គណបក្សកម្លាំងជាតិត្រៀមធ្វើបាតុកម្ម នៅទីលានប្រជាធិបតេយ្យ ដើម្បីទាមទារឱ្យដោះលែង សមាជិកបក្សចំនួន ២នាក់ ដែលត្រូវបានអាជ្ញាធរចាប់ខ្លួនកាលពីពេលថ្មីៗ នេះ។ ពួកគេថា ការចាប់ខ្លួននេះ ជារឿងអយុត្តិធម៌ ដែលមានចេតនារឹតត្បិតលើគណបក្សប្រឆាំង។
អ្នកគាំទ្រ និងសមាជិកគណបក្សកម្លាំងជាតិ ១៥០នាក់ ត្រៀមធ្វើបាតុកម្ម ដើម្បីទាមទារឱ្យដោះលែងសមាជិកបក្ស នៅទីលានប្រជាធិបតេយ្យ រាជធានីភ្នំពេញ។ ការជួបជុំសម្ដែងមតិនេះ នឹងធ្វើឡើង រយៈពេលបីថ្ងៃ ចាប់ពីថ្ងៃទី២២ ដល់ ថ្ងៃទី២៤ ខែមេសា។
អ្នកនាំពាក្យគណបក្សកម្លាំងជាតិ លោក ជា មុនី ប្រាប់វិទ្យុអាស៊ីសេរី នៅថ្ងៃទី៣ ខែមេសាថា អ្នកគាំទ្រ និងសមាជិកគណបក្សកម្លាំងជាតិរាប់រយនាក់ មកពីបណ្ដាខេត្ត និងរាជធានីភ្នំពេញ នឹងជួបជុំគ្នាសម្ដែងមតិ នៅទីលានប្រជាធិបតេយ្យ ដើម្បីស្នើសុំរដ្ឋាភិបាល ឱ្យដោះលែងសមាជិកបក្ស គឺលោក អ៊ំ វីរៈរដ្ឋ និង លោក គា វិសាល ដែលត្រូវបានអាជ្ញាធរឃាត់ខ្លួនដាក់ពន្ធនាគារ ពីបទ «ញុះញង់» និង «រួមគំនិតក្បត់»។
អ្នកនាំពាក្យរូបនេះអះអាងថា ការចាប់ខ្លួនលោក អ៊ំ វីរៈរដ្ឋ និងលោក គា វិសាល គឺជារឿងអយុត្តិធម៌។ លោកបន្តថា ការចាប់ខ្លួននេះ គឺជានយោបាយជាជាងការអនុវត្តច្បាប់។ លោកបញ្ជាក់ថា គណបក្សកម្លាំងជាតិមិនឈរមើលភាពអយុត្តិធម៌ ដែលកំពុងកើតឡើងនោះទេ ហើយលោកស្នើឱ្យរដ្ឋាភិបាលគួរតែបញ្ឈប់ការទុក្ខបុកម្នេញមកលើបក្សប្រឆាំង ព្រោះមិនចំណេញដល់សង្គមជាតិនោះឡើយ។
លោក ជា មុនី៖«ស្ថានភាពនយោបាយ នៅកម្ពុជាមានការរឹតត្បិត មិនមែនតែគណបក្ស នយោបាយទេ សូម្បីតែប្រជាពលរដ្ឋ និងសង្គមស៊ីវិលណាមួយ ដែលរិះគន់រដ្ឋាភិបាល ពីភាពអសកម្ម ក៏ត្រូវបានគេចាប់ចោទ តាមតែការនឹកឃើញ។ អ៊ីចឹងការចាប់ចោទ រយៈពេលកន្លងមកហ្នឹង គឺវាអត់ត្រឹមត្រូវ អត់ត្រឹមត្រូវត្រង់ថា បើអ្នកណាគាំទ្រ បក្សប្រឆាំង ហើយទៅគាំទ្របក្សកាន់អំណាចទៅ អ្នកនោះឯង បានរួចខ្លួន ហើយមានតួនាទី មានបុណ្យស័ក្ដិទៀត»។
កាលពីថ្ងៃទី៣០ មីនា សមត្ថកិច្ចខេត្តកំពង់ស្ពឺ បានឃាត់ខ្លួនបេក្ខជនព្រឹទ្ធសភាលេខរៀងទី១ គឺលោក អ៊ំ វីរៈរដ្ឋ ដែលមានតួនាទីជាអគ្គហេរញ្ញិករបស់គណបក្សកម្លាំងជាតិ អំឡុងពេលលោកធ្វើដំណើរចេញពីកន្លែងដាក់កម្រងផ្ការំលឹកខួប នៃព្រឹត្តិការណ៍គប់គ្រាប់បែកលើក្រុមបាតុករអហិង្សានៅមុខរដ្ឋសភាចាស់។ ការឃាត់ខ្លួននេះ គឺពាក់ព័ន្ធបទចោទ «រួមគំនិតក្បត់»។
