ពលរដ្ឋ​កោះកុង​ទាមទារ​តាម​បណ្ដាញ​សង្គម​ឲ្យ​រដ្ឋាភិបាល​ថ្មី​ដោះលែង​សកម្មជន​ដីធ្លី​ទាំង​៩នាក់

ដោយ ម៉ៅ សុធានី
2023.08.27
ពលរដ្ឋ​កោះកុង​ទាមទារ​តាម​បណ្ដាញ​សង្គម​ឲ្យ​រដ្ឋាភិបាល​ថ្មី​ដោះលែង​សកម្មជន​ដីធ្លី​ទាំង​៩នាក់ រូបភាពដែលពលរដ្ឋខេត្ត​កោះកុង ផ្សព្វផ្សាយតាមបណ្ដាញសង្គម​ហ្វេសប៊ុកស្នើអន្តរាគមន៍ពីនាយករដ្ឋមន្ត្រីថ្មី លោក ហ៊ុន ម៉ាណែត។
រូប៖ ហ្វេសប៊ុកយុវជនសហគមន៍តានី197

ពលរដ្ឋ​មាន​ទំនាស់​ដី​ធ្លី​ខេត្ត​កោះកុង ប្រើប្រាស់​បណ្ដាញ​សង្គម​ដើម្បី​ទាមទារ​ឲ្យ​រដ្ឋាភិបាល​ថ្មី ដឹកនាំ​ដោយ​លោក​នាយករដ្ឋមន្ត្រី ហ៊ុន ម៉ាណែត ជំរុញ​ឲ្យ​តុលាការ​ខេត្ត​កោះកុង ដោះលែង និង​ទម្លាក់​បទ​ចោទ​សកម្មជន​ដីធ្លី​ទាំង​៩នាក់ និង​ដោះស្រាយ​បញ្ចប់​វិវាទ​ដីធ្លី​រ៉ាំរ៉ៃ​អូស​បន្លាយ​ជិត​២០ឆ្នាំ​មក​នេះ។ មន្ត្រី​អង្គការ​សង្គម​ស៊ីវិល​ថា អាជ្ញាធរ គួរតែ​មាន​ចិត្ត​សន្ដោស​ប្រណី​ដល់​ពលរដ្ឋ ដែល​រង​ការ​រំលោភ​បំពាន​ដីធ្លី​ពី​អ្នក​មាន​អំណាច ដោយ​យក​បញ្ហា ដែល​ពួកគាត់​ទាមទារ​មក​ជជែក​គ្នា រវាង​អាជ្ញាធរ និង​ពលរដ្ឋ ដើម្បី​បញ្ចប់​វិវាទ​ដីធ្លី​រ៉ាំរ៉ៃ​នេះ។

តំណាង​សហគមន៍​មាន​ទំនាស់​ដីធ្លី​នៅ​ថ្ងៃ​ទី២៦ សីហា បង្ហោះ​សារ និង​រូបភាព​នៅ​លើ​បណ្ដាញ​សង្គម ដើម្បី​ស្នើ​សុំ​ឲ្យ​រដ្ឋាភិបាល ដឹកនាំ​ដោយ​លោក​នាយករដ្ឋមន្ត្រី ហ៊ុន ម៉ាណែត ដោះលែង​សកម្មជន​ដីធ្លី​ទាំង​៩នាក់ ឲ្យ​មាន​សេរីភាព​ឡើងវិញ។ រូបភាព​ទាំង​នោះ​រួមមាន បដា​ពណ៌​ស មួយ​សន្លឹក​បង្ហាញ​ពី​ការ​ស្នើសុំ​ឲ្យ​ដោះលែង​សកម្មជន​ទាំង​៩នាក់​រួម​មាន អ្នកស្រី ដេត ហួរ លោក សុខ ជ័យ និង​សកម្មជន​ដីធ្លី​ដ៏​ល្បី​ឈ្មោះ គឺ​លោកស្រី ផាវ ញើង ជាដើម។

