ចៅក្រមជំនុំជម្រះសាលាដំបូងរាជធានី ភ្នំពេញ លោក ឃុន សូណា សម្រេចលើកពេលសវនាការជំនុំជម្រះក្ដី សំណុំរឿងស្ថាបនិកគណបក្សបេះដូងជាតិ លោក សៀម ភ្លុក ទៅពេលក្រោយ ព្រោះអវត្តមានមេធាវីការពារក្ដី។ តុលាការក៏មិនទាន់កំណត់ថ្ងៃជាក់លាក់សម្រាប់ការកាត់ក្ដីសំណុំរឿង «ក្លែងបន្លំ និងប្រើប្រាស់លិខិតក្លែង» នេះនៅឡើយដែរ។
លោកមេធាវី កែត ឃី ឱ្យដឹងថ្ងៃទី២២ ខែវិច្ឆិកា ថា មេធាវីរបស់ការពារក្ដីលោក សៀម ភ្លុក គឺលោកមេធាវី ជូង ជូងី និងលោកមេធាវី សំ សុគង់ អ្នកទាំងពីរ គ្មានវត្តមាននៅតុលាការទេ។ លោកឱ្យដឹងថា ក្រៅពីអវត្តមានមេធាវី ការពារក្ដី អ្នកពាក់ព័ន្ធក្នុងសំណុំរឿងមួយចំនួនទៀត ដែលត្រូវចូលបំភ្លឺនៅតុលាការដែរនោះអ្នកខ្លះ ក៏មិនត្រូវបានសមត្ថកិច្ចយាមទ្វារតុលាការ អនុញ្ញាតឱ្យចូលតុលាការដែរ ព្រោះពួកគេមិនទាន់ទទួលដីកាពីតុលាការ៖
«លោកមេធាវី ជូង ជូងី អត់បានមកគាត់ទៅអាមេរិក ហើយលោកមេធាវី ការពារកូនក្ដីច្រើននៅក្នុងរឿងហ្នឹងអវត្តមាន គាត់សុំពន្យារពេលសវនាការ ចុះដីកាម្ដងទៀតឱ្យបានត្រឹមត្រូវ ឱ្យមានវត្តមាន ជូង ជូងី និងមេធាវី សំ សុគង់ ចូលរួមផង»។
សមត្ថកិច្ចបានដឹកស្ថាបនិកគណបក្សបេះដូងជាតិ លោក សៀម ភ្លុក មកតុលាការនៅថ្ងៃទី២២ ខែវិច្ឆិកា។ លោក សៀម ភ្លុក ក៏បានស្នើទៅតុលាការសុំលើកពេលសវនាការផងដែរ ព្រោះលោកត្រូវការមេធាវីជួយការពារក្ដី។
សមត្ថកិច្ចបានឃុំខ្លួនស្ថាបនិកគណបក្សបេះដូងជាតិ លោក សៀម ភ្លុក ដាក់ពន្ធនាគារព្រៃស (ម១) កាលពីថ្ងៃទី២៧ ខែមេសា ទាក់ទងបទចោទក្លែងបន្លំ និងប្រើប្រាស់លិខិតក្លែង តាមបណ្ដឹងក្រសួងមហាផ្ទៃ ពាក់ព័ន្ធនឹងការស្នើសុំបង្កើតគណបក្សបេះដូងជាតិ កាលពីឆ្នាំ២០២១។
សំណុំរឿងនេះ ក៏មានអ្នកពាក់ព័ន្ធជាង ១០នាក់ផ្សេងទៀត ប៉ុន្តែតុលាការអនុញ្ញាតឱ្យពួកគេអាចនៅក្រៅឃុំបណ្ដោះអាសន្ន លើកលែងតែលោក សៀម ភ្លុក ទេ ដែលកំពុងជាប់ឃុំ។
មន្ត្រីសង្គមស៊ីវិល ជំរុញទៅតុលាការគួរលើកលែងការចោទប្រកាន់លោក សៀម ភ្លុក ព្រោះស្ថាបនិកគណបក្សបេះដូងជាតិរូបនេះ គ្មានចេតនាទុច្ចរិត ក្នុងការបង្កើតគណបក្សបេះដូងជាតិឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។