"ពលរដ្ឋ​នឹង​នៅ​តែ​រង​ការ​រឹតត្បិត​សិទ្ធិ​នយោបាយ​ខ្លាំង​ដដែល បើ​គ្មាន​ការ​សើរើ ឬ​លុប​ច្បាប់​រំលាយ​បក្ស​នយោបាយ"

ដោយ មាន ឫទ្ធិ
2019-11-28
អ៊ីម៉ែល
មតិ
Share
បោះពុម្ព
អ្នក​សម្របសម្រួល​ផ្នែក​អង្កេត​នៃ​គណៈកម្មាធិការ​ខុមហ្វ្រែល (COMFREL) លោក កន សាវាង្ស ថ្លែង​ក្នុង​កម្មវិធី​អាស៊ីសេរី កាល​ពី​ថ្ងៃ​ទី​១១ ខែ​ឧសភា ឆ្នាំ​២០១៧។
អ្នក​សម្របសម្រួល​ផ្នែក​អង្កេត​នៃ​គណៈកម្មាធិការ​ខុមហ្វ្រែល (COMFREL) លោក កន សាវាង្ស ថ្លែង​ក្នុង​កម្មវិធី​អាស៊ីសេរី កាល​ពី​ថ្ងៃ​ទី​១១ ខែ​ឧសភា ឆ្នាំ​២០១៧។
Photo: RFA

ក្រុម​អ្នក​ជំនាញ​សិទ្ធិ​នយោបាយ និង​អ្នកវិភាគ ចង់​ឃើញ​រដ្ឋាភិបាល​ពិនិត្យ​ឡើង​វិញ ឬ​លុបចោល​ច្បាប់​ទាំងឡាយ​ដែល​របប​នេះ​បាន​បង្កើត​ឡើង​ក្រោយ​ឆ្នាំ​២០១៧ ដើម្បី​បើកផ្លូវ​ទៅ​រម្លាយ​គណបក្ស​សង្គ្រោះជាតិ និង​យក​អាសនៈ​គណបក្ស​នេះ​ទៅ​ចែក​ឱ្យ​គណបក្ស​ដទៃ​ទៀត​ដែល​ពលរដ្ឋ​មិនបាន​បោះឆ្នោត​ឱ្យ ស្រប​ពេល​គណៈកម្មការ​អឺរ៉ុប ទុក​រយៈពេល ១​ខែ ឱ្យ​របប​ក្រុងភ្នំពេញ​ឆ្លើយតប​នឹង​របាយការណ៍​វាយតម្លៃ​បឋម​របស់​ខ្លួន​យ៉ាង​យូរ​បំផុត​ត្រឹម​ថ្ងៃ​ទី​១២ ធ្នូ ចុង​ឆ្នាំ​នេះ ដែល​រក​ឃើញ​ថា មានការ​រំលោភ​សិទ្ធិ​នយោបាយ និង​សិទ្ធិ​ពលរដ្ឋ​ធ្ងន់ធ្ងរ និង​ជា​ប្រព័ន្ធ​នៅ​កម្ពុជា។ ពួកគេ​ព្រមាន​ថា ប្រសិនបើ​មានការ​សម្រុះសម្រួល​នយោបាយ​ណាមួយ​នា​ពេល​ខាងមុខ ហើយ​គ្មាន​ការ​សើរើ ឬ​លុប​ចោល​ច្បាប់​ទាំងនេះ​នោះ​ទេ នោះ​ពលរដ្ឋ​កម្ពុជា​នឹង​នៅតែ​ទទួលរង​ការ​រឹតត្បិត​ខ្លាំង​ខាង​ផ្នែក​សិទ្ធិ​នយោបាយ​ដដែល។

