ព្រះសង្ឃរិះគន់ថា លោក ហ៊ុន សែន មិនស័ក្ដិសមនឹងទទួលបានការផ្ដល់គោរមងារផ្នែកព្រះពុទ្ធសាសនាឡើយ ព្រោះលោកជាមេដឹកនាំ និងជាអ្នកនយោបាយ ចូលចិត្តប្រើប្រាស់អំពើហិង្សាទាំងផ្លូវកាយនិងចិត្ត បង្កការឈឺចាប់ដល់អ្នកដទៃ ក្នុងនោះមានទាំងការធ្វើទុក្ខបុកម្នេញជារឿយៗ លើព្រះសង្ឃ ដែលមិនស្របតាមការដឹកនាំរបស់លោក។ ការរិះគន់នេះបានធ្វើឡើង បន្ទាប់ពីអង្គការអន្តរជាតិមួយគ្រោងផ្ដល់គោរមងារអ្នកការពារព្រះពុទ្ធសាសនាឱ្យលោក ហ៊ុន សែន។
ព្រះសង្ឃលើកឡើងថា លោក ហ៊ុន សែន មិនសូវយកចិត្តទុកដាក់លើកកម្ពស់វិស័យព្រះពុទ្ធសាសនាឡើយ ព្រោះលោកមិនអនុញ្ញាតព្រះសង្ឃដើរតាមលំអានព្រះពុទ្ធឱ្យបានត្រឹមត្រូវ និងតែងដាក់គំនាបព្រះសង្ឃឱ្យគាំទ្រ ឬដើរតាមការដឹកនាំរបស់លោក ជាពិសេស ព្រះសង្ឃខ្លះរងការធ្វើទុក្ខបុកម្នេញ ការធ្វើបាបរាងកាយ និងការគំរាមកំហែងបណ្ដេញចេញពីវត្ត ឬចាប់ផ្សឹក និងរងការជេរប្រមាថពាក្យសម្ដីអាក្រក់ៗ ដោយមិនញញើតមាត់ពីលោក ហ៊ុន សែន។
ព្រះសង្ឃភៀសព្រះកាយនៅប្រទេសស្វីស ព្រះតេជព្រះគុណ បូរ បេត មានថេរដីកាប្រាប់អាស៊ីសេរីនៅថ្ងៃទី២២ មេសា ថា លោក ហ៊ុន សែន មិនស័ក្ដិសមទទួលគោរមងារជាអ្នកគាំទ្រព្រះពុទ្ធសាសនាឡើយ។ ព្រះអង្គបន្តថា ស្ថិតក្រោមការគ្រប់គ្រងជិត ៤០ឆ្នាំនេះ លោក ហ៊ុន សែន បង្កការឈឺចាប់រាប់មិនអស់ទាំងព្រះសង្ឃនិងគ្រហស្ថ ដែលសកម្មក្នុងការលើកកម្ពស់សិទ្ធិមនុស្ស លទ្ធិប្រជាធិបតេយ្យ ការពារបរិស្ថាន និងវិស័យព្រះពុទ្ធសាសនា។ ព្រះអង្គថា រួមមានការបាញ់សម្លាប់ព្រះតេជព្រះគុណ សំ ប៊ុនធឿន មេសហជីពកម្មករលោក ជា វិជ្ជា សកម្មជនការពារព្រៃឈើលោក ឈុត វុទ្ធី និងលោកបណ្ឌិត កែម ឡី ជាពិសេសការបន្តចាប់ចងអ្នកនយោបាយប្រឆាំងទាំងអយុត្តិធម៌ ដែលកំពុងនាំឲ្យពួកគេបែកបាក់ព្រាត់ប្រាសនិរាសគ្រួសារ
ព្រះតេជព្រះគុណ បូរ បេត៖«ព្រះពុទ្ធតែងអប់រំទូន្មានប្រៀនប្រដៅសត្វលោកហ្នឹង ឱ្យអប់រំចិត្តខ្លួនឯងឱ្យបរិសុទ្ធឱ្យស្អាត មិនឱ្យប្រើអំពើហិង្សា មិនឱ្យឃោរឃៅ ជាពិសេសចំពោះពុទ្ធបរិស័ទ ឧបាសក ឧបាសិកា ឱ្យរក្សាសីល៥។ រក្សាសីល៥ហ្នឹង គឺហាមផ្ដាច់មិនឱ្យបៀតបៀនសត្វដទៃ មិនឱ្យសម្លាប់ មិនឱ្យមូលបង្កាច់ មិនឱ្យធ្វើទុក្ខបុកម្នេញដល់ជនស្លូតត្រង់»។
