មេដឹកនាំបក្សប្រឆាំង ចោទរដ្ឋាភិបាលលាក់បាំងបញ្ហាបំណុល
2023.02.05
លោក សម រង្ស៊ី ប្រធានស្តីទីគណបក្សសង្គ្រោះជាតិ។
Photo: RFA
មេដឹកនាំបក្សប្រឆាំងចោទប្រកាន់រដ្ឋាភិបាលលោក ហ៊ុន សែន ថា កំពុងលាក់បាំងអំពើពុករលួយ និងទិន្នន័យពិតប្រាកដនៃបំណុលរបស់ជាតិ និងប្រជាពលរដ្ឋដែលបណ្ដាលឱ្យពលរដ្ឋខ្មែរធ្លាក់ទៅក្នុងបន្ទាត់នៃភាពក្រីក្រ។ អ្នកវិភាគសេដ្ឋកិច្ចថា បំណុលសាធារណៈមិនទាន់ធ្លាក់ក្នុងកម្រិតធ្ងន់ធ្ងរតែបំណុលឯកជននៅកម្ពុជាមានកម្រិតខ្ពស់ដែលតម្រូវឱ្យរដ្ឋាភិបាលយកចិត្តទុកដាក់ដោះស្រាយបញ្ហានេះ។
ប្រធានស្តីទីគណបក្សសង្គ្រោះជាតិ លោក សម រង្ស៊ី លើកឡើងថា បញ្ហាបំណុលនៅកម្ពុជា នឹងបង្កជាបញ្ហានៅពេលអនាគត ដោយសាររដ្ឋាភិបាលលោក ហ៊ុន សែន លាក់បាំងពីតួលេខបំណុលសាធារណៈ ដែលបន្ទុកការសងបំណុលទាំងនោះ នឹងធ្លាក់មកលើប្រជាពលរដ្ឋខ្មែរ។
លោក សម រង្ស៊ី ថ្លែងនៅក្នុងទំព័រហ្វេសប៊ុករបស់លោក ដោយចោទប្រកាន់លើរដ្ឋាភិបាលលោក ហ៊ុន សែន ថា បានប្រព្រឹត្តអំពើពុករលួយ តាមរយៈការកិបកេងបំណុលសាធារណៈ។ លោកបន្តថា កម្ពុជាកំពុងមានវិបត្តិបំណុលចំនួនពីរ គឺបំណុលសាធារណៈ ដែលបង្កប់ទៅដោយអំពើពុករលួយតាមរយៈការកិបកេង និងវិបត្តិបំណុលឯកជន ជំពាក់ដោយប្រជាពលរដ្ឋខ្មែរជាច្រើននាក់ កំពុងជាប់ផុងក្នុងបំណុលធនាគារ គ្រឹះស្ថានមីក្រូហិរញ្ញវត្ថុ ដែលបំណុលទាំងនេះមានចំនួនច្រើនជាងប្រាក់ចំណូលប្រចាំឆ្នាំរបស់ប្រជាពលរដ្ឋខ្មែរទៅទៀត៖
«រដ្ឋាភិបាលលោក ហ៊ុន សែន គាត់លាក់បំណុលច្រើនណាស់ បំណុលរបស់រដ្ឋជំពាក់បរទេសគឺច្រើនៗមែនទែន អាហ្នឹងជាវិបត្តិទីមួយ។ ហើយវិបត្តិទីពីរ គឺបំណុលរបស់ប្រជាពលរដ្ឋ គឺបំណុលឯកជន គឺច្រើនលើសគេក្នុងពិភពលោក ដូចខ្ញុំនិយាយអម្បាញ់ម៉ិញ គ្មានពលរដ្ឋណាជំពាក់លុយគេច្រើនជាងគេ ដូចពលរដ្ឋខ្មែរក្រោមរបបហ៊ុន សែន ហ្នឹងទេ»។
ការលើកឡើងរបស់មន្ត្រីអតីតក្រសួងសេដ្ឋកិច្ចរូបនេះ គឺស្របគ្នាទៅនឹងរបាយការណ៍ របស់អង្គការតម្លាភាពកម្ពុជា ចេញផ្សាយកាលពីខែកក្កដា ឆ្នាំ២០២២ថា រដ្ឋាភិបាលកម្ពុជាបានជំពាក់បំណុលបរទេសសរុបជាង ៩ពាន់លានដុល្លារអាមេរិក។ នៅក្នុងនោះកម្ពុជាជំពាក់មហាអំណាចកុម្មុយនីស្តចិនដល់ទៅជាង ៤២ភាគរយ ដែលជាចំនួនខ្ពស់ជាងគេ នៃបំណុលកម្ពុជាបានខ្ចីប្រទេសដទៃទៀត ហើយបំណុលទាំងនេះរដ្ឋាភិបាលកម្ពុជាមានលទ្ធភាពចរចារដោះស្រាយត្រឹមតែក្នុងទំហំ ៦ភាគរយ ប៉ុណ្ណោះ។