ស្រប​ពេល​ដែល​របប​ក្រុងភ្នំពេញ​របស់​លោក ហ៊ុន សែន ហាក់​បង្ហាញ​ជំហរ​ទន់ភ្លន់ ចង់​បន្ធូរបន្ថយ​ស្ថានការណ៍​នយោបាយ ដើម្បី​ជា​ការ​ផ្គាប់ចិត្ត​សហភាព​អឺរ៉ុប​កុំ​ឱ្យ​ឈាន​ទៅ​សម្រេច​ព្យួរ​ប្រព័ន្ធ​អនុគ្រោះ EBA របស់​ខ្លួន ដែល​អាច​ធ្វើ​ឱ្យ​កម្ពុជា​ប្រឈម​កាន់តែ​ខ្លាំង​ផ្នែក​សេដ្ឋកិច្ច​នោះ ក្រុម​អ្នក​ជំនាញ​ផ្នែក​សិទ្ធិ​នយោបាយ និង​អ្នកវិភាគ ព្រមាន​ថា ការ​ត្រូវរ៉ូវ​គ្នា​ផ្នែក​នយោបាយ​ណាមួយ​នា​ពេល​ខាងមុខ ដែល​គ្មាន​ការលុបចោល​ច្បាប់​នានា​ដែល​ផ្ទុយ​ពី​គោលការណ៍​ប្រជាធិបតេយ្យ​នោះ នឹង​មិន​អាច​ដោះស្រាយ​បញ្ហា​កម្ពុជា​ជា​យូរអង្វែង​បាន​នោះ​ទេ។ ផ្ទុយ​ទៅវិញ​ពួកគេ​ថា សង្គម​កម្ពុជា នឹង​នៅតែ​បន្ត​ហែកហួរ​គ្នា និង​ឈ្លោះ​គ្នា​រវាង​អ្នកនយោបាយ​មិន​ចេះ​ចប់ មិន​ចេះ​ហើយ។ ច្បាប់​ទាំងនោះ ដែល​ពួកគេ​ហៅថា ជា​ច្បាប់​ធ្វើ​ឱ្យ​ធាក់​ថយក្រោយ​នៃ​ប្រជាធិបតេយ្យ ឬ​ប្រឆាំង​នឹង​គោលការណ៍​ស្នូល​ប្រជាធិបតេយ្យ​នោះ រួមមាន​ច្បាប់​រំលាយ​គណបក្ស​នយោបាយ និង​ច្បាប់​យក​អាសនៈ​គណបក្ស​នយោបាយ​ដែល​បាន​រំលាយ​ទៅ​បែងចែក​ឱ្យ​គណបក្ស​ដទៃ​ដែល​ពលរដ្ឋ​មិនបាន​បោះឆ្នោត​ឱ្យ​ជាដើម។

អ្នក​សម្របសម្រួល​ផ្នែក​អង្កេត និង​តស៊ូ​មតិ​នៃ​អង្គការ​ខុមហ្វ្រែល (Comfrel) លោក កន សាវាង្ស កាលពី​ថ្ងៃ​ទី​២៦ វិច្ឆិកា ព្រមាន​ថា ប្រសិនបើ​គ្មាន​ការ​កែប្រែ​ច្បាប់​ទាំងនោះ ឱ្យ​ត្រលប់​ទៅ​រក​ស្ថានភាព​ដូចដើម​កាលពីមុន​ឆ្នាំ​២០១៧​នោះ​ទេ នោះ​ការចូលរួម​ក្នុង​សកម្មភាព និង​ការប្រកួតប្រជែង​នយោបាយ​នឹង​នៅតែ​មាន​បញ្ហា​ដដែល៖ «និយាយ​រួម​វិសោធនកម្ម​ច្បាប់​ថ្មីៗ ក្រោយ​ការបោះឆ្នោត​ឆ្នាំ​២០១៧ គួរតែ​ត្រលប់​ទៅ​រក​ភាព​ដើម​វិញ។ ដូច្នេះ រាល់​ច្បាប់​ទាំងឡាយ​ដែល​ធ្វើឡើង​ក្រោយ​ឆ្នាំ​២០១៧ គួរតែ​ត្រលប់​ទៅ​ភាព​ដើម​វិញ​។​... ច្បាប់​ទាំងឡាយ​ណា​ដែល​ធ្វើឡើង​ក្រោយ​ឆ្នាំ​២០១៧ ដែល​មាន​ការ​ធ្វើ​វិសោធនកម្ម​ចុងក្រោយ​នេះ បើសិនជា​មិន​មាន​ការ​ត្រលប់​ទៅ​ភាព​ដើម​វិញ​ទេ ការប្រកួតប្រជែង​ក្នុង​ភាព​នយោបាយ​ទៅមុខ វា​នៅតែ​ជាប់​បញ្ហា​ដដែល​ទេ ពីព្រោះ​លក្ខខណ្ឌ​ជាច្រើន ដែល​ទាក់ទង​ជាពិសេស ជនជាប់ចោទ​ដែល​ត្រូវ​ចោទប្រកាន់​ហើយ មិន​អាច​ទៅ​ធ្វើ​សកម្មភាព​នយោបាយ ឬ​បាន​រម្លាយ​ជាប់​ពាក់ព័ន្ធ​... នេះ​ជា​រឿង​សំខាន់​ណាស់ ព្រោះ​វា​ពាក់ព័ន្ធ​នឹង​សិទ្ធិ​សេរីភាព​ក្នុង​ការ​ចូលរួម​ក្នុង​សកម្មភាព​នយោបាយ។ បើ​មានការ​រឹត​បន្តឹង​ទៀត នោះ​វា​ជា​បញ្ហា»