ប្រតិកម្មរបស់ព្រះអង្គបានធ្វើឡើង បន្ទាប់ពីអង្គការពុទ្ធសាសនិកពិភពលោក (World Fellowships of Buddhists) មានមូលដ្ឋាននៅក្នុងប្រទេសថៃ គ្រោងនឹងផ្ដល់គោរមងារ«ពុទ្ធមាមកាភិបាលនៃអង្គការពុទ្ធសាសនិកពិភពលោក(Patron of WFB) ឬអាចហៅថា គោរមងារអ្នកការពារព្រះពុទ្ធសាសនា ដល់លោក ហ៊ុន សែន ហើយកូនប្រុសរបស់លោក គឺលោក ហ៊ុន ម៉ាណែត នឹងទទួលបានគោរមងារទីប្រឹក្សាជាន់ខ្ពស់របស់អង្គការនេះ។ នេះបើតាមការចុះផ្សាយពីបណ្ដាញសារព័ត៌មានក្នុងស្រុក ដែលដកស្រង់សម្ដីអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិលោក ឈិន កេតនា។ ពិធីប្រគល់គោរមងារនេះ នឹងធ្វើនៅរមណីយដ្ឋានវត្តភ្នំ នៅថ្ងៃទី២ឧសភា។
ព្រះតេជព្រះគុណ បូរ បេត មានថេរដីកាទៀតថា អ្នកស័ក្ដិសមគួរទទួលបានគោរមងារនេះ ត្រូវតែមានមេត្តាធម៌និងគុណធម៌ខ្ពស់ តាមលំអានព្រះពុទ្ធ និងត្រូវរក្សាសីលឱ្យបានខ្ជាប់ខ្ជួន មិនកាប់សម្លាប់បៀតបៀន ឬធ្វើបាបបង្កការឈឺចាប់ដល់អ្នកដទៃ ដើម្បីធ្វើជាគំរូពុទ្ធសាសនិកល្អនៅក្នុងសង្គម។
ជុំវិញបញ្ហានេះ វិទ្យុអាស៊ីសេរីមិនអាចសុំការបញ្ជាក់បន្ថែមពីអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិលោក ឈិន កេតនា ដោយសារអ្នកលើកទូរស័ព្ទបានអះអាងថា ជាជំនួយការរបស់លោក។ ជាមួយគ្នានេះ ប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន និងមន្ត្រីនាំពាក្យគណបក្សប្រជាជនកម្ពុជាលោក សុខ ឥសាន ក៏ពុំបានទទួលទូរស័ព្ទ។
ទោះជាយ៉ាងណាក៏ដោយកាលអំឡុងឆ្នាំ២០១៣ មុនការបោះឆ្នោតជ្រើសតាំងតំណាងរាស្ត្រលោក ហ៊ុន សែន ធ្លាប់បានព្រមានឈប់ធ្វើបុណ្យ ប្រសិនបើគណបក្សប្រជាជនកម្ពុជា ចាញ់ការបោះឆ្នោត។ ការណ៍នេះហាក់បញ្ជាក់ថា លោក ហ៊ុន សែន គ្មានចិត្តជ្រះថ្លាពិតប្រាកដក្នុងការធ្វើបុណ្យ ឬជួយការពារព្រះពុទ្ធសាសនាឡើយ។
លោក ហ៊ុន សែន៖«ចាញ់ឆ្នោតហើយ ចាំតែធ្វើកថិនឱ្យព្រះតេជព្រះគុណ និយាយឱ្យត្រង់ៗ ជាមួយគ្នា។ អ្នកណាទៅធ្វើកថិនអីទៀត ធ្វើបុណ្យសឹងងាប់ ហើយអាពួកវាអត់ធ្វើអីសោះ បែរជាឈ្នះឆ្នោត។ អើ!ទៅពឹងអ្នកណុងហែកថិនទៅវ៉ី ឃើញពួកហ្នឹង ហែកថិនពីអង្កាល់។ បានសេចក្ដីថា គណបក្សប្រជាជននឹងឈប់ធ្វើបុណ្យ»។
