សាលាដំបូងរាជធានីភ្នំពេញ បានបើកសវនាការលើសំណុំរឿងកូនប្រុសសកម្មជនបក្សប្រឆាំងម្នាក់ដែលមានជំងឺខ្សោយសតិ និងជាអនីតិជន នៅថ្ងៃទី២៩ កញ្ញា ក្នុងបទចោទញុះញង់ និងផ្ដើមគំនិតជេរប្រមាថរដ្ឋាភិបាល។ ក្រោយបញ្ចប់សវនាការ ចៅក្រមបានប្រកាសថានឹងចេញសាលក្រមនៅពាក់កណ្ដាលខែក្រោយ។ សាច់ញាតិ មេធាវី និងសង្គមស៊ីវិល រំពឹងថាតុលាការនឹងសម្រេចក្ដីយុត្តិធម៌ដោយដោះលែងយុវជនកាក់ សុវណ្ណច្ឆ័យ ឲ្យមានសេរីភាពវិញ។
ក្នុងសវនាការពេញមួយព្រឹក ប្រធានក្រុមប្រឹក្សាជំនុំជម្រះលោក អ៊ួង វុទ្ធា បានគ្រវីក្បាលសឹងតែគ្រប់ចម្លើយ ដែលយុវជនកាក់ សុវណ្ណច្ឆ័យ បានឆ្លើយតបនឹងសំណួររបស់ចៅក្រម។
ក្រុមចៅក្រមជំនុំជម្រះ បានសួរផ្ដោតលើពីការបង្ហោះសារក្នុងហ្វេសប៊ុក (Facebook) និងក្នុងក្រុមនៃបណ្ដាញសង្គមតេឡេក្រាម (Group of Telegram) កាលពីអំឡុងខែមេសា ដល់ខែមិថុនា ដែលបណ្ដាលឲ្យមានការចាប់ខ្លួន។ តែយុវជនកាក់ សុវណ្ណច្ឆ័យ ដែលកំពុងមានជំងឺខ្សោយសតិ ឬអូទីហ្សឹមផងនោះ មិនយល់ពីសំណួររបស់ចៅក្រមចង់សួរទេ ហើយឆ្លើយ ឬនិយាយបញ្ហាផ្សេងទៅវិញ បើទោះជាចៅក្រមបានព្យាយាមសួរបញ្ជាក់ច្រើនដង ឬប្រើសំណួរផ្សេងក៏ដោយ។
ម្ដាយរបស់យុវជនកាក់ សុវណ្ណច្ឆ័យ គឺលោកស្រី ព្រុំ ចាន់ថា ត្រូវបានចៅក្រមអនុញ្ញាតឲ្យចូលស្ដាប់សវនាការ និងធ្វើជាសាក្សីក្នុងសំណុំរឿងនេះឲ្យដឹងថា ការដែលយុវជនកាក់ សុវណ្ណច្ឆ័យ ឆ្លើយមិនត្រូវសំណួររបស់ចៅក្រម ព្រោះកូនរបស់លោកស្រី មានបញ្ហាខ្សោយខួរក្បាល ឬជំងឺអូទីហ្សឹម (Autism) ពីកំណើត។ លោកស្រី អះអាងថា ស្ថានភាពជំងឺនេះបានវិវត្តន៍កាន់តែធ្ងន់ ក្រោយពេលយុវជន កាក់ សុវណ្ណច្ឆ័យ ជាប់ឃុំជាង ៣ខែមកនេះ។ លោកស្រីបន្តថា នៅពេលចៅក្រមសួរយូរទៅ កាក់ សុវណ្ណច្ឆ័យ ចាប់ផ្ដើមភ័យស្លុត ទម្លាក់ទឹកមុខចុះ និងលែងឆ្លើយសំណួររបស់ចៅក្រមបន្តទៀត។
ក្រៅពីបញ្ហាខួរក្បាលហើយ យុវជនរូបនេះ ក៏ទ្រុឌទ្រោមសុខភាពដូចអ្នកជាប់ឃុំផ្សេងដែរ។ ចំពោះការរស់នៅក្នុងពន្ធនាគារ «ម២» វិញ យុវជនរូបនេះតែងតែអង្គុយសញ្ជឹងតែម្នាក់ឯង និងម្ដងម្កាលច្រៀងលេងតែឯងជាដើម។ លោកស្រី ព្រុំ ចាន់ថា ឲ្យដឹងថា កូនប្រុសស្គមស្គាំង និងកើតកន្ទួលរមាស់ពេញខ្លួន។
ក្នុងបន្ទប់សវនាការនៅថ្ងៃដដែល បើទោះជាយុវជនកាក់ សុវណ្ណច្ឆ័យ ឆ្លើយមិនត្រូវសំណួររបស់ចៅក្រមយ៉ាងនេះក៏ដោយ ក៏ព្រះរាជអាជ្ញារងលោក ហុង គឹមសាន នៅតែព្យាយាមដាក់បន្ទុកបន្ថែមលើយុវជនកាក់ សុវណ្ណច្ឆ័យ ដែរ។ តំណាងអយ្យការរូបនេះបានអះអាងជំនួសអ្នកជំនាញវេជ្ជសាស្ត្រថា យុវជនកាក់ សុវណ្ណច្ឆ័យ មានសុខភាពល្អ មានការរៀនសូត្រខ្ពង់ខ្ពស់ ជាដើម។
ទោះយ៉ាងណា ក្ដី លោកស្រី ព្រុំ ចាន់ថា ជឿជាក់ថា តុលាការនឹងដោះលែងកូនប្រុស ឲ្យមានសេរីភាពវិញ នៅថ្ងៃប្រកាសសាលក្រមថ្ងៃទី១៣ ខែតុលាខាងមុខ៖ « ថ្ងៃប្រកាសសាលក្រមហ្នឹង ថ្ងៃទី១៣ ខែ១០ ហ្នឹង ខ្ញុំគិតថា គាត់គួរតែតម្រឹម ឬក៏ដោះលែងឲ្យកូនខ្ញុំមានសេរីភាពឡើងវិញ ដើម្បីឲ្យគាត់មករៀនសូត្រវិញ ព្រោះឥឡូវសាលាគេជិតបើកវិញហើយ។ ពេលដែលគាត់ជាប់ ( ពន្ធនាគារ ) អ៊ីចឹងទៅ ការរើសអើង ( កូន ) នៅតែមាន ហើយពេលមកវិញ មិនដឹងថា គាត់ ( កូន ) ត្រូវប្រឈមមុខនឹងអ្វីខ្លះទេ។ អ៊ីចឹងសុំឲ្យគាត់ ( តុលាការ ) ដោះលែងកូនខ្ញុំមកវិញមក»។
ក្នុងពេលសវនាការនេះ មិនមានសកម្មភាពតវ៉ា ឬការពង្រាយកងកម្លាំងសន្តិសុខខណ្ឌ ៧មករា នៅខាងក្រៅសាលាដំបូងរាជធានីភ្នំពេញនោះទេ។ ចំណែកឆ្មាំពន្ធនាគារ បានអនុញ្ញាតឲ្យលោកស្រី ព្រុំ ចាន់ថា បានជួបកូនប្រុសបន្តិចនៅខាងក្រៅបន្ទប់សវនាការ តែមិនអនុញ្ញាតឲ្យស្និទ្ធស្នាលជាមួយគ្នានោះទេ។
នគរបាលរាជធានីភ្នំពេញ បានសម្រុកចូលចាប់យុវជន កាក់ សុវណ្ណច្ឆ័យ ទាំងអាធ្រាត្រ កាលពីយប់ថ្ងៃទី២៥ មិថុនា ដោយចោទថា យុវជនរូបនេះញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងជេរប្រមាថថ្នាក់ដឹកនាំរដ្ឋាភិបាលតាមរយៈការជជែកគ្នាក្នុងក្រុម (Group) នៃបណ្ដាញសង្គមតេឡេក្រាម (Telegram)។
លោកស្រី ព្រុំ ចន្ថា អះអាងថា ដើមហេតុរឿងនេះ ដោយសារមនុស្សមួយក្រុមនៅក្នុងបណ្ដាញសង្គម(Telegram) នោះ បានជេរប្រមាថលោកស្រី និងឪពុករបស់កាក់ សុវណ្ណច្ឆ័យ ឈ្មោះ កាក់ កុម្ភារ ថា ជាជនក្បត់ជាតិ ដែលបណ្ដាលឲ្យក្មេងជំទង់រូបនេះខឹង ហើយជេរតបតវិញ និងឈានដល់ការប្រមាថរដ្ឋាភិបាលជាដើម។
ជុំវិញរឿងនេះមេធាវីការពារក្ដីឲ្យយុវជន កាក់ សុវណ្ណច្ឆ័យ លោក សំ សុគង់ បានស្នើសុំចៅក្រមអនុញ្ញាតឲ្យអ្នកជំនាញវេជ្ជសាស្ត្រពិនិត្យមើលបញ្ហាខួរក្បាលកូនក្ដី តែចៅក្រមបដិសេធ។ ទោះជាយ៉ាងណា លោកមេធាវីបញ្ជាក់ថា តាមអាកប្បកិរិយា ការឆ្លើយក្នុងសវនាការ អាការៈប្រវត្តិនៃជំងឺ ឬស្ថានភាពការរស់នៅជាដើម យុវជន កាក់ សុវណ្ណច្ឆ័យ គួរត្រូវទទួលបានការដោះលែង ដោយសារមានបញ្ហាខួរក្បាល៖ «តុលាការគួរតែពិចារណាអំពីជំងឺរបស់គាត់ហ្នឹង ហើយនឹងពេលដែលគាត់ប្រព្រឹត្តិបទល្មើសហ្នឹងតើគាត់ (កូនក្ដី ) យល់ដឹងពីការប្រព្រឹត្តិរបស់គាត់ ឬអត់ ! បើតាមមាត្រា៣១ នៃក្រមព្រហ្មទណ្ឌហ្នឹង គឺគេនិយាយទាក់ទងនឹងការទទួលខុសត្រូវព្រហ្មទណ្ឌហ្នឹង ចំពោះមនុស្សដែលគាត់មានបញ្ហាវិបល្លាសចិត្ត ឬក៏ជំងឺអូទីហ្សឹមហ្នឹង បើសិនជាគាត់មាននៅពេលដែលគាត់បានប្រព្រឹត្តិមែន គឺមិនត្រូវទទួលខុសត្រូវព្រហ្មទណ្ឌទេ។ អ៊ីចឹងតុលាការគួរពិចារណា និងដោះលែងគាត់ឲ្យមានសេរីភាព ឲ្យរួចផុតពីបទចោទ »។
យុវជន វ័យ១៧ឆ្នាំ កាក់ សុវណ្ណច្ឆ័យ ធ្លាប់ត្រូវនគរបាលប៉ុស្តិ៍ចាក់អង្រែលើ ខណ្ឌមានជ័យ ចាប់ឃុំខ្លួនក្នុងប៉ុស្តិ៍ប៉ូលិស ២យប់ ២ថ្ងៃ និងបានដាក់ខ្នោះដៃ ហើយវាយដំ និងដាល់ផ្ទៃមុខជាច្រើនដៃ ដោយសារការចូលទៅក្នុងទីស្នាក់ការគណៈបក្សសង្គ្រោះជាតិ នៅសង្កាត់ចាក់អង្រែលើ កាលពីថ្ងៃទី៤ ខែតុលា ឆ្នាំ២០២០។
ក្រោយមកទើបនគរបាលបង្គាប់ឲ្យយុវជនរូបនេះ ធ្វើកិច្ចសន្យាទទួលកំហុស ជាថ្នូរនឹងការដោះលែង។
នៅចុងខែមេសា ជនមិនស្គាល់មុខ ២នាក់ បានជិះម៉ូតូមួយគ្រឿង ឆ្មក់គប់យុវជន កាក់ សុវណ្ណច្ឆ័យ នឹងដុំឥដ្ឋតាន់ត្រូវចំក្បាលខាងឆ្វេងបណ្ដាលឲ្យរបួសដេរអស់ចំនួន ២០ថ្នេរ។ ហេតុការណ៍អាក្រក់ទាំង ២នេះ បានបណ្ដាលឲ្យជំងឺខ្សោយបញ្ញារបស់យុវជន កាក់ សុវណ្ណច្ឆ័យ រើឡើងវិញ និងប៉ះពាល់សតិអារម្មណ៍ធ្ងន់ធ្ងរ គួបផ្សំនឹងចិត្តខឹង ចំពោះអាជ្ញាធរដែលបានចាប់ឃុំខ្លួនឪពុកដាក់ពន្ធនាគារស្រាប់។
ប្រធានផ្នែកកម្មវិធីស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា (CYN) លោក ហេង គឹមហុង ជំរុញឲ្យតុលាការពិចារណាលើសំណុំរឿងនេះឡើងវិញ ហើយធ្វើយ៉ាងណាគួរតែដោះលែងយុវជន កាក់ សុវណ្ណច្ឆ័យ ឲ្យមានឱកាសបានទៅព្យាបាលជំងឺរបស់ខ្លួននៅខាងក្រៅពន្ធនាគារ៖ « ខ្ញុំយល់ថាការផ្ដល់សិទ្ធិសេរីភាពផ្នែកបញ្ចេញមតិ ជាពិសេស ទាក់ទងនឹងការលើកទឹកចិត្តយុវជនហ្នឹងឲ្យគាត់ទទួលបានការមើលថែ។ ជាពិសេស នៅពេលដែលអនីតិជន ហើយជាជនហៅថា ផ្នែកសតិស្មារតីផងហ្នឹង គួរតែឲ្យគាត់ជៀសផុតពីការទទួលបាននូវបទល្មើសណា»។
ក្នុងសំណុំរឿងនេះ គឺតុលាការបានកាត់ទោសតែយុវជន កាក់ សុវណ្ណច្ឆ័យ តែម្នាក់គត់ ដោយមិនបានចាប់ខ្លួន ឬកោះហៅភាគីជម្លោះក្នុងក្រុមតេឡេក្រាម (Group of Telegram) មកសាកសួរឡើយ ខណៈដែលអ្នកច្បាប់ និងសង្គមស៊ីវិលចង់ឲ្យមន្ត្រីតុលាការដោះលែងយុវជនកាក់ សុវណ្ណច្ឆ័យ ឬត្រូវបញ្ជូនយុវជននេះទៅមណ្ឌលស្ដារនីតិសម្បទា ឬត្រូវដាក់ឲ្យស្ថិតក្រោមការព្យាបាលរបស់ម្ដាយវិញ ក្នុងលក្ខខណ្ឌមានជំងឺសតិមិនប្រក្រតី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។