ក្រោយការបោះឆ្នោតដ៏ចម្រូងចម្រាសនៅកម្ពុជា ដែលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ប្រកាសថា ទទួលបានជ័យជម្នះយ៉ាងត្រចះត្រចង់ ដល់ទៅ ១២៥អាសនៈ ខណៈដែលគ្មានគូប្រជែងពិតប្រាកដ គ្មានឡើយពាក្យពេចន៍ ឬសារអបអរសាទរពីក្រុមប្រទេសលោកខាងលិច។ ផ្ទុយទៅវិញ សេចក្ដីថ្លែងការណ៍ថ្កោលទោស និងសម្ដែងក្តីបារម្ភជុំវិញលទ្ធផលនៃការបោះឆ្នោតនេះ បន្តធ្លាក់មកជាហូរហែជុំទិស ធ្វើជាកាដូឲ្យគណបក្សឈ្នះឆ្នោត ដែលត្រូវសហគមន៍អន្តរជាតិ ចាត់ទុកថា ជាការបោះឆ្នោត «ក្លែងក្លាយ» នេះ។
ក្រៅពីសហរដ្ឋអាមេរិក សហភាពអឺរ៉ុប ប្រទេសអូស្ត្រាលី និងកាណាដា នៅក្រោយការបោះឆ្នោតដ៏ចម្រូងចម្រាសនេះ ឥឡូវនេះដល់វេនប្រទេសនូវែលហ្សេឡង់ និងប្រទេសអាល្លឺម៉ង់ នាំគ្នាចេញមកប្រតិកម្មមិនទទួលស្គាល់លទ្ធផលនៃការបោះឆ្នោតនេះ។
ក្នុងសេចក្ដីថ្លែងការណ៍ ចេញផ្សាយថ្ងៃទី៣១ កក្កដា រដ្ឋមន្ត្រីការបរទេសនូវែលហ្សេឡង់ លោក វីនស្តុន ភីធឺរ (Winston Peters) ថ្លែងថា ប្រទេសនូវែលហ្សេឡង់ មានក្តីព្រួយបារម្ភចំពោះការបោះឆ្នោតជាតិនៅកម្ពុជា ដែលគណបក្សប្រឆាំងត្រូវបានផាត់ចេញ។ លោក វីនស្តុន ភីធឺរ ថ្លែងថា ដើម្បីឲ្យប្រទេសកម្ពុជា មានប្រជាធិបតេយ្យស្របច្បាប់មួយបាន ជាការសំខាន់ដែលសំឡេងប្រឆាំង ត្រូវបានគេដឹងឮ និងទទួលស្គាល់។ ប្រទេសនូវែលហ្សេឡង់ អំពាវនាវឲ្យលោកនាយករដ្ឋមន្ត្រី ហ៊ុន សែន អនុញ្ញាតឲ្យគណបក្សប្រឆាំងធំជាងគេ ត្រូវតែអាចចូលរួមក្នុងឆាកនយោបាយឡើងវិញ និងដោះលែងរាល់អ្នកទោសនយោបាយទាំងអស់ រួមទាំងប្រធានគណបក្សនេះ គឺលោក កឹម សុខា ផងដែរ។
សេចក្ដីថ្លែងការណ៍ដដែលនេះបន្តថា នៅមុនពេលឈានទៅរកការបោះឆ្នោតនេះ តុលាការកំពូលនៃប្រទេសកម្ពុជា បានសម្រេចរម្លាយគណបក្សប្រឆាំងធំជាងគេ គឺគណបក្សសង្គ្រោះជាតិ ខណៈប្រធានគណបក្សនេះ គឺលោក កឹម សុខា ត្រូវបានចាប់ដាក់ពន្ធនាគារ។ ដោយគ្មានគណបក្សប្រឆាំងចូលរួម ការបោះឆ្នោតនេះ បណ្ដាលឲ្យគណបក្សកាន់អំណាច អាចដណ្តើមយកជ័យជម្នះដោយភ្លូកទឹកភ្លូកដី។
