អ្នក​នយោបាយ​ផ្ញើ​សារ​ជូនពរ​ពលរដ្ឋ​ខ្មែរ​ក្នុង​ឆ្នាំ​ថ្មី​ឆ្នាំ​សកល​ឆ្នាំ​២០១៦

ដោយ យាង សុជាមេត្តា
2015-12-31
អ៊ីម៉ែល
មតិ
Share
បោះពុម្ព
លោក សម រង្ស៊ី ប្រធាន​គណបក្ស​សង្គ្រោះជាតិ (ឆ្វេង) លោក​នាយករដ្ឋមន្ត្រី ហ៊ុន សែន (ស្ដាំ) ថ្លែង​ទៅ​កាន់​អ្នកកាសែត​នៅ​វិមាន​រដ្ឋសភា កាល​ពី​ថ្ងៃ​ទី៩ ខែ​មេសា ឆ្នាំ​២០១៥។
លោក សម រង្ស៊ី ប្រធាន​គណបក្ស​សង្គ្រោះជាតិ (ឆ្វេង) លោក​នាយករដ្ឋមន្ត្រី ហ៊ុន សែន (ស្ដាំ) ថ្លែង​ទៅ​កាន់​អ្នកកាសែត​នៅ​វិមាន​រដ្ឋសភា កាល​ពី​ថ្ងៃ​ទី៩ ខែ​មេសា ឆ្នាំ​២០១៥។
RFA/Tin Zakariya

ប្រធាន​គណបក្ស​សង្គ្រោះ​ជាតិ លោក សម រង្ស៊ី នៅ​ថ្ងៃ​ទី​៣១ ខែ​ធ្នូ ដែល​ជា​ថ្ងៃ​ចុង​ក្រោយ​ដាច់​ឆ្នាំ​ចាស់​ឆ្នាំ​២០១៥ ឈាន​ចូល​ឆ្នាំ​ថ្មី​ឆ្នាំ​២០១៦ បាន​សរសេរ​ជូនពរ​ឲ្យ​ពលរដ្ឋ​ខ្មែរ​ដែល​កំពុង​រស់នៅ​ក្នុង​ប្រទេស​កម្ពុជា ឲ្យ​ទទួល​បាន​នូវ​ពន្លឺ​យុត្តិធម៌​ក្នុង​ឆ្នាំ​ថ្មី តាម​ការ​ចង់​បាន​របស់​ពលរដ្ឋ។ ចំណែក​អនុប្រធាន​គណបក្ស​សង្គ្រោះ​ជាតិ លោក កឹម សុខា ជូនពរ​ឲ្យ​ពលរដ្ឋ​ទទួល​បាន​សិទ្ធិ​សេរីភាព ខណៈ​លោក​នាយក​រដ្ឋមន្ត្រី ហ៊ុន សែន ណែនាំ​ឲ្យ​ពលរដ្ឋ​បើកបរ​គោរព​ច្បាប់​ចរាចរណ៍​ក្នុង​ឆ្នាំ​ថ្មី។

មុន​ថ្ងៃ​ឆ្នាំ​ថ្មី​ឆ្នាំ​សកល​ឆ្នាំ​២០១៦ ចូល​មក​ដល់ គេ​ឃើញ​មាន​សារ​ជូនពរ​ឆ្លើយឆ្លង​គ្នា​ជា​បន្តបន្ទាប់ ត្រូវ​បាន​ផ្ញើ​ចេញ​ពី​មួយ​ទៅ​មួយ ជាពិសេស​ពី​មន្ត្រី​ថ្នាក់​ក្រោម​ទៅ​កាន់​ចៅហ្វាយ​នាយ​របស់​ខ្លួន នៅ​តាម​ស្ថាប័ន​រដ្ឋ​នានា ឬ​ពី​តំណាង​នៃ​ស្ថាប័ន​កំពូល​មួយ​ទៅ​តំណាង​ស្ថាប័ន​កំពូល​មួយ​ផ្សេង​ទៀត ជាដើម។

នៅ​ក្នុង​សារ​ទាំងអស់​នោះ មន្ត្រី​ថ្នាក់​ក្រោម​ភាគ​ច្រើន​បាន​ជូនពរ​ចៅហ្វាយ​នាយ​របស់​ពួក​គេ ទទួល​បាន​នូវ​សេចក្តី​សុខ​ក្នុង​ឆ្នាំ​ខាង​មុខ និង​បាន​កោត​សរសើរ​ពី​ស្នាដៃ​ដឹក​នាំ​ការងារ​របស់​ចៅហ្វាយ​នាយ​ពួក​គេ និង​សមិទ្ធផល​នានា​ដែល​សម្រេច​បាន​ក្នុង​ឆ្នាំ​ចាស់​កន្លង​ទៅ។