ដោយឡែក អ្នក​ជំនាញ​ខាង​សិទ្ធិ​នយោបាយ និង​បោះឆ្នោត​មួយ​រូប​ទៀត គឺ​លោក សម គន្ធាមី ប្រធាន​អង្គការ​និចហ្វិក លើកឡើង​ស្រដៀង​គ្នា​ដែរ​ថា ច្បាប់​ធ្វើ​វិសោធនកម្ម​ទាំងឡាយ​ទៅលើ​ច្បាប់​ស្ដីពី​គណបក្ស​នយោបាយ ច្បាប់បោះឆ្នោត​ជ្រើសតាំង​តំណាងរាស្ត្រ ច្បាប់​ជ្រើសរើស​ក្រុម​ប្រឹក្សាឃុំ​សង្កាត់ និង​ព្រិ​ទ្ធ​សភា ជាដើម​នោះ ធ្វើឡើង​ផ្ទុយ​ទៅ​នឹង​គោលការណ៍​ប្រជាធិបតេយ្យ ហើយ​ជា​ច្បាប់​ដែល​ធ្វើ​ឱ្យ​ប្រជាធិបតេយ្យ​ដើរ​ថយក្រោយ ព្រោះ​ច្បាប់​ទាំងនេះ បាន​បំផ្លាញ​ឆន្ទៈ​ពិតប្រាកដ​របស់​ពលរដ្ឋ​ម្ចាស់​ឆ្នោត​។ លោក​ព្រមាន​ថា នឹង​ពុំ​មាន​ការបោះឆ្នោត​ដោយ​សេរី​នោះ​ទេ ប្រសិនបើ​ច្បាប់​ទាំងនេះ​នៅតែ​មាន​ធរមាន ជា​ការ​រឹតត្បិត​សិទ្ធិ​នយោបាយ​នោះ៖ «ច្បាប់​វិសោធនកម្ម​ទាំងអស់​នេះ ទាំង​ច្បាប់​ស្ដីពី​គណបក្ស​នយោបាយ​ក៏ដោយ ទោះបីជា​មានការ​ចរចា​គ្នា គឺ​តម្រូវ​ចាំបាច់​ឱ្យ​មាន​ធ្វើ​វិសោធនកម្ម​សារ​ឡើងវិញ ដើម្បី​ធានា​សិទ្ធិ​នយោបាយ។ សិទ្ធិ​នយោបាយ​របស់​គណបក្ស​នយោបាយ​ក្តី របស់​ពលរដ្ឋ​ទូទៅ​ក៏ដោយ ដើម្បី​ធានា​អាហ្នឹង​វិញ​បាន។ បើសិនជា​មានការ​រឹតត្បិត​សិទ្ធិ​នយោបាយ ដូច្នេះ​ក៏​គ្មាន​ការបោះឆ្នោត​ដោយ​សេរី ត្រឹមត្រូវ និង​យុត្តិធម៌​នោះ​ទេ»

