កម្ពុជាមិនទាន់មានស្ថិរភាពនយោបាយ និងអភិបាលកិច្ចល្អ ដើម្បីទាក់ទាញអ្នកជំនួញធំៗទេ
2024.08.15
លោកនាយករដ្ឋមន្ត្រី ហ៊ុន ម៉ាណែត (ស្ដាំ) ជាមួយលោក Daniel J. Kritenbrink ឧបការីរដ្ឋមន្រ្តីការបរទេស អាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក នៅវិមានសន្តិភាព រាជធានីភ្នំពេញ កាលពីទី២៦ កុម្ភៈ ២០២៤។
រូប៖ ហ្វេសប៊ុកលោក ហ៊ុន ម៉ាណែត
អ្នកឃ្លាំមើល និងមន្ត្រីបក្សប្រឆាំងលើកឡើងថា កម្ពុជាពុំទាន់មានស្ថិរភាពនយោបាយ និងមានអភិបាលកិច្ចល្អនៅឡើយសម្រាប់ផ្ដល់ទំនុកចិត្តដល់អ្នកជំនួញដែលមានសក្ដានុពលឱ្យចូលមកបោះវិនិយោគទុននៅកម្ពុជា។ ការលើកឡើងនេះ បន្ទាប់ពីរដ្ឋមន្ត្រីក្រសួងព័ត៌មានលោក នេត្រ ភក្ត្រា អំពាវនាវដល់អ្នកជំនួញចិន និងនៅក្នុងតំបន់អាស៊ាន ចូលមកបោះទុនវិនិយោគនៅកម្ពុជាបន្ថែម ដោយសារលោកអះអាងថា កម្ពុជាមានសន្តិភាព និងស្ថិរភាពផ្នែកនយោបាយពេញលេញសម្រាប់គាំទ្រអ្នកជំនួញបរទេស។
មន្ត្រីគណបក្សប្រឆាំង និងអ្នកឃ្លាំមើលលើកឡើងថា ប្រសិនបើរដ្ឋាភិបាលមានឆន្ទៈស្ដារប្រជាធិបតេយ្យគោរពសិទ្ធិមនុស្ស និងកែប្រែទម្រង់ដឹកនាំប្រទេសប្រកបដោយនីតិរដ្ឋ ក្រុមអ្នកជំនួញធំៗនឹងពិចារណាមករកស៊ីនៅកម្ពុជា ដោយពុំចាំបាច់មន្ត្រីរដ្ឋាភិបាលអំពាវនាវឡើយ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់វិទ្យុអាស៊ីសេរីនៅថ្ងៃទី១៤ ខែសីហា អ្នកវិនិយោគទុនដែលមានសក្ដានុពលជាច្រើននឹងមិនហ៊ានដាក់ទុនវិនិយោគនៅកម្ពុជាឡើយ ក្រៅពីក្រុមហ៊ុន និងអ្នកជំនួញចិនមួយចំនួនដែលមានទំនាក់ទំនងនឹងក្រុមមន្ត្រីរដ្ឋាភិបាលហ៊ានចូលមករកស៊ីនៅកម្ពុជាដែលខ្លះប្រព្រឹត្តអំពើពុករលួយ និងមិនខ្វល់ពីការគោរពសិទ្ធិមនុស្សជាដើម។ ក្រៅពីនេះ លោកសង្កត់ធ្ងន់ថា កម្ពុជាក៏មិនទាន់មានស្ថិរភាពនយោបាយ និងការអនុវត្តច្បាប់ត្រឹមត្រូវ ដើម្បីផ្ដល់ភាពកក់ក្ដៅសម្រាប់អ្នកជំនួញអន្តរជាតិនោះដែរ ខណៈប្រព័ន្ធតុលាការត្រូវបានគេមើលឃើញថា មិនឯករាជ្យ ហើយបទល្មើសឧក្រិដ្ឋកម្មនៅតែបន្តកើនឡើងច្រើន។
លោក អ៊ុំ សំអាន៖ «ដើម្បីទាក់ទាញអ្នកវិនិយោគទុន មកបណ្ដាក់ទុននៅកម្ពុជា រដ្ឋាភិបាលត្រូវតែលុបបំបាត់នូវអំពើពុករលួយ ធ្វើកំណែទម្រង់ប្រព័ន្ធតុលាការឱ្យតុលាការហ្នឹងឯករាជ្យ ព្រោះអ្នកវិនិយោគទុននៅពេលដែលមានរឿងក្ដីក្ដាំអី គេឡើងទៅតុលាការ ហើយតុលាការហ្នឹង មិនមែនជាតុលាការឯករាជ្យ ជាតុលាការពុករលួយប្រាកដជាគេមិនចង់មកបណ្ដាក់ទុននៅកម្ពុជានោះទេ ហើយឈប់ធ្វើទុក្ខបុកម្នេញទៅលើសកម្មជនសង្គម និងសកម្មជននយោបាយជាដើម អាហ្នឹងបានអាចទាក់ទាញអ្នកវិនិយោគទុនមកកម្ពុជាបាន»។
ការលើកឡើងរបស់មន្ត្រីបក្សប្រឆាំងបែបនេះ បន្ទាប់ពីរដ្ឋមន្ត្រីក្រសួងព័ត៌មានលោក នេត្រ ភក្ត្រា អំពាវនាវឱ្យអ្នកវិនិយោគចិន និងនៅក្នុងតំបន់អាស៊ានបន្តចូលមកដាក់ទុនវិនិយោគនៅកម្ពុជា។
ថ្លែងក្នុងសិក្ខាសាលាស្ដីពីការលើកកម្ពស់ពាណិជ្ជកម្ម និងការវិនិយោគអាស៊ាន-ចិន ក្នុងខេត្តសាន់ស៊ី (Shanxi) នៃប្រទេសចិន កាលពីថ្ងៃទី១២ ខែសីហា លោក នេត្រ ភក្ត្រា អះអាងប្រាប់អ្នកវិនិយោគក្នុងប្រទេសចិន និងតំបន់អាស៊ានថា កម្ពុជាមានសន្តិភាព ស្ថិរភាពនយោបាយ និងមានកម្លាំងពលកម្មសកម្មជាង ៦០ភាគរយ ដែលអាចធានាដល់ក្រុមហ៊ុន ឬអ្នកវិនិយោគិនណាដែលមានបំណងមកបណ្ដាក់ទុនរកស៊ីនៅកម្ពុជា។
យោងតាមលោក នេត្រ ភក្ត្រា កាលពីឆ្នាំ២០២៣ ប្រទេសចិនកុម្មុយនិស្តបានបញ្ជូនអ្នកវិនិយោគិនមកបណ្ដាក់ទុននៅកម្ពុជាច្រើនជាងគេដែលបានតម្លៃសរុបប្រមាណ ៣,៧ប៊ីលានដុល្លារអាមេរិក។ ដោយឡែក រយៈពេល ៦ខែ ដើមឆ្នាំ២០២៤ នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគជិត ២រយគម្រោង (១៩០គម្រោង) ដែលមានទំហំទឹកប្រាក់ប្រមាណ ២ពាន់ ២រយលានដុល្លារ។ ក្នុងនោះអ្នកវិនិយោគិនចិនឈរនៅលំដាប់ទី១ ដែលបានបណ្ដាក់ទុនវិនិយោគប្រមាណ ៦៨,០៦ ភាគរយ នៃទុនវិនិយោគសរុប។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី មានប្រសាសន៍ថា រដ្ឋាភិបាលពុំទាន់បានដោះស្រាយបញ្ហាដែលកំពុងជាប់គាំងដូចជា លុបបំបាត់អំពើពុករលួយ និងទប់ស្កាត់បទល្មើសឧក្រិដ្ឋកម្ម ដើម្បីធានាដល់អ្នកវិនិយោគអន្តរជាតិចម្រុះជាតិសាសន៍ចូលមកបណ្ដាក់ទុននៅកម្ពុជាឱ្យបានទូលំទូលាយនៅឡើយ។
លោក សេង វណ្ណលី៖ «ចំណុចដែលខ្ញុំមើលឃើញថា ពិបាកក្នុងការទាក់ទាញហ្នឹង គឺដោយសារបញ្ហាផ្ទៃក្នុងដូចជាបញ្ហាការលាងលុយកខ្វក់ ឧក្រិដ្ឋកម្មឆ្លងដែន និងសន្តិសុខអ៊ីនធឺណិត (Cyber security) វាជាបញ្ហាដល់ព័ត៌មានអវិជ្ជមានដល់មុខកម្ពុជានៅបរទេស។ ក្រុមហ៊ុនវិនិយោគមួយចំនួនធំ ដែលមានសាខាទូទាំងពិភពលោក មុននឹងវិនិយោគគេអាចនឹងសិក្សាបរិយាកាសពីការវិនិយោគ ក៏ដូចជាបញ្ហាសន្តិសុខជាដើម ក៏ប៉ុន្តែការអំពាវនាវនេះ ខ្ញុំគិតថា ប្រសិនរដ្ឋាភិបាលអាចដោះស្រាយពាក់ព័ន្ធបញ្ហាសន្តិសុខ ការជួញដូរមនុស្ស ក៏ដូចជាការលាងលុយកខ្វក់ ប្រព័ន្ធហិរញ្ញវត្ថុដែលមិនសូវមានព័ត៌មានល្អពីកម្ពុជាហ្នឹងអាចដោះស្រាយបាន ខ្ញុំគិតថា វាជាចំណុចមួយដែលរដ្ឋាភិបាលអាចទាក់ទាញវិនិយោគិនបន្ថែម»។
អ្នកតាមដានការអភិវឌ្ឍសង្គមធ្លាប់ព្រមានថា ការណ៍ដែលកម្ពុជាពឹងផ្អែកអ្នកវិនិយោគចិនតែមួយ នឹងមិនអាចជួយជំរុញសេដ្ឋកិច្ចជាតិឱ្យរីកចម្រើនបានឡើយ ប៉ុន្តែវាអាចបង្កអស្ថិរភាពផ្នែកសេដ្ឋកិច្ចជាតិខ្លួនឯង នៅពេលដែលប្រទេសចិនកំពុងជួបវិបត្តិសេដ្ឋកិច្ចធ្ងន់ធ្ងរ។ ក្រុមឃ្លាំមើលនៅតែជំរុញដល់រដ្ឋាភិបាលឱ្យតម្កល់ប្រយោជន៍ជាតិជាធំ ដោយចាប់ផ្ដើមស្ដារប្រជាធិបតេយ្យ កែលម្អប្រព័ន្ធយុត្តិធម៌ និងលុបបំបាត់ឧក្រិដ្ឋកម្មនានា ដើម្បីកសាងទំនុកចិត្តដល់អ្នកជំនួញអន្តរជាតិ ពិសេសលោកសេរីចូលមកបណ្ដាក់ទុនវិនិយោគនៅកម្ពុជាកាន់តែច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
នយោបាយ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- សមាជិកសភាម៉ាឡេស៊ីជំរុញឱ្យមានសវនាការពិសេស ពាក់ព័ន្ធការនិរទេសពលករខ្មែរពីម៉ាឡេស៊ីទៅកម្ពុជាទាំងបង្ខំ
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង