មន្ត្រីជាន់ខ្ពស់ក្រសួងមហាផ្ទៃអះអាងថា ដីការបស់តុលាការថៃ តាមចាប់លោក លី រតនរស្មី និងលោក ពេជ្រ គឹមស្រ៊ិន គឺជាដីកាអត់ប្រយោជន៍ បើភាគីថៃមិនស្វះស្វែងរកកិច្ចសហការអនុវត្តដីកានេះ ជាមួយរដ្ឋាភិបាលកម្ពុជាដោយផ្ទាល់។ ការអះអាងនេះ ធ្វើឡើងបន្ទាប់ការទាមទារយ៉ាងទទូច ពីសំណាក់ក្រុមគ្រួសារលោក លិម គិមយ៉ា ប្រជាពលរដ្ឋខ្មែរ និងក្រុមអ្នកការទូត ឱ្យចាប់បញ្ជូនជនសង្ស័យជាជនជាតិខ្មែរពីរនាក់ ទៅឱ្យតុលាការថៃអនុវត្តនីតិវិធីជំនុំជម្រះក្ដី។
រដ្ឋាភិបាលបដិសេធការពាក់ព័ន្ធឃាតកម្មលើលោក លិម គិមយ៉ា
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វិទ្យុអាស៊ីសេរី នៅថ្ងៃទី២៨ ខែកុម្ភៈថា រដ្ឋាភិបាលកម្ពុជាមិនជាប់ពាក់ព័ន្ធនឹងការសម្លាប់លោក លិម គិមយ៉ា ឡើយ ហើយរដ្ឋធម្មនុញ្ញកម្ពុជា ក៏មិនអនុញ្ញាតឱ្យចាប់បញ្ជូនជនជាតិខ្មែរណាម្នាក់ទៅឱ្យប្រទេសដទៃដែរ។ ប៉ុន្តែលោកបញ្ជាក់ថា កាលបើមានករណីចាំបាច់ ក៏អាចសុំយោបល់ជាគោលការណ៍ពីថ្នាក់ដឹកនាំកំពូល ដើម្បីរកដំណោះស្រាយដែរ។
លោក ខៀវ សុភ័គ ថ្លែងថា ដីការបស់តុលាការព្រហ្មទណ្ឌថៃ មិនអាចហោះទៅចាប់ លោក លី រតនរស្មី និងលោក ពេជ្រ គឹមស្រ៊ិន ពីកម្ពុជាបានទេ។ ដូច្នេះលោកថា ទាល់តែភាគីថៃស្វះស្វែងរកកិច្ចសហការជាមួយកម្ពុជា ដើម្បីអនុវត្តប្រតិបត្តិការ ស្របតាមគោលការណ៍ច្បាប់របស់ប្រទេសនីមួយៗ។ លោកថា រដ្ឋាភិបាលកម្ពុជារង់ចាំធ្វើការជាមួយអាជ្ញាធរថៃ។
លោក ខៀវ សុភ័គ៖ «ដីកាហ្នឹង ចេញហោះមកចាប់ ដីកាហ្នឹងមកចងយកមនុស្ស[ជនសង្ស័យ]ទៅម៉េចបើមនុស្ស[សមត្ថកិច្ចថៃ]មិនមក?ឥឡូវដីកាចេញមកហើយ ចេញឱ្យអ្នកណាអនុវត្ត តើដីការបស់ថៃឱ្យសមត្ថកិច្ចខ្មែរអនុវត្តបានទេ?[ខ្ញុំ]សួរ?ដីការបស់ថៃហ្នឹងចាប់ខ្លួនបញ្ជាមកសមត្ថកិច្ចកម្ពុជាអនុវត្តឈ្មោះហ្នឹង មានចែងអ៊ីចឹងទេ?បញ្ជាមកសមត្ថកិច្ចកម្ពុជាឱ្យចាប់ខ្លួនជនពីរនាក់បញ្ជូនទៅថៃ មានចែងអត់?អាហ្នឹងម៉េច?ដូច្នេះ ត្រូវរកវិធី ដើម្បីសហការគ្នា ដើម្បីអនុវត្តដីកាហ្នឹងឱ្យច្បាស់លាស់មើល ឱ្យapproach[ចូលឱ្យដល់]រដ្ឋាភិបាលមើលបញ្ជូនមកពាក់ព័ន្ធគ្នាមើល។ តើដីកាវាហោះពីបាងកកមកចាប់អាពីរនាក់ទៅ ឬម៉េច?