វិទ្យុអាស៊ីសេរី មិនអាចទាក់ទងរដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត ដើម្បីសុំការបកស្រាយរឿងនេះបានទេនៅថ្ងៃទី៤ ខែកុម្ភៈ។
ប៉ុន្តែ លោក វង្សី វិស្សុត បានថ្លែងក្នុងវេទិកាសាធារណៈ កាលពីថ្ងៃទី២៥ ខែមករា ថា កម្ពុជានៅបន្តរក្សាស្ថិរភាពនៃការគ្រប់គ្រងបំណុលសាធារណៈបានល្អប្រសើរ ហើយបំណុលដែលកម្ពុជាជំពាក់បរទេសបច្ចុប្បន្ន មានប្រមាណជាង១០ពាន់លានដុល្លារ ឬស្មើនឹង៣៤ភាគរយនៃផលិតផលក្នុងស្រុកសរុប។ បើតាមក្រសួងសេដ្ឋកិច្ច កម្ពុជានៅមិនទាន់ធ្លាក់ទៅក្នុងវិបត្តិបំណុលវ័ណ្ឌកនៅឡើយ ព្រោះកម្ពុជាជាប្រទេសដែលជំពាក់បំណុលបរទេសតិចជាងគេក្នុងចំណោមប្រទេសក្នុងតំបន់អាស៊ាន លើកលែងតែប្រទេសប្រ៊ុយណេ។ លោក វង្សី វិស្សុត អះអាងទៀតថា កម្ពុជាមានបំណុលឯកជនក្នុងប្រព័ន្ធធនាគារចំនួន ៥៦ពាន់លានដុល្លារ (៥៦,១) ឬស្មើ ១៨០ភាគរយនៃផលិតផលក្នុងស្រុកសរុប (GDP)។ លោកថា អត្រានេះ គឺជាតួលេខមួយខ្ពស់ជាងធម្មតាសម្រាប់ការកំណត់ក្នុងប្រទេសកំពុងអភិវឌ្ឍដូចកម្ពុជា ដែលត្រូវមានបំណុលវិស័យឯកជនក្នុងប្រព័ន្ធធនាគារប្រមាណ ៧០ភាគរយនៃGDP។
ទោះជាយ៉ាងនេះ អ្នកតាមដានសេដ្ឋកិច្ចនៅតែព្រមានថា បើកម្ពុជារកបាន ៧០ ហើយចាយ ១០០ នោះបំណុលបរទេសដែលរដ្ឋាភិបាលជំពាក់នឹងបន្តកើនឡើងជារៀងរាល់ឆ្នាំ ស្របពេលដែលកញ្ចប់ថវិកាជាតិសម្រាប់ចំណាយប្រចាំឆ្នាំកាន់តែច្រើនឡើង។ ទន្ទឹមនឹងនេះ អ្នកតាមដានសេដ្ឋកិច្ច ជំរុញឱ្យរដ្ឋាភិបាល គួរតែប្រើប្រាស់ថវិកាជាតិដោយប្រុងប្រយ័ត្ន ដើម្បីធានាបាននូវលំនឹងសេដ្ឋកិច្ច និងទប់ទល់កំណើនអតិផរណា ក្នុងស្ថានភាពវិបត្តិសេដ្ឋកិច្ចសកល ព្រោះកម្ពុជា ជាប្រទេសកំពុងអភិវឌ្ឍនៅឡើយ។
អ្នកវិភាគសេដ្ឋកិច្ចឯករាជ្យ លោក ចាន់ សុផល មានប្រសាសន៍ថា បំណុលសាធារណៈរបស់កម្ពុជានៅមិនទាន់ដល់កម្រិតប្រកាសអាសន្ននៅឡើយទេ តែបំណុលឯកជនជារឿងដែលគួរឱ្យព្រួយបារម្ភ ពីព្រោះបំណុលនេះមានចំនួនច្រើន ហើយប៉ះពាល់ខ្លាំងទៅលើប្រជាពលរដ្ឋ។ លោកយល់ឃើញថា រដ្ឋាភិបាលគួរតែបង្កើតឱកាសនិងបង្កលក្ខណៈងាយស្រួលដល់ប្រជាពលរដ្ឋក្នុងការប្រកបការងារអាជីវកម្មផ្សេងៗ ដើម្បីមានលទ្ធភាពសងបំណុលទាំងនោះ និងផ្ដល់ជំនួយទៅដល់ប្រជាពលរដ្ឋក្រីក្រជាដើម៖
«ជាធម្មតាខ្ចីគេមកត្រូវតែមានមុខសញ្ញាចំណាយឱ្យបានច្បាស់លាស់ ជាពិសេសគឺការវិនិយោគដើម្បីបង្កើតជាចំណូលជាតិ ចំណូលប្រជាពលរដ្ឋទៅថ្ងៃអនាគត»។
របាយការណ៍វាយតម្លៃទៅលើសេដ្ឋកិច្ចកម្ពុជា នៅឆ្នាំ២០២២ របស់ក្រសួងសេដ្ឋកិច្ចនិងហិរញ្ញវត្ថុ បង្ហាញថា កម្ពុជាមានកំណើនសេដ្ឋកិច្ច ៥,២ភាគរយ និងព្យាករណ៍ថា អាចកើនឡើងដល់ ៥,៦ភាគរយនៅឆ្នាំ២០២៣។ ប៉ុន្តែរបាយការណ៍របស់ធនាគារពិភពលោក (World Bank) ផ្សាយកាលពីចុងឆ្នាំ២០២២ ព្យាករណ៍ថា កម្ពុជាមានកំណើនសេដ្ឋកិច្ចត្រឹម ៤,៨ភាគរយក្នុងឆ្នាំ២០២២ ខណៈក្នុងឆ្នាំ២០២៣ វិញ ធនាគារពិភពលោកព្យាករណ៍ថា កំណើនសេដ្ឋកិច្ចកម្ពុជានឹងទទួលបាន ៥,២ភាគរយ។ ស្ថាប័នហិរញ្ញវត្ថុអន្តរជាតិមួយនេះព្រមានថា បើទោះជាមានកំណើននេះក៏ដោយ ក៏សេដ្ឋកិច្ចកម្ពុជាប្រឈមនឹងហានិភ័យធ្ងន់ធ្ងរដោយសារតែការវិវត្តសភាពការណ៍ក្រៅព្រំដែនរបស់កម្ពុជា។
អ្នកតាមដានស្ថានការណ៍ មើលឃើញថា រដ្ឋាភិបាលកម្ពុជានៅតែខ្វះតម្លាភាព និងគណនេយ្យភាពក្នុងការបែងចែក និងប្រើប្រាស់ប្រាក់កម្ចីសាធារណៈ ហើយតួលេខនៃកំណើនសេដ្ឋកិច្ចដែលរដ្ឋាភិបាលបង្ហាញនោះ មិនស៊ីគ្នាទៅនឹងរបាយការណ៍របស់អង្គការសង្គមស៊ីវិលឡើយ។ ពួកគេបារម្ភថា កម្ពុជាកាន់តែផុងខ្លួននឹងបំណុលបរទេសកាន់តែធ្ងន់ធ្ងរ ដោយសារការប្រើប្រាស់ប្រាក់កម្ចីមិនច្បាស់លាស់ និងអំពើពុករលួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
អត្ថបទពេញនិយម
នយោបាយ
- តំណាងរាស្ត្រសភាអឺរ៉ុប ព្រមានថា នឹងមិនមានការផ្លាស់ប្ដូរឡើយ បើអឺរ៉ុបមិនដាក់សម្ពាធលើរដ្ឋាភិបាលកម្ពុជា
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- "ការពង្រីកផ្ទៃដីទ័ពអាកាសនៅរាម នឹងនាំឱ្យសង្ស័យកាន់តែខ្លាំងពីវត្តមានទ័ពចិននៅកម្ពុជា"
- អ្នកវិភាគ និងមន្ត្រីបក្សប្រឆាំងថា លោក ហ៊ុន សែន ប្រើប្រាស់អប្បិយជំនឿដើម្បីបោកពលរដ្ឋ
- ក្រុមមេដឹកនាំបក្សភ្លើងទៀនផ្ដាំមន្ត្រីកុំចាញ់ការបំភិតបំភ័យ