អ្នកតាមដានសង្គម និងមន្ត្រីគណបក្សប្រឆាំងថា លោក ហ៊ុន សែន ព្យាយាមរិះរកគ្រប់មធ្យោបាយនិងរឿងរ៉ាវប្លែកៗទម្លាក់កំហុសលើលោក សម រង្ស៊ី។ ជាពិសេសក្នុងរដូវកាលបោះឆ្នោតខាងមុខ។
មន្ត្រីគណបក្សប្រឆាំងសង្កេតឃើញថា លោក ហ៊ុន សែន ដែលជាមេដឹកនាំមានចិត្តឆេវឆាវហាក់បង្ហាញពីអារម្មណ៍ខ្វល់ខ្វាយពីវត្តមានលោក សម រង្ស៊ី នៅមុនការបោះឆ្នោតថ្នាក់ជាតិខាងមុខនេះ ដែលស្ដែងឡើងតាមរយៈការលើកឡើងនៅក្នុងវេទិកាសាធារណៈ និងការប្រឌិតរឿងទម្លាក់កំហុសមកលើលោក សម រង្ស៊ី ជាដើម។
អតីតតំណាងរាស្ត្រគណបក្សសង្គ្រោះជាតិ ខេត្តកំពង់ធំ លោក ម៉ែន សុថាវរិន្ទ្រ ប្រាប់វិទ្យុអាស៊ីសេរីនៅថ្ងៃទី២៨ មិថុនា ថា ការចោទប្រកាន់របស់លោក ហ៊ុន សែន គឺជារឿងប្រឌិតទម្លាក់កំហុសឱ្យលោក សម រង្ស៊ី និងជាការបង្វែងដានបញ្ហានៅចំពោះមុខដែលលោកមិនអាចដោះស្រាយបានដូចជាការបាត់បង់ប្រព័ន្ធអនុគ្រោះព័ន្ធ EBAនិង GSP ជាដើម។ លោកអះអាងថា លោក ហ៊ុន សែន ខ្លួនឯងនេះហើយដែលជាអ្នកកាត់ដីធនធានធម្មជាតិព្រៃឈើឱ្យទៅបរទេស និងក្រុមអ្នកមានលុយមានអំណាចព្រោះលោកជាអ្នកគ្រប់គ្រង និងមានអំណាចពេញដៃ។ លោកមើលឃើញថា លោក ហ៊ុន សែន កំពុងប្រើប្រាស់រឿងនេះដើម្បីទាក់ទាញប្រជាប្រិយភាព ខណៈលោកកំពុងខ្លាចបាត់បង់សន្លឹកឆ្នោត ទោះបីគ្មានវត្តមានគណបក្សភ្លើងទៀនក្ដី។
លោក ម៉ែន សុថាវរិន្ទ្រ៖ «រឿងនេះអត់បានការ!ខ្ញុំមើលទៅអត់បានការសោះ។ និយាយឱ្យចំលោក ហ៊ុន សែន គាត់អត់មានអីនិយាយគាត់និយាយតែដដែលៗហ្នឹង។ ដោយសារគាត់ខ្លាចជាពិសេសប្រព័ន្ធអនុគ្រោះព័ន្ធEBAនិងGSPគេនឹងធ្វើមែនទែនហើយ។ វិបត្តិសេដ្ឋកិច្ចខ្លាំងមែនទែននៅប្រទេសកម្ពុជា។ ហើយគាត់ចេះតែប្រឌិតរឿងអីដែលជិតបោះឆ្នោតទៅ។ ចង់មិនចង់ការបោះឆ្នោតនេះអត់មានគណបក្សជំទាស់ទេ អត់មានគណបក្សភ្លើងទៀនទេ តែក៏ខ្លាចម្ល៉េះ»?
ប្រតិកម្មរបស់មន្ត្រីបក្សប្រឆាំងធ្វើឡើងបន្ទាប់ពីលោក ហ៊ុន សែន នៅថ្ងៃទី២៨ មិថុនា និយាយដោយកាយវិការច្រងេងច្រងាងចោទប្រកាន់មកលើលោក សម រង្ស៊ី ថាកំពុងមានទំនាក់ទំនងជាមួយក្រុមជនជាតិភាគតិចម៉ុងតាញ៉ា ឬចារ៉ាយ ដែលរត់ភៀសខ្លួនពីការតាមចាប់របស់ទាហានវៀតណាមនិងរត់មកពួននៅតាមតំបន់ព្រៃភ្នំក្នុងខេត្តមណ្ឌលគិរី និងរតនគិរី។ ក្នុងនោះលោក ហ៊ុន សែន ចោទថាបានចុះហត្ថលេខាប្រគល់ខេត្តចំនួន៤នៅភូមិភាគឦសាន ឱ្យទៅជនជាតិនេះ។
លោក ហ៊ុន សែន៖ «នេះហើយដែលអាមេក្បត់ជាតិបីជំនាន់ចុះហត្ថលេខាជាមួយកុក ស(ជនជាតិភាគតិចម៉ុងតាញ៉ា)គឺពួកដេហ្គា(Dega)ហ្នឹងឯង រដ្ឋដេហ្គា ដែលចុះហត្ថលេខាជាមួយអាក្បត់ជាតិបីជំនាន់ដែលត្រូវតែកាត់ទោស។ រួចហើយខំថាប្រគល់សិទ្ធិជនជាតិភាគតិចឥឡូវជនជាតិភាគតិចនៅកន្លែងណា?មើលពីក្រោយខ្នងរវាងអាកុក ស ជាមួយនឹងអាក្បត់ជាតិ បីជំនាន់មានទង់ជាតិអាមេរិកមួយមានទង់ជាតិខ្មែរមួយ និងទង់ជាតិដេហ្គាមួយ។ អ៊ីចឹងអ្នកឯងកាត់អ្នកឯងតល់ថាម៉េច?កុំថានេះជារឿងនយោបាយឱ្យសោះ។ រឿងក្បត់ជាតិពេញទី»។
