មេដឹកនាំបាតុកម្មប្រឆាំងថ្ងៃ៧មករា នៅប្រទេសអូស្ត្រាលីអំពាវពលរដ្ឋដើមកំណើតខ្មែរនៅអូស្ត្រាលី ចូលរួមធ្វើបាតុកម្មឲ្យច្រើនកុះករដើម្បីជាសារប្រាប់ទៅរបបក្រុងភ្នំពេញថា ពួកគេមិនត្រូវការដឹងគុណថ្ងៃ ៧ មករានោះទេ។ សហគមន៍ខ្មែរនៅអូស្ត្រាលី ចាត់ទុក ៧ មករាថា ជាថ្ងៃដែលវៀតណាមឈ្លានពានកម្ពុជា និងបន្តរស់នៅប្រទេសកម្ពុជា ដែលមានចំណងចង់លេបត្របាក់យកប្រទេសនេះទៅគ្រប់គ្រងដូចទឹកដីកម្ពុជាខ្មែរក្រោម។
មេដឹកនាំបាតុកម្មប្រឆាំងថ្ងៃ ៧ មករា នៅប្រទេសអូស្ត្រាលី ប្រាប់អាស៊ីសេរីនៅថ្ងៃសុក្រ ទី៤ មករាថា គម្រោងបាតុកម្មរបស់ពួកគេនឹងប្រព្រឹត្តិទៅដូចការគ្រោងទុក នៅម៉ោង ៥ល្ងាច នៅថ្ងៃសៅរ៍ ទី៥ខែមករា នៅមុខភោជនីយដ្ឋាន Maxim ដែលយ៉ាងហោចណាស់ មានបាតុករជាង ២០០នាក់ចូលរួម។
អ្នកដឹកនាំបាតុកម្មម្នាក់លោក ជា យូហន ប្រាប់ថា មូលហេតុដែលសហព័ន្ធខ្មែរអូស្ត្រាលីសាជីវកម្ម ធ្វើបាតុកម្មប្រឆាំងថ្ងៃ៧មករានៅមុខភោជនីយដ្ឋាន Maxim Saigon នៅទីក្រុងស្ព្រីងវែល នៃរដ្ឋវ៉ិកតូរីយ៉ា (Victoria) ព្រោះលោកទទួលដំណឹងថា ក្រុមមន្ត្រីនៃរបបក្រុងភ្នំពេញនឹងរៀបចំអបអរថ្ងៃទី៧ មករា នៅក្នុងភោជនីយដ្ឋាននោះ។ លោក ជា យូហន អំពាវនាវដល់ពលរដ្ឋខ្មែរគ្រប់ទិសទី ដែលរស់នៅប្រទេសអូស្ត្រាលី ឲ្យចូលរួមបាតុកម្មនេះឲ្យបានច្រើនកុះករ៖ «ខ្ញុំអំពាវនាវដល់បងប្អូនរួមជាតិខ្មែរទាំងអស់គ្នា ធ្វើយ៉ាងម៉េចឲ្យមានការសាមគ្គីគ្នា ដើម្បីប្រឆាំងនឹង ៧ មករាហ្នឹង បើយើងស្ដាប់សំដីលោក ប៉ែន សុវណ្ណ គាត់បាននិយាយច្បាស់ហើយ ថ្ងៃ ៧ មករានេះ ជាថ្ងៃដែលយួន ( វៀតណាម ) ចូលមកឈ្លានពានទឹកដីកម្ពុជាយើង»។
សេចក្ដីប្រកាសព័ត៌មានរបស់សហព័ន្ធខ្មែរអូស្ត្រាលីសាជីវកម្មឲ្យដឹងថា ក្រុមបាតុករនឹង ជួបជុំគ្នានៅសមាគមខ្មែរនៅវេលាម៉ោង ៥ល្ងាច នៅថ្ងៃសៅរ៍ទី៥ ខែមករា ដើម្បីដង្ហែក្បួនបាតុកម្មទៅកាន់ ភោជនីយ៍ដ្ឋាន Maxim។ បាតុកម្មនោះមានការចូលរួមពីពលរដ្ឋខ្មែរនៅអូស្ត្រាលីក្នុងនៅរដ្ឋ វីកតូរីយ៉ា (Victoria) សមាគមខ្មែរ សហព័ន្ធខ្មែរ ក្រុមការងារ ២៣ តុលា គណបក្សសង្គ្រោះជាតិ និងពលរដ្ឋខ្មែរមកពីរដ្ឋផ្សេងទៀតនៃប្រទេសនេះ។
អ្នកដឹកនាំបាតុកម្មដ៏មានឥទ្ធិពលមួយរូបទៀត គឺលោក តាក់ ម៉េងហៀង ដែលទើបជាប់ឆ្នោតជាតំណាងរាស្ត្រនៅប្រទេសអូស្ត្រាលី ឲ្យអាស៊ីសេរីដឹងដែរថា ការរួបរួមគ្នារបស់មហាគ្រួសារខ្មែរនៅប្រទេសអូស្ត្រាលីនេះ ដើម្បីរំលឹកពីទុក្ខវេទនារបស់ពលរដ្ឋខ្មែរ ដែលរងគ្រោះព្រោះថ្ងៃ ៧ មករានេះ។ លោកបន្តថា នេះក៏ជាសារមួយប្រាប់ទៅពលរដ្ឋខ្មែរមួយចំនួនតូចនៅអូស្ត្រាលីដែលនៅវង្វេងផ្លូវដឹងគុណថ្ងៃ ៧ មករា ឲ្យងាកមកដើរផ្លូវត្រូវឡើងវិញ កុំជឿតាមការអូសទាញពីក្រុមជនផ្ដាច់ការ។