ចំណែកលោក មឺ សេងហ៊ ហៅ គា វិសាល ក៏ត្រូវបានអាជ្ញាធរខេត្តកំពង់ចាម ឡោមព័ទ្ធចាប់ខ្លួនដាក់ពន្ធនាគារ កាលពីថ្ងៃទី១៥ ខែមីនា ចោទពីបទ «ញុះញង់បង្កឱ្យមានការរើសអើង និងបរិហារកេរ្តិ៍ជាសាធារណៈ»។ លោក គា វិសាល គឺជាអនុប្រធានក្រុមការងារបណ្ដោះអាសន្នរបស់គណបក្សកម្លាំងជាតិ និងជាបេក្ខជនក្រុមប្រឹក្សាខេត្ត កំពង់ចាម លេខរៀងទី១ របស់គណបក្សកម្លាំងជាតិ។
ការចាប់ខ្លួនអ្នកទាំងពីរនេះ ធ្វើឡើងនៅមុនការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ខិតជិតមកដល់។ មន្ត្រីសង្គមស៊ីវិល និងអ្នកវិភាគនយោបាយវាយតម្លៃករណីនេះថា ជាការរឹតត្បិតផ្នែកនយោបាយពីបក្សកាន់អំណាច ដែលតែងតែធ្វើឡើងជាញឹកញាប់ លើមន្ត្រីបក្សប្រឆាំង។
វិទ្យុអាស៊ីសេរី ពុំអាចទាក់ទងអភិបាលរាជធានីភ្នំពេញ លោក ឃួង ស្រេង ដើម្បីឆ្លើយតបការស្នើសុំធ្វើបាតុកម្មរបស់គណៈកម្លាំងជាតិបានទេ នៅថ្ងៃទី៣ ខែមេសា។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADO) លោក អំ សំអាត លើកឡើងថា ការជួបជុំសម្ដែងមតិរបស់គណៈបក្សនយោបាយ និងប្រជាពលរដ្ឋ គឺជាសិទ្ធិសេរីភាព ដែលមានចែងដោយច្បាប់។
លោកបន្ថែមថា ករណីចាប់ខ្លួន និងចោទប្រកាន់លើសកម្មជនគណបក្សប្រឆាំង តែងតែកើតឡើងនៅពេលជិតមានការបោះឆ្នោត ដែលធ្វើឱ្យសហគមន៍ជាតិ និងអន្តរជាតិរិះគន់អំពីស្ថានភាពនយោបាយនៅកម្ពុជាធ្លាក់ចុះ និងកាន់តែអាប់អួ។
លោក អំ សំអាត៖ «យើងជាអង្គការសង្គមស៊ីវិលដែលធ្វើការផ្នែក ទាំងអស់ហ្នឹងមិនចង់ឃើញកម្ពុជាមានបរិយាកាសនយោបាយអាប់អួ ឬមានការរិះគន់សហគមន៍អន្តរជាតិទេ នៅពេលដែលមានការបោះឆ្នោតម្ដងៗ យើងចង់ឃើញស្ថានភាពនយោបាយនៅមុនការបោះឆ្នោតមានបរិយាកាសល្អ យើងនៅតែទទូចសូមឱ្យអ្នកនយោបាយទាំងអស់តម្កល់នូវឧត្ដមប្រយោជន៍ជាតិ និងពលរដ្ឋជាធំ»។
មន្ត្រីគណបក្សកម្លាំងជាតិ រំពឹងថា អាជ្ញាធររាជធានីភ្នំពេញ នឹងជួយសម្រួលឱ្យពួកលោកជួបជុំសម្ដែងមតិដោយសេរី ហើយដោះលែងសមាជិកបក្សទាំង ២នាក់ ឱ្យមានសេរីភាពឡើងវិញ ដោយឥតលក្ខខ័ណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។