ចំណែក​អ្នក​នយោបាយ​វិញ ក៏​បាន​ផ្ញើ​សារ​ទៅ​កាន់​ពលរដ្ឋ​ក្នុង​ខ្លឹមសារ​ខុសៗ​គ្នា​នៅ​ក្នុង​ឆ្នាំ​ថ្មី​នេះ។

ប្រធាន​គណបក្ស​ប្រឆាំង លោក សម រង្ស៊ី ដែល​ពេល​នេះ​កំពុង​រត់​គេច​ពី​ការ​តាម​ចាប់​ខ្លួន និង​កំពុង​ស្នាក់នៅ​ក្រៅ​ប្រទេស បាន​សរសេរ​នៅ​លើ​ទំព័រ​ហ្វេសប៊ុក (Facebook) របស់​លោក​នៅ​ថ្ងៃ​ទី​៣១ ធ្នូ ថា ក្នុង​ឆ្នាំ​ថ្មី​នេះ លោក​សូម​ជូនពរ​ឲ្យ​ពលរដ្ឋ​ខ្មែរ​ក្នុង និង​ក្រៅ​ប្រទេស មាន​សុខភាព​ល្អ និង​សុភមង្គល។

យ៉ាង​ណា​លោក​ថា លោក​នៅ​តែ​នឹក​ដល់​ពលរដ្ឋ​ខ្មែរ​ជាច្រើន​ដែល​កំពុង​រងគ្រោះ​ដោយ​អំពើ​អយុត្តិធម៌​គ្រប់​បែប​យ៉ាង ដោយសារ​ការ​រឹប​អូស​ដីធ្លី ផ្ទះ​សម្បែង និង​ការ​ធ្វើ​ទុក្ខបុកម្នេញ​នៅ​កម្ពុជា។ លោក សម រង្ស៊ី សង្ឃឹម​ថា ពលរដ្ឋ​រងគ្រោះ​ទាំងអស់​នេះ នឹង​ចាប់​ផ្តើម​ឃើញ​ពន្លឺ​សន្តិភាព​ក្នុង​ឆ្នាំ​ថ្មី។

ទាក់ទង​នឹង​រឿងរ៉ាវ​ប្រទេស​ជាតិ​វិញ លោក សម រង្ស៊ី ប្ដេជ្ញា​ថា នឹង​ខិតខំ​ធ្វើ​យ៉ាង​ណា​ឲ្យ​ខ្មែរ​មក​ពី​គ្រប់​គណបក្ស និង​គ្រប់​និន្នាការ​នយោបាយ ជានា ស្រុះស្រួល​គ្នា និង​ពួត​ដៃ​គ្នា​ជា​មហា​គ្រួសារ​តែ​មួយ ដើម្បី​ថែរក្សា ការពារ និង​អភិវឌ្ឍ​ជាតិ។

ចំណែក​អនុប្រធាន​គណបក្ស​សង្គ្រោះ​ជាតិ លោក កឹម សុខា វិញ ក្រៅ​តែ​ពី​ជូនពរ​ឲ្យ​ពលរដ្ឋ​ទទួល​បាន​នូវ​សេចក្តី​សុខ​សន្តិភាព សិទ្ធិ​សេរីភាព និង​សុភមង្គល​នោះ តាម​រយៈ​វីដេអូ​ឃ្លីប (video clip) ដែល​បង្ហោះ​នៅ​លើ​ទំព័រ​ហ្វេសប៊ុក​របស់​លោក អនុប្រធាន​បក្ស​ប្រឆាំង​រូប​នេះ ក៏​បាន​អំពាវនាវ​ឲ្យ​អ្នក​នយោបាយ​ខ្មែរ​ទាំងអស់ បញ្ឈប់​នូវ​ការ​គុំកួន សង​សឹក គំរាម​កំហែង និង​បំភិត​បំភ័យ​គ្នា​ទៅ​វិញ​ទៅ​មក ហើយ​ត្រូវ​ជួប​ជជែក​គ្នា​ដើម្បី​បញ្ចប់​នូវ​កម្ដៅ​នយោបាយ​ដែល​កំពុង​កើត​មាន ហើយ​ដែល​ធ្វើ​ឲ្យ​ពលរដ្ឋ​ភ័យ​ខ្លាច៖ «ឆ្នាំ​ថ្មី​ឆ្នាំ​២០១៦ នេះ គឺ​សុំ​ឲ្យ​នាំ​មក​នូវ​សុខ​សន្តិភាព ការ​បង្រួប​បង្រួម​ផ្សះផ្សា​ជាតិ ដើម្បី​ឈាន​ទៅ​រក​ការ​ទុក​ចិត្ត​គ្នា​រវាង​ខ្មែរ និង​ខ្មែរ ដើម្បី​ឲ្យ​ប្រជាពលរដ្ឋ​យើង​មាន​ក្តី​សង្ឃឹម​ពី​វាសនា​អនាគត​របស់​ពួក​គាត់ ជាពិសេស​ដើម្បី​ឲ្យ​យុវជន​ខ្មែរ​អាច​ទទួល​បាន​នូវ​អនាគត​ដ៏​រុងរឿង​ទៅ​ថ្ងៃ​មុខ»

