សកម្មជនបក្សប្រឆាំងកំពុងជាប់ឃុំបានស្នើទៅតុលាការកាត់ក្ដីឲ្យយុត្តិធម៌លើសំណុំរឿងពួកគេ និងស្នើមេដឹកនាំបក្សនយោបាយចូលតុចរចាបញ្ចប់វិបត្តិនយោបាយ។ ការលើកឡើងបែបនេះ ខណៈ សាលាដំបូងរាជធានីភ្នំពេញគ្រោងនឹងប្រកាសសាលាក្រមសំណុំរឿងបទចោទ «រួមគំនិតក្បត់ និងញុះញង់» ដែលមានកញ្ញា សេង ធារី និងសកម្មជនបក្សប្រឆាំង៤រូបផ្សេងទៀតនៅថ្ងៃទី១៤ ខែមិថុនា ខាងមុខនេះ។
សកម្មជនគណបក្សសង្គ្រោះជាតិ៤នាក់ដែលកំពុងជាប់ឃុំ ក្នុងសំណុំរឿង «រួមគំនិតក្បត់ និងញុះញង់» ប្រាប់តុលាការថា ពួកគាត់គ្មានបំណងក្បត់ជាតិ គ្មានចេតនាញុះញង់បង្កហិង្សា ប៉ុន្តែ ពួកគាត់ស្រលាញ់ជាតិ ស្រលាញ់ពលរដ្ឋ។
សកម្មជនបក្សប្រឆាំងលើកឡើងបែបនេះ ក្នុងសវនាការថ្ងៃទី៣ ខែឧសភា ដែលជាសវនាការធ្វើសេចក្ដីសន្និដ្ឋាន។ ក្នុងសវនាការនេះ តុលាការនៅតែគ្មានភស្តុតាងរឹងមាំដាក់បន្ទុកលើអ្នកទាំងនោះឡើយ។ តុលាការបានត្រឹមតែដកស្រងសំដីលោក សម រង្ស៊ី ដែលបានថ្លែងតាមសារព័ត៌មាន និងថ្លែងតាមហ្វេសប៊ុក រួមនឹងឯកសារចោទប្រកាន់មួយចំនួនដែលគ្មានប្រភពច្បាស់លាស់។
នៅពេលសវនាការ តុលាការបានបង្គាប់ឲ្យនាំខ្លួនសកម្មជនគណបក្សសង្គ្រោះជាតិដែលកំពុងជាប់នៅពន្ធនាគារគឺលោក កាក់ កុម្ភារ លោក ទំ ប៊ុនថន លោក ហេង ចាន់សុទ្ធី និងអតីតសកម្មជនគណបក្សសង្គ្រោះជាតិ និងជាសកម្មជនគណបក្សភ្លើងទៀន អ្នកស្រី យក់ នាង បន្តឆ្លើយបំភ្លឺ និងលើកសំណូមពរ។ សកម្មជនបក្សប្រឆាំងទាំងនោះក៏បានស្នើទៅតុលាការឱ្យកាត់ក្ដីដោយយុត្តិធម៌ និងស្នើមេដឹកនាំគណបក្សនយោបាយចូលតុចរចាបញ្ចប់វិបត្តិនយោបាយ ក៏ដូចជាបញ្ឈប់ការធ្វើទុក្ខបុកម្នេញលើសកម្មជននយោបាយបក្សប្រឆាំង។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត ដែលមានក្រុមការងារឃ្លាំមើលសវនាការនេះយល់ថា សំណើរបស់សកម្មជនបក្សប្រឆាំងដែលលើកឡើងក្នុងតុលាការ គឺជាការឆ្លុះបញ្ចាំងពីការពិតដែលសកម្មជននយោបាយទាំងនោះបានជួបប្រទះ។ មន្រ្តីសិទ្ធិមនុស្សរូបនេះ នៅតែសង្កេតឃើញថា តុលាការមិនមានភស្តុតាងរឹងមាំសម្រាប់ដាក់បន្ទុកលើសកម្មជន នយោបាយទាំងនោះទេ។ លោក អំ សំអាត សង្ឃឹមថា តុលាការនឹងសម្រេចក្ដីដោយយុត្តិធម៌លើសំណុំរឿងនេះ៖ « តុលាការលើកនឹងពិចារណាឈរលើមូលដ្ឋាន ភស្តុតាង គតិយុត្តិនិងផ្លូវច្បាប់ ដើម្បីជៀសផុតការរិះគន់ផ្សេងៗសម្រាប់តុលាការកុំឲ្យមានការចោទប្រកាន់ ហ្នឹង មានជំពាក់ពាក់ពិនជាមួយរឿងនយោបាយច្រើនជាងការអនុវត្តច្បាប់»។
