ក្រុមប្រឹក្សាជំនុំជម្រះនៃគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី២ ខែមេសា ម្សិលមិញ បានសម្រេចតម្កល់សេចក្តីសម្រេចបដិសេធ ការសុំចុះបញ្ជីបេក្ខជនឈរឈ្មោះបោះឆ្នោតរបស់គណបក្សភ្លើងទៀន នៅសង្កាត់អូរឫស្សីទី២ ខណ្ឌ៧មករា រាជធានីភ្នំពេញ។
លោក ប្រាជ្ញ ចន្ទ ប្រធាន គ.ជ.ប និងជាប្រធានក្រុមប្រឹក្សាជំនុំជម្រះ ដែលមានសមាសភាព៩រូប បានសម្រេចក្នុងសវនាការ កាលពីថ្ងៃ២ ខែមេសា ឲ្យដើមបណ្ដឹងឈ្មោះ ស ឡុងដេត តំណាងគណបក្សភ្លើងទៀន ដែលបានប្តឹងតវ៉ាទៅនឹងសេចក្តីសម្រេចរបស់ គណៈកម្មការរៀបចំការបោះឆ្នោតរាជធានីភ្នំពេញ ដោយបដិសេធការសុំចុះបញ្ជីបេក្ខជនឈរឈ្មោះបោះឆ្នោតរបស់គណបក្សភ្លើងទៀន នៅសង្កាត់អូរឫស្សីទី២។ ក្រុមប្រឹក្សាជំនុំជម្រះ គ.ជ.ប អះអាងថា នេះជាសេចក្ដីសម្រេចស្ថាពរបិទផ្លូវតវ៉ា។
ពាក់ព័ន្ធនឹងការបន្តលុបឈ្មោះបេក្ខជន និងលុបបញ្ជីឈ្មោះបេក្ខជន នៅតាមបណ្ដាឃុំសង្កាត់នេះ មន្ត្រីគណបក្សនយោបាយមួយចំនួន ចោទប្រកាន់ថា ទង្វើទាំងនេះអាចជាយុទ្ធសាស្ត្រជាប្រព័ន្ធ របស់គណៈកម្មាធិការជាតិរៀបចំការបោះឆ្នោតដែលបានរួមគំនិតជាមួយអាជ្ញាធរមូលដ្ឋាន ដើម្បីបំភិតបំភ័យដល់បេក្ខជនឈរឈ្មោះរបស់គណបក្សផ្សេង ក្រៅពីគណបក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។