មេដឹកនាំ​គណបក្ស​នយោបាយ​មួយចំនួន​ផ្ញើសារ​នយោបាយ​ផ្សេងៗគ្នា​នៅថ្ងៃបុណ្យ​មាឃបូជា

0:00 / 0:00

ថ្ងៃ​បុណ្យ​មាឃបូជា លោកនាយករដ្ឋមន្រ្តី ហ៊ុន សែន លើក​ឡើងថា​ ព្រះពុទ្ធសាសនា​បាន​រួម​ចំណែក​ឱ្យមាន​សុខ​សន្តិភាព ស្ថិរភាព​សង្គម។ ប៉ុន្តែមេដឹកនាំ​បក្សប្រឆាំង​អំពាវនាវឱ្យ​មេដឹកនាំ​ដែល​តាំង​ខ្លួន​ចង់បាន​សន្តិភាព​នោះ​ត្រូវយល់​ពី​អត្តន័យ​ពិត ដោយស្តែង​តាមរយៈ​កាយ​និង​វាចា។

ថ្ងៃ១៥កើត​ពេញបូណ៌មី ខែមាឃ ជាថ្ងៃដែលពុទ្ធសាសនិក​តែងតែនាំគ្នា​ប្រារព្ធពិធី​ដ៏ធំមួយ​គឺបុណ្យ «មាឃបូជា» ដើម្បីរំឭក​ដល់​ព្រឹត្តិការណ៍​សំខាន់មួយ​ចំនួន​ដែល​បាន​កើត​ឡើង​នៅ​សម័យ​ពុទ្ធកាល។ ពិធីបុណ្យ​មាឃបូជា​ឆ្នាំ​នេះមេដឹកនាំ​នយោបាយ​បក្សកាន់​អំណាចនិង​បក្សប្រឆាំង​បាន​ផ្ញើសារ​នយោបាយ​ហាក់ផ្លែផ្កាដាក់គ្នា ទាក់ទង​នឹងអត្តន័យ​ពាក្យសន្តិភាព​ក្នុងសង្គម ខណៈវិបត្តិ នយោបាយ​មិនទាន់​មានដោះស្រាយ​នៅឡើយ។

នាយករដ្ឋមន្រ្តី​លោក ហ៊ុន សែន សរសេរសារ​នយោបាយ​បង្ហោះលើហ្វេកប៊ុក​អមដោយ​ព្រះពុទ្ធរូប​ក្នុង​ពិធីបុណ្យ​មាឃបូជា នៅថ្ងៃ៥ ខែកម្ភៈថា ព្រះពុទ្ធសាសនា​មិនត្រឹម​តែ​បាន​ធ្វើឱ្យ​ប្រជាពលរដ្ឋខ្មែរ​រួមរស់​ជាមួយគ្នា​ដោយ​សុខសាន្ត​ខាងផ្លូវ​ស្មារតី​នោះទេ ប៉ុន្តែថែមទាំង​បានរួមចំណែក​យ៉ាង​សំខាន់​ក្នុង​ការ​ពង្រឹង​សណ្តាប់ធ្នាប់ សុខសន្តិភាព ស្ថិរភាព​សង្គមការ​អភិវឌ្ឍលើ​គ្រប់វិស័យនិង​ថែរក្សាការពារ​អត្តសញ្ញាណជាតិ។

ទោះបី​លោក ហ៊ុន សែន លើកឡើង​បែបនេះ​ក្តីប្រធាន​គណបក្ស​សង្គ្រោះជាតិ​លោក កឹម សុខា ដែល​រងការ​ចោទប្រកាន់​ពីបទសន្ទិដ្ឋភាពឬ​ការ​ត្រូវរ៉ូវគ្នា​ជាមួយ​រដ្ឋបរទេស​ដើម្បី​ផ្ដួល​រំលំ​រដ្ឋាភិបាល​លោក ហ៊ុន សែន បាន​សរសេរ​សារ​បង្ហោះលើ​ហ្វេសប៊ុកថា ​អ្នក​ដែលតាំង​ខ្លួន​ថា​ជា​ពុទ្ធសាសនិក ជាពិសេស​ប្រជាពលរដ្ឋខ្មែរ ក៏ដូចជា ​មេដឹកនាំ​ប្រទេស​ត្រូវ​យល់​ដឹង និង​ពង្រឹង​ការ​ប្រតិបត្តិ​នូវ​ព្រះពុទ្ធ​ឱវាទ។ លោក កឹម សុខា បន្តថា ​ការទូន្មាន​របស់​ព្រះសម្មាសម្ពុទ្ធ​ឱ្យ​មនុស្ស​គ្រប់រូប​ដែល​តាំង​ខ្លួន​ប្រាថ្នាចង់​បាន​សន្តិភាព​ត្រូវយល់ដឹង​ពី​អត្ថន័យ​នៃ «សន្តិភាព» ពិត​នោះ គឺ​ជា​សន្តិភាព​ដែល​កើត​មាន​នៅក្នុង​ផ្លូវចិត្ត​របស់​បុគ្គល​រៀងៗ​ខ្លួន​ដែលស្តែង​ចេញ​តាម​រយៈ​សកម្មភាព​និង​ពាក្យ​សម្តី។