ក្រៅពីការព្រមានឈប់ធ្វើបុណ្យ លោក ហ៊ុន សែន ក៏មិនដែលញញើតមាត់ជេរប្រមាថព្រះសង្ឃជាសាធារណៈនោះដែរ។ ជាក់ស្ដែងកាលពីពេលថ្មីៗ នេះ លោកបានជេរប្រមាថជាថ្មីទៀត និងប្រកាសតាមចងពៀរព្រះតេជព្រះគុណ ប៊ុត ប៊ុនតិញ ខណៈព្រះអង្គបានឆ្លើយតបវិញថា មូលហេតុលោក ហ៊ុន សែន តាមចង់ពៀរព្រះអង្គបែបនេះ ដោយសារលោក ហ៊ុន សែន បរាជ័យក្នុងការព្យាយាមដាក់គំនាបព្រះអង្គឱ្យដើរគោលនយោបាយរបស់លោក។
លោក ហ៊ុន សែន៖«ឥឡូវ បើចេញមកសុំទោស អាហ្នឹង អូខេ បានអញហៅព្រះតេជព្រះគុណ ឱ្យតែអ្ហែង អាខ្មៅចេញមកសុំទោស អ្ហែងខូច។ បើអ្ហែង កាលណា អ្ហែងមិនព្រមសារភាពអារឿង ១០ម៉ឺនដុល្លារ ថា ហ៊ុន សែន ផ្ញើឱ្យ ជែម សុខ ឬ សុខ សុគុន ទេ អ្ហែងកុំសង្ឃឹមថា អញឈប់រករឿងអ្ហែង អញតាមរករឿងអ្ហែងរហូត។ អញងាប់ទៅឋានក្រោមហើយ អញតាមរករឿងអ្ហែងរហូតទៀត»។
ជុំវិញគម្រោងផ្ដល់គោរមងារដល់លោក ហ៊ុន សែន នេះ ព្រះតេជព្រះគុណ លួន សុវ៉ាត ម្ចាស់ពានរង្វាន់ការពារសិទ្ធិមនុស្សអន្តរជាតិ នៅទីក្រុងហ្សឺណែវ កាលពីឆ្នាំ២០១២ មានថេរដីកាដែរថា បើតាមចរិតលក្ខណៈ និងការអនុវត្តជាក់ស្ដែង លោក ហ៊ុន សែន មិនស័ក្ដិសមទទួលបានគោរមងារជាអ្នកការពារ និងថែរក្សាព្រះពុទ្ធសាសនាឡើយ ព្រោះលោកមិនដែលយកធម៌អហិង្សា និងធម៌សន្តិភាពដែលមានសីលធម៌ជាគោល មកអនុវត្តនៅក្នុងខ្លួនឱ្យបានខ្ជាប់ខ្ជួន។
ព្រះតេជព្រះគុណ លួន សុវ៉ាត៖ «ហើយពេលខ្លះ គាត់ទៅជេរប្រមាថកាតទានដល់ព្រះសង្ឃ ដែលជាអ្នកមានសីល ដែលជាអ្នកបួសក្នុងព្រះពុទ្ធសាសនាទៅទៀត។ អ៊ីចឹង!វាអស់ត្រឹមការជេរប្រមាថកាតទានព្រះសង្ឃ ដែលមានសីល ព្រះសង្ឃជាអ្នកបួសហ្នឹង អាហ្នឹង មិនមែនជាពុទ្ធសាសនិកជន ដែលយកព្រះពុទ្ធ ព្រះធម៌ ព្រះសង្ឃ ជាទីពឹងទីរឭកទេ»។
ព្រះអង្គលើកឡើងទៀតថា ប្រហែលលោក ហ៊ុន សែន ចំណាយលុយបរិច្ចាគ ជាថ្នូរទទួលបានការផ្ដល់គោរមងារពីខាងសាសនា ដើម្បីបញ្ជាក់ថា លោកជាអ្នកគោរពតាមគោលការណ៍ធម៌ព្រះពុទ្ធ ធ្វើជានយោបាយបោកប្រាស់ពលរដ្ឋ សម្រាប់ស្វែងរកការគាំទ្ររបបដឹកនាំតវង្សត្រកូលរបស់លោកតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។