អ្នកប្រើ​បណ្ដាញ​ហ្វេសប៊ុក និង​មន្ត្រីសង្គម​ស៊ីវិល​ដាក់​ស៊ុម​រូបថត​រម្លឹក​ថា «កែម ឡី និយាយ​ការពិត»

ដោយ សេក បណ្ឌិត
2021-07-04
Share
អ្នកប្រើ​បណ្ដាញ​ហ្វេសប៊ុក និង​មន្ត្រីសង្គម​ស៊ីវិល​ដាក់​ស៊ុម​រូបថត​រម្លឹក​ថា «កែម ឡី និយាយ​ការពិត» អ្នកលេងហ្វេសប៊ុក (Facebook) ដែលមានភក្តីភាពចំពោះបណ្ឌិត កែម ឡី បានប្តូរប្រូលហ្វាល់ (Profile) ស៊ុបរូប​ថតជាមួយនឹងឃ្លាថា «​កែម ឡី និយាយការពិត»។
រូប៖ Profile Facebook

ស៊ុមរូប​ថត «កែម ឡី និយាយការពិត» ត្រូវបាន​អ្នក​ប្រើប្រាស់​បណ្ដាញ​សង្គម​ហ្វេសប៊ុក​ដែល​គោរព​ស្រលាញ់​វីរៈភាព​បណ្ឌិត កែម ឡី នាំគ្នា​បង្ហោះ​ព្រោងព្រាត​លើ​រូប​ប្រូហ្វាល (Profile) ហ្វេសប៊ុក​របស់​ពួកគេពួកគេ​ក៏​នៅតែ​លើក​ឡើង​ថា​ បណ្ឌិត កែម ឡី មិនទាន់​ទទួល​បាន​យុត្តិធម៌​នៅ​ឡើយទេ​ និង​ជំរុញ​ឱ្យមានការ​ស៊ើបអង្កេត​ដោយ​ឯករាជ្យ ដើម្បី​រកការ​ពិត និង​អ្នកនៅ​ពី​ក្រោយ​ខ្នង​រឿង​ឃាតកម្ម​ដ៏​កក្រើក​មួយនេះ។

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​( IDEA)​លោក វន់ ពៅ ប្រាប់ថា ការ​ដាក់​ស៊ុម​រូបថត​លើ​ហ្វេសប៊ុក​លោកបែប​នេះ​ គឺលោកចង់​បង្ហាញ​ថា លោក​និង​ពលរដ្ឋ​ខ្មែរ​ផ្សេង​ទៀត​មិន​បំភ្លេច​បណ្ឌិត កែម ឡី ឡើយ។ លោករំលឹកថា បណ្ឌិត​កែម ឡី ក្រៅពី​មាន​ទស្សនៈល្អៗ​ហើយ គាត់បាន​ជួយរៀបចំ​ផែនការ​យុទ្ធសាស្ត្រ​ក្នុងការ​ជួយ​កសាង​សមាគម​របស់​លោក​ឱ្យមាន​ជីវិត​ដល់​សព្វ​ថ្ងៃ​នេះ៖ «យើងចង់​បង្ហាញ​ថា ស្មារតី​បណ្ឌិត កែម ឡី នៅ​ជាប់​ជានិច្ច​សម្រាប់​ពលរដ្ឋ​ខ្មែរ​ជា​ពិសេស​អ្នកធ្វើ​កិច្ចការ​សង្គម»