ទាក់ទិននឹងការចោទប្រកាន់នេះលោក សម រង្ស៊ី អះអាងថា លោកគ្មានកាត់ទឹកដីខ្មែរឱ្យបរទេសណាមួយដូចរដ្ឋបាលរបស់លោក ហ៊ុន សែន ចោទប្រកាន់នោះឡើយ។ លោកបញ្ជាក់ថា លោកបានជួបមេដឹកនាំជនជាតិដើមភាគតិចលោកកុក ស នៅសហរដ្ឋអាមេរិកកាលពីឆ្នាំ២០១៣នោះគ្រាន់តែទទួលស្គាល់សិទ្ធិជនជាតិដើមភាគតិចប៉ុណ្ណោះ។ ទោះបីជាលោក សម រង្ស៊ី អះអាងបែបនេះក្ដីក៏តុលាការក្រោមការបញ្ជារបស់លោក ហ៊ុន សែននៅខែតុលា ឆ្នាំ២០២២ បានប្រកាសសាលក្រមផ្ដន្ទាទោសឱ្យលោក សម រង្ស៊ី ជាប់ពន្ធនាគារអស់មួយជីវិត និងដកសិទ្ធិធ្វើនយោបាយជាស្ថាពរពីបទ«ប្រគល់ឱ្យរដ្ឋបរទេស»។ ក្រៅពីដកសិទ្ធិធ្វើនយោបាយហើយតុលាការក្រុងភ្នំពេញបានចេញដីកាបង្គាប់ឱ្យចាប់ខ្លួនលោក សម រង្ស៊ី ហើយចាត់ទុកការប្រកាសសាលក្រមនេះនៅចំពោះមុខជនជាប់ចោទ។
ជុំវិញរឿងនេះប្រធានក្រុមប្រឹក្សាឃ្លាំមើលកម្ពុជានៅប្រទេសន័រវែស (Norway)លោក ម៉ែន ណាត យល់ឃើញថា ការចោទប្រកាន់របស់លោក ហ៊ុន សែន មកលើលោក សម រង្ស៊ី គឺជាអាការៈនៃជំងឺខ្លាចលទ្ធិប្រជាធិបតេយ្យ ដែលតែងតែកើតមានលើមេដឹកនាំដែលគ្រប់គ្រងប្រទេសតាមបែបផ្ដាច់ការ។ លោកលើកឡើងថា លទ្ធផលបោះឆ្នោតកាលពីឆ្នាំ២០១៧ដែលគណបក្សកាន់អំណាចរបូតអាសនៈក្រុមប្រឹក្សាឃុំសង្កាត់អស់ជាច្រើនទៅគណបក្សប្រឆាំងគឺជាមេរៀនមួយដែលតាមបន្លាចឱ្យលោក ហ៊ុន សែន ខ្លាចស្រមោលលោក សម រង្ស៊ី។
លោក ម៉ែន ណាត៖ «បើថាជ្រុលជាលេងល្ខោនលេងឱ្យវាល្អមើលទៅកុំឱ្យតែលេងល្ខោនមិនសមហេតុផល ហើយដើរចោទប្រកាន់គេអ្នកដទៃ។ ហើយអ្នកដទៃគេមិនដឹងរឿងអីផងហើយគាត់លេងតែម្នាក់គាត់គាត់ចោទគេចោទឯងអ៊ីចឹងវាមិនសមហេតុសមផលយើងគិតមើលទៅហើយកៀកនឹងការបោះឆ្នោតផងហ្នឹង»។
ការទម្លាក់កំហុសចោទប្រកាន់ និងការគំរាមប្រើអាវុធជាយុទ្ធសាស្ត្រដែលលោក ហ៊ុន សែន កំពុងប្រើប្រាស់ក្នុងការរារាំងដំណើររបស់លោក សម រង្ស៊ី មិនឱ្យវិលត្រឡប់មកជាន់ទឹកដីកម្ពុជាវិញ ខណៈលោកធ្លាប់អះអាងថា នឹងស្វាគមន៍មេដឹកនាំប្រឆាំងរូបនេះដោយគុក និងខ្នោះដៃ។ ក្រៅពីកែច្បាប់ដើម្បីបិទផ្លូវនយោបាយលោក សម រង្ស៊ី លោក ហ៊ុន សែន ដែលជាប់ឈ្មោះថា ជាបុរសខ្លាំងកម្ពុជាបានបង្ហាញការប្ដេជ្ញាយ៉ាងដាច់អហង្ការថា នឹងមិនឱ្យលោក សម រង្ស៊ី ចូលមកលើទឹកដីខ្មែរឡើយ ហើយលោកបានគំរាមប្រើអាវុធយុទ្ធភណ្ឌសល់ពីសង្គ្រាមគឺ BM-21បាញ់កម្ទេចលោក សម រង្ស៊ី ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។