លោកបន្តទៀតថា បើខ្មែរនៅតែដឹងគុណថ្ងៃ ៧ មករាទៀត នឹងធ្វើឲ្យខ្មែររងទុក្ខវេទនា និងបែកបាក់គ្នាបន្តទៀត។ ដូច្នេះ ក្នុងនាមជាយុវជនជំនាន់ក្រោយ និងមានសិទ្ធិសេរីភាពពេញលេញ ត្រូវនាំគ្នាប្រឆាំងថ្ងៃ ៧ មករាជាដាច់ខាត៖ «ថ្ងៃនេះ ( ៧ មករា ) យើងចាត់ទុកថា ជាថ្ងៃដែលខ្មែរយើងរំលឹកទុក្ខខ្មែរយើងបាត់បង់ទឹកដីផង ការបាត់បង់អាយុជីវិតពលរដ្ឋខ្មែរយើងផង ដោយសារតែការមកត្រួតត្រារបស់ទាហានបរទេស ( វៀតណាម )» ។
សហគមន៍ខ្មែរនៅអូស្ត្រាលីថា របបលោក ហ៊ុន សែន បានយកព្រឹត្តិការណ៍នេះ មកប្រើប្រាស់ធ្វើជាឧបករណ៍ឃោសនានយោបាយ ហើយគណបក្សប្រជាជនកម្ពុជា ឬរបបក្រុងភ្នំពេញបានចាត់ទុកថ្ងៃជ័យជម្នះលើរបបប្រល័យពូជសាសន៍ ប៉ុល ពត ជាថ្ងៃកំណើតទី២។
ជុំវិញគម្រោងធ្វើបាតុកម្មរបស់សហគមន៍ខ្មែរនៅអូស្ត្រាលីនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យអាស៊ីសេរីដឹងតាមប្រព័្ធតេឡេក្រាមថា ការធ្វើបាតុកម្មប្រឆាំង ៧ មករា ឬញក៏ប្រឆាំងអ្វីផ្សេងទៀត គឺជាសិទ្ធិដែលមិនអាចហាមឃាត់គេបានទេ។ លោកយល់ថា ពលរដ្ឋខ្មែរមួយចំនួន ដែលមានឱកាសបានមករស់នៅក្រៅប្រទេស ក៏ដោយសារថ្ងៃ ៧ មករានេះដែរ។
ប៉ុន្តែ មេដឹកនាំបាតុកម្ម លោក ជា យូហន ឆ្លើយតបទៅលោក សុខ ឥសាន វិញថា បើវៀតណាមមានចិត្តជួយរំដោះប្រទេសកម្ពុជាពិតមែននោះ មិនមែនពួកគេចូលលុកលុយប្រទេសកម្ពុជាហើយមិនព្រមចាកចេញពីកម្ពុជាវិញនោះទេ។ លោកព្រមានថា បើរបបក្រុងភ្នំពេញបន្តដឹងគុណថ្ងៃ ៧ មករាទៀត ប្រទេសកម្ពុជាអាចនឹងត្រូវវៀតណាមលេបត្របាក់យកទៅគ្រប់គ្រងដូចទឹកដីកម្ពុជាក្រោម និងកោះត្រល់ជាដើម៖ «ចៀសវាងគេនិយាយថា ថ្ងៃទី៧ មករាហ្នឹងជាថ្ងៃរំដោះប្រជាជនខ្មែរពីខ្មែរក្រហម អរគុណហើយដែលបានរំដោះបើរំដោះរួចហើយទៅគួរត្រឡប់ទៅប្រទេសវៀតណាមវិញទៅ ចៀសវាងការបញ្ចូលក្រុមវៀតណាមហ្នឹងជាច្រើន ដែលចង់យកប្រទេសកម្ពុជាយើងហ្នឹងឲ្យក្លាយជាកម្ពុជាក្រោមមួយទៀត»។
សហព័ន្ធខ្មែរអូស្ត្រាលីសាជីវកម្ម ឲ្យដឹងថា ការចេញមកធ្វើបាតុកម្មរបស់ពលរដ្ឋដើមកំណើតខ្មែរនៅអូស្ត្រាលីនេះ គឺដើម្បីប្រឆាំងនឹងប្រព័ន្ធឃោសនារបស់គណបក្សប្រជាជនកម្ពុជា និងវត្តមានមន្ត្រីជាន់ខ្ពស់ រួមទាំងមន្ត្រីយោធានៃរបបក្រុងភ្នំពេញ ដែលកំពុងធ្វើយុទ្ធនាការពង្រីកឥទ្ធិពលនយោបាយរបស់ខ្លួននៅលើទឹកដីអូស្ត្រាលី។ សហគមន៍ខ្មែរនៅអូស្ត្រាលីក៏អំពាវនាវដល់ពលរដ្ឋខ្មែរ ដែលកំពុងរស់នៅប្រទេសមានសិទ្ធិសេរីភាពពេញលេញផ្សេងៗ ទៀតរួមគ្នាធ្វើបាតុកម្មប្រឆាំងថ្ងៃ ៧ មករានេះផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។