អ្នកវិភាគ​ថា​កម្ពុជា​នឹង​នៅ​ក្រោម​ការត្រួតត្រា​របស់​វៀតណាម​ផ្ដាច់មុខ​បើ​មិន​ជួយ​សង្គ្រោះ​ទាន់​ពេល

ដោយ ទីន ហ្សាការីយ៉ា
2019-01-06
អ៊ីម៉ែល
មតិ
Share
បោះពុម្ព
លោក អ៊ុង ឫទ្ធី (រូបកាន់មេក្រូនិយាយ) ចូលរួមបាតុកម្មតវ៉ាឲ្យដោះលែងលោក កឹម សុខា នៅមុខក្រសួងការបរទេសអាមេរិក នៅថ្ងៃទី ១៥ ខែ កញ្ញា ឆ្នាំ ២០១៧។
លោក អ៊ុង ឫទ្ធី (រូបកាន់មេក្រូនិយាយ) ចូលរួមបាតុកម្មតវ៉ាឲ្យដោះលែងលោក កឹម សុខា នៅមុខក្រសួងការបរទេសអាមេរិក នៅថ្ងៃទី ១៥ ខែ កញ្ញា ឆ្នាំ ២០១៧។
RFA

ពលរដ្ឋ​ខ្មែរ​នៅ​ក្រៅ​ប្រទេស បាន​នាំគ្នា​ងើប​ផុលផុស​ឡើង​ធ្វើ​បាតុកម្ម​ប្រឆាំង​ថ្ងៃ​៧​មករា ដែល​របប​លោក ហ៊ុន សែន អះអាង​ថា ជា​ថ្ងៃ​ត្រូវ​ដឹងគុណ​វៀតណាម សង្គ្រោះ​កម្ពុជា​ចេញពី​របប​ខ្មែរក្រហម តែ​ក្រុម​បញ្ញវន្ត និង​ពលរដ្ឋ​ខ្មែរ​នៅ​ក្រៅ​ប្រទេស​អះអាង​ថា ថ្ងៃ​៧ មករា​នេះ ជា​ថ្ងៃ​វៀតណាម​ឈ្លានពាន និង​ឈាន​ទៅ​គ្រប់គ្រង​កម្ពុជា​ទាំងស្រុង​នៅ​ពេល​អនាគត​មិន​ខាន។

អ្នកវិភាគ​លើកឡើង​ថា បើសិនជា​ពលរដ្ឋ​ខ្មែរ​មិន​នាំគ្នា​ជួយសង្គ្រោះ​ប្រទេស​កម្ពុជា ចេញពី​របប​លោក ហ៊ុន សែន ទាន់​ពេល​វេលា​ទេ​នោះ កម្ពុជា​នឹង​ក្លាយ​ជា​ប្រទេស​នៅ​ក្រោម​ការត្រួតត្រា​របស់​កុម្មុយនិស្ត​វៀតណាម​ផ្ដាច់មុខ។

អ្នកវិភាគ​នយោបាយ​លើក​ឡើង​ថា ការ​ងើប​ធ្វើបាតុកម្ម​ប្រឆាំង​នឹង​ថ្ងៃ​៧​មករា របស់​ពលរដ្ឋ​ខ្មែរ​នៅ​ក្រៅ​ប្រទេស គឺជា​ការត្រឹមត្រូវ ដើម្បី​ជួយសង្គ្រោះ​កម្ពុជា ឲ្យ​រួច​ផុត​ពី​នឹម​ត្រួតត្រា​របស់​វៀតណាម និង​កុំ​ឲ្យ​កម្ពុជា​ក្លាយទៅជា​កម្ពុជា​ក្រោម​ទី​២ ដែល​ត្រួតត្រា​ទាំង​ស្រុង​ដោយ​អាជ្ញាធរ​វៀតណាម។

