ថ្វីត្បិតតែពលរដ្ឋខ្លះ មានបំណងគាំទ្រការបង្កើតបក្សថ្មីមែន តែពួកគេនៅរង់ចាំមើលគោលនយោបាយ និងសកម្មភាពរបស់គណបក្សថ្មីទាំងនោះសិន ទើបផ្ដល់សេចក្ដីទុកចិត្ត។
កសិករនៅខេត្តកំពង់ធំម្នាក់លោក អ៊ុយ សែន ភ្ញាក់ផ្អើលនៅពេលលឺថា មន្ត្រីគណបក្សសង្គ្រោះជាតិ២ក្រុមទៀត នាំគ្នាបើកបក្សថ្មីបន្ថែម។ តែយ៉ាងណាកសិកររូបនេះ មិនជំទាស់ទេឲ្យតែគណបក្សថ្មីទាំងនោះអាចជួយការពារផលប្រយោជន៍ឲ្យពលរដ្ឋបាន៖ «រង់ចាំមើល គោលនយោបាយរបស់គណបក្សនីមួយៗ បូករួមទាំងសកម្មភាពរបស់ថ្នាក់ដឹកនាំគណបក្សនីមួយៗសិន ព្រោះអ្វីបើសិនជាយើងមើលតែគោលការណ៍នយោបាយរបស់គណបក្សណាមួយ ហើយគិតថា ប្រសើរ តែបើសិនជាថ្នាក់ដឹកនាំនៅក្នុងគណបក្សហ្នុងមិនសូវសកម្ម ក៏វាដូចមានតែគោលការណ៍ដែរ។ បើសិនថា ករណីវាមានគោលការណ៍ហើយ មេដឹកនាំនៅក្នុងគណបក្សនយោបាយហ្នឹងសកម្ម អាចធ្វើឲ្យពលរដ្ឋជឿទុកចិត្តបាន ទាំងខ្ញុំ ទាំងគេ អាចជឿទុកចិត្ត»។
ពលរដ្ឋម្នាក់ទៀតរស់នៅខេត្តសៀមរាបលោក ព្រហ្ម សុព្រឹក្ស ក៏បង្ហាញការគាំទ្រដែរ។ លោកបន្តថា ប្រសិនបើថ្នាក់ដឹកនាំគណបក្សថ្មីទាំងនោះ ហ៊ានធ្វើសកម្មភាពខ្លាំងក្លា មានគោលការណ៍ច្បាស់លាស់ ហ៊ានដើរតួនាទីជាគណបក្សប្រឆាំងឲ្យពិតប្រាកដ ហ៊ានទាមទារផលប្រយោជន៍រួមឲ្យពលរដ្ឋដូចគណបក្សសង្គ្រោះជាតិជាដើម ទើបទទួលបានការគាំទ្រពីពលរដ្ឋ៖ «ឲ្យតែគណបក្សទាំង២ ទាំង៣ ទាំង៤ហ្នឹង ឲ្យតែគណបក្សហ្នឹងយកផលប្រយោជន៍ជាតិជាធំ។ បម្រើប្រជាពលរដ្ឋ បម្រើផលប្រយោជន៍ជាតិ។ កុំបង្កើតគណបក្សមក សូម្បីតែគណបក្សកាន់អំណាចក៏យើងមិនហ៊ានរិះគន់គេដែរ។ យើងមករិះគន់តែបក្សប្រឆាំងខ្លួនឯង។ អាហ្នឹងប្រជាពលរដ្ឋមិនអាចបោះឆ្នោតឲ្យទេ។ ប្រជាពលរដ្ឋនឹងសង្កេតមើល នឹងចាំមើល»។
ចំណែកជាងកាត់ដេរម្នាក់ រស់នៅខេត្តបាត់ដំបងកញ្ញា គឹម ល័ក្ខ ក៏យល់ស្របនឹងការលើកឡើងនេះដែរ។ ស្ត្រីវ័យ ៣៧ ឆ្នាំរូបនេះ សង្កេតឃើញថា ជិត ៥ ឆ្នាំមកនេះនៅកម្ពុជាមិនទាន់មានគណបក្សណាមួយអាចដើរតួនាទីជាបក្សប្រឆាំង ហ៊ានចេញមុខជំនួសពលរដ្ឋ ក្នុងការតវ៉ាជាមួយគណបក្សកាន់អំណាចបានឡើយ។ កញ្ញារំពឹងថា គណបក្សថ្មី ដែលទើបបង្កើតអាចកៀរគរពលរដ្ឋឲ្យចូលរួមធ្វើសកម្មភាពឲ្យខ្លាំងក្លាបាន៖ «បក្សណាក៏ដូចបក្សណាដែរ គឺមានគោលនយោបាយដូចគ្នា។ តែអ្វីដែលសំខាន់នោះ គឺគណបក្សនីមួយៗ គាត់ជ្រើសយកសារនយោបាយដើម្បីឲ្យត្រូវចិត្តនឹងប្រជាពលរដ្ឋដែលចង់បាន ថាតើនៅក្នុងសង្គមយើងហ្នឹងវាលំបាកត្រង់ចំណុចណា ដែលយើងយកជាគោលធំមកដែលត្រូវគិតដល់ប្រជាពលរដ្ឋ គឺខ្ញុំដើរតាម។ ខ្ញុំជាប្រជាពលរដ្ឋមួយដែរ ខ្ញុំចង់បាន ចង់ឃើញការដឹកនាំ ហើយនិងគោលនយោបាយរបស់បក្សមួយៗអ៊ីចឹងណា»។