ដូចគ្នា​នេះ​ដែរ សម្រាប់​អ្នក​សិក្សា​ស្រាវជ្រាវ​បញ្ហា​សង្គម និង​នយោបាយ បណ្ឌិត មាស នី ហៅ​ច្បាប់​ទាំងនោះ​ថា ជា​ច្បាប់​ដែល​អ្នកនយោបាយ​បក្ស​កាន់អំណាច​ធ្វើឡើង​ដើម្បី​កាត់​ក្បាល​តម្រូវ​មួក ហើយ​បើ​មិន​មាន​ការ​កែប្រែ​ច្បាប់​ទាំងនេះ​ទៅ​រក​សភាព​ដើម​វិញ​នោះ​ទេ នោះ​សង្គម​ខ្មែរ​នឹង​នៅតែ​បែកបាក់ មាន​ជម្លោះផ្ទៃក្នុង​ជា​រៀង​រហូត ព្រោះ​អ្នក​មាន​អំណាច​នឹង​យក​ច្បាប់​ទាំងនេះ​ទៅ​ជិះជាន់​យកឈ្នះ​លើ​អ្នក​គ្មាន​អំណាច​ដដែល៖ «បើសិនជា​មិន​វិល​ទៅ​ពិនិត្យ​រឿង​អស់​ហ្នឹង​ឡើងវិញ​ទេ វា​នឹង​នៅតែ​វិល​ត្រលប់​មក​លង​អ្នកនយោបាយ​ខ្មែរ​វិញ​ដដែល ហើយ​យើង​នឹង​ដើរចូល​ទៅ​ក្នុង​រឿងរ៉ាវ​ដដែលៗ ដូច​ខ្មែរ​យើង​និយាយ​ថា វា​អត់​មានអី​ប្លែក​សម្រាប់​គាត់​។ ... ច្បាប់​នេះ​វា​អត់​បាន​បង្ហាញ​នូវ​យុត្តិធម៌​ពិតប្រាកដ​ចេញពី​សេចក្ដី​ចែង​ដែល​មាន​ក្នុង​ច្បាប់​រួចហើយ​។ បើ​មិន​ត្រលប់​ទៅ​ធ្វើការ​ពិនិត្យមើល​ឡើងវិញ ហើយ​ធ្វើការ​កែប្រែ​ទេ ច្បាប់​នេះ​នឹង​នៅតែ​ត្រូវ​បាន​យក​មក​គ្រប​ដណ្ដប់ ហើយ​បន្ត​ឱ្យ​មាន​ជម្លោះផ្ទៃក្នុង ហើយ​អ្នកណា​ដែល​មាន​អំណាច​ទៅ​ថ្ងៃ​ខាងមុខ គេ​អាច​នៅតែ​ប្រើ​ច្បាប់​ទាំងនេះ ដើម្បី​ជិះជាន់​អ្នក​ដែល​អត់​មានអំណាច ឬ​អ្នក​អត់​មាន​ឥទ្ធិពល​ដដែល​វិញ​ទេ»

ការ​លើកឡើង និង​ទទូច​ចង់​ឃើញ​ឱ្យ​មានការ​កែប្រែ ឬ​លុបចោល​លក្ខខណ្ឌ​ច្បាប់​ទាំងនេះ​ពី​សំណាក់​ក្រុម​អ្នក​ជំនាញ​សិទ្ធិ​នយោបាយ និង​អ្នកវិភាគ​នេះ កើតមានឡើង​ស្រប​ពេល​គណៈកម្មការ​អឺរ៉ុប​ទុក​រយៈពេល​មួយ​ខែ គឺ​យ៉ាង​យូរ​ត្រឹម​ថ្ងៃ​ទី​១២ ធ្នូ​ចុង​ឆ្នាំនេះ ឆ្លើយតប​ទៅ​នឹង​របាយការណ៍​វាយតម្លៃ​បឋម​របស់​ខ្លួន ដែល​រក​ឃើញ​ថា មានការ​រំលោភបំពាន​ធ្ងន់ធ្ងរ និង​ជា​ប្រព័ន្ធ​ទៅលើ​សិទ្ធិ​នយោបាយ និង​សិទ្ធិ​ពលរដ្ឋ​នៅ​កម្ពុជា ដែល​ផ្ទុយ​ពី​ក​តិ្ត​កាស​សញ្ញា​អន្តរជាតិ​ស្ដីពី​សិទ្ធិ​ពលរដ្ឋ និង​សិទ្ធិ​នយោបាយ ដែល​កម្ពុជា​បាន​ផ្ដល់​សច្ចាប័ន និង​យក​មក​ចែង​ក្នុង​រដ្ឋ​ធម្មនុញ្ញ។