ចំពោះ​លោក​នាយក​រដ្ឋមន្ត្រី ហ៊ុន សែន វិញ បន្ថែម​ទៅ​លើ​ការ​ណែនាំ​ឲ្យ​ពលរដ្ឋ​បើកបរ​គោរព​ច្បាប់​ចរាចរណ៍ និង​មាន​សុវត្ថិភាព​ក្នុង​ឆ្នាំ​ថ្មី និង​ទទួល​បាន​ពុទ្ធពរ​ទាំង ៤​ប្រការ​នោះ លោក ហ៊ុន សែន បាន​សរសេរ​នៅ​ទំព័រ​ហ្វេសប៊ុក​បង្ហាញ​ក្តី​រីករាយ​របស់​លោក ដែល​បាន​ទៅ​លេង​កម្សាន្ត​នៅ​មាត់​សមុទ្រ​ខេត្ត​ព្រះសីហនុ ជាមួយ​ក្រុម​គ្រួសារ។

ក្រៅ​ពី​នេះ លោក ហ៊ុន សែន ក៏​បាន​រម្លឹក​ពី​ជីវិត​គ្រួសារ​ដែល​បាន​រៀបការ​ជាមួយ​ភរិយា​លោក​ជិត ៤០​ឆ្នាំ​មក​ហើយ។ លោក ហ៊ុន សែន ក៏​បាន​បង្ហោះ​រូប​ដែល​លោក​ថត​ពីរ​នាក់​ជាមួយ​ភរិយា​របស់​លោក​នៅ​មាត់​សមុទ្រ ហើយ​បាន​សរសេរ​ថា «ស្នេហ៍​វ័យ​ចំណាស់ ចេះ​ថ្នាក់​ថ្នម​ខ្លួន»

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

អ្នក​អាន​អនាមិក

I like to add my wish for Cambodia in 2016, that more and more people are aware of the CPP trickery and not fall for their scams like in the past. So I wish and hope people will see the better future Cambodia, their children and grandchildren and vote for CNRP in 2017 and 2018 to change this corrupt government and get rid of them forever.

Happy new year.

Jan 01, 2016 01:45 PM

អ្នក​អាន​អនាមិក

ប្រជាពលរដ្ឋ សូមជូន ពរ ឆ្នាំថ្មី ឆ្នាំសកល ២០១៦ អោយមន្ត្រីរាជការខ្មែរ ប្រជាពលរដ្ឋខ្មែរ ទូទាំងប្រទេស អោយមានសុខភាពល្អ កុំអោយចាញ់បោក ល្បិចនយោបាយ វៀតណាម ធ្វើបាប វ៉ៃ បាញ់សម្លាប់ ខ្មែរខ្លួនអែង តទៅទៀត !

Jan 01, 2016 12:14 AM

អ្នក​អាន​អនាមិក

ស្រួលតែ ក្រុមគ្រួសារ កញ្ចាស់ ហ៊ុន សែន អែង នឹង ចំណែក ប្រជាពលរដ្ឋរាប់លាននាក់ ខ្វែងដៃ ខ្វែងជើង រកស៊ីចិញ្ចឹមជីវិត ទាំងវេទនា !

Dec 31, 2015 08:47 AM

អ្នក​អាន​អនាមិក

This what he(Hun Sen)wishes to see.He has made all Khmer busy with their stomachs than to involve with his leadership so he(Hun Sen) can easily do what he wants.

Jan 01, 2016 10:26 AM

គេហទំព័រ​ទាំងមូល