ទោះជាយ៉ាងណា ការបើកបក្សថ្មីនេះនៅមិនទាន់មានភាពទូលំទូលាយ និងបញ្ជ្រាបដល់ពលរដ្ឋនៅតាមជនបទ ឬតំបន់ដាច់ស្រយាលនៅឡើយទេ។ យុវតីម្នាក់រស់នៅស្រុកអង្គរបុរី ខេត្តតាកែវ កញ្ញា ហៀន សុខលី មិនទាន់ដឹងថា មន្ត្រីជាន់ខ្ពស់នៃគណបក្សសង្គ្រោះជាតិនាំគ្នាបើកបក្សថ្មីទៀតនៅឡើយទេ។ បន្ថែមពីនេះអ្នករស់នៅជាយដែនរូបនេះ ក៏មិនចាប់អារម្មណ៍ដែរ ហើយមិនរំពឹងថា គណបក្សថ្មីទាំងអស់នេះ អាចមានប្រជាប្រិយភាព ឬប្រកួតប្រជែងឈ្នះបក្សកាន់អំណាចបានដែរ៖ «និយាយឲ្យចំទៅ គេបង្កើតអត់សូវចាប់អារម្មណ៍រឿងហ្នឹងទេ។ រឿងនយោបាយអត់សូវចាប់អារម្មណ៍ផង»។
ចំពោះសកម្មជនបក្សប្រឆាំងនៅតាមមូលដ្ឋានវិញ ក៏មិនសូវបង្ហាញការពុះកញ្ជ្រោលនឹងការបើកបក្សថ្មីនេះប៉ុន្មានដែរ។ អតីតអ្នកជាប់ឃុំផ្នែកនយោបាយ និងជាសកម្មជនគណបក្សសង្គ្រោះជាតិនៅក្រុងព្រះសីហនុលោក ម៉ៃ ហុងស្រៀង យល់ថា ការបង្កើតបក្សថ្មីៗ ជាជម្រើសល្អក្នុងសង្គមលទ្ធិប្រជាធិបតេយ្យ។ ប៉ុន្តែលោកមិនទាន់សម្រេចចិត្តគាំទ្រ ឬចូលរួមជាមួយគណបក្សណាមួយទេ ព្រោះមិនទាន់ឃើញគោលនយោបាយ និងសកម្មភាពរបស់បក្សថ្មីនោះជាក់ស្ដែង៖ «ខ្ញុំមិនមែនបដិសេធ ឬក៏ស្អប់ខ្ពើមអ្វីទេ។ តែប្រសិនបើបក្សទាំង២ បក្សមួយណាក៏បាន ដែលបង្កើតមកដើម្បីបម្រើដល់ប្រជាពលរដ្ឋ ខ្ញុំពិតជាគាំទ្រហើយ។ ប៉ុន្តែការចូលរួមគឺជារឿងផ្សេង។ តែបើគាត់បង្កើតមកហើយបម្រើផលប្រយោជន៍ឲ្យជាតិ ឲ្យពលរដ្ឋដែលកំពុងតែស្រេកឃ្លានប្រជាធិបតេយ្យ ស្រេកឃ្លានសិទ្ធិសេរីភាព ដែលគាត់បង្កើតមកហើយជួយឲ្យកម្ពុជាមានប្រជាធិបតេយ្យឡើងវិញ អាហ្នឹងគឺជារឿងប្រសើរហើយ»។
គណបក្សថ្មី ដែលបង្កើតឡើងដោយក្រុមអតីតមន្ត្រីបក្សប្រឆាំងនៅពេលនេះ គឺគណបក្សបេះដូងជាតិ របស់ក្រុមលោក សៀម ភ្លុក និងលោក ថាច់ សេដ្ឋា និង គណបក្សកម្ពុជានិយមរបស់លោក អ៊ូក អ៊ី និងលោក យ៉ែម បុញ្ញឫទ្ធិ ជាដើម។
គិតមកដល់ពេលនេះ មានគណបក្សថ្មីចំនួន ៦ ហើយ ដែលបង្កើតដោយក្រុមអតីតមន្ត្រីជាន់ខ្ពស់នៃគណបក្សសង្គ្រោះជាតិ គឺគណបក្សឆន្ទៈខ្មែរ គណបក្សខ្មែរអភិរក្សនិយម គណបក្សខ្មែរស្រលាញ់ជាតិ គណបក្សកែទម្រង់កម្ពុជា គណបក្សបេះដូងជាតិ និងគណបក្សកម្ពុជានិយម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។