លោក ហង់ វាសនា កូន​ប្រុស​របស់​លោកស្រី ផាវ ញ៉ើង ដែល​កំពុង​ជាប់ឃុំ​នៅ​ពន្ធនាគារ​ខេត្ត​កោះកុង ស្នើ​ដល់​រដ្ឋាភិបាល ដោះស្រាយ​បញ្ចប់​ជម្លោះ​ដីធ្លី និង​ជំរុញ​តុលាការ​ខេត្ត​កោះកុង ដោះលែង​សកម្មជន​ដីធ្លី​ទាំង​៩នាក់។

លោក ហង់ វាសនា៖ «ខ្ញុំ​សូម​ស្នើ​សុំ​ទៅ​រាជ​រដ្ឋាភិបាល​កម្ពុជា​ហ្នឹង សុំ​ធ្វើ​ដូច​ម្ដេច​ចូលរួម ឬ​ក៏​ជំរុញ​ឲ្យ​មាន​ការ​ដោះស្រាយ​ទៅ​លើ​បញ្ហា​ដីធ្លី​របស់​ពួក​ខ្ញុំ។ ជា​ពិសេស​នៅ​ក្នុង​ពេល​បច្ចុប្បន្ន​ហ្នឹង​ធ្វើ​ដូច​ម្ដេច​ឲ្យ​មាន​ការ​ដោះលែង​លើ​ម្ដាយ​របស់​ខ្ញុំ ក៏​ដូចជា សហគមន៍​ផ្សេង​ទៀត ព្រោះ​ពួក​យើង​អត់​បាន​ប្រព្រឹត្ត​កំហុស​ណាមួយ​ដូច​ការ​ចោទ​ប្រកាន់​របស់​តុលាការ​ទាំង​អស់។ ពួក​យើង​ត្រូវការ​យុត្តិធម៌​សម្រាប់​ពួក​យើង ហើយ​យើង​ត្រូវការ​ជីវភាព​រស់នៅ​ដ៏​សមរម្យ​ដូច​ប្រជាពលរដ្ឋ​ផ្សេង​ទៀត​ដែរ»

ស្រដៀងគ្នា​នេះ លោក សួស ថែត ប្តី​លោកស្រី យឿន ខ្មៅ ដែល​កំពុង​ជាប់​ឃុំ​នៅ​ពន្ធនាគារ​ខេត្ត​កោះកុង ថ្លែង​ថា លោក​មិន​អាច​ចេញ​ពី​ផ្ទះ ដើម្បី​ធ្វើ​ការ​ស្វែង​រក​ប្រាក់​ចំណូល​ចិញ្ចឹម​គ្រួសារ​បាន​ទេ ព្រោះ​តាំង​ពី​ប្រពន្ធ​ជាប់​ឃុំ​មក គ្មាន​អ្នក​នៅ​ផ្ទះ​មើល​កូន​តូចៗ ​កំពុង​មាន​ជំងឺ។ លោក​ស្នើ​ដល់​លោក ហ៊ុន ម៉ាណែត ជំរុញ​ដល់​តុលាការ​ខេត្ត​កោះកុង ដោះលែង​សកម្មជន​ដីធ្លី​ទាំង​៩នាក់។

លោក សួស ថែត៖ «បាទ ខ្ញុំ​សង្ឃឹម​ថា ប្រមុខ​រដ្ឋាភិបាល​ថ្មី ដែល​ដឹកនាំ​ដោយ​ឯកឧត្តម​បណ្ឌិត ហ៊ុន ម៉ាណែត​នឹង​ជំរុញ​ឲ្យ​ដល់​តុលាការ ដើម្បី​ឲ្យ​តុលាការ​ដោះលែង​ប្រជាពលរដ្ឋ​បាន​ជួប​ជុំ​ក្រុម​គ្រួសារ​បាទ»

វិទ្យុ​អាស៊ីសេរី ពុំ​អាច​ទាក់ទង​អ្នកនាំពាក្យ​សាលាដំបូង​ខេត្ត​កោះកុង​លោក ស៊ូ សុវណ្ណារ៉ា និង​អ្នកនាំពាក្យ​រដ្ឋាភិបាល​លោក ប៉ែន បូណា ដើម្បី​សុំ​ការ​ឆ្លើយតប​ចំពោះ​សំណើ​របស់​ពលរដ្ឋ បានទេ នៅថ្ងៃទី២៦ សីហា។