រដ្ឋមន្ត្រីការបរទេសនូវែលហ្សេឡង់ លោក វីនស្តុន ភីធឺរ ថ្លែងបញ្ចប់ថា ប្រទេសនូវែលហ្សេឡង់ គឺជាដៃគូដ៏យូរអង្វែងរបស់កម្ពុជា ហើយបានចូលរួមចំណែកផ្តល់នូវកិច្ចខិតខំប្រឹងប្រែងជាច្រើន ក្នុងការជួយនាំមកនូវដំណើរការអន្តរកាលឆ្ពោះទៅរកលទ្ធិប្រជាធិបតេយ្យ តាមរយៈអង្គការសហប្រជាជាតិ ដល់ប្រទេសកម្ពុជា កាលពីដើមទសវត្សរ៍ទី៩០។ លោកបន្តថា យើងនឹងនៅតែត្រៀមខ្លួនរួចជាស្រេច ដើម្បីបំពេញការងារជាមួយដៃគូកម្ពុជា ក្នុងការស្តារឡើងវិញនូវស្ថាប័នប្រជាធិបតេយ្យ និងដំណើរការនានា ដើម្បីអនុញ្ញាតឲ្យមានការបោះឆ្នោតដោយសេរី និងត្រឹមត្រូវ។
ដោយឡែករដ្ឋាភិបាលសហព័ន្ធនៃប្រទេសអាល្លឺម៉ង់ តាមរយៈអ្នកនាំពាក្យការិយាល័យកិច្ចការបរទេសរបស់សហព័ន្ធ នៅក្នុងសេចក្ដីថ្លែងការណ៍ចេញផ្សាយកាលពីថ្ងៃទី៣០ ខែកក្កដា ឲ្យដឹងថា រដ្ឋាភិបាលសហព័ន្ធអាល្លឺម៉ង់ បានកត់សម្គាល់ឃើញថា ការបោះឆ្នោតជាតិនៅកម្ពុជានេះ បានប្រព្រឹត្តិទៅដោយសន្តិវិធី។ ក៏ប៉ុន្តែ ការប្រព្រឹត្តិទៅដោយសន្តិវិធីនៅក្នុងថ្ងៃបោះឆ្នោតនេះ មិនមែនមានន័យថា ជាការគ្រប់គ្រាន់សម្រាប់ផ្ដល់ឲ្យនូវភាពស្របច្បាប់ដល់លទ្ធផលនៃការបោះឆ្នោតនេះទេ ដោយសារតែការបោះឆ្នោតនេះ បានធ្វើឡើងខណៈដែលនៅមុនការបោះឆ្នោតនេះ មានការចាប់ខ្លួនមេដឹកនាំគណបក្សប្រឆាំងធំជាងគេ គឺគណបក្សសង្គ្រោះជាតិ លោក កឹម សុខា កាលពីដើមខែកញ្ញា ឆ្នាំ២០១៧ ការរម្លាយគណបក្សប្រឆាំងកាលពីខែវិច្ឆិកា ឆ្នាំ២០១៧ និងការហាមប្រាមមិនឲ្យមន្ត្រីជាន់ខ្ពស់គណបក្សនេះចំនួន ១១៨រូប ចូលរួមក្នុងសកម្មភាពនយោបាយ។
សេចក្ដីថ្លែងការណ៍បន្តថា រដ្ឋាភិបាលសហព័ន្ធអាល្លឺម៉ង់ អំពាវនាវជាបន្ទាន់ដល់ប្រទេសកម្ពុជា ឲ្យត្រលប់មកគោរពគោលការណ៍ប្រជាធិបតេយ្យឡើងវិញ ដូចដែលមានចែងនៅក្នុងរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ហើយរដ្ឋាភិបាលសហព័ន្ធអាល្លឺម៉ង់ មានឆន្ទៈក្នុងការគាំទ្រប្រទេសកម្ពុជា ឲ្យដើរស្របតាមគន្លងនេះ។
សហភាពអឺរ៉ុប ដែលមានប្រទេសសមាជិក ២៨ប្រទេស បញ្ជាក់ជំហរត្រង់ៗថា លទ្ធផលនៃការបោះឆ្នោតនះ មិនអាចជឿទុកចិត្តបានឡើយ និងមិនអាចទទួលយកបានឡើយ ព្រោះការបោះឆ្នោតនេះខ្វះការប្រកួតប្រជែងស្មោះត្រង់ និងត្រឹមត្រូវ ហើយមិនឆ្លុះបញ្ចាំងពីឆន្ទៈរាស្ត្រពិតប្រាកដ។ រីឯសហរដ្ឋអាមេរិក ក្រៅពីការសម្ដែងការខកចិត្តខ្លាំង បច្ចុប្បន្នកំពុងពិចារណាអំពីជំហានបន្ទាប់ទៀតតាមរយៈការពង្រីកបន្ថែមទៀតនូវបម្រាមទិដ្ឋាការ និងការដាក់ទណ្ឌកម្ម តាមគោលដៅផ្សេងៗទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។