ចំណែកអ្នកជំនាញច្បាប់អន្តរជាតិ និងវិទ្យាសាស្ត្រនយោបាយកញ្ញា សេង ធារី ដែលតែងស្លៀកពាក់ប្លែកៗចូលបំភ្លឺ ព្រោះចាត់ទុកសវនាការនេះជាឆាកល្ខោននយោបាយផងនោះ លើកនេះ កញ្ញាតុបតែងខ្លួនជាអ្នកនាងយុត្តិធម៌ ដោយស្លៀកសំលៀកបំពាក់ឈុតពណ៌ស យកក្រណាត់បិទភ្នែក ដៃកាន់ជញ្ជីង និងសៀតដាវនៅចង្កេះ។ កញ្ញាតុបតែងខ្លួនបែបនេះដើម្បីធ្វើដំណើរទៅកាន់សាលាដំបូងរាជធានីភ្នំពេញ ដើម្បីចូលរួមសវនាការ។
ទោះយ៉ាងណា សមត្ថកិច្ចយាមតុលាការបាន ទាមទារឲ្យកញ្ញាប្តូរសំលៀកបំពាក់ យកដាវ ជញ្ជីង ទុកនៅក្រៅតុលាការសិន ទើបអាចចូលតុលាការ តែកញ្ញាមិនព្រម និងសម្រេចមិនចូលរួមសវនាការនោះទេ។
កញ្ញា សេង ធារី បានថ្លែងនៅមុខតុលាការថា ការតុបតែងខ្លួននេះជាផ្នែកមួយនៃការតស៊ូមតិ។ កញ្ញា សេង ធារី ចង់ឃើញការប្រកាសសាលក្រមនៅខែមិថុនាខាងមុខ តុលាការទម្លាក់ចោលការចោទប្រកាន់កញ្ញានិងសកម្មជនបក្សប្រឆាំងផ្សេងទៀតនៅក្នុងសំណុំរឿងនេះ៖ «ភាពលីឡឺ ក្នុងប្រព័ន្ធតុលាការ ជាអាវុធសម្រាប់បៀតបៀនប្រជាជនស្លូតត្រង់ ទម្លាក់ការចោទប្រកាន់ដែលបានដាក់លើជនជាប់នៅក្នុងឃុំក្ដី អ្នកស្លូតត្រង់ផ្សេងក្ដី តាមនីតិវិធីដែលបានចោទថា យើងបានក្បត់ជាតិ និងញុះញង់ ហ្នឹងទម្លាក់ចោលទាំងស្រុកដោយឥតលក្ខខណ្ឌ »។
សវនាការនេះ ក៏មានការឃ្លាំមើលពីតំណាងសហភាពអឺរ៉ុបប្រចាំកម្ពុជា តំណាងស្ថានទូតសហរដ្ឋអាមេរិក បារាំង មន្រ្តីអង្គការសហប្រជាជាតិប្រចាំកម្ពុជា មន្រ្តីអង្គការសង្គមស៊ីវិលក្នុងស្រុក រួមទាំងអ្នកសារព័ត៌មានផងដែរ។
សវនាការនេះជាសវនាការចុងក្រោយនៃការបញ្ចប់ការសួរដេញដោល ដែលតុលាការធ្វើការសន្និដ្ឋាន រង់ចាំចេញសាលាក្រម។ វាសនាសកម្មជនបក្សប្រឆាំង អាចផុតពីការចោទប្រកាន់ ឬក៏បន្តជាប់ឃុំទៀត នឹងត្រូវដឹងនៅថ្ងៃទី១៤ ខែមិថុនា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។