អ្នកនាំពាក្យ​រដ្ឋាភិបាល លោក ផៃ ស៊ីផាន បដិសេធ​អត្ថាធិប្បាយ​ជុំវិញ​ការ​ទទូច​ចង់​ឃើញ​ពី​ក្រុម​អ្នក​ជំនាញ​ផ្នែក​សិទ្ធិ​នយោបាយ និង​អ្នកវិភាគ ព្រមទាំង​របាយការណ៍​វាយតម្លៃ​បឋម​របស់​សហភាព​អឺរ៉ុប​នេះ​។ លោក​ជំរុញ​ឱ្យ​ទៅ​សួរ​លោក កុយ គួង អ្នកនាំពាក្យ​ក្រសួង​ការបរទេស ដែល​ជា​ស្ថាប័ន​ដឹកនាំ​អន្តររដ្ឋាភិបាល​ទទួល​បន្ទុក​កិច្ចការ​ដោះស្រាយ​បញ្ហា​អ៊ីប៊ីអេ (EBA) ជាមួយ​គណៈកម្មការ​អឺរ៉ុប។

លោក កុយ គួង ប្រាប់​អាស៊ីសេរី​កាលពី​ថ្ងៃ​ទី​២៧ វិច្ឆិកា តាម​ប្រព័ន្ធ​បណ្ដាញ​សង្គម​តេឡេក្រាម​យ៉ាង​ខ្លី​ថា រដ្ឋាភិបាល​កំពុង​សិក្សា​លើ​របាយការណ៍​នេះ៖ «នៅ​ពេល​នេះ​ខាង​កម្ពុជា​មិនទាន់​មាន​មតិ​អី​ទៅ​ហ្នឹង​របាយការណ៍​នោះ​ទេ​។ គឺ​យើង​កំពុងតែ​ពិនិត្យមើល​សិក្សា​មើល​សិន»

លោក​ព្យាយាម​មិន​ឆ្លើយតប​ទៅ​នឹង​ខ្លឹមសារ​នៃ​របាយការណ៍​របស់​គណៈកម្មការ​អឺរ៉ុប ដោយ​លោក​រក្សា​ជំហរ​របស់​ក្រសួង​ការបរទេស​ថា ខ្លឹមសារ​នៃ​របាយការណ៍​ដែល​អាស៊ីសេរី​ផ្សាយ​នេះ គឺ​ខុស​ពី​របាយការណ៍​ផ្លូវ​ការដែល​កម្ពុជា​ទទួល​បាន​ផ្ទាល់​ពី​គណៈកម្មការ​សហភាព​អឺរ៉ុប។

ដោយឡែក អ្នកនាំពាក្យ​ក្រសួងយុត្តិធម៌ និង​ជា​អនុប្រធាន​គណៈកម្មាធិការ​សិទ្ធិមនុស្ស​កម្ពុជា លោក ជិន ម៉ាលីន ទទួល​ស្គាល់​ថា របាយការណ៍​វាយតម្លៃ​បឋម​របស់​គណៈកម្មការ​អឺរ៉ុប ពិតជា​បាន​សម្តែង​ការ​ព្រួយ​បារម្ភ​អំពី​បញ្ហា​សិទ្ធិ​នយោបាយ​នៅ​កម្ពុជា​មែន៖ «យើង​ពិនិត្យ​ទៅលើ​របាយការណ៍​សម្ងាត់​ដែល​សហភាព​អឺរ៉ុប ផ្ញើ​មក​ឱ្យ​រដ្ឋាភិបាល​ហ្នឹង គឺ​មិន​មាន​ខ្លឹមសារ​ដូច​របាយការណ៍​របស់​អាស៊ីសេរី​នោះ​ទេ​។ អ្វី​ដែល​គេ​បង្ហាញ​គឺជា​លទ្ធផល​ដែល​គេ​រក​ឃើញ​នៅ​ក្នុង​បេសកកម្ម​ស្វែងរក​ការពិត​លើក​ទី​ពីរ​។ ក្នុង​នោះ​គេ​បាន​កត់សម្គាល់​ឃើញ​មាន​ការ​រីកចម្រើន​ជា​វិជ្ជមាន​ជាច្រើន​នៃ​ការអនុវត្ត​សិទ្ធិ​លើ​គ្រប់​វិស័យ​។ ក៏ប៉ុន្តែ ក៏​បង្ហាញ​នូវ​ក្តី​កង្វល់​ទៅលើ​ទិដ្ឋភាព​នយោបាយ​មួយ​ចំនួន ហើយ​ដែល​រដ្ឋាភិបាល កំពុង​តែ​ធ្វើការ​ពន្យល់ និង​ឆ្លើយតប​ទៅវិញ ហើយ​នឹង​សហការ​យ៉ាង​ជិតដិត​ជាមួយ​សហគមន៍​អឺរ៉ុប​ក្នុង​ការ​ធ្វើការ​ពន្យល់ ធ្វើការ​ជជែក និង​ធ្វើការ​ទំនាក់ទំនង​គ្នា​តទៅ​មុខ​ទៀត»

មន្ត្រី​រដ្ឋាភិបាល​ទាំងនេះ សុទ្ធតែ​ហៅ​របាយការណ៍​របស់​គណៈកម្មការ​អឺរ៉ុប​នេះ​ថា ជា​របាយការណ៍​សម្ងាត់ ហើយ​ពុំបាន​បង្ហាញ​ឆន្ទៈ​ណាមួយ​ក្នុង​ការ​ចែករំលែក​របា​យ​ការណ៍​នេះ​ជា​សាធារណៈ​នោះ​ទេ។

ផ្ទុយ​ពី​ការ​អះអាង​របស់​លោក ជិន ម៉ាលីន នេះ របាយការណ៍​វាយតម្លៃ​បឋម​របស់​គណៈកម្មការ​អឺរ៉ុប​មុននឹង​ឈាន​ទៅ​សម្រេច​ព្យួរ​ប្រព័ន្ធ​អនុគ្រោះ​ពន្ធ EBA ដែល​អាស៊ីសេរី​ទទួល​បាន​មុនគេ ពី​ប្រភព​ផ្លូវការ​របស់​គណៈកម្មការ​អឺរ៉ុប​នេះ គឺ​មាន​ភាព​ស៊ី​សង្វាក់​គ្នា ដូច​សារព័ត៌មាន​ដទៃ​ទៀត ទើប​ទទួល​បាន​ចុងក្រោយ​នេះ រួមមាន​វិទ្យុ​សំឡេង​ប្រជាធិបតេយ្យ VOD និង​វិទ្យុ​សំឡេង​សហរដ្ឋអាមេរិក VOA ជាដើម។