ប្រធាន​មជ្ឈ​មណ្ឌល​ប្រជាពលរដ្ឋ​ដើម្បី​អភិវឌ្ឍ និង​សន្តិភាព លោក យង់ គិមអេង មាន​ប្រសាសន៍​ថា អាជ្ញាធរ​គួរតែ​ដោះស្រាយ​បញ្ចប់​វិវាទ​ដីធ្លី​រ៉ាំរ៉ៃ ដែល​អូស​បន្លាយ​ជិត ២០ឆ្នាំ​នេះ ឲ្យ​បាន​ឆាប់។

លោក យង់ គិមអេង៖ «សម្រាប់​ប្រជាពលរដ្ឋ ដែល​ពឹង​អាស្រ័យ ជីវភាព​ប្រចាំ​ថ្ងៃ​ទៅ​លើ​ដី​ស្រែ ទៅ​លើ​ដី​ធ្លី​ហ្នឹង​បាទ ប្រសិន​ជា​អត់​មាន​ដំណោះស្រាយ​ទេ ដំណើរការ​នៃ​ការ​តវ៉ា​ហ្នឹង ការ​តវ៉ា​ហ្នឹង​វា​អត់​មាន​ឈប់ឈរ នៅ​តែ​មាន​ការ​តវ៉ា​អ៊ីចឹង​បាទ។ គ្នា​ដឹង​ថា តវ៉ា​ខ្លាំង​អាច​ប្រឈម​នឹង​ការ​ជាប់​គុក​ជាប់​ច្រវាក់​អ៊ីចឹង ប៉ុន្តែ​គ្នា​គ្មាន​ជម្រើស​អ្វី​ក្រៅ​ពី​ការ​តវ៉ា​ហ្នឹង»

កាល​ពី​ថ្ងៃទី១៥ ខែ​សីហា សាលាដំបូង​ខេត្តកោះកុង ប្រកាស​សាលក្រម​លើ​សំណុំរឿង​របស់​តំណាង​សហគមន៍​ដីធ្លី​១៩៧ ដោយ​សម្រេច​ឱ្យ​តំណាង​សហគមន៍​ចំនួន ១០នាក់​ជាប់​ពន្ធនាគារ​១ឆ្នាំ ពី​បទ​ញុះញង់​ឱ្យ​ប្រព្រឹត្ត​អំពើ​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បទ​បរិហារ​បង្កាច់​កេរ្តិ៍ និង​សម្រេច​ឱ្យ​តំណាង​ពលរដ្ឋ​សង​សំណង​៤០លាន​រៀល ឬ​ស្មើ​ប្រមាណ ១​ម៉ឺន (១០.០០០) ដុល្លារ​អាមេរិក ទៅ​កាន់​លោក ហេង ហ៊ុយ ដែល​ពលរដ្ឋ អះអាង​ថា ជា​អ្នក​យក​ដី​ពួកគាត់។

បើ​ទោះបី​ជា​រដ្ឋាភិបាល​ថ្មី ទើប​ប្រកាស​ពី​ការ​អនុវត្ត​យុត្តិសាស្ត្រ​បញ្ច​កោណ ដំណាក់​កាល​ទី១ ដែល​មាន​គោលដៅ​សំខាន់ លើក​កម្ពស់​សេដ្ឋកិច្ច និង​ការ​អភិវឌ្ឍ ក៏ដោយ ក៏​នៅ​ពុំ​ទាន់​ឃើញ​រដ្ឋាភិបាល​ថ្មី​ដឹកនាំ​ដោយ​លោក​នាយករដ្ឋមន្ត្រី ហ៊ុន ម៉ាណែត បង្ហាញ​ពី​ឆន្ទៈ​ក្នុង​ការ​ដោះស្រាយ​បញ្ហា​ដីធ្លី ដែល​ជា​ឆ្នាំង​បាយ​របស់​ពលរដ្ឋ​នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។