺជាការបំពានយ៉ាងច្បាស់លើច្បាប់អន្តរជាតិ។ លោកថា ជប៉ុន និងកម្ពុជាបានចូលរួមជាមួយគ្នាជាប្រទេសសហស្ថាបនិកនៃសេចក្តីសម្រេចចិត្តនៃកិច្ចប្រជុំពិសេសរបស់មហាសន្និបាតអង្គការសហប្រជាជាតិទាមទារឱ្យរុស្ស៊ី (Russia) បញ្ឈប់ជាបន្ទាន់នូវសកម្មភាពវាយប្រហារទៅលើប្រទេសអ៊ុយក្រែន។ លោកថា កម្ពុជា និងជប៉ុនក៏បានសម្ដែងការប្រឆាំងយ៉ាងច្បាស់ចំពោះការផ្លាស់ប្ដូរស្ថានភាពបច្ចុប្បន្នដោយកម្លាំងជាឯកតោភាគីរបស់រុស្ស៊ី និងអំពើហិង្សាប្រឆាំងនឹងច្បាប់អន្តរជាតិ និងធម្មនុញ្ញអង្គការសហប្រជាជាតិ។

ទីភ្នាក់ងារសារព័ត៌មានជប៉ុន ក្យូដូ (Kyodo) រាយការណ៍កាលពីថ្ងៃទី១៨ ខែមីនា ថា ដំណើរទស្សនកិច្ចរបស់នាយករដ្ឋមន្ត្រីជប៉ុនមកកាន់កម្ពុជានាពេលនេះ គឺជាផ្នែកមួយនៃកិច្ចខិតខំប្រឹងប្រែងរបស់ជប៉ុនដើម្បីពង្រឹងកិច្ចសហប្រតិបត្តិការជាមួយអាស៊ាន (ASEAN) ក្នុងការជំរុញឱ្យមាននូវការឆ្លើយតបរួមគ្នាមួយប្រឆាំងនឹងអំពើឈ្លានពានរបស់ប្រទេសរុស្ស៊ីមកលើប្រទេសអ៊ុយក្រែន។

នៅមុនដំណើរទស្សនកិច្ចមកកាន់កម្ពុជានេះ លោកនាយករដ្ឋមន្ត្រីជប៉ុនបានទៅបំពេញទស្សនកិច្ចនៅប្រទេសឥណ្ឌា (India) ដើម្បីពង្រឹងកិច្ចសហប្រតិបត្តិការឆ្ពោះទៅរកតំបន់ឥណ្ឌូ-ប៉ាស៊ីហ្វិកសេរី និងបើកចំហមួយ ស្របពេលដែលជប៉ុន និងឥណ្ឌា គឺជាប្រទេសសមាជិកពីរនៃក្រុមសម្ព័ន្ធមិត្តនៃប្រទេសប្រជាធិបតេយ្យធំៗបួនប្រទេស (the QUAD) ក្នុងតំបន់ឥណ្ឌូប៉ាស៊ីហ្វិក រួមមាន ជប៉ុន ឥណ្ឌា អូស្ត្រាលី (Australia) និងសហរដ្ឋអាមេរិក (USA)។

នៅមុនដំណើរទស្សនកិច្ចផ្លូវការរបស់នាយករដ្ឋមន្ត្រីជប៉ុនមកកាន់កម្ពុជានាពេលនេះ នាវាចម្បាំងរបស់កងកម្លាំងស្វ័យការពារលម្ហសមុទ្រជប៉ុនពីរគ្រឿងបានចូលចតនៅកំពង់ផែព្រះសីហនុ និងបានធ្វើទស្សនកិច្ចទៅកំពង់ផែកងទ័ពជើងទឹករាម ជាទីដែលសហរដ្ឋអាមេរិកសង្ស័យជាយូរមកហើយថា កម្ពុជាបានលួចអនុញ្ញាតឱ្យចិនដាក់មូលដ្ឋានទ័ពនៅទីនោះ។ នៅមួយខែមុនដំណើរទស្សនកិច្ចនេះ កូនប្រុសច្បងលោកនាយករដ្ឋមន្ត្រី ហ៊ុន សែន និងជាបេក្ខជននាយករដ្ឋមន្ត្រីរបស់គណបក្សប្រជាជនកម្ពុជា ក៏បានបំពេញទស្សនកិច្ចនៅប្រទេសជប៉ុន។ ក្រុមអ្នកវិភាគមួយចំនួនមើលឃើញថា ដំណើរទស្សនកិច្ចនាពេលនោះ គឺជាការស្ទាបស្ទង់ស្វែងរកការគាំទ្រពីជប៉ុនចំពោះបេក្ខភាពអនាគតនាយករដ្ឋមន្ត្រីកម្ពុជា ដែលលោក ហ៊ុន សែន លើកបន្តុបចង់ឱ្យបន្តវេនពីលោក។ កាលណោះ ជប៉ុនបានជំរុញឱ្យកម្ពុជារៀបចំការបោះឆ្នោតឃុំសង្កាត់ និងការបោះឆ្នោតជាតិនៅកម្ពុជាខាងមុខ តាមបែបប្រជាធិបតេយ្យ ពោលគឺប្រព្រឹត្តិទៅដោយមានសំឡេងចម្រុះពីគ្រប់ភាគីពាក់ព័ន្ធនៃពលរដ្ឋកម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម