ស្ថាបនិកគណបក្សបេះដូងជាតិ លោក សៀម ភ្លុក ឱ្យដឹងថា លោកបានដាក់ពាក្យបំពេញបែបបទនិងស្នាមមេដៃអ្នកគាំទ្រគណបក្សលោកជាងបួនពាន់នាក់ (៤.០០០) ទៅក្រសួងមហាផ្ទៃរួចហើយកាលពីថ្ងៃទី១៥ ខែកក្កដា។ លោកថា ពេលនេះលោកនៅរង់ចាំតែការយល់ព្រមពីក្រសួងមហាផ្ទៃសម្រេចចុះបញ្ជីផ្លូវការដើម្បីអាចឱ្យគណបក្សរបស់លោកដំណើរប៉ុណ្ណោះ។ លោក សៀម ភ្លុក សុំមិនទាន់និយាយលម្អិតពីផែនការសកម្មភាពគណបក្សបេះដូងជាតិនៅឡើយទេនៅពេលនេះ៖ «យើងធ្វើសកម្មភាពនយោបាយបានក្រោយពីគណបក្សយើងបានចុះបញ្ជីហើយ ក្នុងដំណាក់កាលយើងសុំសិទ្ធិបង្កើតគណបក្សនេះអត់ទាន់មានសិទ្ធិពេញលេញក្នុងការធ្វើសកម្មភាពនយោបាយទេ»។
ជុំវិញរឿងនេះវិទ្យុអាស៊ីសេរីមិនទាន់អាចសុំការបំភ្លឺពីអ្នកនាំពាក្យក្រសួងមហាផ្ទៃលោក ខៀវ សុភ័គ បានទេនៅថ្ងៃទី២២ ខែកក្កដា ដោយប្រព័ន្ធទូរស័ព្ទរបស់លោកមិនទទួលការហៅចូល។
រីឯអ្នកនាំពាក្យគណបក្សប្រជាជនកម្ពុជាលោក សុខ ឥសាន និយាយថាក្រសួងមហាផ្ទៃត្រូវការពេលវេលាមួយសមរម្យដើម្បីពិនិត្យករណីនេះឱ្យបានច្បាស់មុនឹងសម្រេចផ្ដល់នីតិសម្បទាឱ្យគណបក្សនេះ។លោកឱ្យដឹងថាប្រសិនមេដឹកនាំគណបក្សនេះបានបំពេញបែបបទត្រឹមត្រូវ និងមិនជាប់ទោសទណ្ឌនៅតុលាការប្រហែលក្រសួងមហាផ្ទៃមិនជំទាស់សំណើសុំបើកបក្សថ្មីនោះឡើយ៖ « ខ្ញុំមិនដឹងទេសួរទៅក្រសួងទៅក្រសួងមហាផ្ទៃគេអ្នកពិនិត្យ អ្នកអីសើរើពាក់ព័ន្ធតុលាការ»។
លោក សៀម ប្លុក កាលពីថ្ងៃទី៩ ខែមិថុនា បានដាក់លិខិតទៅក្រសួងមហាផ្ទៃ ដើម្បីសុំបង្កើតគណបក្ស «បេះដូងជាតិ» ដែលហៅកាត់ថា (គ.ប.ជ) ដោយផ្អែកតាមច្បាប់ស្ដីពី ការបង្កើតគណបក្សនយោបាយ។ លោក សៀម ប្លុក ដែលជាអ្នកចូលរួមការងារក្នុងសង្គម និងជាអតីតមន្រ្តីគណបក្សប្រឆាំងធ្លាប់ប្រាប់អាស៊ីសេរីថាគណបក្សលោកមានគម្រោងចូលរួមការបោះឆ្នោតក្រុមប្រឹក្សាឃុំសង្កាត់ឆ្នាំ២០២២ និងការបោះឆ្នោតសកលនៅឆ្នាំ២០២៣ ខាងមុខនេះ។
ពាក់ព័ន្ធនឹងរឿងបង្កើតគណបក្សថ្មីនេះអនុប្រធានប្រតិបត្តិគណបក្សសង្រ្គោះជាតិប្រចាំខេត្តកំពង់ឆ្នាំងដែលកំពុងភៀសខ្លួននៅប្រទេសថៃ លោក ដួង ចន្ត្រា ឱ្យអាស៊ីសេរីដឹងថាអតីតមន្ត្រីនិងសកម្មជនគណបក្សប្រឆាំងដែលទៅចូលរួមបង្កើតគណបក្សបេះដូងជាតិព្រោះអ្នកទាំងនោះយល់ថាគណបក្សសង្រ្គោះជាតិមិនអាចទៅចូលរួមការប្រកួតប្រជែងក្នុងការបោះឆ្នោតឆ្នាំ២០២២និងឆ្នាំ២០០២៣បាន។ទោះយ៉ាងណា មន្រ្តីជាន់ខ្ពស់គណបក្សប្រឆាំងរូបនេះអះអាងថាលោកនៅតែរង់ចាំវត្តមានគណបក្សសង្រ្គោះជាតិ៖ « យើងមានបំណងឆន្ទៈតែមួយគត់ គឺទាមទារឱ្យគណបក្សសង្រ្គោះជាតិដំណើរឡើងវិញ»។
អ្នកជំនាញវិទ្យាសាស្ត្រនយោបាយលោកសាស្ត្រាចារ្យ ឯម សុវណ្ណារ៉ា សង្កេតឃើញថាការបន្តសុំសិទ្ធិធ្វើនយោបាយឬការចេញបើកបក្សថ្មីរបស់អតីតមន្ត្រីបក្សប្រឆាំងស្មើនឹងការបំពេញមុខមាត់ឱ្យរដ្ឋាភិបាលលោក ហ៊ុន សែន លើឆាកអន្តរជាតិ។លោកយល់ថាគណបក្សថ្មីនេះពិបាកក្នុងការស្វែងរកសំឡេងគាំទ្រពីពលរដ្ឋព្រោះការបោះឆ្នោតនាពេលខាងមុខព្រោះពេលវេលាកាន់តែខ្លីការខ្វះមធ្យោបាផ្សព្វផ្សាយការពង្រឹងកម្លាំងនៅមូលដ្ឋានរួមទាំងការធ្វើទុក្ខបុកម្នេញនយោបាយផងនោះ៖ «មិនល្អអីទេចង់និយាយថា ដូចចាក់ទឹកពាងចោលកាប់បំពង់រង់ចាំទឹកភ្លៀងព្រោះចេញទៅបង្កើតបក្សថ្មីបើគ្មានការគាំទ្រពីសកម្មជន ឬក៏គណបក្សសង្គ្រោះជាតិ ឬលោក សម រង្ស៊ី ទេ ពិបាកនឹងទទួលបានសំឡេងគាំទ្រណាស់នៅពេលអនាគត»។
ក្រោយបក្សកាន់អំណាចបានរំលាយគណបក្សសង្រ្គោះជាតិកាលពីឆ្នាំ២០១៧អតីតមន្ត្រីបក្សប្រឆាំងដែលសិទ្ធនឹងលោក សម រង្ស៊ី និងអ្នកស្និទ្ធនឹងលោក កឹម សុខា ជាង២០នាក់បានសិទ្ធិធ្វើនយោបាយហើយអ្នកខ្លះក៏ចេញទៅបក្សបក្សថ្មី ដូចជា៖ គណបក្សខ្មែរស្រឡាញ់ជាតិ គណបក្សកែទម្រង់កម្ពុជា គណបក្សខ្មែរអភិរក្សនិយម គណបក្សឆន្ទៈខ្មែរនិងគណបក្សបេះដូងជាតិ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។