ដីកាហ្នឹងវាជិះយន្តហោះពីបាងកកមកចាប់ពីរនាក់ហ្នឹង ដីកាហ្នឹងវាចងពីរនាក់ទៅយ៉ាងម៉េច?សូម្បីតែដីការបស់កម្ពុជា បង្គាប់មកសមត្ថកិច្ចរបស់កម្ពុជា ដើម្បីចាប់ខ្លួន។ សូម្បីតែតុលាការកម្ពុជា ក៏ចេញបង្គាប់ដែរ។ ដីកាហ្នឹងដីកាឥតប្រយោជន៍។ នេះមានតែ[វិធី]មួយទេ។ យើងរង់ចាំសហការជាមួយគ្នា ដើម្បីអនុវត្តកិច្ចការផ្សេងៗ តាមច្បាប់ប្រទេសនីមួយៗ អនុញ្ញាតប៉ុណ្ណឹង»។
វិទ្យុអាស៊ីសេរីមិនអាចសុំការអត្ថាធិប្បាយជុំវិញការលើកឡើងនេះពីស្ថានទូតថៃ ប្រចាំប្រទេសកម្ពុជាបានទេ នៅថ្ងៃទី២៨ ខែកុម្ភៈ។
ការលើកឡើងរបស់លោក ខៀវ សុភ័គ ខណៈករណីនៃការចាប់ខ្លួនជនសង្ស័យពីរនាក់ គឺលោក លី រតនរស្មី និងលោក ពេជ្រ គឹមស្រ៊ិន បញ្ជូនទៅឱ្យតុលាការថៃ ដំណើរការនីតិវិធីជម្រះសេចក្ដីឃាតកម្មលើលោក លិម គិមយ៉ា នៅតែជាការទាមទារយ៉ាងទទូច ពីសំណាក់ប្រជាពលរដ្ឋខ្មែរ និងក្រុមអ្នកការទូត។
អ្នកជំនាញច្បាប់ និងអភិបាលកិច្ចបែបប្រជាធិបតេយ្យលោក វ៉ន ចាន់ឡូត ប្រាប់វិទ្យុអាស៊ីសេរីនៅថ្ងៃទី២៨ ខែកុម្ភៈថា លោកមិនរំពឹងថា រដ្ឋាភិបាលក្រុងភ្នំពេញ នឹងចាប់បញ្ជូនលោក លី រតនរស្មី និងលោក ពេជ្រ គឹមស្រ៊ិន ទៅឱ្យភាគីថៃងាយៗ នោះទេ។ ទោះយ៉ាងណាក្ដី លោកថា ដើម្បីបង្កើនឥទ្ធិពលជំរុញឱ្យមានការចាប់បញ្ជូនអ្នកទាំងពីរ ទៅឱ្យតុលាការព្រហ្មទណ្ឌថៃអនុវត្តនីតិវិធី គឺទាល់តែប្រជាពលរដ្ឋខ្មែរ ដែលស្រឡាញ់យុត្តិធម៌ទូទាំងពិភពលោក ជាពិសេស ក្រុមគ្រួសារលោក លិម គិមយ៉ា ប្រឹងប្រែងទាមទារឱ្យភាគីបារាំង និងថៃយកចិត្តទុកដាក់ចំពោះរឿងនេះ។
លោក វ៉ន ចាន់ឡូត៖ «ត្រូវជំរុញទាំងអស់ គឺជំរុញទាំងបារាំង និងទាំងថៃ ហើយបើកាលណាប្រទេសថៃចាប់ផ្ដើមសកម្ម ហើយប្រទេសបារាំងចាប់ផ្ដើមសកម្ម។ ខ្ញុំយល់ថា កម្ពុជានឹងពិបាកនៅក្នុងការបដិសេធ ក្នុងការធ្វើការសហការ»។
កិច្ចប្រឹប្រែងរបស់ទូតបារាំងរកយុត្តិធម៌ជូនលោក លិម គិមយ៉ា