ជុំវិញ​រឿង​នេះ ព្រះតេជព្រះគុណ បូរ បេត ដែលកំពុង​ភៀសព្រះកាយ​នៅ​ប្រទេសស្វ៊ីស (Swiss) មាន​ថេរដីកា​ថាបុណ្យ​មាឃបូជាគឺជាទំនៀមទំលាប់​ប្រពៃណីខ្មែរ​បែបព្រះពុទ្ធសាសនា​ដើម្បី​អប់រំ​អ្នក​បួសឬអ្នកកាន់​ព្រះពុទ្ធសាសនា​ទាំងអស់​ឱ្យ​មាន​សន្តិភាព​ទាំងផ្លូវ​កាយ​និង​ផ្លូវចិត្តហើយ​អាច​រស់​នៅ​សុខសាន្ត​ក្នុង​សង្គមដោយ​លះបង់​នូវអំពើទុច្ចរិក ការ​បៀតបៀនការ​ឈ្នានីសនិង​គុំគួនសងសឹក​ជា​ដើម។ ទោះយ៉ាងណា​ព្រះអង្គថា ​មូលហេតុនាំឱ្យ​កម្ពុជា​ឈាន​ដល់ការ​បែកបាក់​ជាតិ​មក​ដល់​ពេល​នេះ ដោយសារ​អ្នកនយោបាយ ជាពិសេស​លោក ហ៊ុន សែន មិនបាន​ប្រតិបត្តិ​តាម​ធម៌​អប់រំ​របស់​ព្រះសម្មាសម្ពុទ្ធ​ឱ្យបានត្រឹមត្រូវ។ ផ្ទុយទៅវិញ​ព្រះអង្គថា​ លោក ហ៊ុន សែន បែរជាសាង​អំពើបាបពោលពាក្យ​សម្តី​អសុរោះជេរប្រមាថ​ ជាហូហែ​ ដែលផ្តល់​គម្រូ​អាក្រក់​ដល់​សង្គម​ទៅវិញ។ ព្រះអង្គ​ផ្តល់ឱវាទ​ដល់លោក ហ៊ុន សែន គួរទៅ​វត្តរៀនធម៌​អប់រំចិត្ត រក្សាសីល​ជាមួយ​ព្រះសង្ឃ ដើម្បី​ដាសតឿន​ផ្លូវចិត្ត លះបង់អំពើអាក្រក់​ចោល ហើយងាកមក​ធ្វើអំពើល្អ​តាមរយៈការដឹកនាំប្រទេស​បែបព្រះធម៌វិញ៖

«សេចក្តីសុខនិង​សន្តិភាពកើតឡើងបាន​ដោយការមិន​ចងកម្មចងពៀរមិន​ចងវិវាទ​ជាមួយ​គ្នាហ្នឹងចុះយើងអត់មាន​អ៊ីចឹងផង​ហ្នឹង​យើងម្នាក់ៗគឺលោក ហ៊ុន សែនអីគិតខំប្រឹង​ចងកម្មចងពៀរ​ជាមួយប្រជាជន ព្រះសង្ឃ គណបក្សប្រឆាំង អ្នកការពារ​សិទ្ធិមនុស្ស អ្នកការពារ​ព្រៃឈើ អង្គការ​សង្គមស៊ីវិលនៅពេល​បច្ចុប្បន្ននេះ​តើទៅរកធម៌​ឯណា ហ៊ុន សែន ហ្នឹង​គឺគ្មាន​ធម៌​ទេ»។

ចំណែក​ព្រះតេជព្រះគុណ ហេង គឹមឡាយ ដែល​កំពុងភៀស​ព្រះកាយ​នៅប្រទេសថៃ​មាន​ថេរដីកា​ថា​ ព្រះពុទ្ធសាសនា​បានចូលរួមចំណែក​កសាងសន្តិភាព និងអប់រំមនុស្សនៅក្នុងសង្គម​ឱ្យប្រព្រឹត្ត​អំពើល្អ។ ប៉ុន្តែព្រះអង្គថា ​ទង្វើរបស់លោក ហ៊ុន សែន កំពុង​អនុវត្តផ្ទុយ​ពីព្រះពុទ្ធឱវាទ ព្រោះលោក ហ៊ុន សែន តែងតែ​សាងអំពើបាប​ដូចជា ការធ្វើទុក្ខបុកម្នេញ គំរាមកំហែង​ព្រះសង្ឃ និង​ពលរដ្ឋខ្មែរ​ណា​ដែល​មាន​និន្នាការ​ផ្ទុយ​ពី​រដ្ឋាភិបាលរបស់​លោក។ ព្រះអង្គថា​សាររបស់លោក ហ៊ុន សែន ចំថ្ងៃបុណ្យ​មាឃបូជា​នេះគឺជាសារ​នយោបាយ​ទាញយកព្រះពុទ្ធសាសនា​ដើម្បីកេងចំណេញ​ប្រយោន៍​​នយោបាយ​តែប៉ុណ្ណោះ៖

«តាមមេរៀន​ព្រះពុទ្ធសាសនា(មេដឹកនាំ)ត្រូវមាន​ទសពិធរាជធម៌ ឬធម៌ទាំងមានមេត្តា ករុណាធ្វើ​អំពើ​ល្អ​ដាក់​ពលរដ្ឋចេះយោគយល់​ជាដើម(លោក ហ៊ុន សែន)។និយាយសន្តិភាពបង្រួប​បង្រួម​ជាតិ​ស្អីបើរាល់​ថ្ងៃគាត់​កំពុងដើរ​បំបែកបំបាក់​ជាតិ​គាត់ដើរ​អុជអាល​អ្នកនៅ​ក្រៅ​ប្រទេសគាត់​ដើរ​សម្លុត​អ្នក​ខាងក្នុង​ប្រទេស​បែកបាក់គ្នាបំបែកបំបាក់​បក្ស​ប្រឆាំងតើ​នយោបាយ​អ៊ីចឹងគាត់​និយាយ​ត្រូវ​តែ​ទង្វើគាត់​អនុវត្តខុស»។

ថ្ងៃប្រារព្ធពិធីបុណ្យ​មាឃបូជានេះ​ពុទ្ធសាសនិក​ភាគច្រើន​បាន​ធ្វើចង្ហាន់​ដើម្បីប្រគេន​ព្រះសង្ឃ​នៅតាម​វត្តអារាមនិងបង្ហាះរូបថត​ព្រោងព្រាត​នៅតាមបណ្តាសង្គម​ដោយបួងសួង​សុំសេចក្តីសុខ​ចម្រើន​ជា​ដើម។ ស្របគ្នានេះ ពុទ្ធបរិស័ទនៅ​តាមវត្ត​អារាម​មួយ​ចំនួន​ក៏បាន​ដង្ហែក្បួន​ដាក់​បង្ហាញ​គំនូរ​ដែល​និយាយ​ពីពុទ្ធប្រវត្តិដែរ។

ការ​ប្រារព្ធពិធីបុណ្យ​មាឃបូជាដែល​ពុទ្ធបរិស័ទ​បច្ចុប្បន្ន​ធ្វើ គឺ​ដើម្បី​រំឭក​ដល់​ព្រះមហាករុណាទិគុណ​ព្រះសម្មាសម្ពុទ្ធ ដែលទ្រង់​ប្រជុំ​ចតុរង្គសន្និបាតឬសម្ដែង​ឱវាទ​បាតិមោក្ខនិង​កាល​ដែល​ទ្រង់ដាក់​អាយុ​សង្ខារ​ក្តី​ណានោះ​គឺការគោរព​បូជា​មិនមែន​សំដៅយក​តែចង្ហាន់​ទៅ​ប្រគេន​ព្រះសង្ឃ​នៅ​វត្តនោះ​ទេការបូជា​ដ៏សំខាន់​ក្នុងថ្ងៃ​មាឃបូជាគឺ​ពុទ្ធបរិស័ទ​ទាំងអស់គប្បី​គោរព​តាម​ពុទ្ធឱវាទ​ដូចជា​នាំគ្នា​រក្សាសីល រួមមានសីល៥ សីល៨ ជាដើម។

អ្នកសិក្សា​ផ្នែកព្រះពុទ្ធសាសនា​ណែនាំថា​ ពុទ្ធសាសនិក​គួរនាំគ្នា​បដិបត្តិធម៌​វិបស្សនាកម្មដ្ឋាន និង​ចម្រើន​មេត្តាភាវនា​ផងដែរ ដើម្បីឧទ្ទិសកុសលផលបុណ្យ​ទាំងអម្បាលម៉ាននេះ ជូនដល់បុព្វការីជន មាតា​បិតា ជីដូនជីតា និងសព្វសត្វ​ទាំងអស់ ឲ្យបានដល់​នូវ​សេចក្តីសុខ ពិសេស​ឲ្យបាន​ដល់​មនុស្សទូទៅ​ក្នុងសង្គមជាតិខ្មែរ ដែលសព្វថ្ងៃ​កំពុងជួបបញ្ហាលំបាកផ្នែក​នយោបាយ មានអំពើ​ហិង្សា​ឲ្យ​បាន​ស្បើយពី​បញ្ហានេះនិងបានចុះ​សម្រុងគ្នា​ឡើងវិញ ដើម្បី​រួមគ្នាកសាងកម្ពុជា​ឲ្យមាន​សុខសន្តិភាព និង​ចម្រើនរុងរឿងតទៅមុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។