គណៈកម្មការ​អឺរ៉ុប រក​ឃើញ​ថា ចំណាត់​ការ​ដោយ​រដ្ឋាភិបាល​កម្ពុជា ចាប់​តាំង​ពី​ឆ្នាំ​២០១៧​មក ជាពិសេស​ការ​ធ្វើ​វិសោធនកម្ម​ទៅលើ​ច្បាប់​ស្ដីពី​គណបក្ស​នយោបាយ ការ​រម្លាយ​គណបក្ស​សង្គ្រោះជាតិ និង​ការបែងចែក​អាសនៈ​គណបក្ស​នេះ​នៅ​ក្នុង​សភាជាតិ និង​ក្រុមប្រឹក្សា​ខេត្ត​ក្រុង​ស្រុក​ខណ្ឌ​ឃុំ​និង​សង្កាត់ បង្កើត​ផល​ប៉ះពាល់​អវិជ្ជមាន​ធ្ងន់ធ្ងរ​ដល់​លទ្ធិប្រជាធិបតេយ្យ ការចូលរួម​ក្នុង​សកម្មភាព​នយោបាយ និង​ប្រព័ន្ធ​សេរី​ពហុបក្ស​នៅ​កម្ពុជា។ របាយការណ៍​ដដែល​កត់សម្គាល់​ថា គិត​ត្រឹម​ថ្ងៃ​ដាក់​របាយការណ៍​ដល់​រដ្ឋាភិបាល​កម្ពុជា កាលពី​ថ្ងៃ​ទី​១២ វិច្ឆិកា កម្ពុជា ពុំបាន​ចាត់​វិធានការណ៍​ចាំបាច់ ដើម្បី​ដោះស្រាយ​រាល់​អំពើ​រំលោភបំពាន​ធ្ងន់ធ្ងរ និង​ជា​ប្រព័ន្ធ​ទៅលើ​សិទ្ធិ​នយោបាយ​នោះ​ទេ​។ គណៈកម្មការ​អឺរ៉ុប ចាត់ទុកថា ចំណាត់​នានា​ដែល​រដ្ឋាភិបាល​កម្ពុជា​បាន​ធ្វើ​នៅ​មុន និង​ក្រោយ​ការបោះឆ្នោត បាន​បង្ក​ជា​ឧបសគ្គ​រារាំង មិន​ឱ្យ​ពលរដ្ឋ​កម្ពុជា អាច​អនុវត្ត​បាន​ពេញលេញ​នូវ​សិទ្ធិ​នយោបាយ ក្នុង​នោះ​រួមមាន​សិទ្ធិ​ក្នុង​ការ​ចូលរួម​ក្នុង​កិច្ចការ​សាធារណៈ សិទ្ធិ​បោះឆ្នោត និង​ឈរ​ជា​អ្នកតំណាង​ឱ្យ​ពលរដ្ឋ​បោះឆ្នោត​ឱ្យ​នៅ​ក្នុង​ការបោះឆ្នោត​ពិតប្រាកដ ព្រមទាំង​សិទ្ធិ​ទទួល​បាន​សេវា​សាធារណៈ​ដោយ​គ្មាន​ការរើសអើង​។ គណៈកម្មការ​អឺរ៉ុប ចាត់​ទុក​ថា លក្ខណៈ ពេល​វេលា វិសាលភាព និង​ផល​ប៉ះពាល់​នៃ​ការ​រំលោភបំពាន​ដែល​ខ្លួន​បាន​រក​ឃើញ​នេះ បង្កើត​បាន​ជា​ការរំលោភ​បំពាន​ធ្ងន់ធ្ងរ និង​ជា​ប្រព័ន្ធ​ដល់​គោលការណ៍​ស្នូល​នៃ​សិទ្ធិ​នយោបាយ ដូច​មាន​ចែង​ក្នុង​មាត្រា​២៥ នៃ​កតិកា​សញ្ញា​អន្តរជាតិ​ស្ដីពី​សិទ្ធិ​ពលរដ្ឋ និង​សិទ្ធិ​នយោបាយ​របស់​អង្គការ​សហប្រជាជាតិ។

ទាំង​លោក កន សាវាង្ស លោក សម គន្ធាមី និង​ទាំង​បណ្ឌិត មាស នី សុទ្ធតែ​យល់ឃើញ​ដូចៗ​គ្នា​ថា ដរាប​ណា​អ្នកនយោបាយ​ខ្មែរ​ពុំ​មាន​ឆន្ទៈ​ពិតប្រាកដ​ក្នុង​ការ​សម្រុះសម្រួល​នយោបាយ ដោយ​តម្កល់​ផល​ប្រយោជន៍​ជាតិ​ជាធំ​ជាង​ផលប្រយោជន៍​ផ្ទាល់ខ្លួន និង​បក្សពួក ហើយ​គ្មាន​លក្ខខណ្ឌ​ដោះស្រាយ​ជាក់លាក់​នោះ​ទេ នោះ​ដំណោះស្រាយ​នយោបាយ​ខាងមុខ គ្រាន់តែ​ជា​ដំណោះស្រាយ​មួយ​គ្រា មាន​រយៈពេល​ខ្លី​តែប៉ុណ្ណោះ​។ ពួកគេ​លើកឡើង​ថា ការ​សម្រុះសម្រួល​នយោបាយ​តាម​របៀប​នេះ នឹង​មិន​អាច​ជួយ​បញ្ចៀស​កម្ពុជា ពី​វិបត្តិ និង​ជម្លោះ​រ៉ាំរ៉ៃ​ផ្នែក​នយោបាយ​មិន​ចេះ​ចប់​មិន​ចេះ​ហើយ​នោះ​ទេ​។ មិនតែប៉ុណ្ណោះ អ្នកនយោបាយ​ខ្មែរ នឹង​គ្មាន​ទំនុក​ចិត្ត​ជាមួយគ្នា ហើយ​នៅតែ​យក​ល្បែង​នយោបាយ​ចាស់​មក​ជិះជាន់​គូរ​បដិបក្ខ​ជា​រៀង​រហូត ខណៈ​អ្នក​ដែល​រងគ្រោះ និង​បន្ត​រងគ្រោះ​គឺ​ពលរដ្ឋ​ខ្មែរ​ស្លូត​ត្រង់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល