មេធាវីការពារក្ដីលោក កឹម សុខា បន្តអះអាងថា លោក កឹម សុខា គ្មានផែនការសម្ងាត់ជាមួយរដ្ឋបរទេស ដើម្បីផ្ដួលរំលំរដ្ឋាភិបាល លោក ហ៊ុន សែន ឡើយ។ លោកមេធាវី ចាន់ ចេន បញ្ជាក់ជាថ្មីថា ការថ្លែងរបស់លោក កឹម សុខា នៅប្រទេសអូស្ត្រាលីកាលពីឆ្នាំ២០១៣ ជាងមួយម៉ោងនោះ ជាការថ្លែងដោយបើកចំហ និងមានអ្នកគាំទ្រលោក កឹម សុខា រាប់សិបនាក់ចូលរួម ដូច្នេះនេះមិនមែនជាផែនការសម្ងាត់អ្វីនោះទេ។
មេធាវីការពារក្ដីឱ្យលោក កឹម សុខា គឺលោក លោក ចាន់ ចេន ថ្លែងប្រាប់អ្នកសារព័ត៌មានក្រោយបញ្ចប់សវនាការនៅថ្ងៃទី១ មិថុនាថា សវនាការជំនុំជម្រះក្ដីលោក តាំងពីដើមមកដល់ពេលនេះតុលាការគ្មានភស្តុតាងរឹងមាំដាក់បន្ទុកលោក កឹម សុខា ក្រៅតែពីវីដេអូនៃថ្លែងរបស់លោក កឹម សុខា នោះឡើយ។ ផ្ទុយទៅវិញលោកមេធាវីថា មានតែរដ្ឋបរទេសនានា មានទំនាក់ទំនងល្អជាមួយរដ្ឋាភិបាល៖ « យើងមើលជារួមអត់មានអីដែលហៅថា ភ្នាក់ងារបរទេស ឬរដ្ឋបរទេសណាដែលមកឃុបឃិតជាមួយឯកឧត្ដម កឹម សុខា នោះទេ។ មួយទៀត យើងក៏សង្កេតឃើញកូនក្ដីបានមានប្រសាសន៍ជាច្រើនទាក់ទងសំនួរអយ្យការ គឺចង់បញ្ជាក់ថា អ្វីដែលគាត់ធ្វើកន្លងមកគឺក្នុងក្របខ័ណ្ឌច្បាប់ទាំងអស់ » ។
សវនាការលើកទី៤២នេះ មានការចូលឃ្លាំមើលពីតំណាងស្ថានទូតបរទេស និងតំណាងអង្គការសហប្រជាជាតិប្រចាំកម្ពុជា តំណាងអង្គការសង្គមស៊ីវិលក្នុងស្រុក និងអ្នកសារព័ត៌មានផងដែរ។ កងកម្លាំងប្រដាប់ដោយអាវុធជាង ២០នាក់ រឹតបន្តឹងសន្តិសុខ នៅមុខតុលាការ ខណៈមានអ្នកគាំទ្រលោក កឹម សុខា មួយចំនួនឈរនៅមុខតុលាការ។ តុលាការនឹងបន្តសវនាការសំណុំរឿង លោក កឹម សុខា នៅថ្ងៃទី៨ ខែមិថុនាសប្ដាហ៍ក្រោយទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។