រីឯសកម្មជន​គណបក្ស​សង្គ្រោះជាតិ​លោក វឿង សំណាង លោក​ក៏បាន​ដាក់​ស៊ុមរូបថត កែម ឡី និយាយ​ការ​ពិត​លើ​ហ្វេសប៊ុក​លោក​ដែរ។ លោក​ឱ្យអាស៊ី​ដឹង​ថា លោក កែម ឡី ជា​អ្នក​រួតវាំង​នន​សង្គម​ ដែល​ហ៊ាន​និយាយ​ការពិត​ដើម្បី​ឱ្យ​រាស្ត្រ​ប្រុស​ស្រី​បាន​យល់ពី​បញ្ហា​សង្គម​ដែល​អ្នក​ដទៃ​មិន​ហ៊ាន​និយាយ។  លោករំលឹកថា បណ្ឌិត កែម ឡី ក៏ធ្លាប់​បាន​បណ្ដុះ​គំនិត​ឱ្យ​លោក​ ប្រឹងប្រែង​រៀន​សូត្រ និង​ក្លាហាន ហ៊ានលះបង់​ដើម្បី​ប្រយោជន៍​ជាតិ​ដែរ៖ «អ្នករូតវាំងនន​ឱ្យឃើញ​ច្បាស់​អំពើ​អាក្រក់​នៅក្នុង​ប្រទេស​កម្ពុជា​ជាពិសេស​គឺត្រកូលហ៊ុន»

បណ្ឌិត កែម ឡី ដែលជា​អ្នក​ស្រាវជ្រាវ​ការ​អភិវឌ្ឍ​សង្គម ត្រូវ​បាន​ខ្មាន់​កាំភ្លើង​បាញ់​សម្លាប់​នៅ​ព្រឹក​ថ្ងៃ​ទី​១០ ខែ​កក្កដា ឆ្នាំ​២០១៦ នៅ​ឯ​ស្ដារ​ម៉ាត (Star Mart) ក្នុង​ស្ថានីយ​លក់​ប្រេង​ឥន្ធនៈ​កាល់តិច (Caltex) ក្បែរ​ស្តុបបូកគោ រាជធានីភ្នំពេញ។

រយៈពេល​ប្រាំឆ្នាំ​កន្លងនេះ តុលាការ​នៃ​របប​ក្រុងភ្នំពេញ​រក​ឃើញ​តែ​មនុស្ស​ម្នាក់​គត់ គឺ​ឈ្មោះ អឿត អាង ដែល​ហៅ​ខ្លួនឯង​ថា ជួប សម្លាប់ ក្នុង​រឿង​ឃាតកម្ម​ដ៏​កក្រើក​មួយ​នេះ​។ ទោះជា​យ៉ាង​ណា មហាជន​ទូទៅ​សង្ស័យ​ថា ជួប សម្លាប់ គ្រាន់តែ​ជា​ឃាតក​សិប្បនិម្មិត ហើយគិតថា ឃាតកម្ម​នេះមាន​ការ​រៀបចំផែន​ការនិងពាក់ព័ន្ធ​នឹងមនុស្ស​ច្រើន​នាក់។ អឿត អាង ត្រូវ​បាន​តុលាការ​ផ្ដន្ទាទោស​ដាក់​ពន្ធនាគារ​អស់​មួយ​ជីវិត

ភរិយា​បណ្ឌិត​ កែម ឡី ​អ្នកស្រី ប៊ូ រចនា​ ដែលកំពុង​រស់នៅ​ប្រទេស​អូស្ត្រាលី នៅតែ​ចាត់​ទុក​ឈ្មោះ អឿត អាង គឺជា​ឃាតកសប្បនិមិត្ត

ជុំរិញ​ករណី​នេះ អាស៊ីសេរី​មិន​អាច​សុំការ​បំភ្លឺពី​អ្នក​នាំ​ពាក្យអគ្គស្នងការ​ដ្ឋាន​នគរបាលជាតិ លោក ឆាយ គឹមខឿន អ្នកនាំ​ពាក្យប៉ូលិស​ក្រុង​ភ្នំពេញ លោក សាន សុខសីហា  និង​ប្រធាន​សាលា​ដំបូង​រាជធានីភ្នំពេញ លោក តាំង ស៊ុនឡាយ បាន​ទេនៅថ្ងៃទី០៣ ខែកក្កដា ដោយ​ទូរស័ព្ទ​ចូល​គ្មាន​អ្នក​ទទួល