លោក គឹម សុខ មាន​ប្រសាសន៍​ថា ការ​ផុលផុស​ឡើង​របស់​ពលរដ្ឋ​ខ្មែរ​នៅ​ក្រៅ​ប្រទេស ងើបឈរ​ឡើង​ប្រឆាំង​នឹង​ថ្ងៃ​៧​មករា នេះ ដោយសារតែ​ពួកគាត់​បាន​រស់នៅ​ឆ្លងកាត់​ជាច្រើន​ជំនាន់ និង​មានការ​យល់ដឹង​ច្បាស់​អំពី​ប្រវត្តិ​ពិត​របស់​កម្ពុជា គឺ​មិនមែន ដូច​ការឃោសនា​របស់​របប​ក្រុងភ្នំពេញ​ដែល​អំពាវនាវ​និង​ជំរុញ​ឲ្យ​ពលរដ្ឋ​ខ្មែរ​ត្រូវ​ដឹងគុណ​វៀតណាម​នោះ​ទេ។ លោក​បញ្ជាក់​ថា ប្រវត្តិសាស្ត្រ​ពិត​បាន​កត់ត្រា​ថ្ងៃ​៧​មករា​ឆ្នាំ​១៩៧៩ គឺជា​ថ្ងៃ​ដែល​វៀតណាម​ឈ្លានពាន​ទឹកដី​កម្ពុជា មិនមែន​ជា​ថ្ងៃ​ដែល​វៀតណាម​មក​សង្គ្រោះ​កម្ពុជា ដូចដែល​របប​លោក ហ៊ុន សែន កំពុងតែ​បន្លំ​ប្រវត្តិសាស្ត្រ​ពិត​នេះ​ទេ៖ «ការ​ងើបឡើង​នេះ ដោយសារ​ពលរដ្ឋ​ខ្មែរ​នៅ​បរទេស​បារម្ភ​ពី​មរណភាព​របស់​ប្រទេស​ជាតិ ដែល​មេដឹកនាំ​ដឹកនាំ​ប្រទេស​បន្ត​ពី​របប​ខ្មែរក្រហម​ដែល​លោក​បន្តុប​ដោយ​វៀតណាម ហើយ​វៀតណាម​ធ្វើ​ភាវូបនីយកម្ម​កម្ពុជា គឺ​ធ្វើ​ឲ្យ​កម្ពុជា​ទៅជា​វៀតណាម»

ការ​លើកឡើង​របស់​អ្នកវិភាគ​នេះ ធ្វើឡើង​នៅ​ស្រប​ពេល​ពលរដ្ឋ​ខ្មែរ​នៅ​ក្រៅ​ប្រទេស មាននៅ​អូស្ត្រាលី និង​នៅ​រដ្ឋ​ផ្សេងៗ​ទៀត​នៃ​សហរដ្ឋអាមេរិក បាន​ធ្វើ​បាតុកម្ម​ប្រឆាំង​ថ្ងៃ​៧​មករា​នេះ ជា​បន្តបន្ទាប់​គ្នា។ ពលរដ្ឋ​ខ្មែរ​អូស្ត្រាលី បាន​ធ្វើ​បាតុកម្ម​ប្រឆាំង​ថ្ងៃ​ទី​៧ មករា​នេះ កាលពី​ថ្ងៃ​ទី​៥ មករា ហើយ​អំពាវនាវ​ឲ្យ​ពលរដ្ឋ​ខ្មែរ​ទាំងអស់​កុំ​វង្វេង​ថា ថ្ងៃនេះ ជា​ថ្ងៃ​ដែល​ត្រូវ​ដឹងគុណ​វៀតណាម ដូចដែល​របប​លោក ហ៊ុន សែន កំពុងតែ​ឃោសនា​ថា ជា​ថ្ងៃ​ដែល​ជួយ​រំដោះ​ជាតិ​កម្ពុជា​នោះ។

 

កាលពី​រសៀល​ថ្ងៃ​ទី​៦ មករា ពលរដ្ឋ​ខ្មែរ តំណាង​ពលរដ្ឋ​ខ្មែរ​ប្រចាំ​នៅ​ទីក្រុង​ឡងប៊ិច រដ្ឋ​កាលីហ្វីនីញ៉ា លោក ចៅ វាសនា បញ្ជាក់​ថា ពលរដ្ឋ​ខ្មែរ​អាមេរិក មិន​អាច​នៅ​ស្ងៀម បណ្ដោយ​ឲ្យ​របប​លោក ហ៊ុន សែន ធ្វើ​អ្វីៗ​បាន​ស្រេច​តែ​ចិត្ត​នោះ​ទេ។ លោក​បញ្ជាក់​ថា អ្វី​ដែល​ពលរដ្ឋ​ខ្មែរ​កាន់តែ​ឈឺចាប់ និង​មិន​ទទួល​យក​បាន​នូវ​ទង្វើ​ដ៏​ខុសឆ្គង​កាន់តែ​ខ្លាំង​នៅ​ក្នុង​ប្រវត្តិសាស្ត្រ​កម្ពុជា ដែល​លោក ហ៊ុន សែន ស្នើ​ទៅ​ព្រះមហាក្សត្រ​ឲ្យ​ទទួលស្គាល់​ព្រឹត្តិការណ៍​ក្លែងក្លាយ​៣ ទៅជា​ពិធី​បុណ្យជាតិ៖ «ខ្ញុំ​មាន​ជំនឿ​ថា នៅ​ពេល​ខាងមុខ នៅ​ពេល​ហ៊ុន សែន អស់អំណាច រដ្ឋាភិបាល និង​គណបក្ស​ថ្មី​ដឹកនាំ​ប្រទេស​និង​សើរើ​អំពី​របប​កាប់​សម្លាប់​របស់ ហ៊ុន សែន»

ព្រឹត្តិបត្រ​ដំណឹង​ថ្មី​របស់​រដ្ឋាភិបាល​វៀតណាម បាវមឺយ (baimoi) ចេញផ្សាយ​នៅ​ថ្ងៃ​ទី​២ ខែ​មករា ឆ្នាំ​២០១៩ នេះ​សរសេរ​ថា ព្រះមហាក្សត្រ​ខ្មែរ សម្តេច​ព្រះ​នរោត្តម សីហមុនី ទើប​ទ្រង់​យល់ព្រម​តាម​សំណើ​របស់​លោក​នាយករដ្ឋមន្ត្រី ហ៊ុន សែន អោយ​មាន​ថ្ងៃបុណ្យ​សំខាន់​បី​នៅ​កម្ពុជា​។ ទី​១ ទទួលស្គាល់​ថ្ងៃ​២១ មិថុនា ឆ្នាំ​១៩៧៨ ថា​ជា​ទិវា​ដែល​លោក ហ៊ុន សែន បាន​ទៅ​សុំ​អោយ​វៀតណាម អោយ​មក​ជួយ​កម្ពុជា។ ទី​២ អោយ​ទទួល​ស្គាល់​ថ្ងៃ​៧​មករា ១៩៧៩ ថា​ជា​ថ្ងៃបុណ្យ ដែល​វៀតណាម​ចូល​រំដោះ​ប្រជារាស្ត្រ​ខ្មែរ​ចេញពី​របប ប៉ុល ពត ហើយ​ថា គឺជា​ស្នាដៃ​កងទ័ព​វៀតណាម សហការ​ជាមួយ​កងទ័ព​ខ្មែរ។ ទី​៣ ទទួលស្គាល់​ថ្ងៃ​២៩ ធ្នូ ១៩៩៩ ថា​ជា​ទិវា​ឈ្នះ​ឈ្នះ ដែល​បាន​បញ្ចប់​សង្គ្រាម​រវាង​ខ្មែរ​នឹង​ខ្មែរ។ ព្រឹត្តិបត្រ​បន្ត​ថា ទិវា​បី​ដែល​នាយករដ្ឋមន្ត្រី និង​ព្រះមហាក្សត្រ​ខ្មែរ​ទទួល​យល់ព្រម​ថា ជា​ទិវា​បុណ្យ​ដ៏​សំខាន់​នេះ វា​ជា​មោទនភាព​មួយ​សម្រាប់​ប្រទេស​វៀតណាម ដ្បិត​វា​ជា​តឹកតាង​បង្ហាញ​ថា សហគមន៍​អន្តរជាតិ និង​ប្រទេស​កម្ពុជា​ខ្លួនឯង​ផ្ទាល់ ទទួលស្គាល់​យ៉ាង​ពេញទំហឹង នូវ​ភាព​ស្របច្បាប់ ចំពោះ​ការដែល​ប្រទេស​វៀតណាម​បញ្ជូន​កងទ័ព​មក​ប្រទេស​កម្ពុជា​នៅ​ដើម​ឆ្នាំ​១៩៧៩ ហើយ​និង​នៅ​ជួយ​ប្រទេស​នេះ​១០ ឆ្នាំ​បន្ត​ទៀត។

គណបក្ស​ប្រជាជន​កម្ពុជា ប្រារព្ធ​អបអរ ថ្ងៃ​៧​មករា​លើក​ទី​៤០ នៅ​ពហុកីឡាដ្ឋាន​ជាតិ​អូឡាំពិក​ក្នុង​រាជធានី​ភ្នំពេញ។ អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​ចាត់​ទុក​ថ្ងៃ​ជ័យជំនះ​៧ មករា ឆ្នាំ​១៩៧៩ គឺជា​ថ្ងៃ​រំដោះ​ប្រជាពលរដ្ឋ​កម្ពុជា​ឲ្យ​រួច​ផុត​ពី​គ្រោះ​មរណ​:​នៃ​របប​ប្រល័យ​ពូជសាសន៍ ប៉ុល ពត បាន​ទាន់​ពេល​វេលា និង​ធ្វើ​ឲ្យ​ខ្មែរ​មានការ​បង្រួបបង្រួម​ជាតិ។

ទោះបីជា​យ៉ាង​នេះ​ក្ដី លោក គឹម សុខ អះអាង​ថា វៀតណាម​គ្មាន​ជួយ​អ្វី​ដល់​កម្ពុជា​ឡើយ ក្រៅពី​មក​ឈ្លានពាន​កម្ពុជា​នោះ វៀតណាម​មក​បំផ្លាញ​ធនធានធម្មជាតិ​ខ្មែរ លំហូរ​ជនជាតិ​វៀតណាម​មក​កម្ពុជា​កាន់តែ​ច្រើន​និង​មាន​អត្ត​សញ្ញាប័ណ្ណ​ខ្មែរ ដោយសារ​មន្ត្រី​ពុករលួយ​មួយ​ចំនួន។ លោក គឹម សុខ ព្រួយ​បារម្ភ​ថា នៅ​ពេល​អនាគត​កម្ពុជា នឹង​ត្រូវ​បាន​អាជ្ញាធរ​វៀតណាម​គ្រប់គ្រង​ជា​មិនខាន។ លោក​បញ្ជាក់​ថា ពលរដ្ឋ​ខ្មែរ​ដែល​ប្រឆាំង​នឹង​ថ្ងៃ​៧​មករា​នេះ មិនមែន​តែ​ពលរដ្ឋ​នៅ​ក្រៅ​ប្រទេស​ទេ ពលរដ្ឋ​នៅ​ក្នុង​ប្រទេស​ភាគច្រើន​ក៏​មិន​ទទួលស្គាល់​ថ្ងៃ​៧​មករា​នេះ​ដែរ។

ប្រធាន​គណបក្ស​សង្គ្រោះជាតិ​នៅ​សហរដ្ឋអាមេរិក លោក អ៊ុង ឫទ្ធី បញ្ជាក់​ថា នៅ​ថ្ងៃ​ទី​១៩ មករា​ខាងមុខនេះ ពលរដ្ឋ​ខ្មែរ​អាមេរិកាំង មកពី​ជាង ៣០​រដ្ឋ នឹង​មក​ជួបជុំគ្នា​ដ៏​ធំ​មួយ​នៅ​រដ្ឋធានី​វ៉ាស៊ីនតោន បាតុកម្ម​នៅមុខ​វិមាន​រដ្ឋសភា និង​សេតវិមាន ប្រឆាំង​នឹង​របប​ឯក​បក្ស​ដែល​រណប​វៀតណាម និង​បន្លំ​ថ្ងៃ​៧​មករា ជា​ថ្ងៃ​ប្រវត្តិសាស្ត្រ​ជួយសង្គ្រោះ​កម្ពុជា​នេះ។ ក្រៅ​ពីនេះ​ទៀត លោក បញ្ជាក់​ថា ពលរដ្ឋ​ខ្មែរ​ទាមទារ​ឲ្យ​រដ្ឋាភិបាល​អាមេរិក​ជួយ​អន្តរា​គម​ទៅ​របប លោក ហ៊ុន សែន ឲ្យ​ដោះលែង លោក កឹម សុខា ផ្ដល់​សុពលភាព​ជូន​គណបក្ស​សង្គ្រោះជាតិ ផ្ដល់​តំណែង​ក្រុមប្រឹក្សាឃុំ​សង្កាត់ និង​ផ្ដល់​សិទ្ធិ​ឲ្យ​មន្ត្រី​ប្រឆាំង​ចំនួន ១១៨​នាក់​ធ្វើ​នយោបាយ​ឡើងវិញ។

អ្នកវិភាគ​ពន្យល់​ថា បើសិនជា​ពលរដ្ឋ​ខ្មែរ​មិន​រួម​កម្លាំង​គ្នា ហើយ​អ្នកនយោបាយ​នៅតែ​បន្ត​បែកបាក់​គ្នា កម្ពុជា​នឹង​ធ្លាក់​ក្នុង​កណ្ដាប់ដៃ​វៀតណាម​ទាំងស្រុង​នៅ​ពេល​ខាងមុខ។ ហើយ​កម្ពុជា​សល់​តែ​ឈ្មោះ នៅ​លើ​តែ​ក្រដាស​តែប៉ុណ្ណោះ តែ​ការគ្រប់គ្រង អំណាច សេដ្ឋកិច្ច ស្ថិតនៅ​លើក​កណ្ដាប់ដៃ​វៀតណាម​ជាមិនខាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

បូរណភាពទឹកដី និង អធិប្បតិយភាពជាតិវាស្ថិតនៅក្រោមស្ថាប័នស្តេចដែលជាស្ថាប័នកំពូលរបស់រដ្ឋ វាមិនមែនស្ថិតនៅក្រោមរាជរដ្ឋាភិបាលទេ។ អាយុជីវិតជាតិទាំងមូលវាស្ថិតនៅក្រោមអំណាចស្តេច។ អស់រយៈពេល២៥ឆ្នាំកន្លងមកហេីយ តេីស្តេចបានបំរេីអ្វីខ្លះដល់ប្រជាពលរដ្ឋរបស់ខ្លួន ក្រៅអំពីការពាររាជបាល័ង្គរបស់ខ្លួនតែមួយមុខប៉ុណ្ណោះ? ចំណែកប្រជាពលរដ្ឋដែលជាអ្នករងគ្រោះវិញ ទាំងអស់គ្នាមិនហ៊ាននិយាយការពិត ដាក់ទោសហ៊ុនសែនតែម្នាក តែបែជាលេីកលែងទោសឱ្យស្តេច។ បេីស្តេចមិនអាចបំពេញតួនាទីខ្លួនទេនោះ ស្តេចត្រូវហ៊ានដាក់រាជ។

Jan 07, 2019 08:44 AM

គេហទំព័រ​ទាំងមូល