ក្នុងកិច្ចប្រឹងប្រែងយកចិត្តទុកដាក់រកយុត្តិធម៌ជូនលោក លិម គិមយ៉ា ដែលជាពលរដ្ឋបារាំងដែរ កាលពីថ្ងៃទី២៤ ខែកុម្ភៈ ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ (Jacques PELLET) បានជួបជាមួយអគ្គស្នងការរងនគរបាលជាតិ និងជាកូនប្រសាលោក ហ៊ុន សែន គឺលោក ឌី វិជ្ជា ដើម្បីពិភាក្សាអំពីវិធានការធ្វើឡើងដោយអាជ្ញាធរកម្ពុជា ក្នុងក្របខ័ណ្ឌនៃការស៊ើបអង្កេតរបស់ប្រទេសថៃ ជុំវិញឃាតកម្មលោក លិម គិមយ៉ា។ លោកឯកអគ្គរដ្ឋទូតថា ប្រទេសបារាំង ក៏កំពុងតាមដានដោយយកចិត្តទុកដាក់អំពីការស៊ើបអង្កេត ដែលធ្វើឡើងដោយប្រទេសថៃដែរ ដើម្បីស្វែងរកការពិតចំពោះករណីនេះ។
ជំនួបជាមួយអគ្គស្នងការរងនគរបាលជាតិ លោក ឌី វិជ្ជា នេះ ធ្វើឡើងបន្ទាប់ឯកអគ្គរដ្ឋទូតបារាំង បានជួបរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ម្ដងរួចហើយ កាលពីថ្ងៃទី២៣ ខែមករា ដោយបានរំឭកលោក ប្រាក់ សុខុន ថា ភាគីបារាំងតាមដានយ៉ាងយកចិត្តទុកដាក់លើការស៊ើបអង្កេតស្ដីពីឃាតកម្មលើលោក លិម គិមយ៉ា ដែលជាពលរដ្ឋបារាំង និងជាសមាជិកបក្សប្រឆាំងកម្ពុជា។
អត្ថបទដែលទាក់ទង៖
លោក សម រង្ស៊ី ជំរុញលោក ជា វិជ្ជា ឱ្យសហការជាមួយបារាំង វែកមុខមេខ្លោងសម្លាប់លោក លិម គិមយ៉ា
អគ្គរដ្ឋទូតបារាំងជួបលោក ជា វិជ្ជា ពាក់ព័ន្ធករណីឃាតកម្មលើលោក លិម គិមយ៉ា
ជនសង្ស័យ ដែលបាញ់សម្លាប់លោក លិម គិមយ៉ា នៅបាងកក អាជ្ញាធរចាប់បាននៅក្នុងទឹកដីខ្មែរ
លោក លិម គិមយ៉ា ត្រូវបានខ្មាន់កាំភ្លើងជនជាតិថៃ ឈ្មោះ ឯកាឡាក់ ផែណយ (Ekkalak Phaenoi)បាញ់សម្លាប់នៅទីក្រុងបាងកក កាលពីថ្ងៃទី៧ ខែមករា ដែលមកដល់ពេលនេះ មានរយៈពេលជិតពីរខែហើយ។ ជនសង្ស័យជាជនជាតិខ្មែរពីរនាក់ទៀត គឺលោក លី រតនរស្មី និងលោក ពេជ្រ គឹមស្រ៊ិន ដែលស្ថិតនៅកម្ពុជាមិនត្រូវបានរដ្ឋាភិបាលត្រកូល ហ៊ុន ចាប់បញ្ជូនទៅឱ្យតុលាការថៃអនុវត្តដំណើរការក្ដីឡើយ។ ការសំងំស្ងៀម មិនចេញប្រតិបត្តិការចាប់អ្នកទាំងពីរ មានរយៈពេលប្រមាណមួយខែហើយ បន្ទាប់ពីមានដីការបស់តុលាការព្រហ្មទណ្ឌថៃ និងប៉ូលិសអន្តរជាតិអាំងទែប៉ូល (Interpol) ចេញសេចក្ដីសម្រេចតាមចាប់ខ្លួនពួកគេ។
ទាំងលោក លិម តូម៉ា និងភរិយាលោក លិម គិមយ៉ា គឺលោកស្រី លិម អានី ចាត់ទុកឃាតកម្មលើលោក លិម គិមយ៉ា ជារឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។