ទោះយ៉ាងណា អ្នកនាំពាក្យ​គណបក្ស​ប្រជាជន​កម្ពុជាលោក សុខ ឥសាន យល់ថា មតិថា អឿត អាង ជា​ឃាតករ​ក្លែងក្លាយ​នោះ ជាការ​បញ្ចេញមតិ​ឯកជន​ក្រៅ​ផ្លូវការ​ និង​បង្កប់​ដោយ​និន្នាការ​នយោបាយ៖ «ត្រង់គាត់​យល់ឃើញ​យ៉ាងម៉ិច​រឿងគាត់​ ប៉ុន្តែ​តុលាការ​គេ​ធ្វើ​តាម​នីតិវិធី​របស់​គេ​មាន​សក្សី​មានឯកសារ​អីច្បាស់លាស់​ដើម្បីដាក់​បន្ទុក​លើ​ឃាតករ​រួច​ហើយ»

ផ្ទុយពី​ការ​លើកឡើង​នេះ មជ្ឍមណ្ឌល​សិទ្ធិមនុស្ស​កម្ពុជា (CCHR) លើក​ឡើង​ក្នុង​សេចក្តីថ្លែង​ការណ៍​កាល​ពីថ្ងៃទី ០២កក្កដា​ថា បន្ទាប់​ពី​ការ​បាញ់​សម្លាប់​បណ្ឌិត កែម ឡី ការ​ស៊ើបអង្កេត​លើ​ករណី​នេះ មិន​ទាន់​បាន​ពេញ​លេញ និង​ខ្វះតម្លាភាព។ ទន្ទឹម​នឹងនេះ សវនាការ​លើ​សំណុំ​រឿង​នេះ ទទួល​រង​ការ​រិះគន់ថាមិនបាន​អនុលោម​តាម​ការ​ជំនុំជម្រះស្របតាម​ស្តង់ដារ​អន្តរជាតិ​នោះ​ទេ

ដើម្បី​ចូលរួម​រម្លឹក​ខួប៥ ឆ្នាំ​នៃ​ឃាតកម្ម​លើបណ្ឌិត កែម ឡី និង​ឧទ្ទិសការចងចាំ​អំពី​រូបលោក​ផង ​មជ្ឈមណ្ឌល​សិទ្ធិ​មនុស្ស​កម្ពុជា បានរៀបចំ​យុទ្ធនាការ​តាម​ហ្វេសប៊ុក ដោយ​ផ្សព្វ​ផ្សាយសារ​សំខាន់ៗ​របស់​លោក​ជារៀងរាល់​ថ្ងៃ ចាប់ពីថ្ងៃទី០២ ដល់ទី០៧ កក្កដា។ សារ​សម្រាប់​ថ្ងៃដំបូង គឺ «ជូន​ទឹកភ្នែក​របស់​អ្នក​ រួច​បន្ត​ដំណើរ​ទៅមុខទៀត» ឯសារ​សម្រាប់ថ្ងៃទីពីរ គឺ«បើអ្នក​មិន​ធ្វើអ្វីទាល់​តែ​សោះ ​ក៏​គង់​តែ​ទទួល​រងគ្រោះ​ដែរ គ្រាន់​តែ​មិនទាន់​ដល់​វេន​អ្នក​ប៉ុណ្ណោះ» ​ក្រៅពីនេះ មជ្ឈមណ្ឌល​សិទ្ធិមនុស្ស​កម្ពុជា មាន​កម្មវិធីជាច្រើន​ទៀត ដូចជា បង្ហោះ​រូប​ភាព សកម្មភាព​ការងារ​ ជីវប្រវត្តិបណ្ឌិត កែម ​ឡី ធ្វើ​កម្មវិធី​វិទ្យុ និង​ជជែក​តាម​អនឡាញ​ពី​ការ​នឹក​រលឹក និងទាមទារ​យុត្តិធម៌​ជូន​បណ្ឌិត កែម ឡី ជា​ដើម។ យុទ្ធនាការដែល​មាន​សកម្មភាពចម្រុះនេះ នឹង​បន្តជាហូរ​ហែរ​រហូត​ដល់​ចុងខែកក្កដា​នេះ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល